Linin, kintalatlawanakan tiku kimputumkan tlajaputunaw. Max nila kanajlayaw akxni niy tiku lu paxkiyaw. Komo nina lhuwa kata kgalhiyaw, max lakpuwanaw pi ni katiniw; lhuwa latamanin lakputsakgo xlakata ni nanikgo.

Tiku nikxni xniputunkgo wa faraones xalak Egipto. Lhuwa kilhtamaku xlimaxtukgo kxlatamatkan chu xlatamatkan lhuwa miles latamanin tiku xkamaskujukgo, kaj xlakata tlan xlatamakgolh putum kilhtamaku. Chuna limasiyakgo pirámides nema tlawakgolh... pero na limasiya pi ni makgantaxtikgolh.

Mapakgsinanin xalak China na xkgalhiputunkgo latamat nema ni xkgalhilh xlisputni, xlakan tanu tuku xtlawakgo: xtekgsputunkgo tuku xwakgolh nema xkamaxkilh latamat nema ni xkgalhilh xlisputni. Mapakgsina Qin Shi Huang kalimapakgsilh tiku xtlawanikgo tuku tlan xwalh, nema xmakgtayalh xlakata nikxni xnilh. Pero lhuwa uma nema xtlawakan xkgalhi mercurio. Max wa tuku makgnilh uma mapakgsina.

Chuna la wankgo makgapitsi tatsokgni, Juan Ponce de León, explorador xalak España ksiglo XVI, xputsama chuchut kCaribe tuku xmakgtayalh xlakata nikxni xkgololh. Akxni kilatapulilh tekgsli kachikin nema la uku wanikan Florida (Estados Unidos), pero nilh akxni xkatalachipama tiku xlamakgo kʼAmérica chu ni tekgsli chuchut nema xputsama.

Faraones, mapakgsinanin chu exploradores putsakgolh tuku nikxni xlinikgolh. Maski nitlan akxilhaw tuku xtlawakgo pero limasiya pi putum latamanin ni niputunkgo.

¿Tuku xlakata latamanin ni niputunkgo? Biblia wan xlakata kiMalakatsukinakan, Jehová: «Putum stlan tlawanit chu kxkilhtamaku. Chu kxnakujkan kawilininit pi ni naniputunkgo» (Eclesiastés 3:11). * Wa xlakata latamaputunaw putum kilhtamaku kxakastlan katiyatni, ni kajwatiya  80 kata (Salmo 90:10). Wa uma tuku lakaskin kinakujkan.

¿Tuku xlakata chuna wililh kkinakujkan pi nikxni naniputunaw? ¿Kaj xlakata nakinkamakgalipuwanan? Nila chuna nawanaw. Dios wanit pi namasputu linin. Biblia makglhuwa lichuwinan pi namasputu linin chu na wan pi Dios nakinkamaxkiyan latamat nema ni kgalhi lisputni. (Kaʼakxilhti recuadro  «Tlajakan linin».)

Jesucristo wa: «Wa cha yuma liwi latamat wa ntu xaliʼankgalhin, mpi nalakgapaskgoyan wix [...] Dios, talulokgtat, chu Jesucristo, wa nti wix malakgachanita» (Juan 17:3). Wa xlakata linin ni kintikatlajan. Pero chuna la wa Jesús, maklakaskinaw xtamakgtay Dios xlakata natlajayaw linin.