Michelle: Thobela Sophia. Ke thabela gore ke go hweditše ka gae.

Sophia: Go thabile nna.

Michelle: Ge ke be ke le mo la mafelelo, re ahlaahlile taba ya kamoo Modimo a ikwago ka gona ka go tlaišega ga rena. * O boletše gore ke selo seo e lego kgale o ipotšiša ka sona, kudukudu ka morago ga gore mmago a gobale kotsing ya koloi. Go ba gona, mmago o ya bjang fela?

Sophia: O na le matšatši a gagwe. Lehono gona o tsogile gabotse.

Michelle: Ke thabela go kwa seo. E swanetše go ba e le tlhohlo e kgolo go dula o thabile boemong bjo bo swanago le bjo.

Sophia: Go bjalo. Ka dinako tše dingwe ke ipotšiša gore o tlo tlaišega go fihla neng.

Michelle: Ao ke maikwelo a tlhago. O tla gopola gore ge ke be ke go etetše, ke ile ka go šiela potšišo ya mabapi le lebaka leo ka lona Modimo a dumeletšego gore tlaišego e tšwele pele mola a na le matla a go e fediša.

Sophia: Ee, ke a gopola.

Michelle: Pele re ka ahlaahla karabo ya Beibele, anke re boeletše dintlha tše sego kae tšeo re boledišanego ka tšona nakong e fetilego.

Sophia: Go lokile.

Michelle: Ka mohlala, re ithutile gore gaešita le monna yo a botegago wa mehleng ya Beibele o ile a ipotšiša lebaka leo ka lona Modimo a dumelelago tlaišego. Lega go le bjalo, le ka mohla Modimo ga se a ka a mo omanyetša gore o botšišitše potšišo yeo, le gona Modimo ga se a ka a mmotša gore o be a upša a nyaka tumelo e oketšegilego.

Sophia: Ke be ke thoma go kwa ka seo.

Michelle: Gape re ithutile gore Jehofa Modimo o hloile go re bona re tlaišega. Ka mohlala, Beibele e re ge batho ba gagwe ba be ba tlaletšwe, “le yena o be a tlalelwa.” * Na ga se mo go homotšago go tseba gore Modimo o re kwela bohloko ge re tlaišega?

Sophia: Ee, go a homotša.

Michelle: Sa mafelelo, re ile ra dumelelana ka gore ka baka la matla a magolo ao Mmopi wa rena a nago le ona, ruri a ka kgona go tsena ditaba gare a fediša tlaišego ka nako le ge e le efe.

Sophia: Seo ke sona ke sa se kwešišego. Ke ka baka la’ng Modimo a dumelela dilo tše ka moka tše mpe di direga mola a na le matla a go ka di thibela?

Michelle: Re ka thoma go hwetša karabo ya potšišo ya gago ka go phetla pukung ya mathomo ya Beibele, e lego Genesi. Na o tlwaelane le taba ya Adama le Efa gotee le seenywa seo se ileditšwego?

Sophia: Ee, ke ithutile taba yeo sekolong sa Sontaga. Modimo o be a ba boditše gore ba se ke ba ja dienywa tša sehlare se se itšego, eupša ba ile ba fo ja dienywa tša sehlare seo.

 Michelle: O opile kgomo lenaka. Bjale anke re ahlaahle ditiragalo tšeo di ilego tša lebiša sebeng sa Adama le Efa. Ditiragalo tšeo di sepedišana le potšišo ya mabapi le lebaka leo ka lona re tlaišegago. Hle anke o bale Genesi kgaolo 3, ditemana 1 go fihla ka 5?

Sophia: Go lokile. E re: “Bjale noga e be e le šedi kudu mo go diphoofolo ka moka tša naga tšeo Jehofa Modimo a di dirilego. Ka gona ya re go mosadi: ‘A ke therešo gore Modimo o itše le se ke la ja tše di tšwago sehlareng se sengwe le se sengwe sa mo serapeng?’ Ge noga e re’alo mosadi a re go yona: ‘Dienywa tša dihlare tša mo serapeng re ka di ja. Eupša ge e le mabapi le go ja dienywa tša sehlare seo se lego gare ga serapa, Modimo o itše: “Le se ke la ja tša sona, le se ke la se kgwatha le gatee e le gore le se ke la hwa.”’ Ge mosadi a re’alo noga ya re go yena: ‘Le ka se hwe lehu. Gobane Modimo o tseba gore ka lona letšatši leo le tlago go ja tša sona, mahlo a lena a tla bulega gomme la swana le Modimo, la tseba botse le bobe.’”

Michelle: Ke a leboga. Anke re hlahlobe ditemana tše ka nakwana. Sa pele, ela hloko gore noga e ile ya boledišana le mosadi, e lego Efa. Karolo e nngwe ya Beibele e bontšha gore ge e le gabotse e be e le Sathane Diabolo yo a bego a boledišana le yena a diriša noga. * Sathane o ile a botšiša Efa ka taelo ya Modimo mabapi le sehlare se itšego. Na o hlokometše gore Modimo o be a itše kotlo e tla ba efe ge e ba Adama le Efa ba be ba ka ja dienywa tša sona?

Sophia: Ba be ba tla hwa.

Michelle: O nepile. Ka gona, ka mantšu a gagwe a latelago, Sathane o ile a latofatša Modimo o šoro. Ela hloko seo a se boletšego ge a re: “Le ka se hwe lehu.” Sathane o be a re Modimo ke moaketši!

Sophia: Ga se ka ka ka kwa karolo yeo ya taba peleng.

Michelle: Le gona nakong ya ge Sathane a be a re Modimo ke moaketši, o ile a tsoša kgang yeo e bego e tla tšea nako gore e rarollwe. Na o kgona go bona lebaka la seo?

