«Ñee galán nabániluʼ sin Dios la? Millón de binni na nabani galán sin laabe.» Caadxi binni ni qué runi cré Dios nga gudíxecaʼ para guicá ca diidxaʼ riʼ lu ti letreru. Rihuinni dxíchica gastiʼ Dios para laacabe ne cadi caquiiñecabe laabe.

Laaca nuu stale binni ni na runi cré Dios, peru pur ni rúnicaʼ rusihuínnicaʼ qué runi crecaʼ pa nuube. Salvatore Fisichella, ti arzobispo católicu guníʼ ximodo ca binni ni nuu ndaaniʼ religión stiʼ: «Binni guʼyaʼ laadu la? nagana guiníʼ xpinni Cristu laadu, purtiʼ nabánidu casi ca binni ni qué runi cré Dios».

Nuu binni nabé nuu xhiiñaʼ dede qué gapa tiempu para guiníʼ ique pa nuu Dios. Riníʼ íquecabe nabé zitu nuube de binni ne qué zanda diʼ gacanebe laacaʼ. Ne ruyúbicabe laabe ora si maʼ caquiiñecabe gacanebe laacaʼ; ruuyacabe laabe casi ti mozo ni nuu para si gacané laacabe.

Xcaadxi binni qué runi cré pa zacané cani rusiidiʼ ca religión ca laacaʼ o qué rúnicaʼ ni rusiidicabe laacaʼ. Biaʼ 76% de ca católicu de Alemania ruuyacaʼ gastiʼ naca cuezané ti hombre ti gunaa sin guichaganacaʼ, neca rusiidiʼ yuʼduʼ stícabe ne Biblia cadi jneza guni binni zacá (1 Corintios 6:18; Hebreos 13:4). Zanda guininu cadi ca católicu si nga ruuyacaʼ gadxé ni riziidiʼ ca xpínnicaʼ ne gadxé ni rúnicaʼ. Ca xaíque stiʼ xcaadxi religión laaca riuucaʼ triste ora gúʼyacaʼ nabani ca xpínnicaʼ «casi modo nabani cani qué runi cré Dios».

Nga runi, zanda guinabadiidxanu ndiʼ: ñee caquiiñepeʼ gacané Dios laanu la? Ne cadi deruʼ nga guinabadiidxaʼ binni zacá. Primé biaje gunabadiidxaʼ binni zacá nga dxi deruʼ cadale binni lu Guidxilayú. Para guicábinu guendarinabadiidxaʼ ca la? guidúʼyanu caadxi cosa risaca ni zeeda lu libru stiʼ Génesis.