Miri: Bula Sala. O bulabula tiko?

Sala: Io.

Miri: Ena macawa sa oti, daru veitalanoataka na rai ni Kalou me baleta na noda rarawa. * O kaya ni qo e dua na ka o dau lomatarotarotaka tu, vakabibi ena gauna a coqa kina o tinamu. Ia sa vakacava toka o Na?

Sala: So na siga e vinaka, so na siga e ca sara. Ia, nikua e vinaka toka.

Miri: Au kila ni sega ni rawarawa na ituvaki o sotava tiko.

Sala: E dredre dina. So na gauna au sa sega ni vosota rawa niu raica ni rarawa voli o Na.

Miri: Na ituvaki va qori e levu tale ga era sotava tu, sega ni o iko duadua. Se nanuma tiko ni bera niu biubiu ena macawa sa oti, au tarogi iko se cava na vuna e vakalaiva kina na Kalou meda rarawa ni tu vua na kaukaua me vakaotia?

Sala: Io, au se nanuma tiko.

Miri: Daru na veivosakitaka nikua na kena isau vakaivolatabu, ia ni bera ya, daru na taleva eso na ka daru veitalanoataka ena macawa sa oti.

Sala: Sa donu.

Miri: Daru veitalanoataka nona taroga e dua na turaga yalodina ena gauna vakaivolatabu se cava e vakalaiva kina na Kalou meda rarawa. Ia a sega ni bau cudruvi koya na Kalou se tukuna ni lailai nona vakabauta.

Sala: Au se qai rogoca vakadua.

Miri: Daru veivosakitaka tale ga ni sega ni taleitaka na Kalou o Jiova meda rarawa. Kena ivakaraitaki, e tukuna na iVolatabu ni “rarawa . . . ko koya” ena gauna era rarawa kina na nona tamata. * O lomavakacegu ni o kila ni kauaitaka dina na Kalou na rarawa o sotava?

Sala: Io.

Miri: Daru dikeva tale ga ni tu vua na Dauveibuli na kaukaua me vakaotia na rarawa.

Sala: Oi, ke va qori, na cava e vakalaiva kina na Kalou meda rarawa?

Miri: Daru na raica na isau ni nomu taro ena Vakatekivu. O kila na kedrau italanoa o Atama kei Ivi kei na vuanikau vakatabui?

Sala: Io, keimami vulica qori ena neimami wilivola ni Sigatabu. Erau beca na ivakaro ni Kalou me rau kua ni kana mai na dua na kau e tu e loma ni were.

 Miri: Vinaka. Daru raica mada se yaco vakacava me rau lai talaidredre o Atama kei Ivi, daru na kila kina na vuna eda rarawa voli kina. Rawa ni o wilika mai na Vakatekivu wase 3, tikina 1 ina 5?

Sala: “Sa lawaki na gata ka lialia na manumanu kecega ni vanua ka bulia na Kalou ko Jiova. A sa kaya ko koya vua na yalewa, Oi, sa kaya bagi na Kalou mo drau kakua ni kania na vua ni kau kecega e na were? A sa kaya na yalewa ki na gata, Sa tara me keirau kania na vua ni veikau e na were: ia na vua ni kau ga sa tu e loma ni were, sa kaya kina na Kalou, Drau kakua ni kania, drau kakua talega ni tara, de drau mate. A sa kaya vua na yalewa na gata, Drau na sega dina ni mate: ni sa kila na Kalou e na siga drau na kana kina ena qai yadra dina na matamudrau; ia drau na vaka na Kalou, ni drau na kila na ka vinaka kei na ka ca.”

Miri: Vinaka. Daru raica mada vakalekaleka na veitikina qo. Kena imatai, a vosa vei Ivi e dua na gata. Ena dua tale na tikinivolatabu e tukuna ni o Setani sara ga a vakayagataka na gata me nona waqawaqa me vosa kina vei Ivi. * A vakatarogi Ivi ena ka e vakarota na Kalou me baleta na vunikau vakatabui. Na cava na kedrau itotogi ke rau kana mai kina?

Sala: Erau na mate.

Miri: Koya sara ga qori. Ia ena vosa e tarava, e beitaka sara ga na Kalou o Setani, qai kaya: “Drau na sega dina ni mate.” E tukuna tiko o Setani ni lasu na Kalou!

Sala: Au se qai rogoca vakadua qori.

Miri: Ni tukuna gona o Setani ni lasulasu na Kalou, ena taura na gauna me qai vakadeitaki na nona ile. O kila na vuna?

