I le masina o Tesema, e masani ona vaaia ai ata o Iesu o se pepe, ma o loo taoto i se pusa e tuu ai meaʻai a manu. Ae pe e na o le pau lenā o le auala e tatau ona tatou manatuaina ai Iesu?​— * Seʻi o tatou talanoa i se isi auala e sili atu ona tāua e manatuaina ai o ia. E tatou te aʻoaʻoina se lesona mai i le mea na tupu i ni leoleo mamoe sa iai i le fanua e lata i Peteleema i se tasi pō.

Na faafuaseʻi ona faaali ane se agelu i leoleo mamoe ma faapea atu: ʻUa fanau mai i le asō le Faaola, o Keriso le Alii.’ Na faamatala atu foʻi e le agelu, e latou te maua Iesu “o faapulupulu i ʻie ma o loo taoto i le mea e tuu ai meaʻai a manu.” O le taimi lava lenā na faatasi ane ai isi agelu, ma amata ona “vivii atu i le Atua.”

O ā ni ou faalogona pe a e faalogoina agelu o loo vivii i le Atua?​— Na fiafia leoleo mamoe ma latou talatalanoa e faapea: “Tatou ō loa i Peteleema ma vāai i le mea ua tupu.” O i inā o le a latou maua ai “Maria ma Iosefa, faapea foʻi ma le pepe o loo taoto i le mea e tuu ai meaʻai a manu.”

Mulimuli ane, na asiasi atu foʻi isi tagata i Peteleema i le mea o loo iai Maria ma Iosefa. Ina ua taʻu atu e leoleo mamoe iā i latou le mea matagofie na tupu, na maofa i latou. Pe e te fiafia e iloa nei mea matagofie?​— O i tatou uma lava e alolofa i le Atua e fiafia e iloa nei mea. Seʻi vaai nei la i le māfuaaga e tatou te fiafia ai i le fanau mai o Iesu. O lea, seʻi o tatou talanoa i le taimi a o leʻi faaipoipo Maria.

I se tasi aso, na asiasi atu ai se agelu e igoa iā Kaperielu iā Maria. Na ia faapea atu o le a fanau e Maria se pepe ʻe sili, ma e taʻua o ia o le Alo o le Silisili Ese. O le a fai o ia ma tupu, o lona malo foʻi e leai sona gataaga.’

 Na fia iloa e Maria pe e faapefea ona tupu lenei mea, auā e la te leʻi momoe lava ma se tamāloa. O lea na faapea atu ai Kaperielu iā te ia: ʻE faamalumalu ifo iā te oe le mana o le Silisili Ese, ma o lē o le a fanau mai, e paia ma o le Alo o le Atua.’ O se matuā vavega lava le aumaia e Ieova o le soifua o lona Alo mai i le lagi, ma tuu i le manava o Maria ma avea o se pepe.

Pe e masani ona e vaaia ni ata o ni “tamāloloa popoto” se toʻatolu, o loo asiasi atu i le pepe o Iesu faatasi ai ma leoleo mamoe?​— O vaaiga masani lava na i taimi o Kerisimasi, ae e lē saʻo. O na tamāloloa o ni ē e saʻiliʻili i fetu, o ni faiga e inosia e le Atua. Seʻi vaai i le mea na tupu ina ua taunuu nei tamāloloa. Ua faapea mai le Tusi Paia: “Ua latou ō atu i le fale, ma ua vaaia ai le tamaitiiti ma Maria lona tinā.” O lea, e lē o toe pepe Iesu ma e lē o taoto foʻi i le mea e tuu ai meaʻai a manu. Ua matua o ia ma avea ma tamaitiiti, ma o loo nonofo ma Iosefa ma Maria i se fale.

Na faapefea ona maua e nei tamāloloa Iesu?​— Na muamua taʻitaʻia i latou e se “fetu” i le tupu o Herota i Ierusalema, ae e lē i Peteleema. Ua faapea mai le Tusi Paia na manaʻo Herota e saʻili Iesu ma fasioti o ia. Pe a fua la i lenā mea, faamata o ai na saunia le fetu lea na taʻitaʻia nei tamāloloa iā Herota?​— E lē o le Atua moni o Ieova, ae o lona fili o Satani le Tiapolo!

O loo taumafai pea Satani i aso nei e faasesēina tagata e mafaufau pea iā Iesu ua na o se pepe meamea. Peitaʻi, na faapea atu le agelu o Kaperielu iā Maria: ʻO le a fai o ia ma tupu, o lona malo foʻi e leai sona gataaga.’ O loo pule Iesu o se Tupu i le lagi, ma e lē o toe umi ona ia faaumatia lea o fili uma o le Atua. O le auala lenā e tatau ona tatou manatua ai Iesu, ma e tatau ona tatou taʻu atu lenā mea i isi.