Michelle: Hi, Sophia. Nama berita?

Sophia: Manah.

Michelle: Minggu nyin tadi tua bisi berandau pasal asai ati Petara bekaul enggau pemerinsa ke ditapi kitai. * Nuan madah ngagai aku nuan bisi berunding pasal utai tu, kelebih agi pengudah indai nuan eksiden ba jalai alun. Baka ni gaya indai nuan diatu?

Sophia: Tusah deka nyebut. Tang saritu OK ga iya.

Michelle: Manah nya enti iya gerai. Utai tu tentu tusah ba nuan, enda pia?

Sophia: Au. Kadang-kadang aku berunding, ni pengelama iya patut merinsa.

Michelle: Aku meretika asai ati nuan. Kati nuan agi ingat tanya ke ditinggalka aku minggu nyin tadi, “Nama kebuah Petara nejuka pemerinsa nyadi enti Iya bisi kuasa muai semua pemerinsa?”

Sophia: Au, aku agi ingat.

Michelle: Sebedau tua meda saut ari Bup Kudus, aram tua ngelansa baru utai ti dikerandau tua minggu nyin tadi.

Sophia: OK.

Michelle: Kesatu, kitai udah belajar, nembiak Petara ke tetap ati ba jeman Bup Kudus mega kala nanya, nama kebuah Petara nejuka pemerinsa nyadi. Tang Petara enda nganu sida, tauka semina ngasuh sida ngeringka pengarap agi.

Sophia: Au aku nadai kala berunding pasal utai nya.

Michelle: Kedua, kitai mega belajar, Petara Jehovah enda rindu meda kitai merinsa. Ambika chunto, Bup Kudus madahka, Petara tusah ati lebuh meda nembiak Iya merinsa. * Endaka kitai berasai lantang lebuh nemu asai ati Petara bekaul enggau pemerinsa ke ditapi kitai?

Sophia: Au, tentu kitai berasai lantang.

Michelle: Lalu ke penudi, tua mega besetuju Petara bisi kuasa ti amat besai. Lalu Iya tentu ulih muai pemerinsa kitai ba sebarang maya.

Sophia: Nya meh utai ti ngasuh aku charut runding. Nama kebuah Petara nejuka semua utai jai nyadi enti Iya bisi kuasa muai semua utai jai nya?

Michelle: Kena nemu saut ngagai tanya nuan, aram muka Bup Kudus ngagai bup Pemungkal. Kati nuan agi ingat cherita pasal Adam seduai Awa enggau buah ke ditagang nya?

Sophia: Au aku kala belajarka nya ba sekula gerija maya Hari Minggu. Petara madah anang makai buah ari kayu nya, tang seduai iya enda ningaka jaku Petara.

Michelle: Betul nya. Diatu aram tua meda utai ke nyadi sebedau Adam seduai Awa bedosa. Utai tu amat beguna laban iya bisi kaul enggau kebuah mensia merinsa. Ulih nuan nulung macha Pemungkal bagi 3, ayat 1 ngagai 5?

Sophia: OK. ‘Nyadi ular nya jelu ti pintar agi ari semua jelu bukai ti udah digaga Petara Jehovah. Ular nya lalu bejaku ngagai indu nya, “Kati amat Petara enda nyagi seduai makai buah ari semua kayu ti dalam kebun tu?” Disaut indu nya, “Kami duai tau makai buah ari sebarang kayu dalam kebun tu, tang Petara madahka kami duai enda tau makai buah ari kayu ti ba tengah-tengah kebun, tauka negu buah kayu nya, enggai ke kami duai mati.” Tang ku ular nya nyaut indu nya, “Enda seduai mati, laban Petara nemu, lebuh seduai makai buah nya, seduai deka nyadi sebaka enggau Petara, nemu ngelala bida entara utai ti manah enggau utai ti jai.”’

Michelle: Terima kasih. Aram beratika ayat tu. Keterubah, peratika seiku ular ke benung bejaku enggau Awa. Ayat Bup Kudus kebukai nunjukka Antu Sitan nya meh ke bejaku nengah ular nya. * Sitan nanya Awa pasal pesan Petara bekaul enggau kayu nya. Nitih ku Petara, nama deka nyadi enti Adam enggau Awa makai buah nya?

Sophia: Seduai iya deka mati.

Michelle: Amat nya. Utai ke dipadah Sitan nya siti jaku tuduh ti amat besai ngagai Petara. Sitan madah: “Enda seduai mati.” Reti iya Sitan nuduh Petara nya pemula!

Sophia: Aku enda kala ninga pasal tu.

Michelle: Lebuh Sitan nuduh Petara pemula, iya udah betanyaka siti pekara ke begunaka awak ngambika pekara nya ulih diputarka. Nemu nuan nama kebuah iya?

Sophia: Hmm. Enda nemu aku.

