Jeni: Hai Sofia. Haʼu kontente ita bele hasoru malu fali.

Sofia: Sin, haʼu mós.

Jeni: Loron neʼebé haʼu hasoru mana, ita koʼalia kona-ba Maromak nia sentimentu kuandu nia haree ita hetan terus. * No Ita-Boot dehan katak kleur ona ita hanoin kona-ba neʼe, liuliu husi tempu neʼebé Ita-nia inan hetan asidente iha karreta. Haʼu bele husu, oinsá amá nia saúde agora?

Sofia: Depende, dala ruma diʼak, dala ruma ladún. Maibé ohin sente diʼak.

Jeni: Haʼu kontente rona ida-neʼe. Sin, karik dala ruma mana hanoin barak kona-ba amá nia situasaun.

Sofia: Loos duni. Dala ruma haʼu hanoin, toʼo bainhira mak amá sei terus hanesan neʼe.

Jeni: La sala atu iha hanoin hanesan neʼe. Se mana bele hanoin-hetan, iha loron neʼebé ita koʼalia hamutuk, haʼu rai hela pergunta ida ho mana. Pergunta neʼe mak: Tanbasá Maromak husik ita hetan terus se nia mak iha kbiit atu halakon terus?

Sofia: Sin, haʼu hanoin-hetan pergunta neʼe.

Jeni: Antes ita hetan resposta husi Bíblia, mai ita hanoin fali informasaun neʼebé uluk ita koʼalia tiha ona.

Sofia: Bele.

Jeni: Buat ida neʼebé ita aprende mak, mane fiar-naʼin ida iha Bíblia mós hanoin kona-ba tanbasá Maromak husik ema hetan terus. Maski nuneʼe, Maromak la hirus nia bainhira nia husu pergunta hanesan neʼe, no Maromak la duun nia hodi dehan katak ninia fiar sai fraku.

Sofia: Sin, haʼu mós hakfodak kuandu foin rona ida-neʼe.

Jeni: Ita mós aprende katak Maromak la gosta duni kuandu ita hetan terus. Porezemplu, Bíblia dehan katak bainhira Maromak nia povu hetan terus, “nia mós sente neon-susar”. * Neʼe halo ita sente kmaan duni hodi hatene katak Maromak hanoin tebes ita kuandu ita hetan terus, loos ka lae?

Sofia: Loos.

Jeni: Buat ida tan neʼebé ita aprende mak Maromak nuʼudar Kriadór, nia iha kbiit boot liu hotu. Nia bele halakon kedas ita-nia terus.

Sofia: Neʼe halo haʼu konfuzaun. Tanbasá Maromak husik deʼit buat aat kona ita se nia mak iha kbiit atu halakon kedas terus hotu?

Jeni: Ita bele hetan resposta ba mana nia pergunta hodi lee buat neʼebé hakerek iha livru primeiru iha Bíblia laran. Neʼe mak livru Génesis. Mana hanoin-hetan istória kona-ba Adão no Eva no ai-fuan neʼebé Maromak bandu?

Sofia: Sin, haʼu aprende istória neʼe kuandu haʼu sei kiʼik iha igreja. Maromak dehan sira labele han husi ai-hun ida, maibé sira lakohi rona no han husi ai-hun neʼe.

Jeni: Neʼe loos. Entaun, mai ita koʼalia kona-ba situasaun neʼebé akontese antes Adão no Eva halo sala. Tanba buat neʼebé akontese iha ligasaun ho pergunta, tanbasá ita hetan terus. Mana bele lee iha Génesis kapítulu 3, versíkulu 1 toʼo 5?

Sofia: Bele. “Samea mak animál ida neʼebé matan-moris liu animál fuik hotu iha rai-luan neʼebé Maromak Jeová kria ona. Samea dehan ba feto neʼe: ‘Maromak dehan duni katak imi labele han ai-fuan husi ai-hun hotu iha jardín neʼe ka?’ Feto neʼe hatán ba samea: ‘Ami bele han ai-fuan husi ai-hun sira iha jardín neʼe. Maibé kona-ba ai-fuan husi ai-hun neʼebé iha jardín nia klaran, Maromak dehan ona: “Imi labele han ai-fuan husi ai-hun neʼe, imi labele kaer ai-hun neʼe. Se lae, imi sei mate.”’ Rona tiha neʼe, samea dehan ba feto neʼe: ‘Tuir loloos, imi sei la mate. Tanba Maromak hatene katak iha loron neʼebé imi han ai-fuan neʼe, imi-nia matan sei nakloke no imi sei sai hanesan Maromak hodi hatene buat diʼak no aat.’”

Jeni: Obrigada. Mai ita haree fali versíkulu sira-neʼe. Ulukliu, samea mak koʼalia ho feto neʼe, katak Eva. Iha livru seluk iha Bíblia laran hatudu katak Diabu Satanás mak koʼalia ho feto neʼe liuhusi samea. * Satanás husu Eva kona-ba Maromak nia mandamentu kona-ba ai-hun ida. Maromak dehan saida mak sei akontese ba Adão no Eva se sira han husi ai-hun neʼe?

Sofia: Sira sei mate.

Jeni: Loos. Maibé Satanás nia liafuan tuirmai hatudu katak nia duun matak Maromak. Haree liafuan neʼebé nia hatete: “Imi sei la mate.” Satanás mak dehan katak Maromak mak bosok-teen!

