Michelle: Timoneni Sophia. Ndakondwa kuti ndakusaniyani.

Sophia: Nani ndakondwa kukuwonani, ndakulondiyani.

Michelle: Ulendu wamala tingukambiskana mo Chiuta wavwiya asani wawona masuzgu ngo taŵanthu tikumana nangu. * Mungukambapu kuti fundu yeniyi mukwamba kali kujifumba, ukongwa kutuliya pa nyengu yo anyinamwi anguchitiya ngozi ya galimotu. Kumbi anyinamwi ŵewuli sonu?

Sophia: Visinthasintha. Kweni msanawale ayukapu umampha.

Michelle: Awa tawonga. Kuphwere matenda ndi ntchitu yikulu ukongwa, ndipu nyengu zinyaki wamunthu utamba kuja ndi maŵanaŵanu.

Sophia: Muneneska ama. Nyengu zinyaki nani nditijifumba kuti ama asuzgikengi ndi urwirwi mpaka zukwanji?

Michelle: Ŵanthu anandi atijifumba nadi fumbu lenilo. Asani mukumbuka, ulendu wamala ndingukusiliyani fumbu lakuti, ntchifukwa wuli Chiuta wazomereza kuti tisuzgikengi penipo iyu we ndi nthazi zakumalisiya masuzgu?

Sophia: Hinya ndikumbuka.

Michelle: Techendakambiskani fumbu lenili, tiyeni tikumbuskani dankha vo tingukambiskana ulendu wamala.

Sophia: Chamampha.

Michelle: Chakwamba, tinguwona kuti munthu munyaki wakugomezgeka yo wazumbulika mu Bayibolu, nayu wangufumbapu kuti ntchifukwa wuli Chiuta wazomereza kuti taŵanthu tisuzgikengi. Kweni Chiuta wangumulanga cha chifukwa chakufumba venivi, pamwenga kumukambiya kuti wakhumbika waka kusazgiyaku chivwanu.

Sophia: Fundu yeniyi yenga yachilendu kwaku ini.

Michelle: Tingusambira so kuti Yehova Chiuta vitimuŵaŵa asani wawona kuti tisuzgika. Mwakuyeruzgiyapu, Bayibolu likamba kuti pa nyengu yo ŵanthu aku Chiuta asuzgikanga, “nayu wasuzgikanga.” * Kumbi tipembuzgika cha kuziŵa kuti Chiuta nayu so vitimuŵaŵa asani isi tisuzgika?

Sophia: Hinya, tipembuzgika nadi.

Michelle: Pakumaliya, tosi tinguzomereza fundu yakuti Mlengi we ndi nthazi ukongwa ndipu wangafiska kumalisa masuzgu ngosi yanga kwambula so kusuzgika.

Sophia: Penipo ndipu patindimika mutu ini. Ntchifukwa wuli Chiuta walekere vinthu viheni ivi kuti vichitikengi penipo iyu we ndi nthazi zakuvimalisiya?

Michelle: Kuti timukiki fumbu linu, tiyambi kuwona mu buku la Genezesi lo ndi buku lakwamba la Bayibolu. Kumbi mutiyiziŵa nkhani yakuti Adamu ndi Heva angurya chipasu chakukanizika?

Sophia: Hinya, ndikusambirapu nkhani yo ku sande sukulu. Asi Chiuta wanguŵakanizga kurya vipasu va muchimiti chinyaki, kweni yiwu angurya?

Michelle: Muneneska. Sonu tiyeni tiwoni vo vinguchitika kuti Adamu ndi Heva abudi. Vo vinguchitika vingatiwovya kuziŵa kuti ntchifukwa wuli tisuzgika. Mungatiŵerengiyaku Genezesi chaputala 3, vesi 1 mpaka 5?

