Olofa unyali umue uvĩ. Tu pondola oku liyaka lolofa, longusu yetu yosi. Eci tu fisa umue ngandietu, ca tĩla calua oku tava kondaka yaco. Eci tu kasi amalẽhe, tu sima okuti unyali waco lalimue eteke a tu sanga. Tu kakatela calua kovisimĩlo viaco.

Koloneke vilo ka kuli omanu valua va tava okuti omunu ka fi, ndeci ca enda oku sima va Fareo kosimbu. Ovo kumue lolonalavayi viavo va enda oku sandiliya oku yuvula olofa. Pole, olonjo viavo vioku kenda olosoma vi lekisa okuti ovisimĩlo viavo ka via tẽlisiwile.

Olombiali vio ko China via kuatelevo ovisimĩlo vioku seteka oku yuvula olofa, pole, lonjila yimue ya litepa. Ovo va enda oku nyua ovihemba vimue vi tukuiwa hati, elixir da vida. Ombiali yimue yi tukuiwa hati, Qin Shi Huang wa pinga kolonoño viaye oco vi sandiliye ovihemba vimue vi pondola oku tutuiya olofa. Vialua pokati kovihemba viaco, via pangiwa lohule womerkúrio kuenje vio ponda.

Kunyamo wo 1513 K.Y. onoño yimue yoko Espanya o tukuiwa hati, Juan Ponce de León wa enda toke kofeka yo Caribe oku sandiliya ono yoku amamako oku kala umalẽhe. Eci a kala volupale luo Florida kofeka yo Estados Unidos wa limbukamo uloño umue, pole wa fa kuyaki wa lingiwa la vakuafeka yo Amerika. Ono yoku amamako oku kala umalẽhe ka ya sangiwile.

Va Fareo, olombiali, kuenda olonoño, va sandiliya onjila yoku yuvula olofa. Helie pokati ketu o sepula ocimãho cavo ndaño okuti ka tua solele onjila va kuama? Ocili okuti vosi yetu tu yongola oku amamako oku kala lomuenyo.

Momo lie tua suvukila olofa? Embimbiliya li lombolola esunga liaco. Catiamẽla Kululiki wetu  Yehova Suku, * olio li popia ndoco: “Cosi wa ci posuisila uvo waco. Wa kapa elivelo lievi ka vi pui vutima womanu.” (Ukundi 3:11) Tu pondola oku sanjukila eposo liongongo otembo ka yi pui, okuti ka tu cilingi lika vokuenda kueci ci soka 80 kanyamo. (Osamo 90:10) Eci oco utima wetu u yongola.

Momo lie Suku a kapela vutima wetu onjongole yoku kala “otembo ka yi pui”? Anga hẽ wa ci lingila oco a tu sumuise? Sio, hacoko. Suku wa tu likuminya okuti olofa vi ka yuliwa. Embimbiliya li tukula olonjanja vialua ondaka yoku malako olofa kuenda ohuminyo ya Suku yoku eca omuenyo ko pui.—Tanga vokakasia losapi hati,  “Oku Yula Olofa.”

Yesu Kristu wa popia hati: “Omuenyo ko pui wowu, oku ku kũlĩha, ove lika vu Suku yocili, loku kũlĩhavo Yesu Kristu, u wa tuma.” (Yoano 17:3) Ocisimĩlo coku yula olofa hacuhembiko. Yesu wa lekisa okuti, Suku eye lika o pondola oku tu lingila uyaki waco woku yula olofa.