Nyifwa ndi murwani wakofya. Titesesa kulimbana nayu ndi nthazi zidu zosi. Ndipu asani munthu yo tamuyanjanga wafwa, vititisuzga kuvwana kuti wafwa nadi. Ndipu asani teche ndi nthazi tiŵanaŵanaku cha kuti zuŵa linyaki tifwengi. Titijipusika kuti isi tingafwa cha.

Ŵanthu anandi aŵanaŵana kuti angafwa cha nge mo mafumu nga ku Egipiti ngo ngadanikanga kuti Farao ngaŵanaŵaniyanga. Mafumu yanga ndi anchitu ŵawu amaliyanga nyengu yawu yinandi pakulimbana ndi nyifwa. Viliza vo azenganga mbukaboni wakuti angutondeka kulimbana ndi nyifwa.

Mafumu nga ku China nangu ngaŵanaŵananga kuti munthu watufwa cha. Yiwu aŵanaŵananga kuti pe nthowa zakupambanapambana zo munthu wangalutirizgiya kuja ndi umoyu kumalu nganyaki, kweni ivi vauneneska cha. Fumu Qin Shi Huang yingutuma madokotala ngaki kuti ngayipangiyi munkhwala wakuti yingafwanga cha. Kweni vinthu vinandi vo angupangiya munkhwala wo venga va poyizoni, ndipu venivi vitenere kuti ndivu vingumubaya.

Mu vyaka va m’ma 1500, Juan Ponce de León yo wenga wakufufuza vinthu ku Spain, wangwenda panyanja ya Caribbean kuti wasaniyeku maji ngakovya kuti munthu waleki kukota. Paulendu wenuwu, wanguchifika ku Florida ku U.S.A. Kweni pati pajumpha vyaka vimanavi wangufwa pavuli pakuchita nkhondu ndi ŵanthu a ku America. Ndipu maji ngakovya kuti munthu waleki kukota ngo wapenjanga wangungasaniya cha.

Mafumu nga ku Egipti ndi mafumu nganyaki kweniso akufufuza munkhwala aŵanaŵananga kuti angathereska nyifwa. Ndiyani yo wangakamba kuti ŵanthu yaŵa ŵenga ndi vilatu vambula kovya, chinanga tingawona kuti nthowa zo agwiriskiyanga nchitu zenga zambula kwenere? Kukamba uneneska, palivi yo wakhumba kufwa.

Nchifukwa wuli titinkhana ndi nyifwa? Bayibolo likonkhoska chifukwa chaki. Likonkhoska kuti Mulengi widu, Yehova Chiuta a “waŵika . . . umuyaya mu mtima wa munthu.” (Wakutawula 3:11) Tikhumbiskiska kuti tikondwengi ndi vinthu vakunozga vo ve m’charu kwa vyaka 80 pamwenga vakuwerengeka waka cha, kweni kwamuyaya. (Sumu 90:10) Venivi ndivu mtima widu ukhumba.

Nchifukwa wuli chiuta wakuŵika “umuyaya” mu mitima yidu? Kumbi wakhumba ŵaka kutipusisa? Chiuta wangachita cha venivi. M’malu mwaki, Chiuta watitilayizga kuti wazamutuzgapu nyifwa. Bayibolo likamba mwakuwerezgawerezga vakukwaskana ndi kutuzgikapu kwa nyifwa ndipuso malayizgu ngaku Chiuta nga umoyu wambula kumala.—Wonani bokosi lakuti  “Kumala kwa Nyifwa.”

Yesu Khristu nayu wangukamba kuti: “Chenichi mbumoyu wamuyaya, kuti ŵanthu ŵakuziŵeni imwi, Chiuta yija muneneska ndi so Yesu Khristu mweniyo mungutuma.” (Yohane 17:3) Mwaviyo, te ndi chigomezgu chakuti nyifwa yazamutuwapu nadi. Yesu wasimikizga kuti ndi Chiuta pe yo wangatuzgapu nyifwa.