Morto ta un enemigu kruel ku nos tur ta trata di vense. Ora un ser kerí di nos muri, nos ta haña ku e ta hopi difísil pa aseptá. I si nos ta yòn, nos por pensa ku nunka lo e bati na nos porta; un ilushon ku nos ta tene duru na dje.

Masha poko hende a pensa asina tantu riba inmortalidat manera e Fáraonan di Egipto. Nan a dediká gran parti di nan bida, i tambe di míles di trahadó, na esfuersonan pa purba vense morto. E piramitnan ta prueba palpabel di nan lucha i di nan frakaso.

E emperadornan chines tambe a soña ku inmortalidat, aunke nan método tabata diferente. Nan kier a inventá un bibida místiko ku lo a laga hende biba pa semper. Emperador Qin Shi Huang a eksigí di su sientífikonan pa krea un bibida mágiko ku lo a tene morto leu. Ma hopi di e mesklanan akí ku nan tabata traha a kontené merkurio. I ta parse ku ta un di e mesklanan tóksiko akí mes a mata e emperador.

Den siglo 16 despues di Kristu, e eksploradó spañó Juan Ponce de León a nabegá den Karibe supuestamente en buska di un fuente di hubentut. Ma loke el a deskubrí tabata Flórida, Merka. I pa kolmo, un par di aña despues, el a pèrdè su bida den un enfrentamentu ku e indjannan merikano, sin nunka a deskubrí e fuente di hubentut.

Tantu e Fáraonan, emperadornan komo eksploradónan a purba vense morto. Kisas nos no ta di akuerdo ku nan métodonan. Pero nos ta komprondé dikon nan a purba vense morto, pasobra den fondo di nos ser, nos tur ke sigui biba.

Dikon ta duru pa hende aseptá ku nan tin ku muri? Beibel ta splika e motibu. E ta bisa di nos Kreador, Yehova * ku “el a traha tur kos apropiá na su tempu. Tambe el a pone eternidat den  [hende su] kurason.” (Eklesiástes 3:11) Ta p’esei nos ke disfrutá di nos bunita planeta pa semper, no djis pa un 80 aña asina. (Salmo 90:10) Esei ta loke nos tur ta deseá.

Dikon Dios a pone “eternidat” den nos kurason? Djis pa frustra nos? Nunka lo e hasi un kos asina. Al kontrali, Dios ta primintí nos ku morto lo bai sufri un derota. Bes tras bes Beibel ta papia di tantu e destrukshon di morto komo di e bida eterno ku Dios a primintí.—Wak e kuadro athunto,  “Viktoria Riba Morto.”

Hesukristu mes a bisa bon kla: “Pa haña bida eterno, nan tin ku siña konosé bo, e úniko Dios berdadero, i esun ku bo a manda, Hesukristu.” (Huan 17:3) Pues, e lucha kontra morto no ta pèrdí. Sinembargo, Hesus a mustra ku ta Dios so por yuda nos gana e lucha ei.