ETOMPHO KONTHELE YOMBIMBILIYA

Omokonda Yatyi Huku Ayekelako Ononkhumbi?

Onthele ei etompho Ombangi imwe ya Jeova apondola okukala nalio konthele Yombimbiliya. Pahe tusoke ñgeno Ombangi ya Jeova utiwa o Michele waya peumbo liomukai utiwa o Sofia.

OÑGENI HUKU ELITEHELELA TYINA TUMONA ONONKHUMBI?

Michele: Iyaa. Nahambukwa etyi nekuvasa meumbo Sofia.

Sofia: Tyuu, liepeko.

Michele: Osimano yokualamba, tuapopile konthele yoñgeni Huku akala tyina tumona ononkhumbi. * Iya ove wapopile konthele yotyipuka tyimwe tyikusukalalesa tunde kohale, haunene puetyi me yove avilukile netukutuku. Mahi, nkhele mphopile, me yove ukahi ñgeni?

Sofia: Hahe vala, tyitivala hono nawa hono navi. Mahi hono walelepo nawa.

Michele: Otyo tyinthyambukiswa. Katyapepukile okutualako nehambu tyina una otyitateka ngotyo.

Sofia: Otyo umwe. Pamwe ndyilipula okuti ononkhumbi mbae mambutualako alo pi.

Michele: Tyisukalalesa umwe. Hamwe uhinangela okuti osimano yokualamba, tuasilepo epulo konthele yomokonda yatyi Huku ayekelako ononkhumbi inkha una epondolo liokumbumanako.

Sofia: Yoo, ndyilihinangela.

Michele: Matutale oñgeni Ombimbiliya ikumbulula epulo olio, mahi nkhele tupitulule etyi tuapopile osimano yokualamba.

Sofia: Ewaa.

Michele: Tuelilongesile okuti kohale alo umwe ovanthu vekolelo, velipulile omokonda yatyi Huku ayekelako ononkhumbi. Mahi, Huku kanumanene navo mokonda yokualinga epulo olio, tupu kevepopile okuti ankho vesukisa okukala vali nekolelo.

Sofia: Yoo, iya otyo ame ankho hityii.

Michele: Tupu tuelilongesile okuti tyina tumona ononkhumbi Jeova Huku ketyihande. Mongeleka, Ombimbiliya ipopia okuti etyi ovanthu vae ankho vekahi nokumona ononkhumbi “welitehelelele omapita.” * Katyituhambukiswa okunoñgonoka okuti Huku kahambukwa tyina tumona ononkhumbi?

Sofia: Eenga, tyihambukiswa.

Michele: Konyima, atupopi okuti mokonda Omutungi wetu una epondolo enene, tyilityili nthiki imwe mamaneko ononkhumbi ambuho.

Sofia: Otyo, otyo nahanoñgonokele nawa. Omokonda yatyi Huku ayekelako ovipuka ovivi tyina ena epondolo liokuvimanako?

 OLIE ANKHO UKAHI NOKUPOPIA OTYILI?

Michele: Opo tukumbulule epulo liove, tutale etyi tyipopia Genesis, omukanda wotete Wombimbiliya. Wii ehipululo lia Andau na Eva, notyinyango tyailikwa?

Sofia: Eenga, nelilongesa tyo mokatikesi. Huku weveilikile okulia kotyinyango tyomuti umwe, mahi avehetavela, avaliko.

Michele: Otyo umwe. Pahe, tutale nawa oityi tyalingisile Andau na Eva okulinga onkhali oyo. Otyo matyitukuatesako okunoñgonoka omokonda yatyi tumonena ononkhumbi. Okuti upondola okutanga mu Genesis okapitulu 3, poversikulu 1 alo po 5?

Sofia: Ewaa. “Onyoka ankho yalunguka vali kovinyama aviho viomohika Jeova Huku ankho alinga. Moluotyo, onyoka aipopila omukai okuti: ‘Otyili Huku wemutolela okuti muhaliei komiti aviho vio motyikunino?’ Iya omukai akumbulula okuti: ‘Ovinyango viomiti vio motyikunino tupondola okulia. Mahi, otyinyango tyomuti ukahi pokati kotyikunino Huku wati, “Muhalieiko, tupu muhakuateiko, opo muhankhie.”’ Iya onyoka aipopila omukai okuti: ‘Tyotyili kamamunkhi. Mokonda, Huku utyii okuti onthiki muliako omaiho enyi maikuka, iya amukala nga Huku, okunoñgonoka otyiwa notyivi.’”

Michele: Napandula. Pahe nkhele tutale nawa onoversikulu ombo. Tete, tala okuti onyoka yapopile na Eva. Pena otestu onkhuavo Yombimbiliya ilekesa okuti tyilityili wapopilile monyoka o Satanasi Eliapu. * Satanasi wapulile Eva oityi Huku ankho evepopila konthele yomuti umwe. Wamona oityi Huku apopile konthele yetyi matyimonekela Andau na Eva inkha valiako?

Sofia: Wapopile okuti mavankhi.

Michele: Otyo umwe. Pahe tala oñgeni Satanasi atendeleyile Huku. Wati: “Tyotyili kamamunkhi.” Ngotyo, Satanasi ankho ukahi nokupopia okuti Huku onkhembi!

Sofia: Ankho ha ñgaa ko ndyipenoñgonoka.

Michele: Iya etyi Satanasi apopia okuti Huku onkhembi, wakatula otyitateka tyimwe ankho matyisukisa omuvo omunyingi pala okutyitetulula. Wetyimona omokonda yatyi?

