1, 2. (a) Nanhi ‘o Sobha ia kalelaku,’ ni mukonda diahi o dijina didi dia mu fuama? (Tala o foto ia dianga.) (b) Mukonda diahi tua mesena kuila Jihova u kala Sobha ietu?

SOBHA SOBHUZA ia II, mukua Suazilândia, ua tumina mu 61 a mivu. Kiki ki kiene mu bhita dingi mu mautuminu a izuua íii. Sumbala tu diuana mukonda tuejiia kuila Sobha Sobhuza ua tumina mu mivu iavulu, maji kuene sobha ia mukuá, o utuminu é ua kalelaku, mukonda muéne kafú kála o athu lelu. O Bibidia ixana ‘Sobha ia kalelaku.’ (1 Tim. 1:17) O musoneki ua jisalamu uexana o Sobha íii, mu dijina diê, kioso kia mu tumbula kuila: “Jihova eie u muenexi, o ungana ué unangenena.”—Jisá. 10:16.

² O kithangana kiene mu tumina Nzambi, ki mu tungula ku mautuminu a athu. Maji ki íii ngó, o ukexilu ua Jihova ua ku tumina uene u tu bhangesa ku mesena ku mu bheza. Saí sobha ua tumina mu Izalaiele mu 40 a mivu, ua ximana Nzambi ni izuelu íii: “Jihova ua lenduka, mukua kisambu, u kokoloka o kutema, o jihenda jê ji vula. Jihova, kialu kiê kia ungana ua ki xikika mu diulu, o utuminu uê ua bhiti kuene kuoso.” (Jisá. 103:8, 19) Jihova ki Sobha ietu ngó, maji muéne Tata ietu ué—o Tata ietu ia henda, uene ku diulu. Kiki ki  bheka ibhuidisu iiadi: Ihi ia bhangele Jihova ia londekesa kála o Tata? Kiebhi kia londekesa Jihova kuila muéne Sobha ua mu tumina hanji tundé kia mu bhukumukina mu Edene? O itambuijilu ia ibhuidisu íii, ia-nda tu kuatekesa ku mu zukama dingi ni ku bheza Jihova ni muxima uetu uoso.

3. Nanhi uexile o mon’a ua dianga ku muiji ua Jihova mu ngongo, a nanhi dingi a a bhange kala “an’a” Nzambi?

³ Jihova ua sangulukile kiavulu kioso kia bhange o Mon’e umoxi-élele! Nzambi ka kexile mu mona o mon’ê kála kima kioso-kioso ngó. Maji muéne ua mu zolele kála Mon’a, iu ua mu bhingi phala ku sanguluka né mu ku bhanga o mazunda ni mazunda a ji-anju ja iuka. (Kol. 1:15-17) O Bibidia, izuela kuila o ji-anju jiji, ji sidivila Nzambi ni kisangusangu kioso kala: ‘Akunji iê a bhanga ioso ia mu uabhela muéne.’ Nzambi u a bhana kijingu mu ku a exana “an’a.” Ene a tokala ku muiji ua Jihova ua ngongo ioso.—Jisá. 103:20-22; Jobe 38:7.

4. Kiebhi o athu mu ixi kia bhange mbandu ku muiji ua Nzambi?

⁴ Kioso kia zubha ku bhanga o diulu ni ixi, Jihova ua bandekesa o muiji uê. Kioso kia zubha ku iudika o ixi, Jihova ua bhange o diiala dia dianga, Adá, mu kidifuanganu Kiê. (Dim. 1:26-28) Mukonda muéne ua Bhange Adá, Jihova ua mesenene kuila Adá u mu belesela. Mukonda muéne uexile Tata, Jihova ua bhana o itendelesu ni henda ioso. Muéne ka bhana itumu kua Adá ieji mu fidisa ku kala ni ufôlo.—Tanga Dimatekenu 2:15-17.

