Michelle: Moning Sophia. Mi amamas long yu stap long haus.

Sophia: Moning, mi wetim yu stap.

Michelle: Las taim mi kam, yumi bin toktok long God i ting olsem wanem long pen na hevi yumi karim. a Yu tok olsem em samting yu bin tingting long en inap longpela taim, na moa yet bihain long mama bilong yu i bin kisim bagarap long kar eksiden. Olsem wanem long mama bilong yu nau?

Sophia: Sampela de em i save pilim orait, na sampela de i no gutpela tumas. Tasol tude em i pilim orait.

Michelle: Mi amamas long harim olsem. Ating kain hevi olsem i mekim na i hatwok tru long yu holim gutpela tingting.

Sophia: Em tru. Sampela taim mi tingting, mama i mas karim pen na hevi i go inap long wanem taim.

Michelle: Em nomol long pilim olsem. Ating yu inap tingim laspela taim yumi toktok, mi bin kamapim wanpela askim long yu. Olsem: Sapos God i gat strong long stopim pen na hevi, wai na em i larim ol dispela samting i stap yet.

Sophia: Yes, mi tingim.

Michelle: Paslain long yumi skelim bekim Baibel i kamapim, yumi ken stori gen long sampela poin yumi bin toktok long en long las taim.

Sophia: Em orait.

Michelle: Yumi bin stori long wanpela gutpela man i bin stap long taim bilong ol man i bin raitim Baibel, em i laik save wai na God i larim pen na hevi i stap. Tasol God i no krosim em long ol askim em i kamapim, na tu, God i no tokim em olsem em i mas i gat strongpela bilip.

Sophia: Bipo mi no bin save long dispela.

Michelle: Yumi bin stori tu olsem God Jehova i nolaik tru long yumi karim pen na hevi. Baibel i tok taim lain bilong God i karim hevi, “Bikpela tu i bin karim pen na hevi wantaim ol.” b Yumi kisim bel isi taim yumi save olsem God i sori long yumi taim yumi karim pen, a?

Sophia: Em tru.

Michelle: Na laspela samting, yumi bin wanbel olsem Krieta i gat bikpela strong tru, olsem na em inap pinisim pen na hevi long taim em i laik mekim olsem.

Sophia: Dispela em samting mi save paul long en. Wai na God i larim olgeta kain samting nogut i stap sapos em i gat strong long stopim ol dispela samting?

Michelle: Yumi ken opim Baibel long Buk Stat  bilong painim bekim bilong askim bilong yu. Yu save long stori bilong Adam tupela Iv na prut tambu?

Sophia: Yes, mi lainim dispela stori long Sande-skul. God i tambuim tupela long kaikai prut bilong wanpela diwai, tasol ol i kisim na kaikai.

Michelle: Em i stret. Orait nau yumi ken skelim ol samting i bin kamap we i kirapim tupela long mekim sin. Ol dispela samting i kamapim klia as na yumi karim pen na hevi. Plis, inap yu ritim Stat sapta 3, ves 1 i go 5?

Sophia: Orait. “God, Bikpela i bin wokim olgeta animal, tasol i no gat wanpela bilong ol inap winim snek long tok gris. Na snek i askim meri olsem, ‘Ating God i tambuim yutupela long kaikai pikinini bilong olgeta diwai bilong gaden, a?’ Na meri i bekim tok olsem, ‘Mitupela i ken kaikai pikinini bilong olgeta diwai bilong dispela gaden. Tasol wanpela diwai i sanap namel tru, em God i tambuim mitupela long kaikai pikinini bilong en. God i bin tokim mitupela olsem, “Yutupela i no ken kaikai pikinini bilong dispela diwai, na tu yutupela i no ken holim, nogut yutupela i dai.”’ Orait na snek i tokim meri olsem, ‘Nogat. Yutupela i no inap i dai. Sapos yutupela i kaikai pikinini bilong dispela diwai, bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God. God i save long dispela, olsem na em i tambuim yutupela long kaikai pikinini bilong dispela diwai.’”

Michelle: Tenkyu. Orait nau yumi ken stori liklik long ol dispela ves. Namba 1 samting, snek i toktok long meri, Iv. Narapela hap bilong Baibel i soim olsem em Satan husat i toktok long Iv long rot bilong snek. c Satan i askim Iv long lo God i putim long diwai tambu. Yu lukim strafe God i tok Adam tupela Iv bai kisim sapos ol i kaikai prut bilong dispela diwai?

Sophia: Ol bai dai.

Michelle: Em nau. Bihain Satan i sutim wanpela bikpela tok long God. Lukim tok em i mekim, em i tok: “Yutupela i no inap i dai.” Satan i sutim tok olsem God i man bilong giaman!

