BIJBEL e taki krin dati wan masra musu „lobi en wefi leki fa a lobi ensrefi”. Wan wefi „musu abi bigi lespeki gi en masra”. Den ala tu musu du san Gado e aksi fu den fu di den na „wán skin” (Ef. 5:33; Gen. 2:23, 24). Baka wan pisi ten wan trowpaar e kon gwenti nanga makandra moro nanga moro èn dei fu dei a lobi fu den e kon moro tranga. Yu kan agersi a lobi fu den nanga den rutu fu tu bon di e gro sei nanga sei. Baka wan pisi ten den rutu fu den bon disi e frekti kon na wán. Na so a de tu nanga a lobi di wan koloku trowpaar abi gi makandra. Te fu kaba a gersi leki den kon de wán na ini a fasi fa den e firi.

Ma san e pasa te a masra noso a wefi dede? Di den tu sma disi ben de na libi, den ben de wán èn noti no ben man prati den. Ma now di wan fu den dede, dati no de so moro. Nofo tron a de so taki a patna di tan na baka e sari trutru, a e firi leki a de en wawan èn kande en ati e bron noso a e suku a fowtu na ensrefi. Daniella * di ben trow 58 yari, sabi furu sma di lasi den trowpatna. Ma baka di en masra dede, a taki: „Noiti mi ben sabi san a wani taki fu lasi wan patna na ini dede. Nowan sma man frustan disi solanga so wan sani no miti en.”

Son sabiman kon si taki nowan pen hebi so, leki a pen di wan sma e firi te en trowpatna dede. Furu sma di ondrofeni a sani disi, e agri nanga dati. Millie, di ben trow 25 yari, lasi en masra furu yari pasa. A e fruteri fa a libi fu en de now, di a de en wawan:  „Mi e firi leki wan sma di malengri.” Na so a ben pruberi fu sori fa a ben e firi, baka di a lasi en masra.

Fosi, Susan no ben man frustan fu san ede uma di lasi den masra na ini dede ben e sari someni yari ete. Ma baka di a trow 38 yari, a masra fu en dede. A sani disi pasa moro leki 20 yari kaba. Ma a e taki: „Ibri dei mi e prakseri en.” Nofo tron Susan e krei fu di a e misi en masra trutru.

Bijbel e taki dati a e hati trutru te wan sma lasi en patna na ini dede èn a firi disi e tan wan langa ten. Di Sara dede, en masra Abraham ’bigin row èn a krei fu Sara ede’ (Gen. 23:1, 2). Aladi Abraham ben abi a howpu taki dedesma o kisi wan opobaka, toku a ben sari srefisrefi di en lobi wefi lasi libi (Hebr. 11:17-19). Baka di Yakob en lobi wefi Rakel dede, a no ben man frigiti en. Te a ben e fruteri den manpikin fu en fu Rakel, dan a ben e taki fu en nanga firi fu lobi.—Gen. 44:27; 48:7.

San wi kan leri fu den eksempre disi di skrifi na ini Bijbel? Nofo tron a de so taki te sma lasi den trowpatna na ini dede, dan den e firi sari furu yari langa. Te wi e si taki den e krei, noso taki den e firi sari, dan wi no musu feni taki na swaki den swaki. Na presi fu dati wi musu hori na prakseri taki den e firi so fu di den ati priti di den lasi a lobiwan fu den. Kande wan heri pisi ten baka dati wi musu sori den ete taki wi e firi gi den èn taki wi wani yepi den.

Te wan sma lasi en patna, dan a libi fu en no e kon de baka leki fa a ben de fosi a trow. Te sma trow someni yari kaba, dan nofo tron a masra sabi fa fu trowstu en wefi èn a kan gi en wefi deki-ati te a no e firi bun noso te wan sani e moro en. Ma te a masra dede, dan a wefi no abi wan sma moro di kan sori taki a lobi en noso di kan trowstu en leki fa en masra ben du dati. Na so a de tu taki baka wan pisi ten wan wefi sabi fa fu meki en masra firi koloku èn fa fu gi en a firi taki a e du sani bun. Nowan sani kan meki a masra firi so bun leki a fasi fa en wefi e hori en, a switi fasi fa a e taki nanga en fu meki a firi korostu, nanga a fasi fa a e poti prakseri na sani di a lobi noso sani di a abi fanowdu. Sobun, te a wefi dede, a masra abi a firi taki en libi kon kenki fu di a lasi ala den sani disi. Dati meki son sma di lasi den trowpatna na ini dede, no sabi fa sani o waka gi den na ini a ten di e kon noso kande den frede gi a tamara srefi. Sortu tekst na ini Bijbel kan yepi den?

