ການສົນທະນາກັບເພື່ອນບ້ານ
ເປັນຫຍັງພະເຈົ້າຍອມໃຫ້ມີຄວາມທຸກ?
ຕໍ່ໄປນີ້ເປັນຕົວຢ່າງການລົມກັນລະຫວ່າງພະຍານພະເຢໂຫວາກັບເພື່ອນບ້ານ. ຕອນນີ້ໃຫ້ເຮົານຶກພາບວ່າພະຍານພະເຢໂຫວາທີ່ຊື່ ມີນາກຳລັງເວົ້າກັບໂສພິດຢູ່ເຮືອນຂອງລາວ.
ພະເຈົ້າຮູ້ສຶກແນວໃດກັບຄວາມທຸກຂອງເຮົາ?
ມີນາ: ສະບາຍດີ ເອື້ອຍໂສພິດ ດີໃຈຫຼາຍທີ່ມື້ນີ້ເອື້ອຍຢູ່ເຮືອນ.
ໂສພິດ: ເອື້ອຍກໍດີໃຈທີ່ມື້ນີ້ໄດ້ເຈິນ້ອງ.
ມີນາ: ເທື່ອແລ້ວນີ້ເຮົາລົມກັນວ່າພະເຈົ້າຮູ້ສຶກແນວໃດເມື່ອເຫັນເຮົາມີຄວາມທຸກ. a ເອື້ອຍບອກວ່າຕັ້ງແຕ່ແມ່ເອື້ອຍຖືກລົດຕຳ ເອື້ອຍກໍສົງໄສມາຕະຫຼອດວ່າເປັນຫຍັງແມ່ຕ້ອງເຈິແຕ່ເລື່ອງບໍ່ດີແບບນີ້.
ໂສພິດ: ໂອ້! ນ້ອງຍັງຈື່ໄດ້ຢູ່ຫວາ.
ມີນາ: ໂດຍ ແລ້ວຕອນນີ້ແມ່ເອື້ອຍເປັນແນວໃດ?
ໂສພິດ: ກະສາມມື້ດີສີ່ມື້ໄຂ້ ແຕ່ມື້ນີ້ເບິ່ງຄືສົດໃສດີ.
ມີນາ: ທີ່ຈິງ ບໍ່ງ່າຍເນາະທີ່ຈະອົດທົນກັບເລື່ອງໜັກໆແບບນີ້ ເອື້ອຍເກັ່ງຫຼາຍ.
ໂສພິດ: ກະຍາກຢູ່ຄືກັນເດ. ບາງເທື່ອເອື້ອຍກໍຄິດວ່າແມ່ຈະຕ້ອງທົນຢູ່ໃນສະພາບນີ້ໄປອີກດົນປານໃດ.
ມີນາ: ຖ້າເປັນນ້ອງ ນ້ອງກໍຄິດແບບນັ້ນຄືກັນ. ເອື້ອຍຈື່ໄດ້ບໍ ເທື່ອແລ້ວນ້ອງເຄີຍບອກວ່າຈະກັບມາຕອບຄຳຖາມວ່າເປັນຫຍັງພະເຈົ້າຍອມໃຫ້ມີຄວາມທຸກເກີດຂຶ້ນແບບບໍ່ຮູ້ຈົບຈັກເທື່ອ.
ໂສພິດ: ອໍ ຈື່ໄດ້.
ມີນາ: ກ່ອນຈະເບິ່ງຄຳຕອບຈາກຄຳພີໄບເບິນ ເຮົາມາທົບທວນບາງເລື່ອງທີ່ເຮົາໄດ້ລົມກັນໄປແລ້ວດີບໍ?
ໂສພິດ: ໂດຍ
ມີນາ: ເລື່ອງໜຶ່ງກໍຄື ໃນສະໄໝຄຳພີໄບເບິນພະເຈົ້າຍອມໃຫ້ເລື່ອງບໍ່ດີເກີດຂຶ້ນກັບຄົນທີ່ສັດຊື່ຕໍ່ເພິ່ນ ແຕ່ພະເຈົ້າບໍ່ເຄີຍຮ້າຍເມື່ອເຂົາເຈົ້າຖາມເພິ່ນກ່ຽວກັບຄວາມທຸກທີ່ເກີດຂຶ້ນ ແລະບໍ່ເຄີຍບອກວ່າເຂົາເຈົ້າຕ້ອງມີຄວາມເຊື່ອໃຫ້ຫຼາຍກວ່ານີ້.
