A kodall a kmal kdekudel el cheraro. Me kede mo er sel tkurrebab el klisiched el okoad el omtok er ngii. Kede dirrek el melasem el olechib er a uldesued el kirel sel sekum e ngduubech el mo er a betik er a rengud. Me a lechub e sel dengeasek, e kede melatk el kmo tia el tekoi a kmal diak bo leduubech el mei er kid, e tiang a cheleuid el uldasu el deblechoel el urrekodel er ngii.

Te di kesai el chad a uai tirke el Farao er a irechar el ulemdasu el kirel a diak a ulebengelel el klengar. Te uluusbech a klou el taem er a klengar er tir me a klengar er a rebetok el telael el chad er a ureor el melasem el mo mesisiich er a kodall. E aike el pyramid el lulleketek a olechotel tia el tekoi el lurruul er ngii, el ngii a dimlak a ngera el lerellii.

Tirke el emperor er a Sina a uleltirakl er a osisiu el uldasu el kirel a diak a ulebengelel el klengar, alta te mirruul er tiang el oeak a ngodech el rolel, e le te uluusbech a kar. A Emperor Qin Shi Huang a mle soal tirke el chedal a lerellii a kar el mo uchul e ngmo diak a kodall. Engdi a betok er aike el kar el lurruul a mla er ngii a dok el mercury er a chelsel, e a ta er aike el kar el leriruul a locha milekodir.

Sera rak er a 1513 er a taem er kid, e a ta el chad er a Sebangiol el ngklel a Juan Ponce de León el ulemais el omoid a beluu, a mla er a bilsengel el tuobed er a beluu er a Puerto Rico el mo osiik er a fountain of youth. Ngmiltik er a beluu er a Florida, U.S.A., engdi ngmlad er a sesei el rak er a uriul er a loumekemad ngii me tirke el Native Americans. E dirkak a mla metik er tia el fountain of youth.

Tirke el Farao, me tirke el emperor, me tirke el ulemoid a beluu a rokui el millasem el mo mesisiich er a kodall. Me alta ngchetid aike el tekoi el lurruul, engdi ngtecha er kid a melekoi el kmo ngdimlak el ungil tia el turrekong er tir? Kid el rokui a soad el melemolem el di ngar.

Ngera uchul me kede omtok er a kodall? A Biblia a ouchais er a uchul e kede meruul el uaisei. Ngmelekoi el kirel ngike el Ulemeob er kid el Jehovah el Dios * el kmo: “Ng mla oterekokl a ungil temel a bek el tekoi. Ng mla meskid a urunguled el mo medengelii a ngar medad.” (Olisechakl 3:11) Ngkmal soad el oldeu a rengud er a klebekelel tia el chutem el mo cherechar, el diak di el 80 me a derengel el rak e lemerekong. (Psalm 90:10) E tiang a urunguled.

Ngera uchul me a Dios a lilia “ngar medad” er a chelsel a rengud? Ngmirruul er tia el di mo omekseselk a rengud? Ngkmal diak el sebeched el melatk el uaisei. A Dios a tibir el mei er kid el kmo ngmo er ngii a kats er a kodall. E a Biblia a blechoel el mesaod el kirel a okngemedel a kodall me a telbilel a Dios el kirel a diak a ulebengelel el klengar.​—Momes er a baks el  “Kats er a Kodall.”

A Jesus Kristus a mle bleketakl el melekoi el kmo: “A diak a ulebengelel klengar a belkul a kmo, bo lodengelkau el di ta el meral Dios, e bo lodengelii a Jesus Kristus el ngikel mulderchii el mei.” (Johanes 17:3) Me tia el mekemad el omtok er a kodall a ngar er ngii a bo leketmeklii. A Jesus a meketeklii el kmo ngdi ta el Dios a sebechel el mo kats er tia el mekemad el kired.