„Noiti un musu broko un ede nanga tamara, bika tamara o abi en eigi broko-ede. Ibri dei abi nofo fu en eigi ogri” (Mat. 6:34). Dyaso Yesus ben taki fu sani di sma abi fanowdu fu kan tan na libi. Ma a tekst disi yepi furu sma tu fu horidoro, aladi a ben hebi srefisrefi gi den di den lasi a patna fu den na ini dede. Wan tu mun baka di Charles wefi dede, a skrifi: „Mi e misi Monique èn te now ete a hebi gi mi. Son leisi a e kon moro hebi srefi. Ma mi sabi tu taki na so a e go te sma lasi wan trowpatna na ini dede èn taki baka wan pisi ten mi o firi moro bun.”

Iya, „baka wan pisi ten” Charles no ben sari so furu moro. San yepi en? A taki: „Mi ben teki en safrisafri èn Yehovah ben yepi mi nanga dati.” Aladi Charles ben abi ten fanowdu fu kisi ensrefi baka, toku a bigi sari di a ben e firi, no ben meki taki a no ben man go doro nanga en libi. Efu yu lasi yu patna na ini dede, no feti tumusi nanga den firi fu yu,  ma pruberi fu teki en safrisafri. Yu no sabi sortu bun kan miti yu, noso sortu deki-ati yu o kisi tamara.

Noiti Yehovah ben wani meki sma dede. Ma dede na wan fu „den wroko fu Didibri” (1 Yoh. 3:8; Rom. 6:23). Satan e gebroiki dede fu hori sma na katibo èn fu frede den. A e meki taki den sma disi no abi howpu (Hebr. 2:14, 15). Satan breiti te wan sma no abi a howpu taki a man abi wan bun libi èn taki a man de koloku, srefi na ini a nyun grontapu fu Gado. A hebi pen di wan sma e firi te a lasi en trowpatna, na fu di Adam sondu èn fu di Satan opo ensrefi teige Gado (Rom. 5:12). Yehovah o puru ala den takru bakapisi di kon fu Satan ede. A o puru dede tu, so taki Satan no man gebroiki dati moro fu pina libisma. Na mindri den sma di no e frede moro san Satan man du, yu abi sma di lasi den patna na ini dede neleki yu.

A libi na ini a nyun grontapu o de tra fasi gi den sma di o kisi wan opobaka. Fu eksempre, te papa nanga mama, granpapa nanga granmama nanga den tra afo o kon na libi baka, dan safrisafri den bakapisi fu sondu no o de moro, neleki fa dati o de nanga den pikin èn nanga granpikin fu den. Sma no o owru moro. Kande den moro yonguwan o abi fu leri fu si den afo fu den tra fasi leki fa den e si den now. Den nyun sani disi o meki taki libisma man libi moro bun nanga makandra.

Kande wi abi furu aksi di abi fu du nanga den sma di o kisi wan opobaka, soleki fa sani o de gi den wan di lasi tu noso moro trowpatna na ini dede. Den Saduseiman ben poti wan aksi di abi fu  du nanga wan uma di ben lasi en fosi masra na ini dede. Baka dati na uma lasi a di fu tu masra fu en èn te fu kaba a lasi ete feifi masra na ini dede (Luk. 20:27-33). San o pasa na ini den sortu situwâsi dati baka na opobaka? Wi no sabi èn a no bun fu go prakseri wan lo sani fu a tori disi noso fu broko yu ede tumusi nanga sani di wi no sabi. Nownowde wi musu frutrow na ini Gado nomo. Wán sani de seiker: Awinsi san Yehovah o du na ini a ten di e kon, a o de wan bun sani. A o de wan sani di wi kan howpu na tapu èn di wi no abi fu frede.

