Wanja: Ũhoro waku nyina wa Njeri? Nĩ ndakena mũno nĩ gũgũkora mũciĩ.

Njoki: O na niĩ nĩ ndakena mũno nĩ gũkuona.

Wanja: Hĩndĩ ĩrĩa twĩrĩgaine, nĩ twarĩrĩirie ũrĩa Ngai aiguaga rĩrĩa tũranyamarĩka. * Na ũkĩnjĩra atĩ nĩ weyũrĩtie ũguo kaingĩ, na makĩria rĩrĩa mami wanyu aagũire na ngaari. Tamba ũnjĩre atĩrĩ, mami wanyu ahaana atĩa rĩu?

Njoki: Harĩ hĩndĩ ataraiguaga wega, no rĩu ti mũũru.

Wanja: Nĩ ndakena kũigua ũguo. No mũhaka ũkorũo nĩ ũreyũmĩrĩria mũno ũkĩhiũrania na ũndũ ũcio.

Njoki: Ti ũndũ mũhũthũ, no nĩ ndĩyũragia ekũnyamarĩka nginya rĩ.

Wanja: Andũ aingĩ nĩ meyũragia ũguo. Ngwĩhoka nĩ ũraririkana tũgĩtigana nĩ twoigire atĩ nĩ tũkaarĩrĩria kĩrĩa gĩtũmaga Ngai etĩkĩrie mĩnyamaro, o na arĩ na hinya wa kũmĩniina.

Njoki: Nĩ ndĩraririkana.

Wanja: Tũtanarĩrĩria ũrĩa Bibilia yugĩte-rĩ, reke twambe tũcokere hanini maũndũ marĩa twarĩrĩirie hĩndĩ ĩyo ĩngĩ.

Njoki: Hatirĩ na thĩna.

Wanja: Ũndũ ũmwe tuonire nĩ atĩ, harĩ mũndũ ũmwe mwĩhokeku ũgwetetwo Bibilia-inĩ, woririe Ngai kĩrĩa gĩatũmaga etĩkĩrie mĩnyamaro. Na tũkĩona atĩ Ngai ndaamũgũthũkĩire kana akĩmwĩra atĩ nĩ arabatara wĩtĩkio makĩria.

Njoki: Ũndũ ũcio nĩ wangenirie mũno.

Wanja: Ningĩ nĩ tuonire atĩ Jehova Ngai nĩ aiguaga ũũru kuona tũkĩnyamarĩka. Kwa ngerekano, rĩrĩa ndungata ciake cianyamarĩkaga, Bibilia yugaga “o nake nĩaathĩnĩkire.” * Na githĩ ũndũ ũcio ndũtwĩkĩraga ngoro kũmenya atĩ Ngai nĩ aiguaga ũũru rĩrĩa tũranyamarĩka?

Njoki: Ĩĩ, nĩ ũtwĩkĩraga ngoro.

Wanja: Nĩ twacokire tũkĩona atĩ, Ngai nĩ arĩ hinya mũingĩ mũno, na kwoguo arĩ na ũhoti, na no oe ikinya rĩa kũniina mĩnyamaro hĩndĩ o yothe.

Njoki: Na nĩkĩo ndĩroria atĩrĩ, nĩ kĩĩ gĩtũmaga Ngai arekererie maũndũ moru ũguo mekĩke, na arĩ na hinya wa kũmeheria?

Wanja: Nĩguo tuone macokio ma kĩũria gĩaku, reke twambe twarĩrĩrie ũndũ ũmwe ũrĩ thĩinĩ wa ibuku rĩa Kĩambĩrĩria. Hihi nĩ ũraririkana rũgano rwa Adamu na Hawa na ũrĩa meerĩtwo matikarĩe itunda rĩrĩa maakanĩtio?

Njoki: Ĩĩ, nĩ ndirikanaga rũgĩthomwo kanitha-inĩ. Ngai aamerĩte matikarĩe maciaro ma mũtĩ ũrĩa maakanĩtio, no o makĩrĩa.

 Wanja: Ĩĩ, nĩguo gwathire. Rĩu reke twarĩrĩrie maũndũ marĩa maatũmire Adamu na Hawa maage gwathĩka. Maũndũ macio nĩ makonainie na kĩũria kĩrĩa ũririe kĩa nĩkĩ gĩtũmaga tũnyamarĩke. No wende gũthoma Kĩambĩrĩria mũrango wa 3 mũhari wa 1 nginya 5?

