Michelle: Sophia naashemererwa kukushanga omu ka.

Sophia: Naanye naashemererwa.

Michelle: Obu naahereruka kwija, tukagaaniira aha ku Ruhanga arikwehurira yaareeba nitubonabona. * Okagira ngu naiwe otwire nookyebuuza, na munonga okwiha obu nyoko yaatunga butandu y’emotoka. Beitu shi hati ari ata?

Sophia: Obumwe naaba ari gye obundi atari gye. Kwonka hati haakiri.

Michelle: Ekyo nikigaruramu amaani. Ningira ngu nikikugumira kuguma oikaikaine omu mbeera egi.

Sophia: Tikyorobi. Kwonka obumwe niinyebuuza obu araarekyere aho okubonabona.

Michelle: Ohikire kwebuuza otyo. Ninyijuka ngu nkakutsigira ekibuuzo ahabw’enki Ruhanga arekireho okubonabona kandi obwo aine amaani gw’okukwihaho.

Sophia: Eego, ninyijuka.

Michelle: Tutakareebire eki Baibuli erikugamba aha nshonga egi, ka tweyijutsye bimwe aha bi twareebire izo.

Sophia: Kare.

Michelle: Tukareeba ngu hariho omushaija omwesigwa ori omu Baibuli owaayebuurize ahabw’enki Ruhanga arekireho okubonabona. Kwonka, Ruhanga taramufubiire, kandi taramugambiire ngu okwikiriza kwe ni kukye.

Sophia: Ekyo kikambeera kisya.

Michelle: Tukeega ngu Ruhanga tarikushemererwa kureeba nitubonabona. Nk’eky’okureeberaho, Baibuli neegira ngu obu abantu be baabaire baine obusaasi, “nawe” akabugira. * Mbwenu shi tikirikuhuumuriza kumanya ngu Ruhanga naakwatwaho okubonabona kwaitu?

Sophia: Eego, buzima.

Michelle: Kandi tukareeba ngu Omuhangi waitu, naabaasa kwihiraho kimwe okubonabona kwona ahabw’okuba aine obushoboorozi.

Sophia: Ekyo nikyo kirikungumira kwetegyereza. Ahabw’enki Ruhanga arikwikiriza ebibi kubaho kandi obwo aine amaani g’okubizibira?

Michelle: Nitubaasa kutunga eky’okugarukamu ky’ekibuuzo kyawe turikushoma omu kitabo ky’Okutandika. Noomanya ebirikukwata ahari Adamu na Haawa n’ekijuma eki baabaire bataine kurya?

Sophia: Eego, nkakyegyera omu Sunday school. Ruhanga akaba abazibiire kurya aha muti ogwo, kwonka bakagumizamu baaryaho.

Michelle: Ohikire. Hati ka tureebe ekyareeteire Adamu na Haawa kugomera Ruhanga. Ahakuba ekyo nikiija kutuhwera kwetegyereza ahabw’enki nitubonabona. Shoma Okutandika eshuura 3, omushororongo 1 kuhika 5?

Sophia: Nihagira hati. “Kandi enjoka ekaba eri enyabwengye okukira emyamaishwa zoona ezi [Yehova] Ruhanga yaahangire. Yaabuuza omukazi eti: N’eky’amazima, Ruhanga akagira ngu mutarirya aha muti gwona ogw’omuri eki kibanja? Omukazi yaagarukamu enjoka ati: Nitwikirizibwa kurya ebijuma by’emiti y’omu kibanja, kureka ebijuma by’omuti oguri ahagati y’ekibanja; nibyo Ruhanga yaagizire ati: Mutaribirya, n’obu kwakuba okubikoraho, mutakaafa. Enjoka yaagambira omukazi eti: Okufa kwo, buzima timurifa; Ahabw’okuba Ruhanga naamanya ngu eizooba eri muriguryaho, amaisho gaanyu garyaiguka, naimwe mube nka Ruhanga, mumanye oburungi n’obubi.”

Michelle: Weebare munonga. Ka tushwijume emishororongo egyo. Yetegyereze ngu ekijoka kikagamba n’omukazi, Haawa. Ekyahandiikirwe ekindi omu Baibuli nikyoreka butunu ngu Sitaane niwe yaabaire naagamba nawe kurabira omu kijoka. * Sitaane akabuuza Haawa aha muti ogu Ruhanga yaabazibiire kuryaho. Mbwenu shi niki ekyabaire nikiza kuhika ahari Adamu na Haawa bwanyima y’okurya aha muti ogwo?

Sophia: Bakaba nibaija kufa.

Michelle: Ohikire. Sitaane akagumizamu yaayomesereza Ruhanga arikumugambaho ebishuba. Yetegyereze eki yaagambire: “Okufa kwo, buzima timurifa.” Sitaane akaba ari nk’okugira ngu Ruhanga n’omubeihi!

Sophia: Ekyo mbaire ntarikukimanya.

Michelle: Kandi Sitaane ku yaagizire ngu Ruhanga n’omubeihi, akareetaho enshonga eyaabaire neija kwetengyesa obwire buraingwa kubaasa kugishoboorora.

Sophia: Ni nshonga ki egyo?.

Michelle: Kubaasa kugyetegyereza, nka nkuhe eky’okureeberaho. Ka tugire ngu naakugira ngu ninkukiza amaani. Noobaasa kumpamiza ota ngu ngwire?