Wan fu den moro krin leri na ini Bijbel, na taki den lobiwan fu wi di dede o kon na libi baka. Den tori di Bijbel e fruteri fu sma di ben kisi wan opobaka, e gi wi a dyaranti taki „ala den sma di de na ini den grebi o yere [Yesus] sten èn den o komopo drape” (Yoh. 5:28, 29). Sma di o libi na a ten dati, o firi koloku te den o miti den wan di kisi wan opobaka. Wi na ini a ten disi no man frustan srefi o koloku den sma dati o de.

Te den dedesma o kon na libi baka, dan prisiri o de na grontapu pasa marki. Milyardmilyard sma di ben dede fosi, o de baka na mindri den libiwan (Mark. 5:39-42; Openb. 20:13). Te sma di lasi wan lobiwan na ini dede, o denki dipi fu a wondru disi di o pasa na ini a ten di e kon, dan dati o trowstu den.

Sma o abi fu sari te na opobaka o de? Bijbel e taki dati disi no de so. Yesaya 25:8 e taki dati Yehovah „o swari dede fu têgo”. Disi wani taki dati a o puru dede nanga den takru bakapisi di dede e tyari kon. A profeititori fu Yesaya e taki moro fara: „A Moro Hei Masra Yehovah . . . o figi den watra-ai fu ala sma puru na den fesi.” Efu yu e sari now fu di yu trowpatna dede, dan yu kan de seiker taki na opobaka o meki yu firi koloku baka.

Nowan libisma man frustan krin san na ala den sani di Gado o du na ini a nyun grontapu. Yehovah e taki: „Neleki fa hemel hei moro grontapu, na so den pasi fu mi hei moro den pasi fu unu èn den prakseri fu mi hei moro den prakseri fu unu” (Yes. 55:9). Te wi e bribi san Yesus taki fu na opobaka, dan dati e gi wi na okasi fu sori taki wi e frutrow na tapu Yehovah neleki Abraham. A moro prenspari  sani gi ibri Kresten now na fu du san Gado e aksi fu wi. Na so wi o de sma di „warti fu libi na ini a grontapu di o kon”, makandra nanga den wan di o kisi wan opobaka.—Luk. 20:35.

Efu yu e tan prakseri a moi howpu disi, dan dati o yepi yu fu no broko yu ede nanga a tamara. Furu sma no abi wan howpu gi a tamara. Ma Yehovah pramisi wi wan moro betre sani. Wi no sabi finifini san Yehovah o du fu gi sma ala san den abi fanowdu noso san den wani. Toku wi no musu tweifri taki a o du den sani disi trutru. Na apostel Paulus skrifi: „Te wan sma e howpu fu kisi wan sani èn a kisi a sani dati trutru, dan a no o howpu moro, a no so? Wi kan taki dan, dati wan sma e howpu fu kisi wan sani, efu a kisi a sani dati kaba? Ma efu wi e howpu fu kisi wan sani di wi no kisi ete, dan wi o tan wakti a sani dati fayafaya, aladi wi e horidoro” (Rom. 8:24, 25). Te yu no e tweifri taki Gado o du san a pramisi, dan dati o yepi yu fu horidoro. Te yu e horidoro, dan yu o si den moi sani di Yehovah o du na ini a ten di e kon. Na a ten dati a o „gi yu san yu ati wani” èn a o „gi ala libisani san den e angri fu kisi”.—Ps. 37:4; 145:16; Luk. 21:19.

Na a ten di Yesus ben o dede, den apostel fu en ben e sari, den ben frede èn den ben bruya. Dati meki Yesus trowstu den nanga den wortu disi: „No broko un ede. Bribi na ini Gado èn bribi na ini mi tu.” A taigi den: „Mi no o gowe libi unu leki pikin di no abi papa nanga mama, ma mi o kon na unu” (Yoh. 14:1-4, 18, 27). Na ini den hondrohondro yari di pasa den wortu fu Yesus gi salfu Kresten howpu èn a meki taki den ben man horidoro. Den sma di angri fu si te den lobiwan fu den kisi wan opobaka, no abi fu lasi-ati. Yehovah nanga en Manpikin no o gowe libi den. Yu kan de seiker fu dati.