ໂສພິດ: ອືມ ເອື້ອຍບໍ່ເຄີຍຄິດມຸມນີ້ມາກ່ອນເລີຍ.
ມີນາ: ແລະເຮົາກໍລົມກັນວ່າພະເຢໂຫວາພະເຈົ້າບໍ່ມັກທີ່ເຫັນເຮົາມີຄວາມທຸກ ຕົວຢ່າງເຊັ່ນ ຄຳພີໄບເບິນບອກວ່າເມື່ອປະຊາຊົນຂອງເພິ່ນກຳລັງເຈິກັບຄວາມທຸກ ເພິ່ນຮູ້ສຶກ “ທຸກໃຈ.” b ເລື່ອງນີ້ເຮັດໃຫ້ເຮົາສະບາຍໃຈຂຶ້ນແມ່ນບໍ ເມື່ອເຮົາຮູ້ວ່າພະເຈົ້າກໍຮູ້ສຶກທຸກໃຈຄືກັບເຮົາ?
ໂສພິດ: ແມ່ນ
ມີນາ: ເຮົາໄດ້ຮຽນນຳວ່າພະເຈົ້າເປັນພະຜູ້ສ້າງທີ່ມີລິດອຳນາດມະຫາສານ. ດັ່ງນັ້ນ ຖ້າເພິ່ນຢາກກຳຈັດຄວາມທຸກໃຫ້ໝົດໄປເມື່ອໃດ ພະອົງກໍເຮັດໄດ້ທັນທີ.
ໂສພິດ: ຫັນແຫຼະ ເອື້ອຍເລີຍສົງໄສວ່າແລ້ວເປັນຫຍັງພະເຈົ້າຈຶ່ງຍັງບໍ່ລົງມືຈັກເທື່ອໃນເມື່ອເພິ່ນກໍມີອຳນາດທີ່ຈະເຮັດໄດ້?
ໃຜກັນແທ້ທີ່ເວົ້າຄວາມຈິງ?
ມີນາ: ໂອເຄ ເຮົາມາຫາຄຳຕອບຈາກຄຳພີໄບເບິນນຳກັນ ເລີ່ມຈາກປຶ້ມຫົວທຳອິດທີ່ຊື່ປະຖົມມະການ. ເອື້ອຍເຄີຍໄດ້ຍິນເລື່ອງອາດາມກັບເອວາ ຫຼືທີ່ຫຼາຍຄົນເອີ້ນວ່າເອວາ ແລະໝາກໄມ້ຕ້ອງຫ້າມບໍ?
ໂສພິດ: ໂດຍ ເອື້ອຍເຄີຍໄດ້ຮຽນເລື່ອງນີ້ຢູ່ໂຮງຮຽນສອນສາສະໜາວັນອາທິດ. ຢູ່ຫັ້ນສອນວ່າພະເຈົ້າຫ້າມກິນໝາກໄມ້ໃນສວນ ແຕ່ເຂົາເຈົ້າບໍ່ເຊື່ອຟັງແລ້ວກໍກິນເຂົ້າໄປ.
ມີນາ: ຖືກຕ້ອງ. ຕອນນີ້ໃຫ້ເຮົາມາເບິ່ງວ່າສິ່ງໃດຊັກຊວນອາດາມກັບເອວາໃຫ້ເຮັດບາບຕໍ່ພະເຈົ້າ ເຫດການນີ້ຈະຊ່ວຍເຮົາໃຫ້ຮູ້ຄຳຕອບວ່າເປັນຫຍັງເຮົາຕ້ອງເຈິກັບຄວາມທຸກ. ເອື້ອຍຈະຊ່ວຍອ່ານປະຖົມມະການ ບົດ 3 ຂໍ້ 1-5 ໄດ້ບໍ?
