Diciembre phajjsinjja, oraqpachanwa Jesusarojj asu wawäkaspasa ukham dibujonakan uñjasi, ukat mä canastar uñtasitaruw Jesusaw sasin mä muñeco uchapjje. Ukampis ¿Jesusajj asu wawakïskaspas ukhamti uñjañasäspa?... * Janiw ukham uñjañasäkiti. Ukhamajj ¿kunjams uñjañasa? Belén marka jakʼankasipkäna uka awatirinakarojj kunas mä arumajj pasäna uk yatjjatañäni.

Akatjamatwa mä angelajj awatirinakar uñstäna. Ukat akham sänwa: “Jichhürojj jumanakataki mä Qhespiyiriw naci, Davidan markapana, ukasti Cristo Tatituwa” sasa. Ukjjarusti akham saskakïnwa: “Jumanakajj wawarojj wawa isinakamp kʼirtʼatwa mä uywa manqʼañawjan ikiskir jikjjatapjjäta” sasa. Ukatjja, walja angelanakampiw uñstanirakïna ukat ‘Diosaruw jachʼañchapjjäna’.

Angelanakaru Diosar jachʼañchaskiri istʼasma ukhajja, ¿kunjams jikjjatasisma?... Awatirinakajj wali kusisitaw jikjjatasipjjäna. Akham sapjjänwa: “Jichhajj sarañäniya Belenaru kunatï paskatayna, ukhamarak kuntï Tatitojj yatiykistu uk yatjjatiri” sasa. Ukanjja, “Mariampir Joseampiru jikjjatapjjäna, asu wawarusti uywa manqʼañawjana ikiskir jikjjatapjjarakïna”.

Ukatjja, yaqhanakaw ukar puripjjarakïna. Awatirinakajj kunatï paskäna uk yatiyapjjäna ukhajja, wal muspharapjjäna. ¿Ukanak yatisajj kusisitarakïtati?... Diosar munasktan ukanakajj kusisitarakïtanwa. Kunatsa Jesusan nasitapat kusisipjjäna uk jichhajj yatjjatañäni. Ukatakejja, Mariajj jan chachanïkäna uka tiempot yatjjatañäni.

Mä urojja, Gabriel sat angelaw Mariarojj mä wawanïyätawa sasin yatiyäna. Angelajj akham sänwa: “Jupasti jachʼäniwa, ukhamarak: ‘AIajjpach Diosan Wawapaw’ satarakïniwa. Ukatsti Dios Tatituw juparojj reyit uttʼayani [...] apnaqañapajj janipuniw tukuskaniti” sasa.

“Janïrajjay nayajj chachanïkstejja. ¿Kunjämatarak  akasti ukham lurasispasti?” sasaw Mariajj säna. Ukat angelajj akham sänwa: “Qollan Ajayuw jumjjaru jutani, ukatsti alajjpach Diosan chʼamapaw mä qenayjam jumarojj imjjattätam. Ukatwa naskan uka wawajj” ‘Diosan Wawapa satarakïni’ sasa. Diosajj mä milagro toqew alajjpachankir Wawaparojj mä arunjja, Jesusarojj Marian purakapar uchañapäna, ukhamat jupajj kunjamtï wawanakajj mamapan purakapan jilapki ukham jilañapataki.

¿Dibujonakansa ukat Navidadan Jesusaw nasi sasin amtapki ukanakan kimsa “magonak” Jesusar visittʼaskir uñjirïtati?... Ukajj niya taqe cheqanwa uñjasi, ukampis ukajj janiw ukhamäkänti. Uka “magonakasti” astrología toqet yatjjatatäpjjänwa, uka jaqenakajj kunatï Diosatak jan walïki ukanakwa lurapjje. Jesusar uñjapjjäna ukhajj kunsa lurapjjäna uk jichhajj yatjjatañäni. Bibliajj akham siwa: “Utar mantasinsti wawampiru, María taykapampiruw jikjjatapjjäna” sasa. Ukhamajja, Jesusajj janiw asu wawäjjänti, janirakiw uywa manqʼa imaña cheqankkänti. Jan ukasti, jilsutäjjänwa ukat Joseyampi Mariampiw mä utan jakasjjäna.

¿Kunjamsa astrólogo jaqenakajj Jesusar jikjjatapjjäna uk yattati?... Warawarar uñtat mä qhanaruw arkapjjäna, ukampis janiw Belén markar cheqak irpkänti, jan ukasti Jerusalenaruw Herodes reyin ukar irpäna. Ukat Biblianjja, Herodes reyejj jiwayañatakiw Jesusarojj thaqhaskäna sasaw qhanañchi. ¿Khitis uka warawara uñstaypachäna?... Janiw Diosajj uka warawar uñstaykänti, jan ukasti uñisiripaw uñstayäna, mä arunjja, Supaya.

Jesusajj mä asu wawakïskaspas ukhamwa Supayajj jaqenakar amuyayañ muni. Ukampis Gabriel sat angelajj akham sasaw Mariar säna: “Dios Tatituw juparojj reyit uttʼayani [...], apnaqañapajj janipuniw tukuskaniti” sasa. Jesusajj alajjpachan mä Reyëjjewa, ukat niyarakiw Diosan taqe uñisirinakapar tukjani. Ukhamajj mä Reyirjamaw Jesusarojj uñjañasa, ukat ukwa jaqenakar yatichañasaraki.