Michelle: Maopay nga aga, Sophia. Nalilipay ako nga maabotan ka dinhi ha iyo balay.

Sophia: Ako man.

Michelle: Ha naglabay ko nga pagbisita, nag-istorya kita kon ano an inaabat han Dios kon kita nag-aantos, ngan nagsiring ka nga maiha mo na liwat nga ginhuhunahuna an mahitungod hito, labi na han nabaldado an imo nanay ha usa nga aksidente ha dalan. * Anay daw, kumusta ngay-an hiya?

Sophia: Usahay OK, usahay diri. Yana, OK hiya.

Michelle: Nalilipay ako nga hibatian ito. Sigurado nga makuri magin positibo ha sugad nga sitwasyon.

Sophia: Oo. Usahay nahuhunahuna ko kon tubtob san-o inin iya pag-antos.

Michelle: Natural la ito. Antes ako bumaya ha naglabay ko nga pagbisita, nagpakiana ako kon kay ano nga gintutugotan han Dios an pag-antos nga may-ada man hiya gahum ha pagtapos hito.

Sophia: Aw, nahinunumdoman ko ito.

Michelle: Antes naton tagdon an baton han Biblia hito nga pakiana, paghisgotan anay naton an pipira han aton gin-istoryahan ha naglabay.

Sophia: Sige.

Michelle: Hinbaroan naton nga may usa nga tawo ha panahon han Biblia nga bisan kon matinumanon, nagpakiana kon kay ano nga gintutugotan han Dios an pag-antos. Kondi bisan pa hito, waray gud an Dios mag-isog ha iya o magsiring nga kulang la hiya hin pagtoo.

Sophia: Yana ko la ito hinbatian.

Michelle: Hinbaroan liwat naton nga nadiri hi Jehova nga Dios nga makita kita nga nag-aantos. Pananglitan, an Biblia nasiring nga kon ginsasakit an iya katawohan, ‘nasasakit’ hiya. * Diri ba nakakaliaw hibaroan nga napaid an Dios kon kita nag-aantos?

Sophia: Oo.

Michelle: Dugang pa, nagkauyon kita nga kon tatagdon an daku nga gahum han aton Maglalarang, sigurado nga may-ada hiya abilidad nga manginlabot ngan tapuson an pag-antos bisan san-o kon karuyag niya.

Sophia: Ito an diri ko masabtan. Kay ano nga gintutugotan niya ini nga mga karaotan nga may-ada man unta hiya gahum ha pagtapos hito?

Michelle: Mahimo naton pamilngon an baton ha imo pakiana pinaagi ha pagtagad han siyahan nga libro han Biblia, an Genesis. Pamilyar ka ba han istorya mahitungod kanda Adan ngan Eva ngan han igindidiri nga bunga?

Sophia: Oo, hinbaroan ko ito ha Sunday school. An Dios nagsiring nga diri hira kumaon tikang ha usa nga puno, kondi waray nira sunda ito.

Michelle: Husto. Yana, aton paghisgotan an panhitabo nga nagresulta ha pakasala nira Adan ngan Eva tungod kay may direkta nga kalabotan ito ha  pakiana kon kay ano nga nag-aantos kita. Alayon daw pagbasa han Genesis kapitulo 3, bersikulo 1 tubtob 5.

Sophia: Nasiring: “Niyan an halas malingo pa kay han bisan ano nga mananap han kapatagan nga kan Jehova nga Dios ginhimo. Ngan hiya siniring ha babaye: Ngay-an nagsiring ba an Dios: Diri ka kumaon bisan ano nga kahoy dida ha tanaman? Ngan an babaye siniring ha halas: Ha bunga han mga kahoy ha tanaman kami makakakaon: Kondi han bunga han kahoy nga aada ha butnga han tanaman, an Dios nagsiring: Diri kamo kumaon hito, bisan pagkamkam hito, bangin kamo mamatay. Ngan an halas sinmiring ha babaye: Kamo diri gud mapatay: Kay an Dios maaram nga ha adlaw nga kamo kumaon hito, an iyo mga mata mapupukrat, ngan kamo mahinunugad ha Dios, nga mag-inaramon na han kaopayan ngan han karaotan.”

Michelle: Salamat. Usisahon anay naton ini. Siyahan, tigamni nga an usa nga halas nakiistorya ha babaye, hi Eva. Usa liwat nga teksto an nagpapakita nga ha pagkamatuod hi Satanas nga Yawa an nakiistorya ha iya pinaagi han halas. * Hi Satanas nagpakiana kan Eva kon ano an iginsugo han Dios mahitungod han puno. Natigamnan mo ba an sirot kon kumaon hira Adan ngan Eva tikang hito?

Sophia: Hira mapatay.

Michelle: Husto. Katapos, naghimo hi Satanas hin sobra karaot nga akusasyon kontra ha Dios. Hiya siniring: “Kamo diri gud mapatay.” Hito nga paagi, iya gintawag an Dios nga buwaon!

Sophia: Yana ko pa gud la hibatii ito nga bahin han istorya.

Michelle: Ngan han gintawag ni Satanas an Dios nga buwaon, nagbangon hiya hin isyu nga nagkikinahanglan hin panahon basi masulbad. Maaram ka ba kon kay ano?

Sophia: Hmm. Diri ako sigurado.

Michelle: Aw, bangin makabulig ini nga ilustrasyon. Usa ka adlaw dinaop ako ha imo ngan nagsiring nga mas makusog ako kay ha imo. Paonan-o mo mapapamatud-an nga sayop ako?

