Michelle: Iriyo nade, Sophia. Amor ni wachako waromo kaka ne wachikore.

Sophia: An be amor ni ibiro.

Michelle: Ma ne akwongo limi, ne waneno kabe Nyasaye dewowa sama wachandore. * Niwacho ni ma wach ma ne isebedo kipenjori kuom kinde malach, to moloyo bang’ minu hinyore e masira mar ndara. To kapok wadhi nyime, mamau dhi nade sani?

Sophia: Seche moko owinjo maber, to seche moko ok owinj maber. Kawuono to nochiewo maber.

Michelle: Ka en kamano, to ber. Ang’eyo ni nyagruok gi pek ma kamano ok yot.

Sophia: Owada, en adier kaka iwachono. Samoro awuoro awuora ni obiro sandore kama nyaka karang’o.

Michelle: Mos. Inyalo paro ni kane wawuoyo kodi kinde mokalo, napenji gimomiyo Nyasaye oweyo chandruok mondo obedie kata obedo ni en gi teko mar tiekogi.

Sophia: Ee, anyalo paro.

Michelle: Kapok waneno dwoko ma Muma chiwo, we wanwo ane moko kuom weche ma ne wawuoyoe kinde mokalo.

Sophia: Onge wach.

Michelle: Ne waneno ni kata achiel kuom joma ne tiyo ne Nyasaye kinde machon nopenjo gimomiyo Nyasaye oweyo mondo ji ochandre. Kata kamano, Nyasaye ne ok okwero janabino ma nyinge ne en Habakkuk ni ne openjo penjo maricho kata nyise ni ne en gi yie matin.

Sophia: Ee anyalo paro wachno kendo ne en wach ma wendo kuoma.

Michelle: Ne wapuonjre bende ni Nyasaye ok mor sama wachandore. Kuom ranyisi, Muma wacho ni weche duto ma ne thago Jo-Israel, ‘en bende ne thage.’ * Donge en gima morowa ng’eyo ni Nyasaye dewowa sama wachandore?

Sophia: Ee.

Michelle: Gikone, ne wawinjore ni ka Nyasaye nigi teko mar chweyo gik moko duto, mano nyiso ni en gi nyalo mar kawo okang’ mar tieko chandruogewa sa asaya.

Sophia: Mano e gima ok awinj ni chuth, nikech ka Nyasaye nigi teko mar tieko gik marichogi duto, kare ang’o momiyo pok otiekogi?

Michelle: Mondo omi wayud dwoko mar penjonino, we wael bug Chakruok, ma e buk mokwongo e Muma. Be isegawinjo sigana mar Adam gi Hawa kod olemo ma ne okwergi ni kik gicham?

Sophia: Ee, ne opuonjwa siganano e Sunday school kane pod atin. Kata obedo ni Nyasaye  nokwerogi ni kik gicham olemb yadhno, ne ok giwinjo ma gichamo olemo ma ne okwergino.

Michelle: Iyude. Koro we wanon ane weche ma ne owuondgo Adam gi Hawa ma nomiyo gitimo richono. Wechego konyowa neno gimomiyo wachandore. Be diher somo ndiko mar Chakruok 3, matindo 1 nyaka 5?

Sophia: Onge wach. Owacho kama: ‘To thuol ne riek moloyo gibuya duto me piny ma ne Jehova Nyasaye osechweyo. Mi nowacho ni dhako niya: “Mano adieri koso, Nyasaye osewacho, kik ucham kuom yien duto ma ni e puodho?” Mi dhako nowacho ni thuol: ‘Chamo olemb yien me puodho to wanyalo chamo: to kuom olemb yath ma ni e dier puodho, Nyasaye osewacho niya, “kik ucham kuome, kata mule kik umule, dipo kutho.”’ Mi thuol nowacho ni dhako, ‘Ok unutho ngang’: to Nyasaye ong’eyo ka e chieng’no muchame, wang’u noyepi, mi nubedi ka Nyasaye, kung’eyo mabeyo gi maricho.’’

Michelle: Erokamano. We wanon ane ndikoni matin. Mokwongo, ne ni thuol nowuoyo gi Hawa. Nitiere ndiko moro ma wacho ni Satan Jachien ema nowuoyo gi Hawa kotiyo gi thuol. * Satan nopenjo Hawa gima chik Nyasaye ne wacho kuom yadh olemo moro. Be ne ineno gima Nyasaye nowacho ni ne dhi yudo Adam gi Hawa kapo ni ne gichamo olemo mowuok e yadhno?

Sophia: Ne gidhi tho.

Michelle: Iwacho adier. Weche ma ne Satan owacho bang’ mago ne ohango ne Nyasaye wach. Ne ane gima nowacho: “Ok unutho ngang’.” Satan ne wacho ni Nyasaye en ja miriambo!

Sophia: Mano gima ne pok ang’eyo.

Michelle: To kane Satan oluongo Nyasaye ni ja miriambo, mano ne otugo wach moro maduong’ ma ne dhi kawo kinde mondo orie. Be ing’eyo gimomiyo rieyo wachno ne dhi kawo kinde?