Michelle: Uji gambarka enti aku madah, aku tu kering agi ari nuan. Baka ni nuan deka nunjukka utai ke dipadah aku enda amat?

Sophia: Engka tua ulih ngaga siti test.

Michelle: Au betul. Engka tua ulih milih siti utai ke berat lalu meda sapa entara tua ke ulih ngangkat iya. Kebendar iya, amat senang deka nunjukka sapa ke kering agi.

Sophia: Au, aku setuju.

Michelle: Tang, baka ni enti aku madah aku lurus agi ari nuan. Endaka utai tu tusah deka ditemu?

Sophia: Au, amat ga nya.

Michelle: Pia mega lurus ati ukai baka pengering ke ulih ditunjukka nengah test biasa aja.

Sophia: Betul.

Michelle: Semina siti aja chara kena nunjukka orang nya lurus tauka enda, iya nya enggau nejuka siti timpuh belalu. Enggau nya orang bukai ulih meda sapa entara tua ke lurus agi.

Sophia: Au amat nya.

Michelle: Diatu, aram tua meda baru cherita ba bup Pemungkal. Kati Sitan madahka diri kering agi ari Petara?

Sophia: Enda.

Michelle: Senang aja Petara deka nunjukka Diri kering agi ari Sitan. Nya kebuah Sitan madahka diri lurus agi ari Petara. Enggau jaku bukai, iya madah ngagai Awa, “Petara ngemulaka nuan, tang aku meh ke madah utai ti bendar.”

Sophia: Em, betul ga nya.

Michelle: Jehovah amat pintar, lalu Iya nemu chara ti pemadu manah kena mutarka jaku tuduh Sitan iya nya enggau nejukka siti timpuh belalu. Pengujung iya, kitai deka nemu sapa ke amat sereta sapa ke bula.

Sophia: Tang sepengudah Awa mati, endaka tu nunjukka utai ti dipadah Petara nya amat?

Michelle: Nya amat, tang kebendar iya, jaku tuduh Sitan ukai naka nya aja. Uji peda baru ayat 5. Nama utai bukai ke dipadah Sitan ngagai Awa?

Sophia: Sitan madah enti Awa makai buah nya, runding iya deka tebuka.

Michelle: Au, iya deka ‘nyadi sebaka enggau Petara, nemu ngelala bida entara utai ti manah enggau utai ti jai.’ Nyadi Sitan madahka, Petara benung ngenanka utai ti manah ari mensia.

Sophia: Diatu baru aku nemu.

Michelle: Nya mega siti jaku tuduh ti amat besai.

Sophia: Nama reti ku nuan?

Michelle: Ari jaku nya, Sitan madahka Awa enggau semua mensia deka gaga agi enti enda dipegai Petara. Bekaul enggau tu, Jehovah mega nemu, chara ti pemadu manah kena mutarka jaku tuduh tu iya nya enggau nejuka Sitan nunjukka bukti utai ti dipadah iya amat. Ketegal nya Petara ngemendarka Sitan merintah dunya tu enda lama. Nya meh kebuah mayuh pemerinsa nyadi ngelingi kitai laban Sitai ke merintah dunya tu, ukai Petara. * Tang kitai bisi berita manah.

Sophia: Nama berita nya?

Michelle: Bup Kudus ngajar dua iti pemendar ti ngalitka ati pasal Petara. Kesatu, Jehovah ibuhka kitai lebuh kitai merinsa. Ambika chunto, perundingka jaku Raja David ke ditulis ba Masmur 31:7. David napi mayuh pemerinsa ba pengidup iya, tang peratika sampi iya ngagai Petara. Ulih nuan macha ayat nya?

Sophia: OK. Ku iya: “Aku deka lantang sereta rami gaga ketegal pengerindu Nuan ti meruan belama iya, laban Nuan udah meda pemerinsa aku. Nuan nemu penusah aku.”

Michelle: Nyadi taja pan David merinsa, tang iya bulih pengelantang laban iya nemu Jehovah ulih meda semua utai ti ditapi iya. Jehovah nemu semua utai ke benung nyadi nyengkaum pemerinsa ba emosi kitai ke engka enda dimeretika orang bukai. Kati nuan berasai lantang lebuh nemu tu?

Sophia: Au, aku tentu berasai lantang.

Michelle: Utai kedua ti ngalitka ati nya, Petara enda nejuka kitai merinsa belama iya. Bup Kudus ngajar, Petara deka ngujungka pemerintah Sitan ti jai. Iya mega deka muai semua utai ti enda manah, nyengkaum utai ti nyadi ba nuan enggau indai nuan. Ulih aku datai minggu baru, kena nerang ngagai nuan kebuah kitai ulih andal Petara deka ngujungka semua pemerinsa enda lama agi? *

Sophia: Au, ulih.