Sophia: Bangin pinaagi hin pipira nga pagsari.

Michelle: Husto. Mahimo kita mag-alsa hin mabug-at nga butang ngan kitaon kon hin-o an makakaakos hito. Kondi, masayon la an paghibaro kon hin-o an mas makusog.

Sophia: Nasasabtan ko an imo iginpapasabot.

Michelle: Pero kumusta man kon diri pagin makusog an akon ginkukwestyon, kondi an akon pagin mas tangkod kontra ha imo? Iba na ito nga istorya, diri ba?

Sophia: Aw, iba na ito.

Michelle: Labi na nga an pagin tangkod diri pariho ha kusog nga puydi pamatud-an pinaagi hin simple la nga pagsari.

Sophia: Oo.

Michelle: Ha pagkamatuod, usa la an paagi ha pagsulbad han isyu. An pagpalabay hin igo nga panahon basi maobserbaran han iba kon hin-o ha aton nga duha an mas tangkod.

Sophia: May punto ka.

Michelle: Yana, balikon naton an asoy ha Genesis. Nagsiring ba hi Satanas nga mas makusog hiya kontra han Dios?

Sophia: Waray.

Michelle: Madagmit unta pamatud-an han Dios nga sayop hi Satanas. Kondi iba an igin-akusar ni Satanas. Hiya nag-angkon nga mas tangkod hiya ha Dios pinaagi han iya ginsiring kan Eva, ‘Nagbibinuwa an Dios ha imo, kondi ako nagsusumat ha imo han kamatuoran.’

Sophia: Hmm, baga hin may punto ito.

Michelle: Salit, tungod han kinaadman han Dios, maaram hiya nga an pinakamaopay nga paagi ha pagsulbad han isyu amo an pagtugot nga lumabay an panahon. Ha urhi, magigin matin-aw kon hin-o an nagsusumat han tinuod ngan an nagbubuwa.

Sophia: Kondi waray pag-iha namatay hi Eva. Diri ba ito nagpapamatuod nga an Dios nagsusumat han tinuod?

Michelle: Ha usa nga bahin, oo. Kondi labaw pa hito an iginpapakita han isyu nga iginbangon ni Satanas. Kitaa utro an bersikulo 5. Ano pa an ginsiring ni Satanas kan Eva?

 Sophia: Hi Satanas nagsiring nga kon kumaon hi Eva han bunga, maaabri an iya mga mata.

Michelle: Oo. Magigin pariho hiya ha Dios nga ‘maaram han maopay ngan han maraot.’ Dida hito, nag-akusar hi Satanas nga may-ada maopay nga butang nga diri iginhahatag an Dios ha mga tawo.

Sophia: Aw, hinsabtan ko na.

Michelle: Ngan usa liwat ito nga daku nga isyu.

Sophia: Ano an imo karuyag sidngon?

Michelle: Pinaagi han mga pulong ni Satanas, baga hin iya iginpapasabot nga hi Eva—ngan an mga tawo—mas mag-oopay an sitwasyon kon waray an pagmando han Dios. Hini nga kahimtang liwat, maaram hi Jehova nga an pinakamaopay nga paagi ha pagsulbad han isyu amo an pagtugot kan Satanas nga pamatud-an an iya akusasyon. Salit, gintugotan hiya han Dios nga mandoan an kalibotan ha usa ka peryodo hin panahon. Ito an rason han duro nga pag-antos ha kalibotan. Hi Satanas, diri an Dios, an nagmamando hini. * Kondi may-ada maopay nga sumat.

Sophia: Ano ito?

Michelle: An Biblia nagtututdo hin duha nga makalilipay nga kamatuoran mahitungod han Dios. Siyahan, diri kita ginpapabay-an ni Jehova kon kita nag-aantos. Pananglitan, tagda an ginsiring ni Hadi David ha Salmo 31:7. Damu nga pag-antos an iya naeksperyensyahan, kondi tigamni kon ano an iya igin-ampo ha Dios. Puydi mo ba basahon ito?

Sophia: Sige. Ito nasiring: “Malilipay ako ngan maandak dida hiton imo ginkaloy-an; Kay ikaw nakakakita han akon kagol-anan: Nakilala mo an akon kagol-anan.”

Michelle: Salit bisan kon nakaeksperyensya hi David hin kakurian, naliaw hiya ha paghibaro nga nakikita ni Jehova an ngatanan nga nahitatabo ha iya. Naliliaw ka ba ha paghibaro nga maaram hi Jehova han ngatanan, bisan han aton mga kasakit nga bangin diri bug-os nga hinbabaroan han iba?

Sophia: Oo, gin-aapresyar ko ngani ito.

Michelle: An ikaduha nga makalilipay nga kamatuoran mahitungod ha Dios amo nga diri niya gintutugotan nga an aton pag-antos magpadayon tubtob ha waray kataposan. An Biblia nasiring nga ha diri maiha, tatapuson han Dios an maraot nga pagmando ni Satanas. Ngan bug-os nga pagwawad-on niya an magraot nga mga butang nga nahitatabo, upod na an mga panhitabo nga gin-aantos mo ngan han imo nanay. Puydi ba ako bumalik ha sunod nga semana basi pamatud-an kon kay ano nga makakasiguro kita nga tatapuson han Dios an ngatanan nga pag-antos ha diri na maiha? *

Sophia: Sige, maghuhulat ako.