NKAND’A NZAMBI uvovanga vo yakala “kazol’owandi nkento nze i yandi kibeni.” O nkento mpe kafwete ‘vumina nkaz’andi.’ Yau awole bafwete lungisa e mbebe au wau vo bakitukidi se “nitu mosi.” (Ef. 5:33; Etu. 2: 23, 24) Ekolo e mvu miviokanga, e ngwizani muna muntu yo nkw’andi iwokelanga, kumosi mpe ye nzol’au. Nze una e mianzi mia nti miole miabatakana miyikakiananga ekolo mikulanga, e nzola ya yakala yo nkento bena ye longo lwakiese iwokelanga yo yikakiana ekolo e mvu miviokanga.

Kansi, adieyi tuvova avo yakala yovo nkento ofwidi? E kangwa kiangolo kina kiakala kiasikila muna zingu ki’akazi, owau kivambanene. O yakala yovo nkento ona osidi o moyo okendalalanga yo mona kinsona. Ezak’e ntangwa ofunganga makasi yovo kuyitumba. Muna mvu 58 mia longo lwandi, Daniella wazayana ye wantu ayingi bafwilwa akazi au. * Kansi vava nkaz’andi kafwa, wavova vo: “Entete kiabakulanga diambu diadi ko. Kulendi dio bakula ko avo ke diabwididi ko.”

Afimpi a mambu bevovanga vo ke vena lukendalalu lusundidi olu lwa fwilwa yakala yovo nkento ko. Ndonga mun’awana bafwilwa akazi bekwikilanga muna mvovo miami. O nkaz’a Millie wafwa se vioka mvu miayingi. Wasasila kinsona kiandi mu mvovo emi: “Ikuyimwenanga nze mvanguki.” I wau kayikila kinsona kamonanga vava kafwilwa yakala diandi ona kazinga yandi mu mvu 25.

Susan wayindulanga vo akala yovo akento ana bekendalalanga mu mvu miayingi mu kuma kia lufwa lwa akazi au mambu besakisanga. Kansi, vava balungisa mvu 38 mia longo lwau, yakala diandi wafwa. Kana una vo mvu 20 miviokele kala, wavova vo “ikunyindulanga e lumbu yawonso.” Nkumbu miayingi odilanga mu kuma kia viangi ikumwenanga.

Nkand’a Nzambi usonganga vo e ntantu za fwilwa yakala yovo nkento zampasi kikilu, mvu miayingi zizingilanga. Vava Sara kafwa, ­Abarayama wa nkaz’andi ‘wadila Sara, yo kumbokomokena.’ (Etu. 23: 1, 2) Kana una vo wakwikilanga muna lufuluku, Abarayama wamona ntantu vava nkaz’andi anzolwa kafwa. (Ayib. 11: 17- 19) Vava Rakele wa nkaz’andi anzolwa kafwa, Yakobo kamvilakana ko. Wavovelanga nkumbu andi kwa wan’andi ye zola kwawonso.—Etu. 44:27; 48: 7.

Adieyi tulenda longoka muna nona yayi ya Nkand’a Nzambi? Nkumbu miayingi, akala ye akento ana bafwilwa akazi bemonanga ntantu mu mvu miayingi. Ke tufwete badikila dilu ye nkenda zau ko nze lutovoko. Kansi, bemonanga ntantu zazi mu kuma kia lufwa lwa akazi au. Balenda vwa o mfunu wa ngemba yo lusadisu lweto mu kolo kiandá.

Avo muntu ofwidilu yakala yovo nkento, e zingu kiandi ke kivutuka diaka ko nze una kiakala vava kakala mpumpa. Ekolo e mvu mia lukazalu mikulamanga, o yakala ozayanga una kalenda fiaulwisila nkaz’andi yo kunkasakesa vava kekalanga wakendalala. Avo fwidi, o zola ye lufiaulwisu kavananga kwa nkaz’andi lufwidi mpe. Diau adimosi mpe, o nkento ozayanga una kalenda sadisila nkaz’andi mu kala ye luvuvamu ye kiese. Ke vena lekwa ko kilenda tezaneswa ye mpila kansimbilanga, mvovo mia lufiaulwisu kasadilanga ye sungididi kasianga muna zolela ye nsatu zandi. O nkento avo fwidi, o yakala olenda mona kinsona muna zingu kiandi. Muna kuma kiaki, akaka mun’awana bafwilwa akazi betokananga yo mona wonga wa kusentu. Nkia nkanikinu a Nkand’a Nzambi ulenda kubasadisa mu kala yo luvuvamu?