Sophia: Nimba nyine kukugyezesa.

Michelle: Ohikire buzima. Obundi nitubaasa kutaho ekintu kiremeire tureebe orikubaasa kukikiriza. Okumanya n’oha orikukiza amaani eki n’ekintu kyorobi.

Sophia: Ohikire.

Michelle: Kwonka shi omu mwanya gw’okugira ngu niinkukiza amaani, ku naakugira ngu ninkukiza kuba ow’amazima? Mbwenu shi ekyo nikiba kyorobi kuhamya?

Sophia: Ekyo kigumire.

Michelle: Torikubaasa kupima amazima, nk’oku orikubaasa kumanya orikukiza amaani.

Sophia: Ohikire.

Michelle: Omuringo murungi gw’okumanya ngu omuntu n’ow’amazima n’okureka obwire burikumara kuhinguraho, abandi bakareeba ngu ori omwesigwa buzima.

Sophia: Ekyo nikikora amakuru.

Michelle: Ninkushaba ogarukye oyetegyereze ebi twashoma omu Okutandika. Mbwenu shi Sitaane akagira ngu naakiza Ruhanga amaani?

Sophia: Ngaaha.

Michelle: Ruhanga akaba naabaasa kworeka ahonaaho ngu Sitaane n’omubeihi. Kureka, Sitaane akagira ngu n’ow’amazima kukira Ruhanga. Akaba ari nk’orikugira Haawa ati: ‘Ruhanga naakubeiha, kwonka nyowe ninkugambira amazima.’

Sophia: Hati naatandika kwetegyereza enshonga.

Michelle: Ahabw’okugira ngu Ruhanga aine obwengye bwingi, akamanya ngu kubaasa kushoboorora enshonga egi, kikaba nikyetengyesa obwire buraingwa kurabaho. Kandi aha muheru, kikaba nikiza kweyoreka butunu n’oha orikubeiha.

Sophia: Mbwenu shi Haawa ku yaafiire obwo bukaba butari buhame oburikworeka ngu Ruhanga naagamba amazima?

Michelle: Ekyo kikahamya ngu Ruhanga ahikire. Kwonka hariho ekindi eki Sitaane yaagambire. Garuka oreebe omushororongo 5. Niki ekindi eki Sitaane yaagambiire Haawa?

Sophia: Akamugira ngu yaarya aha kijuma, amaisho ge nigaija kwiguka.

Michelle: Weebare munonga, kandi akamugira ngu naija kuba ‘nka Ruhanga amanye oburungi n’obubi.’ N’ahabw’ekyo Sitaane akagira ngu hariho ekintu kirungi eki Ruhanga asherekire abantu.

Sophia: Enshonga ningireeba.

Michelle: Kandi egi nayo n’enshonga nkuru.

Sophia: Noomanyisa ki?

Michelle: Sitaane akooreka ngu Haawa n’abantu boona okutwarira hamwe, bakaabaire bari gye bataine Ruhanga nk’omutegyeki waabo. Kandi nabwo, Yehova akaba naamanya ngu haine kuhinguraho obwire, Sitaane kubaasa kworeka enshonga ye yaaba ehikire. N’ahabw’ekyo Ruhanga akaikiriza Sitaane kutegyeka ensi kumara obwire. Egi niyo nshonga ahabw’enki nitureeba okubonabona kwingi omu nsi ahakuba Sitaane niwe mutegyeki waayo beitu atari Ruhanga. * Kwonka hariho amakuru marungi.

Sophia: Ni makuru ki ago?

Michelle: Baibuli neeyegyesa amakuru marungi aga abiri. Ag’okubanza, Yehova naatufaho twaba nitubonabona. Nk’eky’okureeberaho, teekateeka aha bigambo bya Daudi, ebiri omu Zaaburi 31:7. Daudi akabonabona munonga, kwonka yetegyereze eki yaagambiire Ruhanga omu kushaba kwe. Ninkushaba kuhashoma

Sophia: Nihagira hati: “Ndyashemererwa, nyesiime ahabw’embabazi zaawe, ahakuba okareeba obusaasi bwangye, waamanya enaku zangye.”

Michelle: N’ahabw’ekyo n’obu Daudi yaabonaboine munonga, ekyamuhuumuriize n’okumanya ngu Yehova naayetegyereza gye ebi arikurabamu. Okugira ngu Yehova naamanya oburemeezi bwaitu bwona, otwariiremu n’obusaasi obu twine abu abantu batarikubaasa kwetegyereza, tikirikuhuumuriza?

Sophia: Eego buzima.

Michelle: Amazima ga kabiri, n’okugira ngu Ruhanga tarikwija kwikiriza okubonabona kugumaho ebiro byona. Baibuli neeyoreka ngu juba naija kwihaho obutegyeki bwa Sitaane obubi. Naija kwihiraho kimwe ebibi byona ebirikubaho otwariiremu oburemeezi obu oine n’ebi nyoko arikurabamu. Mbwenu shi nimbaasa kugaruka saabiiti erikukurataho reero nkworekye ahabw’enki nitubaasa kuhamya ngu Ruhanga juba naija kwihaho okubonabona kwona? *

Sophia: Ekyo buzima ni kirungi.