Sofia: Humm. Hetyinoñgonokele nawa.

Michele: Ewaa, tupondola okutyieleka nongeleka ei. Ñgeno nthiki imwe ndyipopia okuti ndyina vali ononkhono kuove. Oñgeni molekesa okuti etyi napopia hatyiliko?

Sofia: Ndyipondola okuovola onkhalelo imwe yokutyilekesa.

Michele: Otyo umwe. Hamwe tupondola okuovola otyipuka tyimwe tyalema atutale olie metyivili okutyityindapo. Okutala olie una vali ononkhono katyipuiya.

Sofia: Pahe netyinoñgonoka.

Michele: Mahi inkha ndyikupopila okuti ame ndyimukuatyili vali kuove molingi ñgeni? Otyo tyipuilisa vali, hatyo?

Sofia: Eenga, otyo tyipuilisa.

Michele: Mokonda, okutala inkha omunthu omukuatyili katyikahi ngokutala inkha una ononkhono.

Sofia: Otyili, katyelifuile.

Michele: Otyili, mokonda onkhalelo ike vala yokutetulula otyitateka otyo, okuyeka palambe omuvo utuuka opo vakuetu vatale olie puonthue vevali omukuatyili vali.

Sofia: Otyo umwe.

Michele: Pahe, tutale vali pehipululo mu Genesis. Okuti Satanasi wapopile okuti una vali ononkhono ku Huku?

Sofia: Au.

Michele: Inkha wapopile ngotyo, Huku ñgeno walekesale okuti Satanasi kapopile otyili. Mahi Satanasi wapopile okuti omukuatyili vali ku Huku. Ongatyina ankho ekahi nokupopila Eva okuti: ‘Huku wemukemba, mahi ame ndyikahi nokumupopila otyili.’

Sofia: Otyo otyili.

Michele: Mokonda Huku omunongo, ankho utyii okuti onkhalelo yaviuka yokutetulula otyitateka otyo, okuyeka palambe omuvo. Mokueenda kuomuvo matyimoneka olie ankho ukahi nokupopia otyili iya olie ankho ukahi nokukemba.

 OTYIPUKA TYIMUE TYAKOLELA

Sofia: Mahi etyi pakala vala katutu Eva ankhi, otyo katyalekesiliale okuti o Huku ankho ukahi nokupopia otyili?

Michele: Tyalekesa umwe. Mahi ankho pena vali otyitateka otyikuavo. Tala vali moversikulu 5. Wamona otyipuka otyikuavo Satanasi apopilile Eva?

Sofia: Wapopile okuti inkha Eva ulia kotyinyango, omaiho ae maaikuka.

Michele: Iya ati makala “nga Huku, okunoñgonoka otyiwa notyivi.” Ngotyo Satanasi ankho ukahi nokupopia okuti Huku una otyipuka tyimwe otyiwa aholeka ovanthu.

Sofia: Ndyityeete.

Michele: Otyo tupu ankho otyitateka otyinene.

Sofia: Otyitateka otyinene ñgeni?

Michele: Nonondaka ombo, Satanasi ankho ukahi nokupopia okuti Eva, novanthu aveho, mavakala vali nawa inkha kavatuminwa na Huku. Tupu, Jeova amono okuti onkhalelo yaviuka yokutyitetulula, okuyeka Satanasi etyilekese. Moluotyo, Huku wayeka Satanasi atumine ouye uno mokueenda kuomuvo umwe. Otyo tyilekesa okuti tukahi nokumona ononkhumbi mokonda o Satanasi ukahi nokutumina ouye uno, ha Huku ko. * Mahi kuna onondaka onongwa.

Sofia: Onondaka patyi?

Michele: Ombimbiliya ilongesa ovipuka evi vivali oviwa konthele ya Huku. Tete, Jeova usuka nonthue tyina tumona ononkhumbi. Mongeleka, tala onondaka Mbohamba David mo Salmo 31:7. David wakalele novitateka ovinyingi, mahi tala etyi apopile melikuambelo limwe ku Huku. Okuti upondola okutanga oversikulu ei?

Sofia: Ewaa. Yati: “Mandyikwilila nehambu moluembia luove olunene. Mokonda wamona ononkhumbi mbange. Wanoñgonoka emone liange.”

Michele: Moluotyo, namphila David ankho ena ovitateka ovinyingi, wahambukilwe etyi anoñgonoka okuti Jeova utyeete. Katyikupameka okunoñgonoka okuti Jeova weete ovipuka aviho, alo umwe omaluihamo etu vakuetu vehevili okunoñgonoka?

Sofia: Eenga, tyimphameka.

Michele: Vali, Huku kamayeke tutualeko nokumona ononkhumbi. Ombimbiliya ilongesa okuti apa katutu makamanako outumini omuvi wa Satanasi. Tupu, makamanako ononkhumbi ambuho tumona, alo umwe ononkhumbi ove na me yove mumona. Nahambukwa unene etyi tuahipulula. Okuti ndyipondola okukondoka osimano iyako, opo ndyikulekese omokonda yatyi tupondola okukala nonthumbi yokuti apa katutu Huku makamanako ononkhumbi ambuho? *

Sofia: Tyikahi nawa.

Okuti pena otyipuka tyimwe konthele Yombimbiliya uhanda okunoñgonoka vali nawa? Okuti uhanda okunoñgonoka vali nawa omatavelo novilinga vio Nombangi mba Jeova? Inkha uhanda, upondola okukapopia Nombangi imwe ya Jeova. Mekukuatesako nehambu.

[Onondaka Poutoi]