“Yu no nidim God? Planti milion manmeri i pilim olsem ol i no nidim God.” Em tok bilong wanpela sainbot em wanpela lain i no bilip long God i bin baim ol man long sanapim. Ol i pilim olsem ol i no nidim God.

Tasol planti manmeri husat i tok ol i bilip long God, ol i wokim ol disisen i olsem God i no stap. Salvatore Fisichella, em wanpela asbisop bilong Misin Katolik i tok long ol memba bilong sios bilong em olsem: “Taim mi skelim ol pasin bilong mipela, mi ting ol man i no inap luksave olsem mipela i Kristen bikos ol pasin bilong mipela i wankain olsem bilong ol man i no bilip long God.”

Sampela i bisi tumas na ol i no tingim God. Ol i ting olsem em i stap longwe tumas na em i no inap mekim wanpela samting long laip bilong ol. Kain lain olsem i save tingim God tasol long taim ol i gat hevi o taim ol i nidim wanpela samting—i olsem God i wanpela wokboi i redi tasol long bihainim laik bilong ol.

Ol narapela i pilim olsem ol tok lotu i skulim ol long en i no helpim ol tumas, na ol i no bihainim ol dispela tok. Olsem, long Jemani, 76 pesen bilong ol Katolik i bilip olsem i orait long man na meri i sindaun wantaim paslain long ol i marit—dispela tingting i no stret wantaim tok lotu bilong ol i skulim ol long en, na tu, i no stret wantaim tok bilong Baibel. (1 Korin 6:18; Hibru 13:4) Tasol i no Misin Katolik wanpela, ol narapela lotu tu i luksave olsem maski planti man i tok ol i lotuman, ol i no save bihainim samting ol i bilip long en. Planti bikman bilong ol lotu i bel hevi olsem ol memba bilong ol, maski ol i go lotu, ol i mekim pasin olsem ol i no bilip long God.

Ol dispela eksampel i kirapim ol man long mekim dispela askim: Yu ting yumi nidim God? Dispela askim em i no nupela samting. Dispela askim i bin stap namba 1 taim long kirap bilong Baibel. Bilong kisim bekim bilong dispela askim, yumi ken skelim sampela bikpela askim i bin kamap long Buk Stat bilong Baibel.