Martto: Saaree ay malee, loˈˈoo? Nena zaaretta demmido gishshau ufayttaas.

Saaro: Taanikka ufayttaas.

Martto: Ini gallassi, nuuni tuggatiyo wode Xoossau aybi siyettiyaakko tobbida. * Neeni hegaabaa daro wodiyau, ubba ne aayyiyaa kaamiyan deshettoosappe haa simmin keehi qoppiyoogaa yootadasa. Odishin, haˈˈi ne aayyiyaa ay malee?

Saaro: A loˈˈo; shin issi issitoo sahettausu. SHin hachi iitukku.

Martto: Hegee ufayssiyaaba. Hegaa mala hanotan loˈˈobaa qoppiyoogee metees.

Saaro: Ee, metees. Issi issitoo a awude gakkanaashin tuggatanee gaada qoppays.

Martto: Hegee hara asaukka siyettiyaaba. Ini galla taani baanaappe kase, ‘Xoossau wolqqay deˈikko tuggaa coˈˈu giidi xeelliyoy aybissee?’ giya oyshaa oychoogaa hassayennan aggakka.

Saaro: Ee, hassayays.

Martto: Ha oyshaa zaaruwaa Geeshsha Maxaafaappe beˈanaappe kase, he gallassi tobbidobaappe amaridabaa zaarettoos.

Saaro: Ero.

Martto: Koyruwan, Geeshsha Maxaafan abay odettido ammanettida issi asi Xoossay tuggaa coˈˈu giidi xeelliyoy aybissakko eranau koyidoogaa beˈida. SHin i hegaa oychido gishshau Xoossay a seeribeenna woy qassi neeni loytta ammanana bessees gibeenna.

Saaro: Hagee tau oorattaba.

Martto: Qassi Xoossaa Yihooway nuuni tuggatanaadan koyenna. Leemisuwau, Geeshsha Maxaafay a asay tuggatiyo wodiyaabaa yootiiddi, “Eta waayee ubban i waayettiis” * yaagees. Yaatin, nuuni tuggatiyo wode Xoossay nuussi qarettiyoogaa eriyoogee minttettenee?

Saaro: Ee, hegee minttettiyaaba.

Martto: Wurssettan, nuna Medhidaagau gita wolqqay deˈiyoogaa akeekidi, i awudenne gidin kelttiyaa gelidi tuggaa xayssana danddayiyoogaa maayida.

Saaro: Hegee tau gelibeenna. Xoossau hegaadan oottiyo wolqqay deˈikko, ha iitaba ubbay gakkishin ayssi coˈˈu giidi xeellii?

Martto: Ne oyshaa zaaroy Geeshsha Maxaafan koyro maxaafaa gidida Doomettaabaa maxaafan deˈees. Addaamebaa, Hewaanibaanne mooppite giido mittaa ayfiyaabaa eray?

Saaro: Ee, he taarikiyaa woosa keettan tamaaraas. Eti issi mittaa ayfiyaa meenna mala Xoossay  yootiis; shin eti azazettennan ixxidi hegaa miidosona.

Martto: Ee, likke. Ane haˈˈi Addaameenne Hewaana nagaraa oottanaadan denttettidabay aybakko beˈoos. Hegee ‘Nuuni tuggatiyoy aybissee?’ giya oyshau zaaruwaa oyqqiis. Hayyanaa Doomettaabaa shemppo 3 paydo 1ppe biidi 5 gakkanaashin nabbabuutee?

Saaro: Ero. “SHooshshai GODAI Xoossai medhdhido do7a ubbaappe aadhdhida genanchcha. Issi gallassi shooshshai he maccaasiyo, ‘Xoossai tumu inttena, Gannatiyan de7iya mitta teeraa ubbaappekka mooppite giidee?’ yaagidi oichchiis. Oichchin maccaasiyaa shooshshaayyo zaarada, ‘CHii, Xoossai hagaadan gibeenna; nuuni gannatiyan de7iya mittatu teeraa maanau danddayoos; shin Xoossai nuna, “Gannatiyaassi gidduwan de7iya mitta teeraa mooppite; bochchoppite; hinkkoode intte haiqqana” giis’ yaagaasu. SHooshshai maccaasiyo, ‘CHii, intte ainnekka haiqqekketa; Xoossai hegaa giidoogee, he mittaa teeraa intte miikko, intte aifee dooyettin, lo77uwaanne iitaa Xoossaadan intte eranaagaa i eriyo gishshaassa’ yaagiis.”

Martto: Daro loˈˈo. Ane ha xiqisiyan deˈiya issi issibaa tobboos. Koyruwan, Hewaano haasayissiday shooshshaa gidiyoogaa akeeka. Geeshsha Maxaafay harasan shooshshaa baggaara o haasayissiday Seexaanaa Dabloosa gidiyoogaa yootees. * Issi mittaa xeelliyaagan Xoossay azazidobaa Seexaanay Hewaano oychiis. Addaameenne Hewaana he mittaa ayfiyaappe miikko ayba qixaate qaxxayettanaakko akeekadii?

Saaro: Eti hayqqana.

Martto: Likke gaadasa. Seexaanay hegaappe simmidi Xoossaa mootiis. I, “CHii, intte ainnekka haiqqekketa” yaagidoogaa akeekadii? Seexaanay Xoossay worddotidabadan yootiis.

Saaro: Taani hegaa kase akeeka erikke.