Sophia: Chamampha. Patiti, “Sonu njoka yenga yakuchenje ukongwa kuluska nyama zosi zamudondu zo Yehova Chiuta wangupanga. Ndipu yingufumba munthukazi kuti: ‘Kumbi mbuneneska kuti Chiuta wakukamba kuti mungaryanga cha vipasu va muchimiti chechosi cha mumunda uwu?’ Munthukazi wangumuka njoka yo kuti: ‘Tingarya vipasu va muvimiti va mumunda. Kweni vipasu va muchimiti cho che pakati pa munda, Chiuta wakukamba kuti: “Mungaryanga cha vipasu va muchimiti cho, mungachikwaskanga cha; chifukwa asani muchitengi viyo, mufwengi.”’ Njoka yingumuka munthukazi yo kuti: ‘Kufwa, mufwengi cha. Pakuti Chiuta waziŵa kuti pa zuŵa lo mwazamuryiya vipasu va muchimiti cho, masu nginu ngazamujulika ndipu mwazamuyanana ndi Chiuta, mwazamuziŵa chamampha ndi chiheni.’”

Michelle: Tawonga, mwaŵerenga umampha. Sonu tiyeni tikambiskani mavesi ngenanga. Chakwamba, tawona kuti njoka yingukambiskana ndi munthukazi, Heva. Vesi linyaki la mu Bayibolu lilongo kuti wenga Satana Dyaboli yo wangukambiskana ndi Heva mwakugwiriskiya ntchitu njoka. * Satana wangufumba Heva vakukwaskana ndi dangu lo Chiuta wanguŵapaska pa nkhani ya chimiti. Kumbi lemba ili lakamba kuti Chiuta wangukamba kuti ntchinthu wuli cho chatingi chichitikiyengi Adamu ndi Heva asani angarya vipasu va muchimiti cho wanguŵakaniza?

Sophia: Wanguŵakambiya kuti afwengi.

Michelle: Gudu. Kweni sonu wonani vo Satana wangukamba pakususka vo Chiuta wangukamba. Iyu wanguti: “Kufwa, mufwengi cha.” Yapa tingakamba kuti Satana wangulongo kuti Chiuta ngwaboza!

Sophia: Nkhakwamba kuvwapu venivi.

Michelle: Sonu Satana wati wakamba kuti Chiuta ngwaboza, pakhumbikanga nyengu kuti uneneska chayiwu uziŵiki. Mwachiziŵa chifukwa chaki?

Sophia: Awa anyina.

Michelle: Panyaki kuti muvwisi, ndikukambiyeni chakuyeruzgiyapu. Tiyeruzgiyi kuti zuŵa linyaki mbwenu ini buli, nditikukambiyani kuti ini pe nde ndi nthazi zakunyamuliya vinthu kuphara yimwi. Kumbi mungachita wuli kuti tiwoni yo ngwanthazi nadi?

Sophia: Po mbwe pangakhumbika kuti tipharizani.

Michelle: Muneneska. Panyaki tingato chinthu chizitu kuti tipharizani kunyamuwa. Yo wafiska kuchinyamuwa ndikuti ndiyu we ndi nthazi. Tawonatu, kuziŵa kuti ndiyani we ndi nthazi ndi nkhani yipusu.

Sophia: Ndawamu sonu.

Michelle: Kweni wuli asani ndingakamba kuti ini nde wakugomezgeka ukongwa kuphara yimwi? Asi maphara ngaki ngangaŵa ngakusuzgiyapu?

Sophia: Muneneska kweni.

Michelle: Kugomezgeka kupambana ndi nthazi, chifukwa pangakhumbika kugwiriskiya ntchitu nthowa yakusuzgiyapu kuti tiziŵi uneneska chayiwu.

Sophia: Po mwagwaza.

Michelle: Kuti timalisi nkhani yeniyi, pangakhumbika kuti pajumphi nyengu kuti ŵanthu anyaki awoni vo tichita kuti pakumaliya akambi kuti ndiyani yo ngwakugomezgeka ukongwa.

Sophia: Nani ndikoliyana namwi.

Michelle: Sonu tiyeni tiwere ku nkhani ya mubuku la Genezesi. Kumbi Satana wangukamba kuti iyu ngwanthazi kuphara Chiuta ngati?

Sophia: Awa.

