Michelle: Kgalhen, Sofía. Lu tlan pi kmanokglhaman.

Sofía: Akit na lu kpaxuwa pi kakxilhman.

Michelle: Xaʼawatiya akxni kgalhchuwinaw lichuwinaw la makgkatsi Dios akxni kinkaʼakxilhan pi patinanaw. * Kiwani pi makgasata kgalhiya uma takgalhskinin, pero la uku tlakg chuna kgalhskinkana xlakata tuku nitlan lanilh mintse. Chu mintse, ¿la wi?

Sofía: Min kilhtamaku tlan tawila chu min kilhtamaku nitlan tawila, pero la uku tlan wi.

Michelle: ¡Lu tlan! Max tuwa xatapaxuwan natawilaya xlakata lu tuwa tuku titaxtupat.

Sofía: Chuna, lakgachunin kiʼakstu kinkgalhskinkan komo lhuwaku kilhtamaku napatinanaw.

Michelle: Xlikana chuna la lakpuwana. Max lakapastaka pi akxni chuwinaw kkgalhskin tuku xlakata Dios masta talakaskin chuntiya kaʼanalh tapatin, maski kgalhi litliwakga xlakata namasputu.

Sofía: Klakapastaka.

Michelle: Pulana kalakapastakwi tuku lichuwinaw, chu alistalh naʼakxilhaw la kinkakgalhtiyan Biblia.

Sofía: Tlan.

Michelle: Katsiniw pi chatum chixku xalamakgasa tiku ni xmakgxtakga Dios akstu kgalhskinka, tuku xlakata masta talakaskin kaʼanalh tapatin, Dios ni kilhnilh chu ni wanilh pi ni xkgalhi takanajla.

Sofía: Xlikana, ni xakkatsi.

Michelle: Nachuna katsiniw pi Jehová ni lakaskin napatinanaw. Biblia wan pi makgasa, akxni xkachikin xkgalhi taʼakglhuwit, «akxni xpatinamakgolh na lu nitlan xlimakgkatsi». * ¿Ni xlikana pi tlan makgkatsiyaw xlakata Jehová nachuna makgkatsi la akinin?

Sofía: Xlikana.

Michelle: Akxilhwi pi Dios kgalhi lhuwa litliwakga, chu tlan namasputu tapatin akxni nalakaskin.

Sofía: Wa uma tuku ni kʼakgatekgsa. Komo kgalhi putum litliwakga, ¿tuku xlakata chuntiya mastama talakaskin kaʼanalh tapatin?

Michelle: Kaʼakxilhwi tuku wan Génesis, xapulana tatsokgni nema wi kBiblia. ¿Kgaxpatnita xlakata Adán chu Eva chu xtawakat kiwi nema ni xliwatkan xwanit?

Sofía: Chuna, kkgaxmatnit kcatecismo. Dios kawanilh pi ni xwakgolh xtawakat kgantum kiwi, pero xlakan ni kgalhakgaxmatkgolh.

Michelle: Lu tlan. Pero kaʼakxilhwi tuku pulana  lalh, xlakata anta kilhtsukulh tapatin nema kgalhikgo putum latamanin. Kalikgalhtawakga Génesis, capítulo 3, versículos 1 asta 5.

Sofía: Tlan, wan: «Chu, luwa wa tiku tlakg skgalala litaxtulh xliputum animales xalak kakiwin nema Dios xkatlawanit. Wa xlakata tsukulh wani puskat: “¿Lu xlikana Dios kawaninitan pi ni nawayatit xtawakat putum kiwi nema wilakgolh kjardín?”. Wa xlakata puskat kgalhtilh luwa: “Xtawakat kiwi nema wilakgolh kjardín tlan nakwayaw. Pero xtawakat kiwi nema wi kxitat jardín, Dios wanit: «Ni nawayatit, ni, ni naxamayatit xlakata ni naniyatit»”. Akxni chuna, luwa wanilh puskat: “Ni katinitit. Xlakata Dios katsi pi kilhtamaku akxni nawayatit natalakki milakgastapukan chu la Dios nawanatit, nalakgapasatit tuku tlan chu tuku nixatlan”».

Michelle: Paxtikatsinilh. Kalichuwinaw umakgolh versículos. Pulana, wan pi tantum luwa tachuwinalh Eva. Alakatanu kBiblia wan pi tiku machuwinilh luwa, wa Akgskgawini, Satanás. * Xla kgalhskilh Eva xlakata limapakgsin nema xkamaxkinit Dios xlakata ni xwakgolh xtawakat kiwi. ¿Tuku kawanilh Dios Adán chu Eva pi xʼama kaʼakgspula komo ni xkgalhakgaxmatkgolh?

Sofía: Kawanilh pi xʼamakgolh nikgo.

Michelle: Chuna. Alistalh, Akgskgawini wa akgtum takgsanin xlakata Dios. Kaʼakxilhti tuku wa: «Ni katinitit». ¡Wa pi Dios xaʼakgsanina!

Sofía: Tuku kiwanipat nikxni xakkgaxmatnit.

Michelle: Akxni wa pi Dios xaʼakgsanina, tlawalh pi xtawi akgtum takgalhskinin nema lu makgas xtitaxtulh xlakata xtakgalhtilh. ¿Katsiya tuku xlakata?

