Diciembri killaqa mëtsëchömi animalkunapa mikïnin churakuyänanchö Jesus tsëraq yurishqa këkaqta dibüjukunachö y maskunachö rikantsik. Peru ¿Jesus llullullaraq këkanqantaku pensashwan?. . . * Precisanmi juknömampa yarpänantsik. ¿Imanö? Yarpärishun Belen markachö mitsikoqkunata juk paqas ima pasanqanta.

Mitsikoqkunata illaqpita juk angel yuripurirmi, ‘salbayäshoqniquicuna Cristum canan yuricurishqa’ nirqan. Tsëpitanam kënö nirqan: ‘Llullutam tariyanqui animalcunapa micucuyänancho ayuwan pitushqa iscarëcaqta’. Jinan höram mëtsikaq angelkuna yuriramur Diosta alabar qallëkuyarqan.

¿Imanöraq sientikunkiman angelkuna Diosta alabaqta wiyarirnin?. . . Mitsikoqkunaqa kushishqam këkäyarqan. “Acu jinallacho Belen marcaman ewar, ricamushun” niyarqanmi. Tsëchömi “taririyarqan Joseta, Mariata y llullutanam animalcunapa micucuyänanllacho iscarëcaqta”.

Ichik tiempullata Belenman wakin nunakuna chäyaptinmi mitsikoqkuna pasakunqanta willariyarqan y pëkunaqa alläpa espantakurmi kushikuyarqan. ¿Gustashunkimantsuraq kënö shumaq willakïkunata Jesuspita yachakï?. . . Diosta kuyaqkunaqa pëkunanömi sientikuntsik. Peru ¿imanirtaq Jesus yurikunqanta musyarirnin pasëpa kushikuyarqan? Tsëta musyarinapaqqa Marïa soltëra kanqan witsankunapita parlarishun.

Juk junaqmi, Gabriel jutiyoq angel Marïata watukarqan llullu wamrayoq kanampaq kaqta willanampaq. Jina nirqanmi llullun precisaq këman chänampaq kaqta y “Diospa tsurin” nir qayashqa kanampaq kaqta. Nïkurnam rey kanampaq kaqta y mandakïnin mana ushakänampaq kaqta nirqan.

Mana ni pï ollquwan mana këkarnin imanö qeshyaq tikranampaq kaqtam Marïaqa musyëta  munarqan. Gabrielmi kënö nirqan: ‘Diospa poderninwanmi qeshyaq tucurinqui’ y “Santu wawequinam Diospa tsurin canqa”. Jehoväqa juk milagrutam ruranman karqan, porqui ciëluchö këkaq wamrampa kawënintam Marïapa mädrinman churanan karqan, tsënöpa llapan llullukunanö winanampaq.

¿Rikarqunkiku navidä witsankuna dibüjukunachö y nacimientuta rurayanqankunachö “kima reykuna” Jesusta watukëkaqta?. . . ¿Tsënötsuraq pasakurqan? Rasumpa kaqchöqa ‘kiman reykunaqa’ qoyllurkuna mëpa kuyukunqanta estudiar imapis pasakunampaq kaqta adivinaqkunam kayarqan, y tsë rurëkunaqa manam Diosta gustantsu. Jesus kaqman chäriyaptin ima pasakunqanta rikärishun. Bibliam kënö willamantsik: “Yecurirnam, llulluta [“wamrata”, NM] maman Mariatawan quecayaqta taririyarqan”. Jesusqa manam animalkunapa mikïnin churakuyänanchönatsu këkarqan ni tsëraq yurishqa llullutsu karqan, sinöqa juk wayichö Josëwan y Marïawan yachaq wamranam karqan.

¿Musyankiku qoyllur estudiaqkuna Jesusta imanö tariyanqanta?. . . Juk qoyllur niraqta qatirninmi. Peru Belenman manaraq aparninmi, tsë qoyllurqa rey Herödis këkanqan Jerusalenmanraq aparqan. Y Bibliaqa willakun rey Herödis wanutsinampaq Jesusta tarita munanqantam. Tsëqa, ¿piraq tsë qoyllurta Herödis kaqman pusharqan?. . . Manam Diostsu karqan, sinöqa chikeqnin Satanasmi.

Satanasqa munan Jesus llullu kanqanta nunakuna creiyänantam. Peru yarpë, angel Gabrielqa Marïata kënömi nirqan: ‘Jesusqa mandacoqmi canqa’ y “pepa mandaquinenqa manam ushacanqatsu”. Jesusqa ciëluchömi reynö këkan y ichikllachönam Diospa chikeqninkunata ushakäratsinqa. Tsëmi Jesusta reytanö yarpänantsik, y tsëtam nunakunata yachatsinantsik.