Michelle: Mari mari Sofía, ayühun tayu peutun.

Sofía: Felei, müna cümei.

Michelle: Nehue chumül nütramcayu chum duamcülei Chau Dios pefilu taiñ cutrancaumequen. * Fentren tripantu ramtuuquen tüfachi dungu pien, doyelchi mai huesaque dungu mu rupalu tami ñuque feichi chocangelu tañi auto. ¿Chumlei tami ñuque?

Sofía: Huenche huenchelei, huelu fachantü cümelcalei.

Michelle: ¡Cümei tati! ¿Cüdautupelaimi tami nieal cüme raquiduam femngechi dungu rupan mu?

Sofía: Mai, ramtuuquen tunteñmayai taiñ cutrancaumequen.

Michelle: Cümei tami ramtun. ¿Acordapelaimi chem ñi ramtucünuel rupachi semana? Chau Dios com nehuen niei, fei ¿chumngelu petu catrütulafi ti cutrancahun?

Sofía: Mai, acordan tati.

Michelle: Petu tayu ngüneduamnon ñi chem pin ta Biblia, huiño peafuyu quiñeque dungu tayu nütramcael rupachi semana.

Sofía: Felei.

Michelle: Fütra cuifi quiñe huentru serfiquefilu ta Chau Dios ramtuhui chumngelu petu catrütulafi ti huesaque dungu. Huelu Chau Dios lladcülai, nielaimi feyentun pilaeyu.

Sofía: Mai, quimquelafun tüfa.

Michelle: Ca quimürpuyu Chau Ngünechen ayüquelai taiñ cutrancaumequen. Biblia feipi fütra cuifi cutrancaulu Chau Dios tañi pu che “quisu ca cutrantupiuquei”. * Cüme duamelqueiñmu ñi chumquen Chau Ngünechen.

Sofía: Felei tati.

Michelle: Cafei com nehuen nielu Chau Dios, apümcayafui ti cutrancahun chumül rume.

Sofía: Feita adümquelafiñ. Com nehuen nielu rume, ¿chumngelu petu apümlafi huesaque dungu?

Michelle: Hune peayu ñi feipin ta Biblia. Tüfa ta Génesis. ¿Eimi allcüpelaimi ti nütram Adán Eva engu ca tati fün ngenolu ñi iyal?

Sofía: Mai, quimeltungen tañi religion mu. Chau Dios feipifi engu ñi inoal ti fün anümca, huelu feyentulaingu.

Michelle: Felei. Huelu peayu chem ñi rupan petu ñi femnon engu ta tüfa. Ngüneduamaimi chumngelu cutrancaumequi pu che. ¿Papeltuafuimi Génesis capitulo 3 versiculo 1 puhualu 5?

Sofía: Mai, feipilei: “Fei tati filu doi coila ngünen-ngerquei itrocom ti pu culliñ meu tañi deumael ta Ngünechen, fei ti filu ramtufi ti domo: ‘¿Fei chem pieimumeu anta Ngünechen? ¿Feipi tamu inoafiel quiñe anümca ñi fün no rume mülelu ti anümcahue meu?’ pifi. Fei ti domo lloudungueyu: ‘Com tati anümca ñi fün iyafuyu, huelu ngelai tayu iyafiel rangi ti anümcahue meu mülechi anümca ñi fün. Ngünechen ta feypieyumeu tayu inoafiel ca tayu tunoafiel rume tüyechi anümca ñi fün, fei femliyu tayu layal’. Huelu tati filu feipifi ti domo: ‘Feingelai tamu layal. Ngünechen ta cüme quimniei ifilmu tüfeichi anümca ñi fün, quimaimu tati cümeque dungu ca tati cümenolu, fei ta famngechi ta Ngünechen reque ta feleaimu’”

Michelle: Chaltu. Ngüneduamayu tüfachi versiculo. Hune feipi quiñe filu ñi nütramcafiel ta Eva. Huelu Biblia ca feipilei tüfa ta Satanás chi Huecüfü, fei dungulfi ta quiñe filu. * ¿Chau Ngünechen feipi tamu inoafiel feichi fün anümca? pifi. Huelu, ¿chem pieyu Chau Ngünechen ñi rupayafel engu ifile feichi fün anümca?

Sofía: Feipieyu ñi layal engu.

Michelle: Felei tati. Huelu fei hula ti Huecüfü dalluntucufi ta Chau Ngünechen. Feingelai tamu layal pi. Coilatufe pifi ta Chau Dios.

Sofía: Turpu allcüquelafun ñi chem pin ta Huecüfü.

Michelle: Huecüfü coilatufe pifilu ta Chau Dios, mülefui ñi rupayal fentren tripantu tañi huiñoldungungeal. ¿Chumngelu cai?

