MUTWE WA MWANDA WA PA KIBALU | LUNONGA LULETA LUFU
Bulwi Bulwa Bantu Mwanda wa Baleke Kufwa
Lufu i walwana ulenga moyo. Tulwanga nalo na bukomo bwetu bonso. Ketwitabijangapo kitatyi kyolusela muntu otusenswe. Nansha ke kitatyi kyotudi bankasampe na bukomo bungi, tubwanya kulanga’mba walwana kaketupetapo nansha dimo—kwididika kotubwanya kwididika nyeke.
Langulukila bityetye pa būmi bwa nyeke pa kyaba kya kulangulukila padi Bafelo ba kala. Bāpityije kitatyi kilampe mu būmi bwabo—mu būmi bwa tununu na tununu twa bengidi—balonga bukomo bwa kunekenya lufu. Bibundu bya mabwe byobādi bōbaka bilombola’mba bādi balonga bukimbi—ino bakankalwa.
Balopwe ba mu Shine nabo badi basaka kwikala bōmi nyeke, nansha kwingidija miswelo palapala—ya kwishīka mwa kwikadila na būmi. Mulopwe Qin Shi Huang wanene bantu benga lawa basokole majende abwanya kusonsolwela lufu kulampe. Inoko, bimino bivule byobadi bamina byadi na mekyule afwana, kadi bimweka bu bwanga bwadi butyangilwe’ko bo bwamwipaile.
Mu myaka katwa ka 16 K.K., Juan Ponce de León musokodi mwine Eshipanye waendele ku karaibe mu kukimba kyumbu kya bunkasampe. Wasokwele mu mwingilo wandi ntanda ya Florida, mu États-Unis, ino myaka mityetye pa kupita’po wafwa mu divita dya bene Amerika ba Kibutwila. Kadi kasokwelepo kyumbu kya bunkasampe.
Bafelo, balopwe, ne basokodi, bonso badi bakimba kunekenya lufu. Le i ani motudi ukapēlula kitungo kyabo, nansha shi ketusenswepo manwa abo? Na bubine, batwe bonso tusakanga mu mutyima wetu kwikala’ko nyeke.
LELO LUFU LUBWANYA KUNEKENIBWA?
Mwanda waka ketusakangapo kufwa? Bible uleta bubinga. Unena pangala pa Yehova Leza * Umpangi wetu amba: “Wapanga bintu byonsololo bya buyabuya, kyoki mu kyaba kyakyo aki nakyo mu kyaba kyakyo; ino wabika [būmi bwa nyeke] mu mutyima wa [bantu].” (Musapudi 3:11) Tukasangela nyeke buya bwa ntanda, ke enkapo myaka 80 ne kupita. (Mitōto 90:10) Kino kyo kisaka mutyima wetu.
Mwanda waka Leza wātūdile ‘būmi bwa nyeke’ mu mityima yetu? Le i mwanda’tu wa kwitukambakanya? Nansha dimo. Ino, Leza i mwitulaye amba lufu lukanekenibwa. Bible wisambila kitatyi ne kitatyi pa kutalulwa’ko kwa lufu ne pa mulao wa Leza wa būmi bwa nyeke.—Tala kapango kadi pano kanena’mba, “Kunekenibwa kwa Lufu.”
Yesu Kidishitu aye mwine wānene patōkelela amba: “Buno’bu bo būmi bwa nyeke, bekale kukuyuka abe, Leza umo kete wa bine, ne yewa owatumine, Yesu Kidishitu.” (Yoano 17:3) Nanshi bulwi botulwa na lufu ke bwa bitupupo. Ino Yesu ubingijanga’mba, i enka Leza ubwanya kwitunekenenya bulwi botulwa.
^ Yehova i dijina dya Leza monka modilombwedilwe mu Bible.
