An kamatayon makaharadlok nga kaaway. Nakikig-away kita hito tubtob han aton mahihimo. Posible makurian kita ha pagkarawat hito kon nahitatabo ito ha usa han aton hinigugma. O, tungod han kahimsog han pagkabatan-on, bangin diri naton hunahunaon nga posible ito mahitabo ha aton—usa nga ilusyon nga aton gintitipigan tubtob han aton mahihimo.

An mga Paraon naghingyap gud nga magin imortal. Ginamit nira an kadak-an nga bahin han ira kinabuhi, ngan an kinabuhi han ira yinukot nga uripon, ha pangalimbasog nga diri mamatay. An mga piramid nga ira gintukod nagpapamatuod han ira pangalimbasog ngan kapakyasan.

Naghingyap liwat an mga emperador ha Tsina han imortalidad, kondi ha iba nga paagi—pinaagi han irimnon nga may-ada milagroso kuno nga sangkap. Ginsugo ni Emperador Qin Shi Huang an iya mga alchemist nga maghimo hin milagroso nga tambal nga makakapugong han kamatayon. Kondi damu han ira ginhimo an may sangkap nga makahirilo nga mercury, ngan usa hito an posible nagin hinungdan han iya kamatayon.

Han ika-16 ka siglo C.E., hi Eksplorador Juan Ponce de León han Espanya naglayag ha Caribbean ha pagpamiling kuno hin burabod han pagkabatan-on. Samtang ginbubuhat ito, nadiskobrehan niya an Florida, E.U.A., kondi namatay paglabay hin pipira ka tuig katapos makig-away ha mga nitibo han Amerika. Pero waray burabod han pagkabatan-on nga nabilngan.

An mga Paraon, emperador, ngan eksplorador ngatanan naghingyap nga diri mamatay. Ngan hin-o ha aton an puydi magminos han ira tumong, bisan kon nadiri kita han ira mga pamaagi? Ha aton kasingkasing, waray usa ha aton an naruruyag mamatay.

Kay ano nga nakikig-away kita kontra ha kamatayon? Ginbabaton han Biblia ito nga pakiana. May kalabotan han aton Maglalarang, hi Jehova nga Dios, * an Biblia nasiring: “Iya ginhimo an tagsa nga butang nga matahom ha panahon hini: iya man iginpahamutang an kadayonan ha ira [katawohan] kasingkasing.”  (Eklesiastes 3:11) Karuyag naton pahimulsan an makaruruyag nga tuna ha kadayonan, diri ha sulod la hin mga 80 ka tuig o sobra pa. (Salmo 90:10) Ito an hingyap han aton kasingkasing.

Kay ano nga iginbutang han Dios an “kadayonan” ha aton kasingkasing? Basi la ba mapakyas kita? Imposible ito. Ha kabaliktaran, an Dios nagsasaad nga mapipirde an kamatayon o mawawaray na ito. Pauroutro nga ginhihisgotan ito han Biblia ngan an saad han Dios nga kinabuhi nga waray kataposan.—Kitaa an kahon,  “Kadaogan Kontra ha Kamatayon.”

Hi Jesu-Kristo mismo nagsiring: “Nangangahulogan ini hin kinabuhi nga waray kataposan, an ira pagkilala ha imo, an amo la nga totoo nga Dios, ngan ha imo ginsugo, hi Jesu-Kristo.” (Juan 17:3) Salit an pakig-away kontra ha kamatayon diri kay waray kadaogan. Kondi, hi Jesus nagsiring nga an Dios la an makakapirde hito para ha aton.