ໂສພິດ: ໂດຍ. “ໃນຈຳພວກສັດຕ່າງໆທີ່ພະເຢໂຫວາພະເຈົ້າສ້າງ ງູເປັນສັດທີ່ສະຫຼາດທີ່ສຸດ. ງູຖາມຜູ້ຍິງວ່າ: “ພະເຈົ້າຫ້າມພວກເຈົ້າບໍ່ໃຫ້ກິນໝາກໄມ້ທຸກຕົ້ນໃນສວນນີ້ແມ່ນບໍ?” ຜູ້ຍິງກໍຕອບງູວ່າ: “ພວກເຮົາກິນໝາກໄມ້ໃນສວນນີ້ໄດ້. ແຕ່ພະເຈົ້າບອກວ່າ ‘ຫ້າມກິນໝາກໄມ້ຈາກຕົ້ນໜຶ່ງທີ່ຢູ່ກາງສວນ ບໍ່ໃຫ້ຈັບ ບໍ່ໃຫ້ບາຍ ຖ້າເຮັດແບບນັ້ນພວກເຈົ້າຊິຕາຍ.’” ແລ້ວງູກໍບອກຜູ້ຍິງວ່າ: “ພວກເຈົ້າຊິບໍ່ຕາຍດອກ. ພະເຈົ້າຮູ້ຢູ່ແລ້ວວ່າ ຖ້າພວກເຈົ້າກິນໝາກໄມ້ຈາກຕົ້ນນັ້ນ ພວກເຈົ້າກໍຈະສະຫຼາດຂຶ້ນ. ພວກເຈົ້າຈະເປັນຄືກັບພະເຈົ້າ ຮູ້ຈັກດີແລະຊົ່ວ.’”
ມີນາ: ຂອບໃຈ. ໃຫ້ເຮົາມາເບິ່ງຈຸດທີ່ໜ້າສົນໃຈຢ່າງລະອຽດເທື່ອລະຂໍ້ເນາະ. ຈຸດທຳອິດ ສັງເກດວ່າງູເວົ້າກັບເອວາ ແຕ່ຂໍ້ຄຳພີອີກຂໍ້ໜຶ່ງອະທິບາຍວ່າແທ້ໆແລ້ວຄົນທີ່ເວົ້າກັບເອວາບໍ່ແມ່ນງູ ແຕ່ເປັນຊາຕານພະຍາມານ. c ຊາຕານຖາມເອວາກ່ຽວກັບຄຳສັ່ງທີ່ພະເຈົ້າຫ້າມກິນໝາກໄມ້ຈາກຕົ້ນໜຶ່ງ. ຕາມທີ່ເຮົາອ່ານ ເອື້ອຍເຫັນບໍວ່າອາດາມກັບເອວາຈະເປັນແນວໃດຖ້າກິນໝາກໄມ້ນັ້ນເຂົ້າໄປ ພະເຈົ້າຈະລົງໂທດເຂົາເຈົ້າແນວໃດ?
ໂສພິດ: ເຂົາເຈົ້າຈະຕາຍ.
ມີນາ: ແມ່ນແລ້ວ. ຂໍ້ຕໍ່ໄປບອກໃຫ້ເຮົາຮູ້ວ່າຊາຕານຈົງໃຈກ່າວຫາພະເຈົ້າ ພະເຈົ້າສັ່ງບໍ່ໃຫ້ກິນ ເພາະຖ້າກິນກໍຈະຕາຍ ແຕ່ຊາຕານເວົ້າກັບເອວາວ່າ ‘ເຈົ້າຈະບໍ່ຕາຍແທ້ດອກ’ ນັ້ນເທົ່າວ່າກັບຊາຕານກຳລັງບອກວ່າພະເຈົ້າຂີ້ຕົວະ.
ໂສພິດ: ເອື້ອຍບໍ່ເຄີຍໄດ້ຍິນເລື່ອງນີ້ມາກ່ອນເລີຍ.
ມີນາ: ເມື່ອຊາຕານກ່າວຫາພະເຈົ້າວ່າພະເຈົ້າຂີ້ຕົວະ ມັນເຮັດໃຫ້ເກີດຄຳຖາມທີ່ຕ້ອງໃຊ້ເວລາພິສູດ ເອື້ອຍຮູ້ບໍວ່າຍ້ອນຫຍັງ?