Sophia: Hmm. Ok ang’eyo.

Michelle: Anyalo tiyo gi ranyisi moro e lero wachno. Wawach ni e kindwa kodi wadwaro ng’eyo ng’ama tek moloyo nyawadgi e ting’o gimoro. Wanyalo ng’eyo nade?

Sophia: Wanyalo kelo gimoro mapek kae to wane ni ng’ano kuomwa ma nyalo ting’o gino malo.

Michelle: Mano adier. Kendo mano biro nyiso e yo mayot ni ng’ano e kindwa ma nigi teko moloyo nyawadgi.

Sophia: Awinjo kama ikelono.

Michelle: To nade kapo ni ne awacho ni ajaratiro moloyi to ok ni atek moloyi? Mano en wach mopogore, donge?

Sophia: Ee, mano to opogore.

Michelle: En kamano nikech ng’eyo ka ng’ato en jaratiro kata ooyo ok en gima inyalo ng’e mayot.

Sophia: Mano adier.

Michelle: Gima inyalo tim en mana weyo kinde moromo okal mondo ji one ni ng’ano ma jaratiro moloyo nyawadgi e kindwa kodi.

Sophia: Mano winjore.

Michelle: Ne ane kendo weche ma waa somo e bug Chakruok. Be Satan ne wacho ni en gi teko moloyo Nyasaye?

Sophia: Ooyo.

Michelle: Kapo ni Nyasaye ne dwaro nyiso ni otek moloyo Satan, donyiso mano e yo mayot ahinya. Kata kamano, gima Satan ne wacho ne en ni ojaratiro moloyo Nyasaye. Ne chalo mana ka gima nonyiso Hawa ni, ‘Nyasaye wuondi, to an ema awachoni adier.’

Sophia: Pok naparo wachno kamano!

Michelle: Omiyo, nikech Nyasaye en ng’ama riek, noneno ni yo maber mar tieko wachno ne en weyo mondo kinde okal. Gikone, ne dhi nenore maler ni ng’ano ma ne wacho adier, to ng’ano ma ne riambo.

Sophia: To donge tho mar Hawa nonyiso maler ni Nyasaye ema ne wacho adier?

 Michelle: Wanyalo wacho kamano. To kata kamano, nitie gimachielo ma ne Satan owuoyoe. Ng’i ane kendo gima kwan matindo 5 wacho. Be ineno gimachielo ma Satan nonyiso Hawa?

Sophia: Nonyiso Hawa ni ka Hawa ochamo olemono, wengene ne dhi yepo.

Michelle: Ee, kendo ni ‘nobed ka Nyasaye, kong’eyo mabeyo gi maricho.’ Omiyo, gima Satan ne wacho en ni Nyasaye ne tuono dhano gimoro maber nyowuoyo.

Sophia: Awinji.

Michelle: To mano bende ne en gima duong’.

Sophia: Itemo wacho ni?

Michelle: Weche ma Satan notiyogogo ne temo nyiso ni Hawa kod dhano duto ne nyalo dak maber kata ka Nyasaye ok otayogi. Jehova nong’eyo ni yo maber mar tieko wachno en miyo Satan thuolo mondo onyis ane kabe ne en kare. Kuom mano, Nyasaye nomiyo Satan thuolo mondo oloch e wi pinyni kuom kinde. Mano e momiyo waneno ka piny opong’ gi chandruok nikech Satan ema chiko gik ma timore e pinyni, to ok Nyasaye. * Kata kamano, nitiere wach maber.

Sophia: En wach mane?

Michelle: Muma puonjowa weche moko ariyo mabeyo e wi Nyasaye. Mokwongo, Jehova dewowa sama wachandore. Kuom ranyisi, ne ane weche mag Ruoth Daudi mayudore e bug Zaburi 31:7. Kata obedo ni Daudi noyudo masiche mang’eny e ngimane, ne ane gima nokwayo Nyasaye e lamo. Ok isom ane ndikoni?

Sophia: Ee, we asome. Owacho niya: ‘Anamor kendo yil ahinya kuom kechni: nimar iseneno sand mara: iseng’eyo chunya ka an gi chandruok.’

Michelle: Ne ni kata obedo ni ngima Daudi nopong’ gi chandruoge, gima ne hoye en ng’eyo ni Nyasaye ne neno chandruogenego duto. Be ng’eyo ni Jehova ong’eyo gimoro amora ma chandowa, kata mana chandruogewa ma jomamoko ok nyal neno, hoyo chunyi?

Sophia: Ee, ng’eyo mano mora.

Michelle: Wach mar ariyo ma morowa en ni Nyasaye ok bi ng’iyowa ang’iya nyaka chieng’ ka wachandore. Muma singonwa ni Nyasaye biro tieko piny marach ma Satan chikoni. Kendo obiro tieko chuth gik maricho mosetimore, moriwo nyaka chandruok ma iseyudo kod chandruok ma minu kaloe. Donge anyalo duogo juma manyien mondo alerni gimomiyo wanyalo bedo gadier ni machiegnini Nyasaye biro tieko chandruoge duto? *

Sophia: Ber manade!