Njoki: Reke thome. “Na rĩrĩ, nyamũ-ya-thĩ yarĩ na ũhinga gũkĩra nyamũ o na ĩrĩkũ thĩinĩ wa nyamũ iria ingĩ cia gĩthaka iria Jehova Ngai ombĩte. Nayo ĩkĩũria mũndũ mũka ũcio atĩrĩ, Anga Ngai nĩoigĩte atĩ mũtikanarĩe mũtĩ o na ũmwe wa mũgũnda ũyũ? Nake mũndũ mũka agĩcokeria nyamũ-ya-thĩ, akĩmĩĩra atĩrĩ, Maciaro ma mĩtĩ ya mũgũnda ũyũ, tũrĩ etĩkĩrie kũmarĩa; no rĩrĩ, ha ũhoro wa maciaro ma mũtĩ ũrĩa wĩ mũgũnda gatagatĩ-rĩ, Ngai oigĩte atĩrĩ, Mũtikanamarĩe, o na kana mũmahutie, nĩ getha mũtigakue. Nayo nyamũ-ya-thĩ ĩkĩĩra mũndũ mũka atĩrĩ, Aca, ti atĩ no mũhaka mũgakua, nĩ gũkorũo Ngai nĩoĩ atĩ mũthenya ũrĩa mũkamarĩa, hĩndĩ ĩo maitho manyu nĩmakahingũka, mũtuĩke o ta Ngai, mũmenyage wega o na ũũru.”

Wanja: Nĩ ngatho. Ta reke twarĩrĩrie mĩhari ĩyo hanini. Wa mbere, ta rora wone atĩ nyoka ĩyo yaaririe na Hawa. Ibuku rĩngĩ rĩa Bibilia rĩonanagia atĩ Shaitani ũrĩa Mũcukani nĩwe waaragia nake akĩhũthĩra nyoka. * Shaitani oririe Hawa ũrĩa Ngai aamerĩte igũrũ rĩgiĩ mũtĩ ũrĩa maakanĩtio. Hihi nĩ wona ũrĩa Ngai oigĩte kũngĩekĩkire mangĩarĩire maciaro maguo?

Njoki: Nĩ gũkua mangĩakuire.

Wanja: Ũcio nĩ ũhoro wa ma. Harĩ ũndũ Shaitani aacokire akiuga wa gũthitanga Ngai. Ta rora wone ũrĩa oigire: “Ti atĩ no mũhaka mũgakua.” Akiuga ũguo, eendaga kuonania atĩ Ngai nĩ wa maheeni!

Njoki: Hau ndirĩ ndaigua hagĩtaarĩrio.

Wanja: Rĩrĩa Shaitani oigire Ngai nĩ wa maheeni, aarehire thitango yabataraga ihinda yoneke kana nĩ ya ma kana ya maheeni. Ndiũĩ kana we nĩ wona ũguo?

Njoki: Hmm. Hau ndinanyita.

Wanja: Kĩreke ngũtaarĩrie hanini. Kwa ngerekano-rĩ, ingĩkwĩra atĩ ndĩna hinya gũgũkĩra-rĩ, tũngĩka atĩa nĩguo tũmenye ũrĩa wĩna hinya gũkĩra ũrĩa ũngĩ?

Njoki: No twĩthimire tuone nũũ wĩna hinya kũrĩ ũrĩa ũngĩ.

Wanja: Ũcio nĩ ũhoro wa ma. Hihi ũrĩa tũngĩka, nĩ kwĩgereka na kĩndũ kĩritũ, tuone nũũ ũngĩhota gũkĩoya. Nĩ wona kũmenya ũrĩa ũrĩ na hinya ti ũndũ mũritũ?

Njoki: Rĩu nĩ ndanyita.

Wanja: Ĩ rĩu handũ ha kuuga ndĩna hinya gũgũkĩra-rĩ, njuge wee waragia maheeni, na niĩ njaragia ma? Githĩ ũndũ ũcio ti ngũrani na rĩrĩa ndoiga ndĩna hinya gũgũkĩra?

Njoki: Nĩ ma, no . . . woiga ũguo nĩkĩ?

Wanja: Nĩ tondũ wĩhokeku ndũhaana ta hinya atĩ nĩ ũgũthimwo na njĩra ya kwĩra mũndũ oe kĩndũ kĩritũ. Kana tiguo?

Njoki: Ĩĩ, nĩguo.

Wanja: Nĩguo kũmenyeke wega nũũ mwĩhokeku-rĩ, githĩ to mũhaka ihinda rĩhĩtũke, nĩguo andũ mone nũũ gatagatĩ-inĩ gaitũ waragia ma?

Njoki: Ũcio nĩ ũhoro wa ma.

Wanja: Ta reke rĩu tũcoke ibuku-inĩ rĩa Kĩambĩrĩria. Hihi nĩ wonire ta Shaitani oigire atĩ, nĩ arĩ hinya kũrĩ Ngai?

Njoki: Aca.

