Ị̀ chọrọ ka ahụ́ gbasie gị na ndị ezinụlọ gị ike, unu adịrịkwa ndụ ruo mgbe ebighị ebi? Ị̀ chọrọ ibi n’ụwa mgbe ihe mgbu, ịta ahụhụ, na ọnwụ na-agaghịzi adị? Ihe ndị a abụghị akụkọ ifo. N’oge na-adịghị anya, ụwa ga-aghọ paradaịs n’ihi na ọ bụ otú Jehova Chineke chọrọ ka ụwa dịrị mgbe o kere ya. Ị ga-ahụ ihe o bu n’obi ime ná Mkpughe 21:3-5.—Gụọ ya.

‘Chineke ga-ehichapụ anya mmiri niile n’anya ha.’ (Mkpughe 21:4) Olee ụdị anya mmiri ọ ga-ehichapụ? Ọ bụghị ụdị nke na-agba anyị mgbe obi na-atọ anyị ụtọ ma ọ bụ nke na-eme ka anya anyị na-arụ ọrụ nke ọma. Anya mmiri Chineke ga-ehichapụ bụ nke na-agba anyị ma anyị tawa ahụhụ ma ọ bụ ruwe uju. Ma, ihe Chineke ga-eme abụghị naanị ihichapụ anyị anya mmiri nkịtị, kama ọ ga-ewepụ ihe niile na-akpata ahụhụ na iru uju.

“Ọnwụ agaghị adị ọzọ.” (Mkpughe 21:4) Ọ bụ onye iro anyị, bụ́ ọnwụ, kacha akpatara ndị mmadụ anya mmiri. Ma, Jehova ga-eme ka ndị na-erubere ya isi kwụsị ịnwụ anwụ. Olee otú ọ ga-esi eme ya? Ọ ga-ewepụ ihe mere ndị mmadụ ji anwụ anwụ, ya bụ, mmehie anyị ketara n’aka Adam. (Ndị Rom 5:12) Jehova ga-eme ka ụmụ mmadụ zuo okè n’ihi na Jizọs achụọla àjà maka ha. * Chineke ga-emecha mee ka onye iro ikpeazụ anyị bụ́ ọnwụ “ghara ịdị irè.” (1 Ndị Kọrịnt 15:26) N’oge ahụ, ndị hụrụ Chineke n’anya ga-adị ndụ ruo mgbe ebighị ebi otú Chineke chọrọ ya. Ahụ́ ga-agbasikwa ha niile ike.

“Ihe mgbu agaghịkwa adị ọzọ.” (Mkpughe 21:4) Olee ụdị ihe mgbu na-agaghịzi adị? Ọ bụ ihe mgbu niile mmehie na ezughị okè na-akpatara anyị. O nwere ike ịbụ ụfụ na-afụ anyị ma anyị merụọ ahụ́, obi ọjọọ na-eme anyị mgbe ụfọdụ ma ọ bụ ihe ndị ọzọ na-enye anyị nsogbu. Ihe mgbu ndị a emeela ka ọtụtụ nde mmadụ tagbuo onwe ha n’ahụhụ. Ma, ha niile ga-akwụsị.

N’oge na-adịghị anya, anya mmiri, ọnwụ, na ihe mgbu agaghịzi adị. Ma, i nwere ike ịjụ, sị: ‘Ebee ka ihe ndị a ga-eme?’ ‘Ọ̀ bụ n’eluigwe ka nkwa ndị a Chineke kwere ga-emezu?’ Mba. Ka anyị hụ ihe mere anyị ji kwuo otú ahụ. Nke mbụ bụ na tupu e dee nkwa ndị ahụ Chineke kwere n’amaokwu ahụ, e bu ụzọ dee na “ụlọikwuu nke Chineke dịnyeere mmadụ.” Ebee ka ụmụ mmadụ bi? Ọ bụ n’ụwa a. (Mkpughe 21:3) Nke abụọ bụ na nkwa ahụ Chineke kwere na “ọnwụ agaghị adị ọzọ” na-egosi na ọ bụ n’ụwa ka ọ ga-ewepụ ọnwụ n’ihi na ọ bụ n’ụwa ka ọnwụ dị kemgbe. Ndị bi n’eluigwe anaghị anwụ anwụ, ma ọnwụ na-echi ndị bi n’ụwa ọnụ n’ala kemgbe. N’ihi ya, nkwa ahụ Chineke kwere ga-emezu n’ụwa.

Jehova chọrọ ka obi sie anyị ike na ya ga-emezu nkwa o kwere anyị na ụwa ga-aghọ paradaịs. Mgbe Jehova kwuchara ihe ọma ndị ahụ ọ ga-emere anyị, o kwuru ihe gosiri na ya ga-emezurịrị nkwa ya. Ọ sịrị: “Lee! Ana m eme ihe niile ka ha dị ọhụrụ.” O kwukwara, sị: “Okwu ndị a kwesịrị ntụkwasị obi, bụrụkwa eziokwu.” (Mkpughe 21:5) Ọ́ gaghị adị mma ka ị mụta otú gị na ndị ị hụrụ n’anya ga-esi soro ná ndị obi ga-atọ ụtọ mgbe Chineke ga-emezu nkwa niile o kwere?