Yesu Kidishitu—Tufwaninwe Kumuvuluka Muswelo’ka?
FUNDIJAI BENU BANA
Yesu Kidishitu Tufwaninwe Kumuvuluka Muswelo’ka?
Mu Kweji 12, bantu bavule pano pa ntanda bamonanga mafoto nansha bifwatulo bidi Yesu bu mwana wa lukeke. Ulēle mu kidīlo, kipombo kikatampe mobelelanga banyema biyombo bya kudya. Ino le tufwaninwe kuvuluka Yesu’nka bu mwana wa lukeke?— * Twisambilei bidi pa muswelo muyampe mpata wa kumuvuluka. Tukokeja kuboila ñeni pa byātene bakumbi bufuku mu budimi bwa mu Betelema.
Mwikeulu umo wamwekēle bakumbi mu kitulumukila. Webasapwila amba: “Dyalelo dino’di kubemubutwilwa Umpandiji, ke Kidishitu Mfumwetu kadi.” Kupwa mwikeulu webasapwila’mba bakatana Yesu “uvungilwe mu bisandi ulēle mu kidīlo.” Kupwa papo, bamwikeulu bakwabo bavule bamweka ne kushilula ‘kutendela Leza.’
Le wādi wa kwiivwana namani shi wāivwene bamwikeulu batendela Leza?—Bine, bakumbi bāsangele! Banena’mba, “twayai ku Betelema tukamone kino kintu kyalongeka’ki.” Batana kwine’kwa “Madia ne Yosefa, ne mwana wa lukeke ulēle mu kidīlo.”
Kepejije bakwabo bafika ku Betelema kwādi ba Madia ne Yosefa. Bakumbi pa kwibalombola byalongeka, abo bonso bātulumuka. Le ubasangala pa kuyuka bino bintu bya kutendelwa?—Batwe bonso basenswe Leza twi basangale. Shi ke pano, tutalei kine kinenenwa’mba lubutulo lwa Yesu luletanga nsangaji mivule. Pa kino, tufwaninwe bidi kujokela kunyuma mu kitatyi kyādi kekyasongelwe Madia.
Difuku dimo mwikeulu witwa bu Ngabudyele wāile kupempula Madia. Wamulaya’mba ukabutula mwana “ukekala mukatampe kadi uketwa bu Mwanā Mwine wa Mūlu Mwine.” Ngabudyele unena’mba, “ukabikala bu Mulopwe, ne Bulopwe bwandi kebukekalapo na mfulo.”
Madia wāsakile kuyuka mobyādi bya kwikadila, mwanda wādi kayukile mwana-mulume. Ebiya Ngabudyele wāmushintulwila amba: “Bukomo bwa Mwine wa Mūlu Mwine bukakupūta mwemba,” kadi “mwine ubutulwa uketwa bu ujila, Mwanā Leza.” Kuyata Mwanā Leza momwa mūlu ne kumutūla mu difu dya Madia mwanda wa kutamina’mo bu mwana wa lukeke—kyādi kingelengele kikatampe!
Lelo kodi mumone mafoto a “ba tunangu” basatu bāpempwile Yesu pamo ne bakumbi?—Ano mafoto avudile kulombolwa mu bitatyi bya Noele. Ino ke a binepo. Bano “ba tunangu” i bañanga ba malumba a ñenyenye, badi balonga bintu bipelejibwe na Leza. Tutalei bidi byālongekele pobafikile. Bible unena amba: “Abo pa kutwela mu njibo bamona’mo mwana mutyetye na inandi Madia.” Nanshi pano Yesu kākidipo monka mwana wa lukeke ulēle mu kidīlo; wādi mwana wādi wikele na Yosefa ne Madia mu njibo!
Le bañanga ba malumba a ñenyenye bātene Yesu muswelo’ka?— Bāludikilwe na “luñenyenye,” ke ku Betelemapo, ino dibajinji kwa Mulopwe Heloda mu Yelusalema. Bible unena’mba Heloda wādi usaka kusokola pādi Yesu mwanda wa kumwipaya. Shi ke pano, langulukila pa uno mwanda. Le ulanga i ani wāmwekeje luñenyenye lwāludikile bañanga ba malumba a ñenyenye?—Ke Yehova Leza wa binepo, ino i kinkwa nandi, nansha walwana, Satana Dyabola!
Dyalelo Satana utompanga kutonona bantu balange’mba, Yesu i mwana wa lukeke’tu wampikwa bukwashi. Ino mwikeulu Ngabudyele wāsapwidile Madia amba: “Ukabikala bu Mulopwe . . . ne Bulopwe bwandi kebukekalapo na mfulo.” Pano Yesu uludikanga bu Mulopwe momwa mūlu, kadi usa panopano ponka konakanya balwana na Leza bonso. Kino kyo kyotufwaninwe kuvuluka padi Yesu, kadi tusakilwa kusapwila’kyo bakwetu.
Tanga mu obe Bible
Kusokwelwa 19:19-21; 1 Yoano 2:17
[Kunshi kwa dyani]
^ Shi utanga na mwana, kashiko kakuvuluja pa kwimana, kadi kankamika mwana esambe aye mwine.