Wanja: Ĩyo nĩ thitango Ngai angĩacokirie na ihenya mũno na onanie Shaitani nĩwe waaragia maheeni. Handũ ha ũguo, Shaitani oigire atĩ we nĩwe mwĩhokeku kũrĩ Ngai. Nĩ ta kwĩra eerire Hawa ũũ: ‘Ngai nĩ kũmũheenia amũheenagia, no niĩ ndĩramwĩra ũhoro wa ma.’

Njoki: Haiya, ndirĩ ndeciria ũguo.

Wanja: Tondũ Ngai arĩ ũũgĩ mũingĩ, onire njĩra ĩrĩa njega ya gũcokia thitango ĩyo ya Shaitani, nĩ kũreka ihinda rĩhĩtũke. Thutha mũtheri, nĩ kũngĩamenyekire wega nũũ hihi waaragia ma, na nũũ waaragia maheeni.

Njoki: No hĩndĩ ĩrĩa Hawa aakuire-rĩ, na githĩ gũtiamenyekire atĩ Ngai nĩwe waaragia ma?

 Wanja: Nĩ ma nĩ kwamenyekire. No Shaitani harĩ ũndũ ũngĩ eendaga kuonania. Ta rora rĩngĩ mũhari wa 5.Hihi nĩ wona ũndũ ũngĩ ũrĩa Shaitani eerire Hawa?

Njoki: Aamwĩrire atĩ, angĩarĩire itunda rĩu maitho make nĩ mangĩahingũkire.

Wanja: Ĩĩni, na atĩ, nĩ ‘angĩtuĩkire o ta Ngai, amenyage wega o na ũũru.’ Kwoguo, Shaitani endaga kuuga atĩ harĩ kĩndũ kĩega Ngai aimaga andũ.

Njoki: Nĩ ndona.

Wanja: Na ĩyo no thitango ĩngĩ nene.

Njoki: Nĩkĩ.

Wanja: Tondũ rĩrĩa Shaitani oigire ũguo, eendaga kuonania atĩ, Hawa o hamwe na andũ arĩa angĩ othe, matirabatara gũtongorio nĩ Ngai. Nĩ ũndũ ũcio, Ngai nĩ arekereirie Shaitani aathane gũkũ thĩ kwa ihinda. Na nĩkĩo andũ manyamarĩkaga ũguo; tondũ ti Ngai wathanaga gũkũ thĩ, ĩndĩ nĩ Shaitani. * No harĩ na ũhoro mwega.

Njoki: Ũhoro ũrĩkũ?

Wanja: Bibilia nĩ ĩtũrutaga maũndũ merĩ mega megiĩ Ngai. Wa mbere, Jehova nĩ onaga rĩrĩa tũranyamarĩka. Kwa ngerekano, ta wĩcirie ciugo cia Mũthamaki Daudi, iria irĩ thĩinĩ wa Thaburi 31:7. Daudi nĩ aacemanirie na mathĩna maingĩ mũno ũtũũro-inĩ wake, no ta rora wone ũrĩa eerire Ngai mahoya-inĩ. Hihi no wende gũthoma rĩandĩko rĩu?

Njoki: Ĩĩ, rĩroiga ũũ: “Niĩ no njanjamũke ngĩkenagĩra ũtugi waku, nĩ gũkorũo gũthĩnĩka gwakwa, wee nĩũkuonete; kũmenya nĩũmenyete ũrĩa ngoro yakwa yonete mĩnyamaro.”

Wanja: Nĩ ngatho. O na gũtuĩka Daudi nĩ aanyamarĩkire mũno, kũmenya atĩ Jehova nĩ onaga maũndũ marĩa mothe aacemanagia namo, nĩ kwamũũmagĩrĩria. Andũ no maage kũmenya maũndũ marĩa tũrahiũrania namo. No githĩ ti ũndũ wa gũtũũmĩrĩria, kũmenya atĩ Jehova nĩ aramenya ruo rwitũ rwa ngoro, na mathĩna marĩa tũcemanagia namo?

Njoki: Ĩĩni, kaĩ itagĩkena mũno kũmenya ũguo!

Wanja: Ũndũ wa kerĩ ũngenagia mũno nĩ atĩ Ngai ndegwĩtĩkĩria tũtũũre tũnyamarĩkaga. Bibilia ĩrutanaga atĩ ica ikuhĩ, Ngai nĩ ekũniina wathani mũũru wa Shaitani. Ningĩ nĩ ekũniina biũ maũndũ mothe moru marĩa Shaitani areheire andũ, o hamwe na maũndũ marĩa we na mami wanyu mũragerera. No wende ngooka kiumia kĩu kĩngĩ, tũkaarĩrĩria kĩrĩa gĩtũmaga tũkorũo na ma, atĩ Ngai ica ikuhĩ nĩ ekũniina mĩnyamaro yothe? *

Njoki: Nĩ ngaagweterera.