«U millonesil máakoʼobeʼ uts yaniloʼob x-maʼ Diosil. ¿Kux túun teech?» Bey tu yaʼalil junpʼéel anuncio boʼotaʼab tumen junmúuchʼ máakoʼob maʼ tu creertikoʼob wa yaan Diosoʼ, máakoʼob ku tuklikoʼob maʼ kʼaʼabéet Dios tiʼobiʼ.

Yaʼab máakoʼob xaneʼ kex ku yaʼalikoʼob ku creertikoʼob Dioseʼ yéetel u kuxtaloʼobeʼ ku yeʼeskoʼob maʼ beyiʼ. Salvatore Fisichella, juntúul arzobispo catolicoeʼ, tu yaʼalaj yoʼolal u yéet religioniloʼob: «Míin mix máak jeʼel u creertik wa cristianoʼoneʼ, tumen k-kuxtal jeʼex le maʼ cristianoʼoboʼ».

Uláakʼoʼobeʼ minaʼan tiempo tiʼob utiaʼal Dios. Ku tuklikoʼobeʼ jach náach yanil yéetel mix baʼal uts jeʼel u taasiktiʼobeʼ. Chéen ku kʼaʼajal Dios tiʼob ken kʼaʼabéetchajak wa baʼax tiʼob. Ku yilkoʼob Dios bey juntúul j-kʼooseʼ.

Uláakʼoʼobeʼ ku tuklikoʼob maʼ jach kʼaʼabéet le baʼax ku kaʼansaʼal tu religionoʼoboʼ, tsʼoʼoleʼ kex wa kʼaʼabéeteʼ maʼatech u beetkoʼob. Jeʼex teʼ Alemaniaoʼ, u 76% le catolicoʼoboʼ ku creertikoʼob maʼ kʼaas ka múul kajlak juntúul xiib yéetel juntúul koʼolel kex maʼ tsʼokaʼan u beeloʼobiʼ; baʼaleʼ u religionoʼob yéetel le Bibliaoʼ ku yaʼalik maʼ utsiʼ (1 Corintoiloʼob 6:18; Hebreoʼob 13:4). U jaajileʼ maʼ chéen catolicoʼob beetik yaanal baʼal tiʼ le ku kaʼansaʼaltiʼoboʼ. U nuuktakil yaʼab religionoʼobeʼ chiʼichnakoʼob, tumen le máaxoʼob ku muchʼkubaʼob tu yéeteloʼoboʼ ku kuxtaloʼob «óoliʼ jeʼex le máakoʼob maʼ tu creertikoʼob wa yaan Diosoʼ».

Tuláakal lelaʼ ku beetik k-tuklik: «¿Jach wa tu jaajil kʼaʼabéettoʼon Dios?». Le kʼáatchiʼaʼ maʼ túumbeniʼ, desde tu yáax libroil le Biblia ku chíikpajloʼ. Utiaʼal k-kaxtik u núukileʼ koʼox ilik jujunpʼéel baʼaxoʼob aʼalaʼab tu libroil Génesis.