ໂສພິດ:ບໍ່ຮູ້ເດ
ມີນາ: ເອົາຈັ່ງຊິເນາະ ສົມມຸດວ່າມື້ໜຶ່ງນ້ອງບອກເອື້ອຍວ່ານ້ອງແຮງຫຼາຍກວ່າເອື້ອຍ ແຕ່ເອື້ອຍບໍ່ເຊື່ອ ເອື້ອຍຈະເຮັດແນວໃດ?
ໂສພິດ: ກໍຕ້ອງລອງພິສູດກັນເບິ່ງ
ມີນາ: ແມ່ນແລ້ວ ເຮົາອາດຈະແຂ່ງກັນຍົກເຄື່ອງ ແລ້ວກໍເບິ່ງວ່າໃຜຈະຍົກເຄື່ອງໄດ້ຫຼາຍກວ່າກັນ ຈະໄດ້ພິສູດວ່າໃຜແຂງແຮງກວ່າກັນ.
ໂສພິດ: ອໍ ເອື້ອຍນຶກພາບອອກລະ
ມີນາ: ຖ້າບໍ່ແມ່ນເລື່ອງຄວາມແຮງແຂງ ແຕ່ສົມມຸດນ້ອງບອກເອື້ອຍວ່ານ້ອງສັດຊື່ກວ່າເອື້ອຍເດ ອາດຈະພິສູດຍາກກວ່າແມ່ນບໍ?
ໂສພິດ: ອືມ. . .ກໍແມ່ນ
ມີນາ: ເພາະຄວາມສັດຊື່ບໍ່ໄດ້ວັດກັນງ່າຍໆຄືກັບຄວາມແຂງແຮງຂອງຮ່າງກາຍ
ໂສພິດ: ແນ່ນອນ
ມີນາ: ທີ່ຈິງ ວິທີດຽວທີ່ຈະຮູ້ໄດ້ວ່າລະຫວ່າງເຮົາສອງຄົນໃຜສັດຊື່ກວ່າກັນກໍຕ້ອງໃຫ້ເວລາເປັນເຄື່ອງພິສູດ
ໂສພິດ: ກໍແມ່ນແບບທີ່ນ້ອງເວົ້າ ຟັງເບິ່ງກໍມີເຫດຜົນດີເນາະ
ມີນາ: ບັດນີ້ໃຫ້ເຮົາກັບໄປເບິ່ງທີ່ປະຖົມມະການອີກເທື່ອໜຶ່ງ ຊາຕານອ້າງວ່າມັນແຂງແຮງກວ່າພະເຈົ້າບໍ?
ໂສພິດ: ບໍ່
ມີນາ: ຖ້າມັນອ້າງແບບນັ້ນພະເຈົ້າກໍພິສູດງ່າຍໆເລີຍແມ່ນບໍ? ແຕ່ຊາຕານອ້າງວ່າມັນຊື່ສັດກວ່າພະເຈົ້າ ມັນບອກເອວາວ່າ ‘ພະເຈົ້າຂີ້ຕົວະ’ ແຕ່ມັນເອງຫັນແຫຼະທີ່ອ້າງວ່າເວົ້າຄວາມຈິງກັບລາວ.
ໂສພິດ: ເອີ. . .ແມ່ນໆ
ມີນາ: ແຕ່ພະເຈົ້າມີວິທີຈັດການກັບເລື່ອງນີ້ຢ່າງສະຫຼາດແລະສຸຂຸມ ໂດຍໃຫ້ເວລາຜ່ານໄປຫຼາຍພໍສົມຄວນເພື່ອຈະໄດ້ຮູ້ວ່າໃຜເວົ້າແທ້ ໃຜຂີ້ຕົວະ
ຄຳຖາມສຳຄັນທີ່ເກີດຂຶ້ນ
ໂສພິດ: ແຕ່ທັນທີທີ່ເອວາຕາຍ ເລື່ອງນີ້ກໍພິສູດແລ້ວບໍ່ແມ່ນບໍວ່າພະເຈົ້າເວົ້າຄວາມຈິງ?