Sofía: Mmm, quimlan.

Michelle: Quiñe pengelün dungu. Quiñe antü iñche feipieyu : “Iñche ta doi nehuen-ngen ta eimi mu”. ¿Chumngechi pengelafuimi ñi huelulcalen iñche?

Sofía: Mür pengelafuyu tunte tayu nehuen-ngen.

Michelle: Felei, huitrañpüramafuyu quiñe chemcün rume fanelu. Müchai müten quimfalngeai inei doi nehuen-ngei.

Sofía: Mai.

Michelle: Huelu rüf dunguquelaimi pieliyu, ¿müchai quimfalcünungeai ti rüf dungu?

Sofía: Femlai.

Michelle: Doi cüdaungei pengelal ñi rüf dunguquen quiñe che.

Sofía: Felei tati.

Michelle: Ñi quimngeal tami rüf dunguquen, mülei ñi rupayal tiempo, fei pu che peai tami femquen.

Sofía: Feingei.

Michelle: Huiño inaduamaiñ Génesis ñi feipin. ¿Doi nehuen-ngen ta Chau Dios mu pipei mai ta Huecüfü?

Sofía: Feipilai.

Michelle: Chau Dios müchai müten pengelafui tañi doi nehuen-ngen. Feimu Huecüfü feipi Chau Dios ñi rüf dunguquenon. Feipifi reque ta Eva: “Chau Dios coilatumequeimu, iñche ta rüf dunguquen”.

Sofía: Tüfei nga.

Michelle: Chau Ngünechen rume quimün-ngei, feimu quimniefui ñi duamfalngen tañi rupayal tiempo. Femngechi cüme quimngeafui inei ñi coilatun, Chau Dios cam Huecüfü.

Sofía: Huelu lalu Eva, quimfali Chau Dios ñi rüf dungun, ¿felei?

Michelle: Mai piafuiñ. Huelu quiñe dungu petu quimfal-lafui. Huiño ngüneduamnge ti versiculo 5, ¿ca chem feipifi Huecüfü ta Eva?

Sofía: Ifilmi ti fün, com quimaimi pifi.

Michelle: Mai. Cafei “Ngünechen reque ta feleaimi” pi, “quimaimi ti cüme dungu ca tati cümenolu”. Femngechi dalluntucufi ta Chau Dios ñi cüpa eluquenofiel cümeque dungu tati pu che.

Sofía: Felei tati.

Michelle: Tüfachi dungu mu Huecüfü ca dalluntucufi ta Chau Dios.

Sofía: ¿Chumngelu?

Michelle: Huecüfü feipifi ta Eva ca feipieiñmu reque ta com iñchiñ doi cümelcaleaiñ püntüleliyiñ Chau Dios mu. Feimu Chau Jehová eli ñi rupayal tiempo, femngechi Huecüfü pengelafui ñi rüfngepen mai tañi feipin. Elufi ñi ngünenieal ti Mapu. Feimu cutrancaumequei ta che Mapu mu, petu ngünenielu cai ti Huecüfü, Chau Dios no. * Huelu mülei cümeque dungu.

Sofía: ¿Chem cümeque dungu?

Michelle: Ngüneduamnge chem quimeltuquei Biblia Chau Dios mu. Feipi taiñ fülmanieteu Chau Dios taiñ cutrancahun mu. Peafiyu quiñe dungu ñi huirintucun David Salmo 31:7 mu. Fei rume cutrancahui, huelu ngüneduamnge ñi chem pifiel ta Chau Dios. ¿Papeltuafuimi ti versiculo?

Sofía: Mai, feipilei: “Tami nor piuqueyen ayühulpiuqueneu, penielu cai eimi tañi hueñancülen; ca cüme quimnieimi iñche tañi fütra cutrantupiuquelen”.

Michelle: Fei cutrancaulu rume ta David, cüme duamcületui quimnielu Chau Dios ñi penieteu tañi huesa rupan. Chau Jehová com peniei taiñ rupan, taiñ cutrantupiuquelen cütu, quimnole rume ta caquelu che. ¿Cüme duamelqueimu quimal tüfachi dungu?

Sofía: Cüme duamelqueneu llemai.

Michelle: Cafei Biblia feipi puhuai ti antü Chau Ngünechen ñi fentecünual taiñ cutrancahun. Cafei quimeltuquei pichiñma mu apümcayafi chem ñi ngünenieel ta Huecüfü. Fei com cüme elcünutuafi. Cüme elcünutuai ti huesaque dungu tami rupan eimi ca tami ñuque. ¿Ayüafuimi iñche ñi huiñotual ca semana? Pengelelafeyu chumngelu maneluhuafuiñ ñi pichilehuen tañi afal huesaque dungu. *

Sofía: Mai, cümeafui.