Eejiraashii waya waneepia süpüla nnojoliinjanain ouktüin waya. Jamüsüjaʼa süküjünüle wamüin nünaajaain wanee wayuu kasa wanain, eesü müle alawaakai saaʼin wamüin. Süka jimaʼaiyülin wanee wayuu, eesü jülüjüle naaʼin nnojoleechin ouktüin nia. Amülapejeʼe jülüjüin naaʼin tia.

Na aluwataaliikana chaa Egipto, nachajaain maʼin sukuwaʼipa süpüla nnojoliinjanain ouktüin naya. Naʼyateʼerüin maʼin na wayuukana süpüla nountüin tia. Akumajüshii naya miichi miyoʼuyuu. Akatsaʼa amülain neʼe nakumajüin tia.

Akaʼaya na aluwataalii chajanakana China, nachajaain maʼin sukuwaʼipa süpüla nnojoliinjanain ouktüin naya. Nachajaain maʼin tü wunuʼu shipinaseinjatkat tü ouktaakat. Jamüshijaʼa chi aluwataai kanüliakai Qin Shi Huang, nüchajeʼerüin wanee asüüshi süpüla katüinjatüin noʼu waneepia. Shiasaʼa saʼaka tia asüüshikat, eejatü wanee kasa ouktasiroʼu. Makalaka ouktüin Qin Shi Huang nüsapa tia asüüshikat.

Eeshi wanee wayuu Juan Ponce de León nünülia, chejeʼewai España, oʼunajaai suluʼumüin wanee mma naata. Soʼu juyaka 1513, oʼunüshi nia wattapünaa süpüla nüchajaain süchiki tü shipinaseinjatkat tü ouktaakat. Mayaapejeʼe nüntüin sünain tü mma kanüliakat Florida (Estados Unidos), ouktüshi neʼe nia sümaa nnojoluin nüntüin sünain tü shipinaseinjatkat tü ouktaakat.

Na aluwataaliikana chaa Egipto, China otta na oʼunajaaliikana suluʼumüin wanee mma naata, nachajaain maʼin sukuwaʼipa süpüla nnojoliinjanain ouktüin naya. Mayaainjeʼe nnojoluin pansaain waaʼin sümaa tü naainjakat, watüjaa aaʼu nachajaain maʼin sukuwaʼipa süpüla nnojoliinjanain ouktüin naya.

¿Jamüshii nnojoliika oukteein waya? Müsü tü Wiwüliakat nüchiki Jeʼwaa chi Kakumalakai wayuu: «Anashaatasü maʼin sukumajia nutuma. Niʼitaain suluʼu saaʼin wayuu kateein soʼu waneepia» (Eclesiastés 3:​11, NM). * Müsüjeseʼe suluʼuin waaʼin kateein woʼu waneepia yaa saaʼu mmakat. Nnojotsü shiain neʼe ouktüinjanain waya mekiisatpa shikii wouyase (Salmo 90:10). Kateesü woʼu süpüla kaʼika süpüshuaʼa.

¿Jamüsü niʼitaaka Jeʼwaa suluʼu waaʼin kateein woʼu süpüla kaʼika süpüshuaʼa? ¿Shiache süpüla mojuinjatüin waaʼin nutuma? Nnojo. Nüküjüin Jeʼwaa nüsünneʼerüinjatüin tü ouktaakat. Kojuyatua süküjüin tü Wiwüliakat nüsünneʼerüinjatüin Jeʼwaa tü ouktaakat otta kojuyatua süküjüin katüinjatüin woʼu süpüla kaʼikat süpüshuaʼa. (Paashajeʼera tü pütchikat: «Nüsünneʼereerü Maleiwa tü ouktaakat».)

Müshi Jesukürisüto: «Kateena oʼu waneepia na ayatakana ekirajaain püchiki piakai, chi Maleiwa shiimainshikai otta tachiki tayakai Jesukürisüto, chi püjünalakai» (Juan 17:​3, NM). Nnojoleena shiyamülüin waya tü ouktakat. Makaʼa nüküjüin Jesuu, choʼujaashi wamüin chi Maleiwakai süpüla katüinjatüin woʼu waneepia.