ມີນາ: ໂດຍ ໃນດ້ານໜຶ່ງກໍແມ່ນ ແຕ່ຍັງມີອີກບັນຫາໜຶ່ງ ໃຫ້ເຮົາມາເບິ່ງນຳກັນໃນຂໍ້ 5 ເອື້ອຍສັງເກດບໍວ່າຊາຕານບອກແນວໃດກັບເອວາອີກ?
ໂສພິດ: ມັນບອກວ່າຖ້າເອວາກິນໝາກໄມ້ຕາຂອງລາວຈະແຈ້ງຂຶ້ນ.
ມີນາ: ຖືກຕ້ອງ ແລ້ວລາວຈະເປັນ ‘ຄືພະເຈົ້າ ທີ່ຮູ້ຈັກຄວາມດີແລະຊົ່ວ’ ຈາກຄຳເວົ້າຂອງຊາຕານເບິ່ງຄືມັນກຳລັງໃສ່ຮ້າຍພະເຈົ້າວ່າຫວງສິ່ງດີໆເອົາໄວ້ບໍ່ໃຫ້ມະນຸດ.
ໂສພິດ: ເຂົ້າໃຈລະ
ມີນາ: ແລະເລື່ອງນີ້ເຮັດໃຫ້ເກີດຄຳຖາມສຳຄັນຂຶ້ນມາ
ໂສພິດ: ແນວໃດ?
ມີນາ: ຊາຕານເວົ້າຄ້າຍໆວ່າບໍ່ໄດ້ມີແຕ່ເອວາຄົນດຽວເທົ່ານັ້ນ ແຕ່ມະນຸດທຸກຄົນໃນໂລກຈະຢູ່ດີມີສຸກກວ່າຖ້າບໍ່ມີພະເຈົ້າປົກຄອງ ໃນກໍລະນີນີ້ກໍຄືກັນ ພະເຢໂຫວາຮູ້ວ່າວິທີທີ່ດີທີ່ສຸດທີ່ຈະຈັດການກັບບັນຫາຄື ໃຫ້ຊາຕານໄດ້ທົດລອງໃຊ້ວິທີຂອງມັນ ດັ່ງນັ້ນ ພະເຈົ້າເລີຍຍອມໃຫ້ມັນປົກຄອງໂລກນີ້ໄລຍະໜຶ່ງ ນີ້ຄືເຫດຜົນທີ່ວ່າເປັນຫຍັງມີຄວາມທຸກເກີດຂຶ້ນຮອບໆຕົວເຮົາ ເພາະຊາຕານເປັນຜູ້ປົກຄອງໂລກນີ້ ບໍ່ແມ່ນພະເຈົ້າ d ແຕ່ຄຳພີໄບເບິນມີຂ່າວດີສຳລັບເຮົານຳ
ໂສພິດ: ຂ່າວດີເລື່ອງຫຍັງ?
ມີນາ: ຄຳພີໄບເບິນບອກໃຫ້ເຮົາຮູ້ຄວາມຈິງສອງຂໍ້ທີ່ໜ້າປະທັບໃຈກ່ຽວກັບພະເຈົ້າ. ໜຶ່ງ ພະເຢໂຫວາຫ່ວງໃຍເຮົາເມື່ອເຫັນເຮົາຕ້ອງທົນກັບເລື່ອງທີ່ເຮັດໃຫ້ທຸກໃຈ ໃຫ້ເຮົາອ່ານຄຳເວົ້າຂອງກະສັດດາວິດນຳກັນທີ່ຄຳເພງ 31:7 ເປັນຕົວຢ່າງ ຈາກຂໍ້ນີ້ເຖິງວ່າດາວິດຕ້ອງເຈິກັບເລື່ອງທີ່ບໍ່ດີຫຼາຍຕະຫຼອດຊີວິດຂອງລາວ ແຕ່ລາວເວົ້າກັບພະເຢໂຫວາແນວໃດໃນຄຳອະທິດຖານ ເອື້ອຍລອງອ່ານເບິ່ງເດີ.
ໂສພິດ: ໂດຍ. “ຂ້ອຍຈະຊື່ນຊົມຍິນດີເພາະພະອົງຮັກຂ້ອຍຢ່າງໝັ້ນຄົງ ພະອົງເຫັນຄວາມທຸກລຳບາກຂອງຂ້ອຍແລ້ວ ພະອົງຮູ້ວ່າຂ້ອຍທຸກໃຈຫຼາຍ.”
