Antu Akeñaña Kufumishahu Kufwa
MUTU WUDI HEFU DATACHI | KOMANA KUFWA DIKUKUMA KWAWANTU?
Antu Akeñaña Kufumishahu Kufwa
Kufwa hichilumbu itwatiyaña woma. Twalwishaña nañovu jetu jejima kulonda tukufumishuhu. Twakaanaña neyi anatuleji nawu muntu itwakeña nafwi. Neyi tuchidi atwansi, twatoñojokaña netu hitwakafwaku, yitoñojoka yamuchidiwu yekalaña mudi etu.
Antu antesha akeñeleña kushakama haya nyaka kubadika aFwaro akushankulu. Muchihandilu chawu nichawantu jawu akeñeleña kuwana njila yakumanishilamu kufwa. Jipiramidi jatuñileñawu jamwekeshaña nawu akeñeleña kufumishahu kufwa ilaña akañenyi.
Anyanta akuChina niwena akeñeleña kushakama haya nyaka, ilaña azatishili njila yambukaku yakuzatisha menji ajila awumi. Mwanta Qin Shi Huang walejeli antu jindi atuñileña yitumbu nindi akeñi yitumbu yamagiki yakumanishilamu kufwa. Ilaña yitumbu yiyapatakesheluwu yadiña nawulembi wamercury chakwila yajahili nimuntu wayipatakesheleña.
Mukwakwenda wakuSpain Juan Ponce de León wamunkulakaji yayaaka 16 wendeli nawatu mukaluñalwiji kaCaribbean nawa antu ashimunaña nawu wayili nakukeñakeña kaseloki kafuntishaña antu kuwansi. Diyi mutachi kuwana musumba waFlorida, U.S.A., ilaña mukukeñakeña wafwili chimwahitili yaaka yantesha hanyima yakuzuña naWantu ashakamineña muAmerica. Ilaña aka kaseloki kafuntishaña antu kuwansi kwosi wakiwanaku.
A Fwaro, anyanta niakwakwenda wonsu wawu akeñeleña kufumishahu kufwa. Kwosi watela kuseha mwafuukwiluwu hela chakwila azatishili njila yatama. Wonsu wetu twakeñaña kushakama haya nyaka.
HINYI WUNATELI KUFUMISHAHU KUFWA?
Muloñadi wutwakeñelaña kushakama haya nyaka? Bayibolu yatulejaña muloña wutwakeñelaña kushakama haya nyaka. Yahosha hadi Nleñi yetu Yehova Nzambi, * nawu: ‘Wela dehi yuma yejima yiikali nalubanji hampinji yayu, washa dehi nawa mpinji yahaya nyaka munyichima yawantu.’ (Mukwakutaŋisha 3:11) Twakeñaña kudiluñisha yuma yayiwahi yahamaseki haya nyaka, bayi hadi yaaka 80 hohuku. (Masamu 90:10) Dichuma chitwakeñaña.
Muloñadi Nzambi chashilayi ‘mpinji yahaya nyaka’ munyichima yetu? Wakeñaña kutuneñesha tahindi? Inehi. Ilaña Nzambi watukana nindi wakafumishahu kufwa. Bayibolu yahoshaña kakavulu nawu kufwa akakwifumishahu nawa yahoshaña nihachikaninu chaNzambi chawumi wahaya nyaka.—Talenu chikasha chinakuhosha nawu, “Kufwa Akakwifumishahu.”
Yesu Kristu wahosheli nindi: “Wumi wahaya nyaka woweniwu, wakukwiluka eyi Nzambi walala wumu hohu, niYesu Kristu watemesheli.” (Yowanu 17:3) Mwamweni, kufwa akakwifumishahu. Yesu wahosheli nindi, Nzambi hohu diyi watela kufumishahu kufwa.
[Tumazu twaheshina]
^ Ijina daNzambi diyi Yehova neyi chashimunawu muBayibolu.
[Chikasha chidi hefu 5]
Kufwa Akakwifumishahu
“Naminyi dehi kufwa chahaya nyaka; Yehova wakakombola madilu mumesu awantu ejima.”—(Isaya 25:8)
‘Muloña weniwu diwu muchima waTata yami, nakeñi antu ejima atalaña Mwana amwitiyaña chakukuhwelela, muntu himuntu, amoni wumi wahaya nyaka.’—(Yowanu 6:40)
“Chilumbu chakukuminina akanoñeshayi, yowu kufwa.” (1 Akorinda 15:26)
‘Twachiñejaña wumi wahaya nyaka, watukaninuwu kudi Nzambi wabulaña kutwamba, hadiñi nyaka yamunyima yejima yichidi kanda.’—(Titusa 1:2)
“Wakayikombola madilu ejima kumesu awu; hikwakekala nawa cheñi kufwaku.”—(Chimwekeshu 21:4)
[Mwevulu wudi hefu 4]
FWARO KHUFU
[Mazu aKusakilila]
Egyptian mural: © Erich Lessing/Art Resource, NY
[Mwevulu wudi hefu 4, 5]
MWANTA QIN SHI HUANG
MUKWAKWENDA PONCE DE LEÓN