Sofia: Haʼu nunka rona parte husi istória neʼe.

Jeni: No bainhira Satanás bolu Maromak bosok-teen, nia hamosu pergunta neʼebé presiza tempu atu rezolve. Tanbasá?

Sofia: Hmm. Haʼu la hatene.

Jeni: Karik haʼu bele fó ezemplu ida. Loron ida haʼu hasoru mana no dehan katak haʼu mak forsa liu mana. Entaun mana bele halo saida atu hatudu katak haʼu koʼalia la loos?

Sofia: Karik ita bele halo buat ruma atu buka-hatene.

Jeni: Loos duni. Karik ita bele hili buat ida neʼebé todan liu, no haree toʼok sé mak bele hiʼit sasán todan neʼe. Tuir loloos, fasil deʼit atu hatene sé mak forsa liu.

Sofia: Agora haʼu komprende.

Jeni: Maibé duké buka-hatene sé mak forsa liu, oinsá se haʼu duun katak mana mak bosok-teen? Neʼe la fasil atu prova kedas, loos ka lae?

Sofia: Loos.

Jeni: Atu hiʼit sasán todan, neʼe fasil atu prova. Maibé atu buka-hatene sé ema ida mak laran-loos, neʼe ita labele hatene kedas.

Sofia: Loos.

Jeni: Tuir loloos, presiza tempu atu nuneʼe ema seluk mós bele haree husi ita naʼin-rua ema ida-neʼebé mak laran loos.

Sofia: Neʼe loos.

Jeni: Mai ita haree fali istória neʼe iha Génesis. Satanás dehan nia forsa liu fali Maromak ka lae?

Sofia: Lae.

Jeni: Maromak bele prova kedas katak nia forsa liu Satanás. Maibé Satanás mak dehan katak nia mak laran-loos liu fali Maromak. Neʼe hanesan nia dehan ba Eva, ‘Maromak bosok imi, maibé haʼu mak koʼalia loos.’

Sofia: Neʼe interese.

Jeni: Tanba Maromak iha matenek boot, nia hatene katak presiza tempu atu rezolve pergunta neʼe. Ikusmai, ema hotu bele hatene sé mak koʼalia loos no sé mak bosok-teen.

Sofia: Maibé bainhira Eva mate, neʼe prova ona katak Maromak mak koʼalia loos, ka lae?

Jeni: Neʼe loos. Maibé Satanás mós hasaʼe lia kona-ba buat seluk tan. Haree fali iha versíkulu 5. Satanás dehan saida tan ba Eva?

Sofia: Nia dehan se Eva han husi ai-fuan neʼe, ninia matan sei nakloke.

Jeni: Loos duni, no mós Eva sei sai “hanesan Maromak hodi hatene buat diʼak no aat”. Entaun Satanás duun katak Maromak hanetik ema atu hetan buat diʼak.

Sofia: Komprende.

Jeni: Neʼe hamosu pergunta seluk tan.

Sofia: Haʼu la komprende.

Jeni: Liuhusi ninia liafuan, Satanás hatete katak Eva, no mós ba ema hotu katak sira la presiza Maromak atu ukun sira. Entaun, Maromak hatene katak dalan diʼak atu rezolve pergunta neʼe mak atu fó tempu ba Satanás atu prova toʼok, nia koʼalia loos ka lae. Tan neʼe mak Maromak husik Satanás ukun mundu neʼe toʼo agora. Neʼe mak razaun tanbasá mundu nakonu ho terus. Satanás mak ukun mundu, laʼós Maromak. * Maski nuneʼe, ita iha esperansa.

Sofia: Saida mak neʼe?

Jeni: Bíblia fó sai lia-loos rua neʼebé furak tebes. Primeiru, Jeová sempre prontu atu ajuda ita kuandu ita hetan terus. Porezemplu, mai ita lee Liurai David nia liafuan iha Salmo 31:7. Iha David nia moris, nia hetan terus barak, maibé haree ninia liafuan kuandu nia halo orasaun ba Maromak. Mana bele lee versíkulu neʼe?

Sofia: Sin, bele. Neʼe dehan: “Haʼu sei haksolok tebes tanba Ita-nia domin neʼebé laran-metin, tanba Ita haree ona haʼu-nia terus; Ita hatene didiʼak haʼu-nia susar boot sira.”

Jeni: Entaun, maski David hetan terus, nia sente kmaan hodi hatene katak Jeová haree buat hotu neʼebé akontese ba nia. Mana sente kmaan loos ka lae? Atu hatene katak Jeová haree buat hotu neʼebé akontese ba ita, inklui ita-nia laran-susar hotu neʼebé ema seluk la hatene.

Sofia: Sente duni.

Jeni: Lia-loos furak segundu mak Maromak sei la husik terus kontinua ba nafatin. Bíblia dehan lakleur tan Maromak sei halakon Satanás nia ukun neʼebé aat. No nia sei hadiʼa buat aat hotu neʼebé akontese, inklui terus neʼebé Ita-Boot ho amá hasoru daudaun. Haʼu bele mai fali semana oin no hatudu ba mana tanbasá ita bele fiar katak lakleur tan Maromak sei halakon terus hotu? *

Sofia: Bele, haʼu hein.