Sofía: Mmm... Ni, nikkatsi.

Michelle: Kawiliw akgtum liʼakxilhtit. Kalakpuwaw pi akgtum kilhtamaku akit nakmin chu nakwaniyan pi akit tlakg tliwakga nixawa wix. ¿La xlimasiya pi ni xlikana tuku kwan?

Sofía: Max wi tuku xliʼakxilhwi.

Michelle: Chuna. Xputsaw tuku tsinka chu xʼakxilhwi tiku xtayanilh. Uma ni tuwa limasiyakan tiku tlakg tliwakga.

Sofía: Kʼakgatekgsa.

Michelle: Pero, komo xakwa pi ni akgstitum likatsiya, uma tanu tuku wamputun, ¿ni chuna?

Sofía: Chuna.

Michelle: Xlakata nalimasiyaya pi akgstitum la likatsiya ni wa talakaskin litliwakga.

Sofía: Xlikana.

Michelle: Xlakata natakatsi pi wix xaʼakgstitum la likatsiya, talakaskin natitaxtu kilhtamaku, chu naʼakxilhkgo amakgapitsin la kgalhiya la likatsiya.

Sofía: Xlikana tuku wana.

Michelle: Kaʼakxilhparaw amakgtum tuku wan Génesis. ¿Wa Akgskgawini pi tlakg tliwakga xwanit ni xawa Dios?

Sofía: Ni.

Michelle: Dios ni tuwa xlimasiyalh pi tlakg tliwakga. Akgskgawini wa pi Dios ni akgstitum la xlikatsi. Xtachuna la komo wanilh Eva: «Dios akgskgawiman akit kwaniman tuku xlikana».

Sofía: Nichuna xakakxilhnit.

Michelle: Dios lu skgalala chu liwana xkatsi pi xlakata nakgalhti xtaʼakgsanin Akgskgawini, xtalakaskin xmastalh xtitaxtulh kilhtamaku. Chuna xkatsika tiku xaʼakgsanina.

Sofía: Pero akxni Eva nilh takatsilh pi tuku xkawaninit Dios xlikana xwanit, ¿nichuna?

Michelle: Tlan nawanaw pi xlikana tuku wanti. Pero Akgskgawini ni kajwatiya uma tuku xwamputun. Kaʼakxilhpara tuku wan versículo 5. ¿Tuku atanu wanilh Eva?

Sofía: Komo xwalh xatawakat kiwi xtalakkilh xlakgastapu.

 Michelle: Chuna, chu wanilh pi komo xwalh chuna “xʼama wan la Dios, xlakgapasli tuku tlan chu tuku nitlan”. Akgskgawini na wa pi Dios ni xkamaxkiputun tuku tlakg tlan latamanin.

Sofía: Xlikana.

Michelle: Chu uma tuku wa, lu lanka taʼakgsanin.

Sofía: Ni kʼakgatekgsa, o kmakgachakgxi.

Michelle: Akxni Akgskgawini malakpuwanilh Eva chu la uku putum latamanin pi tlakg tlan xtawilalh komo ni wa xkapulalilh Dios. Jehová xkatsi pi na xtalakaskin xmaxkilh kilhtamaku Akgskgawini xlakata xlimasiyalh komo xlikana tuku xlichuwinanit. Dios maxkilh talakaskin namapakgsinan tsinu kKatiyatni. Wa xlakata anan lhuwa tapatin: xlakata tiku mapakgsinama uku kKatiyatni wa Akgskgawini, ni wa Dios. * Pero, wi akgtum tlan tamakatsinin

Sofía: ¿Tlan tamakatsin?

Michelle: Chuna, Biblia lichuwinan lakwan tachuwin xlakata Dios. Wan pi Dios lakatsu wi akxni patinanaw. Akgtum liʼakxilhtit, kaʼakxilhwi tuku tsokgli mapakgsina David kSalmo 31:7. Xla lhuwa patinalh kxlatamat, pero kaʼakxilhti tuku wanilh Dios. ¿Likgalhtawakgaputuna uma versículo?

Sofía: Tlan, wan: «Kpaxawa porque snun kilakgalhamanita. Porque wix kilakatani la xakakgxtakgajnamaj, y la ixlakgaputsama kinakuj».

Michelle: Maski lhuwa patinalh, David tlan xmakgkatsi akxni xlakapastaka pi Jehová putum xakxilha tuku nitlan xtitaxtuma. Chu wix, ¿matliwakglhan akxni lakapastaka pi Jehová putum akxilha, maski nitlan makgkatsiya chu makgapitsi nila akgatekgsnikgoyan?

Sofía: Chuna, lu kimakgtaya.

Michelle: Nachuna, Biblia wan pi nialh namasta talakaskin pi chuntiya napatinanaw putum kilhtamaku. Na masiya pi nialh makgas namasputu xtamapakgsin Satanás chu nalakkaxtlawa putum tuku nitlan katlawaninit latamanin. Asta tapatin nema kgalhi mintse chu wix. ¿Tlan naklakgmimparayan atanu semana? Kmasiyaniputunan tuku xlakata tlan nawanaw pi nialh makgas Dios namasputu tapatin. *

Sofía: Tlan.