«Ӕнӕ Хуыцауӕй амондджынӕй цӕрӕн ис? Милуантӕ ӕнӕ Хуыцауӕй цӕрынц, ӕмӕ сты амондджын». Ахӕм фыст ӕрӕджы фенӕн уыд, фӕндаджы был цы стыр рекламӕтӕ вӕййы, уыдонӕй иуыл. Фидгӕ йын бакодтой атеисттӕ. Уыдонмӕ афтӕ кӕсы, ӕмӕ адӕймагӕн йӕ бон у ӕнӕ Хуыцауӕй амондджынӕй цӕрын.

Фӕлӕ йӕхи Хуыцауыл ӕууӕндӕг чи хоны, уыдонӕн дӕр сӕ митӕм гӕсгӕ афтӕ уайы, цыма Хуыцау уӕвгӕ дӕр нӕй. Католикон аргъуаны архиепископ Сальваторе Физикелла католиктӕй загъта: «Ӕвӕццӕгӕн, махмӕ кӕсгӕйӕ абон иунӕг адӕймаг дӕр нӕ зӕгъид, чырыстӕттӕ кӕй стӕм, уымӕн ӕмӕ нӕ цард ӕнӕуырнӕг адӕмы цардӕй ницӕмӕй хицӕн кӕны».

Бирӕты Хуыцауыл хъуыды кӕнынмӕ ӕвдӕлгӕ дӕр нӕ кӕны. Уыдонӕн Хуыцау цы – ис, цы – нӕй, уымӕн ӕмӕ афтӕ хъуыды кӕнынц, ӕмӕ Хуыцау у тынг дард, стӕй йӕ базонӕн дӕр нӕй. Ахӕм адӕм ӕм фӕкувынц, исты зын уавӕры куы бахауынц кӕнӕ сӕ исты куы фӕхъӕуы, ӕрмӕстдӕр уӕд – раст сӕ цыма хӕсджын у, цӕмӕй сын сӕ алы фӕндон дӕр ӕххӕст кӕна, уыйау.

Иннӕтӕм та афтӕ кӕсы, ӕмӕ сын сӕ дины ахуырӕдтӕм гӕсгӕ цӕрын ницы пайда у. Зӕгъӕм, Германийы католиктӕн сӕ 76 проценты нымайынц, нӕлгоймаг ӕмӕ сылгоймаг сӕ къух ӕрфыссыны размӕ лӕг ӕмӕ усы цард куы кӕной, уӕд уым ӕвзӕрӕй кӕй ницы ис – кӕд сӕ аргъуаны ахуырӕдтӕм гӕсгӕ дӕр ӕмӕ Библимӕ гӕсгӕ дӕр уый раст нӕу, уӕддӕр (1 Коринфӕгтӕм 6:18; Дзуттӕгтӕм 13:4). Кӕй зӕгъын ӕй хъӕуы, ӕрмӕст католиктӕ не ’мбарынц, сӕ дин сӕ цардыл ӕппындӕр кӕй нӕ зыны. Бирӕ динтӕн сӕ разамонджытӕ хъаст кӕнынц, сӕ адӕм сӕхи «ӕцӕг атеисттау» кӕй дарынц, уымӕй.

Ацы хабӕрттӕ кӕсгӕйӕ адӕймагӕн йӕ бон у ахъуыды кӕнын: «Цымӕ ӕнӕ Хуыцауӕй ӕцӕгдӕр амондджынӕй цӕрӕн ис?» Ацы фарста адӕммӕ абон нӕ сӕвзӕрд. Фыццаг кӕд фӕзынд, ууыл ныхас цӕуы Библийы райдианы. Ӕмӕ йын цӕмӕй дзуапп базонӕм, уый тыххӕй уал ӕркӕсӕм, Библийы фыццаг чиныджы, Райдианы чиныджы, цы хабӕртты кой ис, уыдоны фӕдыл цы фарстатӕ сӕвзӕрд, уыдонмӕ.