Morto ta un enemigo cruel cu nos tur ta trata di vence. Ora un ser keri di nos muri, nos ta haya cu e ta hopi dificil pa acepta. Y si nos ta jong, nos por pensa cu nunca lo e bati na nos porta; un ilusion cu nos ta tene duro na dje.

Masha poco hende a pensa asina tanto riba inmortalidad manera e faraonan di Egipto. Nan a dedica gran parti di nan bida, y tambe di miles di trahador, na esfuersonan pa purba di vence morto. E piramidanan ta prueba palpabel di nan lucha y di nan fracaso.

E emperadornan Chines tambe a soña cu inmortalidad, aunke nan metodo tabata diferente. Nan kier a inventa un bibida mistico cu lo laga hende biba pa semper. Emperador Qin Shi Huang a exigi pa su cientificonan crea un bibida magico cu lo tene morto leu. Pero hopi di e mesclanan aki cu nan tabata traha a contene mercurio, cu ta masha venenoso. Y ta parce cu ta un di e mesclanan aki mes a mata e emperador.

Den siglo 16 despues di Cristo, e explorado Spaño Juan Ponce de León a nabega den Caribe supuestamente en busca di un fuente di hubentud. Pero loke el a descubri tabata Florida, Merca. Y pa colmo, un par di aña despues, el a perde su bida den un enfrentamento cu e indjannan Mericano, sin nunca descubri e fuente di hubentud.

Tanto e faraonan, emperadornan como exploradonan a purba di vence morto. Kisas nos no ta di acuerdo cu nan metodonan. Pero nos ta compronde dicon nan a purba di haci esey, pasobra den fondo di nos curason, nos tur kier sigui biba.

Dicon ta duro pa hende acepta cu nan tin cu muri? Bijbel ta splica e motibo. E ta bisa di nos Creador, Jehova * cu “el a traha tur cos apropia na su tempo. Tambe el a pone eternidad den [hende  su] curason.” (Eclesiastes 3:11) Ta pesey nos kier disfruta di nos bunita planeta pa semper, no djis pa un 80 aña asina. (Salmo 90:10) Esey ta loke nos tur ta desea.

Dicon Dios a pone “eternidad” den nos curason? Djis pa frustra nos? Nunca e lo haci un cos asina. Al contrario, Dios ta priminti nos cu morto lo bay sufri un derota. Bes tras bes Bijbel ta papia di tanto e destruccion di morto como di e bida eterno cu Dios a priminti.—Wak e cuadro adhunto,  “Victoria Riba Morto.”

Hesucristo mes a bisa bon cla: “Pa haya bida eterno, nan tin cu siña conoce bo, e unico Dios berdadero, y esun cu bo a manda, Hesucristo.” (Juan 17:3) Pues, e lucha contra morto no ta perdi. Sinembargo, Hesus a mustra cu ta Dios so por yuda nos gana e lucha ey.