Wañoyqa may sajra enemigo. Tukuytaj atipayta munanku. Pi familianchejpis wañupojtin, sonqonchej mayta nanawanchej. Jovenllaraj kanchej chaytaj, ichapis ni jaykʼaj wañunanchejta yuyanchej. Ashkhas jinata yuyanku.

Egiptota kamachej faraonesqa, wañuyta atipanapaj imatá mana ruwarqankuchu. Ashkha tiempota chayman churaspa, may chhika runasta llankʼacherqanku. Jatuchaj orqosman rijchʼakoj aya pʼampanasninkutaj, qhasillata llankʼasqankuta rikuchin.

Chinosta kamachejkunapis, wañuyta mana rejsinankurayku, wiñayta kausanapaj jampita tariyta munarqanku. Qin Shi Huang nisqa kamachejqa, yachayniyoj runasninman wiñayta kausanapaj jampita maskʼanankuta kamacherqa. Chaywanpis casi tukuynin chay jampisman, mercuriota churaj kanku. Chay kamachejtaj, chay jampista ujyaykuspasina wañorqa.

España suyumanta Juan Ponce de Leonqa, 1501-1600 watas chaynejpi kausarqa. Payqa wiñay kausay juturita maskʼaspa, Puerto Rico suyumanta barcopi kachaykukusqa. Chay risqanpi Florida (Estados Unidos) nisqa llajtata tarejtinpis, chay cheqamanta runaswan maqanakuspa iskay watasninman wañupusqa. Nitaj chay wiñay kausay juturita tarerqachu.

Tukuy laya kamachejkuna, jinallataj waj runaspis, wañuyta atipayta munarqanku. Ruwasqankuta mana allinpaj qhawaspapis, paykunata entiendesunman. Imaraykuchus ni pi wañuyta munanchejchu.

¿Imaraykutaj mana wañuyta munanchejchu? Biblia kutichiwanchej: Jehová “Diosqa tukuy imata tiempompi kʼachituta ruwarqa. Payllataj runaj sonqonman wiñay kasqanta churarqa”, nispa (Eclesiastés 3:11). * Chayrayku kay kʼacha Jallpʼanchejpi mana 80 watasllatachu kausayta  munanchej, manaqa wiñaypaj (Salmo 90:10). Chaytaj sonqonchejpi kashan.

¿Imaraykutaj Dios wiñay kausayta sonqonchejpi churarqa? ¿Qhasita kusichinawanchejpajchu? ¡Mana! Diosqa wañuyta chinkachinanta, wiñay kausaytataj qonawanchejta nin. Bibliaqa kutin kutita chaymanta parlan ( “Wañoyqa atipasqa kanqa”, nisqa recuadrota leey).

Jesucristopis sutʼita nerqa: “Kaymin chay wiñay kawsayqa: Qan kʼata cheqa Diosta rejsisunanku, kachamusqayki Jesucristotapis”, nispa (Juan 17:3). Arí, wañoyqa atipasqa kanqa. Chaywanpis Jesús nerqa jina, Diospa yanapanta necesitanchej.