“Ke nutelamenw’owu wa mbazi mene e mioyo ko: o mbazi mene okutelamenw’o moyo. E mbi ifwene muna lumbu yandi.” (Mat. 6: 34) E mvovo miami mia Yesu, nsatu za nitu miyikanga, kansi misadisanga mpe wantu ayingi mu zizidila ntantu za lufwa lwa akazi au. Vava nkaz’andi kafwa, ke vavioka ngonde zayingi ko Charles wasoneka vo: “Ikalanga ye viangi kiayingi kia Monique, e viangi kiaki kiwokelanga konso lumbu. Kansi, nzeye wo vo ke diambi ko, kuna kulanda e ntantu zazi zifokoka malembe-malembe.”

Kieleka, Charles wazizidila e ntantu zazi ekolo e “mvu miaviokanga.” Nki kiansadisa? Wavova vo: “Muna lusadisu lwa Yave yazinganga lumbu kimosi kimosi.” Charles kayambula ko vo lukendalalu lwansunda. E ntantu ke zafokoka mu lumbu kimosi ko, kansi kayambula mpe ko vo zanyoyesa. Avo yakala yovo nkento wafwilwa, zizidila e mpasi zazi muna zinganga lumbu kimosi kimosi. Kuzeye ko e nsambu yovo lukasakeso olenda tambula muna lumbu kilanda.

O lufwa ke lwakala ko mun’ekani diantete dia Yave. Kansi, dimosi muna “mavangu ma Nkadi ampemba.” (1 Yoa. 3:8; Roma 6: 23) Satana osadilanga lufwa yo wonga wa lufwa mu kitula wantu se abundu yo dimbula e vuvu kiau. (Ayib. 2: 14, 15) Satana oyangalalanga vava muntu kedimbulanga e vuvu kia kala ye kiese kiakieleka, kana nkutu muna nz’ampa ya Nzambi. E sumu dia Adami ye ukolami wa Satana i tuku dia mpasi kemonanga o yakala yovo nkento wafwilwa nkaz’andi. (Roma 5: 12) Yave osinga sukisa e mbi yawonso ketwasanga o Satana kumosi yo lufwa luna vo i nwaninwa kiandi kiangolo. Akaka mun’awana bevevolwa muna wonga kesadilanga Satana, i awana bafwilwa akazi au. Nanga ongeye mpe omonanga wonga wau.

Awana befuluka muna nz’ampa, nsobani zayingi zivangama muna zingu kiau. E ngwizani vana vena o wantu isoba. Kasikil’owu, mase, nkaka ye akulu akaka ana befuluka malembe-malembe bekituka wantu alunga kumosi yo wan’au ye atekulu au. O ununu ufokoka. E mpila ina aleke bebadikila nkaka zau yaswaswana kikilu ikala ye mpila bekubabadikilanga o unu. E nsobani zazi zisadisa mu tomesa zingu kia wantu.

Tulenda kala ye yuvu yayingi mu kuma ki’awana besinga fuluka. Kasikil’owu, adieyi divangama kw’awana bafwilwa akazi wole yovo vioka? Asaduki bayuvula kiuvu mu kuma kia nkento wafwilwa yakala diantete, i bosi ona wazole yakuna nsambwadi. (Luka 20:27-33) Aweyi ukala e ngwizani au vava befuluka? Ke tuzeye ko ye ke dina mfunu ko mu tokanena yuvu yayi. Diambu dimosi kaka tufwete vanga i bund’e vuvu muna Nzambi. Tulenda kala ye ziku vo konso dina kevanga o Yave kuna sentu, diambote dikala. Tuvingilanga ye kiese kiawonso e diambu diadi, vana fulu kia mwena dio wonga.