Sophia: Mi no bin harim dispela bipo.

Michelle: Na taim Satan i tok God i giaman, em i kamapim wanpela bikpela tok, na planti haptaim i mas lus bilong stretim dispela tok. Yu save long risen bilong dispela?

Sophia: Nogat. Mi no save.

Michelle: Orait, mi ken mekim wanpela tok piksa. Tingim olsem wanpela taim mi kam na tokim yu olsem mi gat bikpela strong moa long yu. Olsem wanem yu ken soim olsem tok bilong mi i no tru?

Sophia: Ating yumi ken testim strong bilong yu na mi.

Michelle: Em nau. Ating yumi makim wanpela samting i hevi na lukim husat inap apim dispela. I no hatwok long luksave long husat i strong moa.

Sophia: Em stret.

Michelle: Tasol olsem wanem sapos mi no tok mi strong moa long yu, tasol mi tok mi onest moa long yu? Dispela i hatwok liklik long pruvim, a?

Sophia: Yes, ating olsem.

Michelle: Onest pasin i no wankain olsem strong we yumi ken pruvim long rot bilong wanpela tes.

Sophia: Em tru.

Michelle: I gat wanpela rot tasol bilong stretim dispela tok, yumi mas larim sampela haptaim i lus na ol narapela i ken lukim husat i onest moa, mi o yu.

Sophia: Yu tok stret.

Michelle: Orait, lukim gen dispela stori long Buk Stat. Yu ting Satan i tok em i gat bikpela strong moa winim God?

Sophia: Nogat.

Michelle: Em isi tru long God i soim olsem dispela tok i no tru. Tasol Satan i tok em i onest moa long God. Em i tokim Iv, ‘God i tok giaman long yu, tasol mi tok tru long yu.’

Sophia: Em i stret.

Michelle: God i gat bikpela savetingting, na em i save olsem gutpela rot bilong stretim  dispela tok em i mas larim sampela haptaim i lus. Bihain ol samting i kamap bai soim klia tru husat i tok tru na husat i giaman.

Sophia: Tasol taim Iv i dai, dispela i kamapim klia olsem God i tok tru, a?

Michelle: Tru, tasol i gat sampela samting moa long tok Satan i sutim. Lukim gen ves 5. Yu lukim wanem narapela tok Satan i mekim long Iv?

Sophia: Satan i tokim em olsem sapos em i kaikai dispela prut, ai bilong em bai op.

Michelle: Yes, na em bai kamap ‘wankain olsem God na save long wanem samting i gutpela, na wanem samting i nogut.’ So Satan i tok God i pasim ol man long kisim gutpela samting.

Sophia: Em stret.

Michelle: Na dispela tu i wanpela bikpela tok Satan i sutim.

Sophia: Olsem wanem em i bikpela tok?

Michelle: Long rot bilong tok bilong em, Satan i tok Iv—na olgeta manmeri—bai stap gutpela moa sapos God i no bosim ol. Bilong stretim dispela tok tu, Jehova i save olsem i gutpela long larim Satan i pruvim tok bilong em. So God i larim Satan i bosim dispela graun inap sampela haptaim. Dispela i kamapim klia as na i gat planti pen na hevi—Satan i bosim dispela graun, na i no God. d Tasol gutpela samting bai kamap.

Sophia: Wanem gutpela samting?

Michelle: Baibel i skulim yumi long 2-pela stretpela save long God. Namba 1, Jehova i sambai long yumi taim yumi karim pen na hevi. Tingim tok bilong King Devit i stap long Song 31:7. Devit i karim bikpela pen na hevi long laip bilong em, tasol lukim tok em i mekim taim em i prea long God. Inap yu ritim dispela ves?

Sophia: Orait. Em i tok: “Yu sori long mi oltaim, olsem na mi amamas long yu. Yu lukim dispela hevi bilong mi, na yu save long olgeta trabel i kamap long mi.”

Michelle: So maski Devit i karim pen na hevi, em i save Jehova i lukim olgeta hevi em i karim, na dispela i mekim gut bel bilong em. Jehova i save long olgeta samting, olgeta bel hevi bilong yumi tu em ol narapela man i no kliagut long en. Olsem wanem? Dispela i mekim gut bel bilong yu?

Sophia: Yes.

Michelle: Namba 2, God i no inap larim yumi karim pen na hevi inap oltaim. Baibel i tok klostu nau God bai pinisim wok bos nogut bilong Satan. Na em bai stretim olgeta samting nogut i bin kamap, na olgeta pen na hevi em yu na mama bilong yu i bin karim. Inap mi kam bek long neks wik na soim yu i gat wanem as na yumi ken bilip tru olsem klostu nau God bai pinisim olgeta pen na hevi? e

Sophia: Em bai gutpela.