Martto: Xoossay worddotidabadan Seexaanay mootido wode, zaaranau amarida wode koshshiya gita oyshaa denttiis. Hegau wodiyaa koshshidoy aybissakko eray?

Saaro: Hegee aybissakko erikke.

Martto: Hegaa qonccissanau ane issi leemisuwaa yootays. Taani issitoo neekko yaada, neeppe wolqqan dariyoogaa yootidabadan qoppa. Neeni taappe wolqqan dariyoogaa waata bessana danddayay?

Saaro: Neeni issibaa oottanaadan paaccana danddayays.

Martto: Likke. Issi deexxiyaabaa nu naaˈˈaappe ooni tookkana danddayiyaakko paaccana danddayaasa. Hegaa tookkana danddayiyay oonakko eriyoogee metenna.

Saaro: Ee, tuma.

Martto: SHin taani nena wolqqi baynna asa giyoogaa aggada, neeni ammanettenna asa giyaakko shin? Hegee sohuwaara shaakkanau metiyaaba gidennee?

Saaro: Ee, metiyaaba.

Martto: Issi asi ammanettiyoogaa, i mino gidiyoogaa woy gidennaagaa eranau paaccidi eriyoogaadan sohuwaara erana danddayettenna.

Saaro: Ee, tuma.

Martto: Hegaa akeekanau, neeni ammanettiya asa gidiyoogaa harati erana mala amarida wodee aadhana bessees.

Saaro: Hegee bessiyaaba.

Martto: Ane haˈˈi Doomettaabaa maxaafan deˈiya qofaa zaarettidi beˈoos. Seexaanay Xoossaappe wolqqan darays giidee?

Saaro: CHii, gibeenna.

Martto: Hegaadaana gidiyaakko worddanchay Seexaanaa gidiyoogaa Xoossay sohuwaara qonccissana danddayees. SHin Seexaanay Xoossay ammanettenna yaagiis. I Hewaaniyyo giidobay, ‘Xoossay intteyyo yootidobay worddo; shin taani yootiyoobay tuma’ giyoogaa mala.

Saaro: Garamiyaaba.

Martto: Xoossay ba aadhida eratettan, ha yohuwaa giigissanau amarida wodee aadhana bessiyoogaa akeekiis. Wodeppe, tumaa yootiday oonakko, qassi wordduwaa yootiday oonakko qonccana.

Saaro: SHin Hewaana hayqqido wode, tumaa yootiday Xoossaa gidiyoogee erettibeennee?

 Martto: Ee, amarida ogiyan erettiis. SHin Seexaanay giidoban harabaykka deˈees. Ane paydo 5 zaarettidi beˈoos. Seexaanay Hewaanissi yootido harabaa akeekadii?

Saaro: A he mittaa ayfiyaa miyaaba gidikko, i ayfee dooyettanaagaa yootiis.

Martto: Ee, “lo77uwaanne iitaa Xoossaadan” eranaagaakka yootiis. Seexaanay Xoossay asaa naata goˈˈiyaabaa diggidabadan yootiis.

Saaro: Haˈˈi akeekaas.

Martto: Hegeekka hara mooto.

Saaro: Neeni giyoobay tau gelibeenna.

Martto: Seexaanay yootidobay, Hewaananne asaa naati ubbay Xoossaayyo haarettennaakko eti giiga deˈo deˈanaagaa bessees. Yihooway ha allaalleekka tuma woy worddo gidiyoogaa Seexaanay bessana mala kuuyiis. Hegaa gishshau, Seexaanay ha alamiyaa amarida wodiyau haarana mala Xoossay paqqadiis. Hegee ha alamiyan tuggay daridoy aybissakko eranau maaddees; tuggay Xoossay ehiidoba gidennan, ha alamiyaa haariya Seexaanay ehiidoba. * SHin issi ufayssiyaabaykka deˈees.

Saaro: Hegee aybeeshsha?

Martto: Geeshsha Maxaafay Xoossaa xeelliyaagan tuma gidida naaˈˈubaa yootees. Koyruwan, Yihooway nu tuggaa akeekees. Leemisuwau, Kawuwaa Daawiti Mazamure 31:7n yootidobaa akeeka. Daawiti daro tuggaa beˈida asa; shin i Xoossaakko woossiyo wode woygidaakko akeeka. He xiqisiyaa nabbabuutee?

Saaro: Ero, hagaadan gees: “Ta metuwaa neeni be7ido gishshaunne ta tuggaa neeni erido gishshau, taani aggenna ne siiquwan ufaittananne ufaissau poocu gaana.”

Martto: Hegaa gishshau, daawiti tuggatidaba gidikkokka, Yihooway a tuggaa ubbaa akeekiyoogaa eridi woppu giis. Yihooway ubbabaa, hara asi loyttidi akeekana danddayenna nuna unˈˈissiyaabaakka eriyoogee nena minttettennee?

Saaro: Ee, minttettees.

Martto: Naaˈˈanttuwan, Xoossaa xeelliyaagan tuma gididabay, i nuuni merinau tuggatiiddi deˈanaadan koyennaagaa. Xoossay mata wode Seexaanaa haaruwaa xayssanaagaa Geeshsha Maxaafay yootees. Qassi i ne tuggaanne ne aayee tuggaa gujjin, iitabaa ubbaa muleera xayssana. Xoossay tugga ubbaa mata wode xayssanaagaa nuuni waanidi ammanettana danddayiyaakko tobbanau taani hachi galla yiyaakko shin? *

Saaro: Ero, hegee loˈˈo.