Dimosi muna malongi matoma kiá mena muna Nkand’a Nzambi i dia sia vo azolw’eto ana bafwa besinga fuluka. Lusansu lwa Nkand’a Nzambi mu kuma kia wantu bafuluka kuna nz’ankulu, lusonganga e ziku vo awonso bena muna nkala bewa nding’a Yesu yo fuluka. (Yoa. 5:28, 29) Muna ntangwa yayina, wantu bekala ye kiese kia monana ye azolw’au ana befuluka. Awana befulwa kiese kiayingi mpe bekala kiau.

Wau vo ulolo wa wantu ufuluka, o wantu ova ntoto bekala ye kiese kina nkutu ke basidi kala kiau ko. (Maku 5:39-42; Lus. 20:13) O badika esivi diadi dia kusentu dilenda fiaulwisa awonso bafwilwa azolw’au.

Nga vekala diaka ye kuma kia kendalala vava lufuluku lwalu luvangama? Nkand’a Nzambi uvovanga vo ve. Mun’owu wa Yesaya 25:8, Yave ‘osukisa lufwa yakwele mvu.’ Ediadi disongele vo ofokola lufwa ye mpasi lutwasanga. O ungunza wa Yesaya uvovanga mpe vo “Mfumu Yave okunguna mansanga muna ndose zawonso.” Konso lukendalalu okalanga lwau mu kuma kia nkaz’aku wafwa, lufokoka vava kefuluka.

Ke vena muntu ko olenda bakula mawonso kevanga o Nzambi muna nz’ampa. Yave ovovanga vo: “Una disundidi ezulu e nza, i una isundidi fu yame e fu yeno, ye ngindu zame e ngindu zeno.” (Yes. 55:9) O nsilu a Yesu mu kuma kia lufuluku ukutuvananga elau dia bund’e vuvu muna Yave nze una wavanga Abarayama. E diambu ­disundidi o mfunu kwa konso Nkristu i vanga mana kekutulombanga o Nzambi. Avo tuvangidi wo, tukala twafwana mu zingila muna nz’ampa kumosi y’awana befuluka.—Luka 20:35.

Vana fulu kia telamwa moyo, kala ye vuvu. Wantu ayingi ke bena ye vuvu kia kusentu ko. Kansi, Yave lekwa kiambote kekutusilanga o nsilu. Kana una vo ke tuzeye ko una Yave kevangila wo, tulenda kala ye ziku vo olungisa e nsatu ye zolela yeto yawonso. Paulu wa ntumwa wasoneka vo: “Vuvu kimonekene, ke vuvu ko: anki, nani osia kina kamwene e vuvu? Kansi ovo tusia kina tulembele mon’e vuvu, tuvingila kio kuna luzindalalu.” (Roma 8: 24, 25) E vuvu kiasikila muna nsilu mia Nzambi kikusadisa mu zizidila lufwa lwa nkaz’aku. Avo ozindalele, kuna sentu omona vava Yave ‘kekuvana zolela ya ntim’aku.’ Olungisa “kinzola-nzola kia mioyo miawonso.”—Nku. 37:4; 145:16; Luka 21:19.

Vava kiafinamanga lufwa lwa Yesu, e ntumwa zandi bakendalala yo mona wonga yo lembi zaya dina bevanga. Yesu wabafiaulwisa muna mvovo emi: “Ke nutelamwa mioyo ko: nukwikila muna Nzambi, omu mono mpe nukwikila.” Wabavovesa vo: “Kikunusisa nwansona ko: kwiza nkwiza koko nwina.” (Yoa. 14:1-4, 18, 27) E mvovo mia Yesu miavana kuma kiasikila kw’alandi andi akuswa mu kala ye vuvu yo luzindalalu mu mvu miayingi. Awana bena ye luzolo lwa mona azolw’au muna lufuluku, ke bena mpe ye kuma ko kia dimbula e vuvu. Yave yo Mwan’andi ke bekubayambula ko. Awana bafwa befuluka. Ke kolo ko okala vamosi y’awana omwenanga e viangi!