Ifyo Tufwile Ukwishiba Pali Yesu Kristu
FUNDENI ABANA BENU
Ifyo Tufwile Ukwishiba Pali Yesu Kristu
Mu December, abantu abengi balamona ifikope nelyo ifyo babasa nelyo ukubumba ifilanga Yesu ukuti kanya. Bamulanga ninshi ali mu cibokoshi basungilamo icani ica kuliisha ifitekwa. Lelo bushe tufwile ukulaibukisha fye Yesu ukuti kanya?— * Natulande pa cintu cimo icacindama ico tufwile ukwishiba pali Yesu. Natumone ifyo twingasambililako ku fyacitikiile abalecema impaanga ubushiku lwa mupepi na Betelehemu.
Ukwabula ukwenekela, malaika alishile kuli bakacema. Abebele ati: ‘Lelo nakufyalwa Umupusushi wenu, uyu e Kristu Shikulu.’ Na kabili atile mulesanga akanya “nabakapomba mu nsalu kabili nakalaala mu ca kuliilamo ifitekwa.” Awe apo pene kwalishile bamalaika abengi “balalumbanya Lesa.”
Bushe nga waumfwile shani ukumfwa uko bamalaika balelumbanya Lesa?— Bakacema balitemenwe sana kabili batile: “Natuleya ku Betelehemu no kumona ici cintu icicitike.” Ilyo bafikile, basangile “Maria na Yosefe, na kanya nakasendama mu ca kuliilamo ifitekwa.”
Tapakokwele, abantu na bambi baliile ku kumona Maria na Yosefe ku Betelehemu. Ilyo bakacema babashimikile ifyacitike, abantu bonse balipapile nga nshi. Bushe watemwa ukumfwa ifyacitike?— Bonse fwe batemwa Lesa tulomfwa bwino ukwishiba ifi fyacitike. Nomba leka tumone icalengele abengi ukutemwa ilyo Yesu afyelwe. Twalabalilapo ukulanda pa cacitike ilyo Maria ashilaupwa.
Bushiku bumo malaika Gabriele aile kuli Maria. Malaika aebele Maria ukuti aali no kukwata umwana kabili atile uyu mwana ‘akaba umukalamba kabili aketwa ati Umwana wa Wapulamo. Akaba imfumu no bufumu bwakwe tabwakabe ne mpela.’
Maria alefwaisha ukwishiba ifyo aali no kukwata umwana apo tabalile alaalapo no mwaume. E co malaika amwebele ati: “Amaka ya Wapulamo yakakufimba” e mulandu wine “uukafyalwa aketilwa uwa mushilo, Umwana wa kwa Lesa.” Ukukuusha ubumi bwa kwa Yesu ukufuma ku muulu ukwisa mwi fumo lya kwa Maria pa kuti abe umuntunse cali cisungusho nga nshi!
Bushe walimonapo ifikope nelyo ifyo babasa nelyo ukubumba ifilanga “aba mano” batatu e lyo na bakacema abaile mu kumona Yesu ilyo afyelwe?— Ifikope fya musango uyu filaseeka sana mu nshita ya Krisimasi. Ifyo ifi ifikope filanga te fya cine. Balya baume “aba mano” balebukila ku ntanda kabili balecita ifyo Lesa apata. Natumone ifyacitike ilyo bafikile ukwali Yesu. Baibolo itila: “Ilyo baingile mu ng’anda, bamwene umwana na Maria nyina.” Kanshi pali iyi nshita Yesu taali akanya ica kuti bamusange na bamulalika umwakuliila ifiteekwa, lelo basangile ninshi alikulako kabili bekala mu ng’anda mu mwabo.
Bushe aba baume abalebukila ku ntanda baishibe shani ukwali Yesu?— “Ulutanda” e lwabatungulwile. Pa kubala, talwabatungulwile ku Betelehemu, lwabatungulwile ku Mfumu Herode mu Yerusalemu. Baibolo itila, Herode alefwaya ukwishiba ukwali Yesu pa kuti amwipaye. Bushe ulemona ukuti ni nani watumine lulya lutanda ulwatungulwile abalebukila ku ntanda ukuya kuli Herode?— Te Lesa wa cine Yehova, lelo mulwani wakwe, Satana Kaseebanya.
Muno nshiku, Satana afwaya abantu baletontonkanya ukuti Yesu acili akanya. Lelo malaika Gabriele aebele Maria ati, Yesu “akaba imfumu . . . , no bufumu bwakwe tabwakabe ne mpela.” Pali ino nshita, Yesu ni Mfumu ku muulu kabili nomba line ali no konaula abalwani ba kwa Lesa. Kanshi ifi e fyo tulingile ukwishiba pali Yesu kabili e fyo tufwile no kulaebako bambi.
Belenga Muli Baibolo Yobe
Ukusokolola 19:19-21; 1 Yohane 2:17
[Futunoti]
^ para. 3 Nga ca kuti mulebelengela capamo na bana, apo mulesanga akashilwa ninshi mufwile mwalolelako pa kuti abana balandepo.