ມີນາ: ເຖິງວ່າດາວິດຈະເຈິກັບຄວາມທຸກຫຼາຍ ແຕ່ລາວກໍຮູ້ສຶກສະບາຍໃຈເມື່ອຮູ້ວ່າພະເຢໂຫວາເບິ່ງເຫັນແລະຮັບຮູ້ວ່າລາວຕ້ອງເຈິກັບອັນໃດແດ່. ເອື້ອຍຮູ້ສຶກສະບາຍໃຈບໍທີ່ຮູ້ວ່າພະເຢໂຫວາເຫັນທຸກສິ່ງ ແມ້ແຕ່ຄວາມທຸກໃນໃຈທີ່ບໍ່ມີໃຜຮູ້ບໍ່ມີໃຜເຫັນ?
ໂສພິດ: ຟັງແລ້ວກໍໄດ້ກຳລັງໃຈດີເນາະ.
ມີນາ: ຄວາມຈິງທີ່ໜ້າປະທັບໃຈອີກຢ່າງໜຶ່ງ ຄືພະເຈົ້າຈະບໍ່ຍອມໃຫ້ເຮົາຕ້ອງທົນຢູ່ກັບສະພາບແບບນີ້ໄປຕະຫຼອດ. ຄຳພີໄບເບິນສອນວ່າພະເຈົ້າຈະບໍ່ຍອມໃຫ້ຊາຕານປົກຄອງໂລກນີ້ອີກຕໍ່ໄປ. ການປົກຄອງທີ່ຊົ່ວຮ້າຍຂອງມັນຈະຕ້ອງສິ້ນສຸດລົງ ແລະພະເຈົ້າຈະແກ້ໄຂເລື່ອງບໍ່ດີທຸກຢ່າງ ລວມທັງສິ່ງທີ່ເອື້ອຍກັບແມ່ກຳລັງເຈິຢູ່ໃນຕອນນີ້ນຳ.ອາທິດໜ້ານ້ອງຈະກັບມາເວົ້າກັບເອື້ອຍວ່າເຮົາຮູ້ໄດ້ແນວໃດວ່າອີກບໍ່ດົນພະເຈົ້າຈະ ກຳຈັດຄວາມທຸກທັງໝົດອອກໄປ? e
ໂສພິດ: ໂອເຄ ເອື້ອຍຈະຖ້າເດີ
ມີເລື່ອງຫຍັງໃນຄຳພີໄບເບິນທີ່ເຈົ້າສົງໄສຢູ່ບໍ? ເຈົ້າຢາກຮູ້ບໍວ່າພະຍານພະເຢໂຫວາມີຄວາມເຊື່ອແນວໃດ ແລະເຂົາເຈົ້າເຮັດກິດຈະກຳທາງສາສະໜາອັນໃດແດ່? ເທື່ອໜ້າຖ້າເຈົ້າຢາກເຈິພະຍານພະເຢໂຫວາ ຂໍຢ່າລັງເລທີ່ຈະຖາມເຂົາເຈົ້າ ພະຍານພະເຢໂຫວາຍິນດີລົມນຳເຈົ້າໃນເລື່ອງເຫຼົ່ານີ້.
a ເບິ່ງບົດຄວາມ “ການສົນທະນາກັບເພື່ອນບ້ານ—ພະເຈົ້າສົນໃຈຄວາມທຸກຂອງເຮົາບໍ?” ໃນຫໍສັງເກດການສະບັບ 1 ກໍລະກົດ 2013
b ເບິ່ງເອຊາຢາ 63:9
c ເບິ່ງພະນິມິດ 12:9
d ເບິ່ງໂຢຮັນ 12:31; 1 ໂຢຮັນ 5:19
e ເບິ່ງລາຍລະອຽດເພີ່ມເຕີມໃນບົດ 9 ຂອງປຶ້ມຄຳພີໄບເບິນສອນແນວໃດແທ້ໆ? ຈັດພິມໂດຍພະຍານພະເຢໂຫວາ.
