Ukufa linaba elithusako. Silwisana nakho ngawo woke amandlethu. Kungenzeka singakholwa nekubamba omunye esimthandako. Nesisesebatjha singacabanga bona ukufa ngeze kusibambe—ibhudango esinamathela kilo isikhathi eside ngendlela esingakghona ngayo.

Bambalwa abantu abacabanga ngokufa kunangesikhathi saboFaro wekadeni. Basebenzisa isikhathi esinengi sokuphila kwabo—neseenkulungwana zeensebenzi—balinga ukuhlula ukufa. Imibhotjhongo abayakhako ifakazela imizamo yabo nokuhluleka kwabo.

Ababusi beChina nabo benza imizamo efanako bona bangafi, kodwana basebenzisa indlela ehlukileko—iketjezi ebelizobenza bangafi. Umbusi uQin Shi Huang watjela abasebenza ngamakhemikhali bona bamenzele iketjezi ebelizomenza angafi. Kodwana iinthako zakhona ezinengi bezine-mecury enetjhefu, begodu kungenzeka esinye seenthako lezo ngiso esambulalako.

Eminyakeni yama-1500, umhloli weendawo weSpain uJuan Ponce de León wakhamba ngomkhumbi waya eCaribbean ayokufuna umthombo wobutjha. Ekhambwenelo wafumana iFlorida ese-U.S.A., kodwana wafa eminyakeni embalwa ngemva kokulwa nabantu beNdabuko beMerika. Awukho umthombo wobutjha owakhe wafunyanwa.

AboFaro, ababusi nabahloli beendawo, boke bebafuna ukuhlula ukufa. Ngubani kithi ogade anganyaza umnqophwabo, ngitjho nanyana besingazithandi iindlela abazisebenzisako? Kuhle kuhle soke sifuna ukuhlala siphila.

Kubayini silwisana nokufa? IBhayibheli inikela ibanga. Malungana nomBumbi wethu, uJehova uZimu, * uthi: ‘Wenze yoke into yafaneleka ngesikhathi sayo. Godu ufake nobuphakade eenhliziyweni  [zabantu].’ (UmTjhumayeli 3:11) Singathabela ubuhle bephasi ngokungapheliko, ingasi iminyaka ema-80 kwaphela. (IRhubo 90:10) Leso sifiso sehliziywethu.

Kubayini uZimu afake ‘ubuphakade’ eenhliziyweni zethu? Kghani bona asizwise ubuhlungu? Awa akusinjalo. Ngokuphambene nalokho, uZimu usithembisa bona uzokuhlula ukufa. IBhayibheli ikhuluma ngokubuyelelweko ngokuqedwa kokufa nangesithembiso sakaZimu sokuphila ngokungapheliko.—Qala ibhoksi elithi,  “Ukuhlulwa Kokufa.”

UJesu watjho ngokukhanyako: “Ukuphila okungapheliko ngilokho bona bazi wena wedwa Zimu weqiniso nokwazi uJesu Krestu, omthumileko.” (Jwanisi 17:3) Ngalokho lisesekhona ithemba lokulwisana nokufa. Nokho, uJesu waqinisekisa bona nguZimu kwaphela ongathumba ipi le.