Nyifwa ni mulwani wakofya comene. Tikulimbana nayo na nkhongono zithu zose. Kanandi cikuŵa cakusuzga kuzomerezga para nyifwa yatipoka mubali withu. Nakuti nyifwa yikutora nanga mbawukirano ŵankhongono zawo.

Nangauli vili nthena, kweni mbanandi yayi awo ŵakughanaghanirapo vyakuti ŵangakhala kwamuyirayira nga umo ghakacitira mathemba gha ku Eguputo. Mathemba agha pamoza na ŵanchito ŵawo, ghakamalira nyengo yawo yinandi kuti panji ŵangayitonda nyifwa. Ukaboni wakuti ghakafwilirapo comene ni vimapilara ivyo ghakazenga kweni vikaphura kanthu yayi.

Mathemba ghanyake gha ku China nagho ghakaŵa na maghanoghano ghakuyana waka, nangauli igho ghakacita munthowa yakupambanako, cifukwa ghakagomezganga kuti pali munkhwala unyake uwo ukusazgirako umoyo. Themba linyake likati munthu uyo wakalipenjeranga munkhwala wabowozga munkhwala uwo ungawovwira kuti munthu waleke kufwa. Kweni vinthu ivyo ŵakasazganga vikaŵa na poyizoni wa Mercury, ndipo themba ili likwenera kuti likafwa na vinthu ivi.

Mu vyaka vya m’ma 1500, munthu munyake wa ku Spain wakufufuza malo, wakenda pa nyanja ya Caribbean kupenja munkhwala wakuti munthu waleke kucekura. Apo wakaŵa mukati kupenjerezga, wakasanga msumba wa Florida, U.S.A., ndipo vyaka vicoko waka vikati vyajumphapo wakakomeka pa kutimbana na ŵanthu ŵa ku America. Ndipouli munkhwala uwu wakawusanga yayi.

Ŵafaro, mathemba kweniso ŵakufufuza, ŵakayezgayezga kuti ŵaleke kufwa. Ka ni njani uyo wangasuska ivyo ŵakacitanga nangauli tingaleka kukolerana na umo ŵakacitira? Unenesko ngwakuti tose tikukhumba yayi kufwa.

Cifukwa wuli tikukhumba yayi kufwa? Baibolo likutiphalira cifukwa cake. Pakuyowoya za Mlengi withu  Yehova, * Baibolo likuti: “Wacita vyose vyakutowa mu nyengo yake; ndiposo wimika vya muyirayira mu mtima wa munthu.” (Mupharazgi 3:11) Taŵanthu tikukhumba kukondwa na cilengiwa kwamuyirayira, kwa vyaka 80 pera yayi. (Salmo 90:10) Ivi ndivyo tikukhumba.

Cifukwa wuli Ciuta wali kuŵika “vyamuyirayira” mu mitima yithu? Kasi wakakhumbanga kuti watikhuŵazge waka? Napacoko pose. Nakuti Ciuta wakutilayizga kuti wazamuthereska nyifwa. Baibolo likuti nyifwa yizamumara ndipo layizgo la Ciuta la umoyo wamuyirayira lizamufiskika. Wonani bokosi lakuti,  “Nyifwa Yizamumara.”

Yesu Khristu nayo wakati: “Kuti ŵaŵe na umoyo wamuyirayira, ŵakwenera kumumanyani imwe Ciuta waunenesko yekha, ndiposo Yesu Khristu, mweneuyo mukamutuma.” (Yohane 17:3) Ntheura, tili na cigomezgo cose kuti nyifwa yizamumara. Nakuti Yesu wakutisimikizgira kuti ni Ciuta yekha uyo wangamazga nyifwa.