Sala: Sega.

Miri: Ena matata beka keu vakatauvatana va qo. Kaya mada keu tukuna niu kaukaua cake vei iko. Ena kilai vakacava ni dina na ka au tukuna?

Sala: Ena vakatovolei mada me qai laurai.

Miri: Donu. Daru na laveta e dua na ka bibi me qai laurai se o cei vei kedaru e laveta rawa. E rawarawa sara nodaru vakadeitaka se o cei e kaukaua vei kedaru.

Sala: Dina.

Miri: Ia vakacava keu tukuna niu yalodina cake vei iko? Ena duatani sara ya, se vakacava?

Sala: Io, dina.

Miri: O nanuma ni rawarawa me vakadeitaki nona yalodina e dua?

Sala: Sega.

Miri: Na sala ga daru na vakadinadinataka kina se o cei vei kedaru e yalodina oya mera raica eso tale na ka daru cakava ena loma ni dua na gauna.

Sala: Io.

Miri: Raica tale mada na ka e tukuna o Setani ena Vakatekivu. E kaya beka o koya ni kaukaua cake vua na Kalou?

Sala: Sega.

Miri: Ni rawa sara ga ni vakaraitaka na Kalou ni kaukaua vei Setani. Sa qai beitaka ni lasulasu na Kalou. E vaka ga e tukuna vei Ivi o Setani, ‘E dina na ka au tukuna, e lasu na Kalou.’

Sala: Oi sa dina.

Miri: E kila vinaka na Kalou ni sala duadua ga me na vakadinadinataki kina na ile i Setani, ya me solia na gauna me na qai kilai kina se o cei e dina.

Sala: Ena gauna e mate kina o Ivi, e sega beka ni vakadeitaka ya ni dina na ka e tukuna na Kalou?

 Miri: E dina qori. Ia e levu tale na ka e okati ena ile i Setani. Raica tale mada na tikina e 5. O kila se cava tale e tukuna o Setani vei Ivi?

Sala: E tukuna ni gauna ena kania kina na vuanikau, ena qai yadra na matana.

Miri: Io, e tukuna tale ga ni na ‘vaka na Kalou, ena kila na ka vinaka kei na ka ca.’ A kaya tiko o Setani ni Kalou e vunitaka tiko e dua na ka vinaka vei keda.

Sala: Oi, sa dina.

Miri: E torosobu dina na veibeitaki ya.

Sala: Cava na vuna?

Miri: E tukuna tiko o Setani ni na vinaka cake na nona bula o Ivi kei ira na nona kawa ke sega ni liutaki ira na Kalou. E kila gona o Jiova ni na gadrevi me soli vei Setani na gauna me vakadinadinataka na ka e tukuna. E vakalaiva kina na Kalou me liutaka na vuravura qo. Sa rauta me levu tu nikua na rarawa ni liutaka tiko na vuravura o Setani, sega ni Kalou. * Ia e dua na ka vinaka sa na vakarau yaco.

Sala: Na cava ya?

Miri: Na iVolatabu e vakavulica e rua na ka dina me baleta na Kalou. Kena imatai, o Jiova e kauai dina nida sotava na rarawa. Kena ivakaraitaki, raica mada na vosa i Tui Tevita ena Same 31:⁠7. E levu sara na ituvaki rarawataki e sotava, ia dikeva na nona qaqanimasu. O rawa ni wilika mai?

Sala: E kaya: “Au na reki ka marau e na nomuni yalololoma; kemuni sa vakananuma na noqu rarawa; kemuni a kila na kena veivakararawataki ni yaloqu.”

Miri: Dina ga ni sotava o Tevita na ka rarawa, e lomavakacegu ni kila ni raica vinaka tu o Jiova na ka kece qori. O lomavakacegu tale ga ni o kila ni raica tu o Jiova na ka kece o sotava, na ka mada ga era sega ni kila eso tale?

Sala: Io.

Miri: Na ikarua ni ka dina me baleta na Kalou ya ni na sega ni vakalaiva me yaco tu ga na veika rarawa eda sotava. E vakavulica na iVolatabu ni sa voleka ni vakarusa na veiliutaki ca i Setani. Ena vakaotia tale ga na rarawa kece, okati kina na rarawa drau sotava tiko vakaveitinani. E tiko na vuna eda nuidei kina ni na vakaotia na rarawa na Kalou. O na vinakata me daru veivosakitaka ena macawa mai qo? *

Sala: Sa donu.