Day na ɛnimi we mɔtalman de fred bad bad wan. Wi kin du ɔl wetin wi ebul fɔ du fɔ mek wi nɔ day. If pɔsin we wi lɛk day, wi nɔ kin want fɔ biliv se i dɔn day. Ɛn we pɔsin yɔŋ, i kin tink se day na tin we nɔ go ɛva mit am.

Pipul dɛn trade trade bin de tink bɔt wetin go mek dɛn liv sote go. Bɔt di Fɛro dɛn we na di kiŋ dɛn we bin de na Ijipt bin de tink mɔ bɔt dis. Wetin mek wi se so? Na bikɔs dɛn bin de spɛn bɔku tɛm fɔ du sɔm tin dɛn we go mek day nɔ ebul dɛn. Dɛn bin de mek bɔku bɔku pipul dɛn wok fɔ bil dɛn big ɛn fayn fayn grev dɛn we dɛn kɔl piramid. Dɛn grev ya de sho se di Fɛro dɛn bin rili want fɔ liv sote go. Bɔt dɛn grev ya de sho bak se dɛn nɔ bin ebul fɔ du wetin dɛn want.

Dɛn fɔstɛm Chayni kiŋ dɛnsɛf bin want fɔ liv sote go, bɔt dɛn bin yuz ɔda we fɔ du dat. Us we dɛn bin yuz? Dɛn bin yuz wan majik tin we dɛn bin biliv se go mek dɛn liv sote go. Wan Chayni kiŋ we nem Chin Shi Hawn bin tɛl in sayɛnsman dɛn fɔ fɛn majik drink we go mek dɛn ebul fɔ stɔp day. Bɔt plɛnti pan di majik drink dɛn we dɛn mek bin gɛt wan pɔyzin we dɛn kɔl makyuri. Sɔntɛm, na wan pan dɛn drink ya bin kil dis kiŋ.

Insay di ia 1513 afta Krays, wan Spanishman bin de we nem Wuan Ponse de Leɔn. I bin lɛk fɔ travul fɔ no bɔt difrɛn difrɛn ples dɛn ɛn ɔda tin dɛn. Pipul dɛn se dis man ya bin de travul fɔ fɛn wata we de mek pɔsin yɔŋ. We i bin de du dis, i fɛn di ples we dɛn kɔl Flɔrida we de insay Amɛrika. Afta sɔm tɛm, i bin fɛt wit sɔm pipul dɛn we bin dɔn de na Amɛrika, ɛn dis bin mek i day leta. Te naw, nɔbɔdi nɔ ɛva ebul fɔ fɛn di wata we go mek pɔsin yɔŋ.

Di kiŋ dɛn na Ijipt, di kiŋ dɛn na Chayna, ɛn dɛn pipul we bin lɛk fɔ travul fɔ no bɔt difrɛn difrɛn ples dɛn ɛn ɔda tin dɛn, bin de tray fɔ stɔp day. Sɔntɛm, plɛnti pan wi nɔ go lɛk di we aw dɛn pipul ya bin de tray fɔ stɔp day. Bɔt udat pan wi go se wetin dɛn pipul ya bin de tray fɔ du nɔ impɔtant? Insay wi at, nɔbɔdi nɔ de we want fɔ day, wi ɔl want fɔ liv sote go.

Wetin mek wi nɔ want fɔ day? Di Baybul gi wi di rizin. We i de tɔk bɔt Jiova Gɔd * we mek wi, i tɔk se: “[Jiova] dɔn mek ɔl di fayn fayn tin dɛn, di rayt tɛm. I dɔn put am na mɔtalman at fɔ mek dɛn want fɔ liv sote go.” (Ɛkliziastis 3:11, NW) Wi want fɔ ɛnjɔy di fayn fayn tin dɛn we de na dis wɔl sote go, nɔto fɔ ɛnjɔy dɛn fɔ lɛk 80 ia nɔmɔ. (Di Sam Dɛm 90:10) Insay wi at, wi nɔ rili want fɔ day, wi want fɔ liv sote go.

Wetin mek Gɔd “put am na mɔtalman at fɔ mek dɛn want fɔ liv sote go”? Na fɔ lɛ wi at pwɛl? Nɔ, Gɔd nɔ de ɛva du tin lɛk dat. Bifo dat, Gɔd dɔn prɔmis wi se tɛm de kam we day nɔ go de igen. Di Baybul tɔk bɔku tɛm se Gɔd gɛt fɔ pul day kɔmɔt, ɛn i go gi wi layf we go de sote go.—Rid di bɔks we se,  “Day Nɔ Go De Igen.”

Jizɔs Krays insɛf tɛl wi klia wan se: “Fɔ gɛt da layf de, we go de sote go, dɛn fɔ no yu, we na di wangren tru Gɔd, ɛn dɛn fɔ no Jizɔs Krays, we yu sɛn kam to dɛn.” (Jɔn 17:3) Pipul dɛn dɔn du ɔlkayn tin fɔ fɛt day, bɔt dɛn nɔ ebul. Dis nɔ min se op nɔ de; Jizɔs bin tɔk se na Gɔd nɔmɔ ebul fɔ win dis fɛt fɔ wi.