Sophia: Hmm. Ga ke kgonthišege ka seo.

Michelle: Go ba gona, mohlomongwe nka go direla mohlala ka se. A re re ka letšatši le lengwe ke tla go wena gomme ka go botša gore ke go feta ka matla. O be o tla mpontšha bjang gore ke fošitše?

Sophia: Ke nagana gore re be re tla swanelwa ke go dira moleko o itšego.

Michelle: Ee, go bjalo. Mohlomongwe re be re tla kgetha selo se itšego se boima ke moka ra bona gore ke mang yo a bego a ka kgona go se kuka. Ge e le gabotse, go bonolo go bona gore ke mang yo a nago le matla.

Sophia: Ke go topa nta thekeng.

Michelle: Eupša go thwe’ng ge e ba go e na le go go botša gore ke go feta ka matla, ke re ke botega go go feta? Yeo ke taba e nngwe, na ga go bjalo?

Sophia: Ee, ke nagana bjalo.

Michelle: Go ba gona, go botega ga se selo seo se swanago le matla, seo se ka hlatselwago ka go dira molekwana.

Sophia: Go bjalo.

Michelle: Ge e le gabotse, tsela e nnoši ya go rarolla bothata e be e tla ba gore go dumelelwe nako e lekanego gore e fete e le gore ba bangwe ba re šetše gomme ba bone gore ke mang yo a botegago e le ka kgonthe.

Sophia: Seo se a kwagala.

Michelle: Bjale, lebelela gape pego ye yeo e lego go Genesi. Na Sathane o ile a bolela gore o feta Modimo ka matla?

Sophia: Aowa.

Michelle: Modimo a ka be a ile a hlatsela le semeetseng gore o fošitše. Go e na le moo, Sathane o ile a bolela gore o botega go feta Modimo. Ge e le gabotse, o boditše Efa gore, ‘Modimo o le botša maaka, eupša nna ke le botša therešo.’

Sophia: Seo se a makatša.

Michelle: Ka gona, Modimo ka bohlale bja gagwe o be a tseba gore tsela e di phalago tšohle ya go rarolla bothata e be e tla ba ya gore a dumelele nako gore e fete. Mafelelong, go be go tla ba molaleng gore ke mang yo a bolelago therešo le gore ke mang yo a bolelago maaka.

Sophia: Eupša ka morago ga gore Efa a hwe, na seo ga se sa bontšha gore Modimo o be a bolela therešo?

Michelle: Ka tsela e itšego, go bile bjalo. Eupša tlhohlo ya Sathane e be e sa felele moo. Lebelela gape temana ya 5. Na o lemoga gore ke’ng se sengwe seo Sathane a se boditšego Efa?

Sophia: O mmoditše gore ge a be a ka ja dienywa tša sehlare seo, mahlo a gagwe a be a tla bulega.

Michelle: Ee, le gore o be a tla “swana le Modimo, [a] tseba botse le bobe.” Ka gona Sathane o ile a bolela gore Modimo o be a tima batho selo se itšego se sebotse.

Sophia: Ke a bona.

Michelle: Seo le sona e be e le tlhohlo e kgolo.

Sophia: O ra gore’ng?

Michelle: Sathane ka mantšu a gagwe, o be a bolela gore Efa—go akaretša le batho ka moka—o be a tla phela gabotse ntle le pušo ya Modimo. Tabeng ye le gona, Jehofa o be a tseba gore tsela e di phalago tšohle ya go rarolla tlhohlo yeo e be e tla ba go dumelela Sathane gore a leke go bontšha gore o be a rereša. Ka gona, Modimo o dumeletše Sathane gore a buše lefase le ka nakwana. Seo se hlalosa lebaka leo ka lona re bonago tlaišego e ntši gakaakaa—ke ka gobane Sathane ke yena mmuši wa kgonthe wa lefase le, e sego Modimo. * Eupša go na le ditaba tše dibotse.

Sophia: Ke dife?

Michelle: Beibele e ruta ditherešo tše tše pedi tše kgahlišago ka Modimo. Ya pele, Jehofa o tshwenyega ka rena ge re tlaišega. Ka mohlala, ela hloko mantšu a Kgoši Dafida, ao a ngwadilwego go Psalme 31:7. Dafida o ile a tlaišega kudu bophelong bja gagwe, eupša ela hloko seo a ilego a kgona go se botša Modimo ka thapelo. Ke kgopela gore o bale temana yeo hle.

Sophia: Go lokile. E re: “Ke tla thabela le go hlalalela botho bja gago, ka ge o bone mohlako wa ka; o tsebile ka tlalelo ya moya wa ka.”

Michelle: Ka gona, gaešita le ge Dafida a ile a tlaišega, o ile a homotšwa ke go tseba gore Jehofa o be a bona tšohle tšeo di bego di mo diragalela. Na o homotšwa ke go tseba gore Jehofa o bona tšohle, gaešita le bohloko bjoo re bo kwago bjoo batho ba bangwe ba ka no se bo kwešišego ka botlalo?

Sophia: Ee, seo se a homotša.

Michelle: Therešo ya bobedi e kgahlišago ke ya gore Modimo a ka se dumelele gore re tlaišege ka mo go sa felego. Beibele e ruta gore kgauswinyane o tla fediša pušo e kgopo ya Sathane. E bile o tla fedišetša sa ruri dilo ka moka tše mpe tšeo di diregilego, go akaretša le dilo tšeo di tlaišitšego wena le mmago. Na nka boa bekeng e tlago gomme ke go bontšhe lebaka leo ka lona re ka kgodišegago gore Modimo kgauswinyane o tla fediša tlaišego ka moka? *

Sophia: Tšeo e kwala e le ditaba tše dibotse.