Michelle: Muneneska nadi, chifukwa vikaŵengi viyo Chiuta watingi wasuzgikengi cha kulongo kuti ngwanthazi. Mumalu mwaki Satana wangulongo kuti iyu ngwakugomezgeka ukongwa kuphara Chiuta. Venga nge kuti Satana wakambiya Heva kuti, ‘Chiuta watikupusikani, kweni ini ndini ndikamba uneneska.’

Sophia: Aa, kumbi ku?

Michelle: Mwazeru zaki, Chiuta wanguwona kuti wakhumbika kuzomereza kuti pajumphi nyengu kuti muneneska pa nkhani iyi wawoneki. Wanguwona kuti asani pangajumpha nyengu, viziŵikengi kuti ndiyani yo wakambanga uneneska ndipuso ndiyani yo wakambanga boza.

Sophia: Kweni asi mbwe nkhani yingumala Heva wati wafwa chifukwa vinguwoneka kuti Chiuta waneneskanga?

Michelle: Kamanavi. Nkhani yo Satana wangwambisa yenga yikulu. Wonani so pa vesi 5. Kumbi mwayiwona fundu yinyaki yo Satana wangukambiya Heva?

Sophia: Wangumukambiya kuti asani wangarya chipasu masu ngaki ngajulikengi.

Michelle: Hinya, kweniso wangumukambiya kuti “mwazamuyanana ndi Chiuta, mwazamuziŵa chamampha ndi chiheni.” Yapa Satana wang’anamuwanga kuti pe chinthu chinyaki chamampha cho Chiuta watiŵabisa ŵanthu.

Sophia: Oho.

Michelle: Yeniyi nayu yenga nkhani yikulu.

Sophia: Mung’anamuwanji?

Michelle: Vo Satana wangukamba vang’anamuwanga kuti vinthu vingamuyende umampha ukongwa Heva kweniso ŵanthu wosi, asani angaleka kulamulika ndi Chiuta. Pa nkhani iyi napu, Yehova wanguwona kuti nthowa yamampha yakuyimalisiya nkhuzomereza kuti Satana walamuliyi charu kwa kanyengu. Ndisimika kuti sonu mwawamu, pacharu pe masuzgu nganandi viyo chifukwa chakuti Satana ndiyu walamuliya charu chosi, Chiuta cha. * Kweni vinthu visinthengi.

Sophia: Mung’anamuwanji?

Michelle: Bayibolu lisambiza fundu ziŵi izi zauneneska zakukwaskana ndi Chiuta. Chakwamba, Yehova vitimuŵaŵa asani tisuzgika. Mwakuyeruzgiyapu, wonani vo Fumu Davidi yingulemba pa Salimo 31:7. Davidi wangukumana ndi masuzgu nganandi, kweni wonani vo iyu wangukamba pakupemphera kwaku Chiuta. Mungatiŵerenge vesi lenili?

Sophia: Chamampha. Lititi: “Ndikondwengi ukongwa chifukwa cha chanju chinu chambula kumala, pakuti yimwi mwawona kusuzgika kwangu; ndipuso muziŵa umampha mo ndisuzgikiya maŵanaŵanu.”

Michelle: Nge po tawone, chinanga kuti Davidi wangukumana ndi masuzgu nganandi, kweni wapembuzgikanga chifukwa chakuziŵa kuti Yehova wawonanga vosi. Kumbi yimwi mupembuzgika cha kuziŵa kuti Yehova wawona ndipuso waziŵa vosi vo vititichitikiya kusazgapu urwirwi ukulu wo isi taŵanthu tituvwa? *

Sophia: Vakupembuzga nadi ama.

Michelle: Chachiŵi ntchakuti Chiuta wazomerezengi cha kuti tilutirizgi kusuzgika mpaka muyaya. Bayibolu lisambiza kuti pambula kuswera yapa iyu wamalisengi ulamuliru uheni uwu waku Satana. Kweniso wazamutuzgapu vinthu viheni vosi vo vichitika kusazgapu vo vichitikiya yimwi ndi anyinamwi. Kumbi ndingaza so sabata yamawa kuti tizikambiskani chifukwa cho tingagomezge kuti Chiuta watuzgengepu nadi masuzgu pambula kuswera yapa?