5. Ihi ia bhange Nzambi phala ku izalesa o ixi ni an’ê?

⁵ Jihova ka difu ni jisobha mu ixi, muéne u langa kiambote o muiji uê, muéne u a dielela kiavulu, ki ki mu bhonza ku a bhana o ujitu ua ku bhanga o kikalakalu kiê. Mu kifika, muéne ua bhana kua Adá, o kikalakalu kia bhonzo kia ku luka majina ku iama ioso mu ixi. (Dim. 1:26; 2:19, 20) Nzambi ka bhange o athu oso mu ixi. Maji ua bhange muhatu phala Adá—a mu ixana Eva. (Dim. 2:21, 22) Muéne ua bhana ku dikaza didi, o ujitu ua ku vuala an’a, phala ku izalesa o ixi. Mu ukexilu ua iuka ua ixi, Adá ni Eva eji iukisa o ixi ioso phala ku kala palaízu. O ji-anju joso ku diulu eji bheza Jihova, katé ku hádia kala muiji uê. Kiki kiexile kima kiambote! Kiki kilondekesa o henda ia Tata ietu Jihova!

6. (a) Kiebhi kia mateka o muiji ua Nzambi ku mu bhukumukina? (b) Kiebhi ki tuejiia kuila Jihova ua mu tumina hanji?

⁶ Maji Adá ni Eva, ka xikina kuila Jihova u kala Sobha iâ. Mu veji dia kiki a solo ku kaiela o mona ua bhukumuka ua Nzambi, Satanaji. (Dim. 3:1-6) Mukonda dia ku dituna ku a tumina kua Nzambi, kia a bhekela hadi ni kalunga ku an’ê. (Dim. 3:16-19; Loma 5:12) Mu kiki, Nzambi ka kexile dingi ni an’a a mu belesela mu ixi. O kuila kiki kilombolola kuma muéne ka tenene dingi mba ka mesenene dingi ku tumina o ixi ni athu? Kana! Muéne ua londekesa o kutena kuê kioso kia kaie o diiala ni muhatu mu jaludim ia Edene, phala ku a fidisa ku vutuka-mu, muéne ua te jixelube phala ku langa o njila. (Dim. 3:23, 24) Muéne ua londekesa ué o henda iê ia tata, mu kulondekesa kuila o vondadi iê ia ku kala ni muiji ku diulu ni athu mu ixi, ieji dikumbidila. Muéne ua kanena “mbutu” ieji buika Satanaji ni ku zubha o ibhidi ioso ia bheka o kituxi kia Adá.—Tanga Dimatekenu 3:15.

7, 8. (a) Ukexilu uahi ua iibha ua kexile ku mundu mu izuua ia Noué? (b) Ihi ia bhangele Jihova phala ku zelesa o ixi ni ku langa o muiji uê mu ixi?

⁷  Ku hama ia mivu ia bhiti athu avulu a solo ku bheza Jihova. Bhu kaxi ka athu enhá, bhua kexile Abele ni Enoko. Maji nzungule dia athu a ditunine Jihova kala Sobha iâ, o Tata iâ. Mu izuua ia Noué, mu ixi ioso anga “muizala usuéia.” (Dim. 6:11) O kuila kiki ki lombolola kuma Jihova ka tenene dingi ku tumina o ixi? Ihi ilondekesa o misoso ia Bibidia?

⁸ Xinganeka mu musoso ua Noué. Jihova ua mu bhana itendelesu ia lungu ni kiebhi kia tokalele o ku tunga o álaka ieji bhulula Noué ni muiji uê. Nzambi ua londekesa ué henda ku muiji uoso mu ixi, kioso kia tumina Noué ku kala “mujimbuidi ua maka maiuka.” (2 Phe. 2:5) Nange o njimbu ia Noué ia lungile ni ku dimuna o athu phala ku diela phala ku bhuluka. Mu mivu iavulu, Noué ni muiji ué, a tungile mu ixi iezalele ni undumbu ni usuéia. Kála o Tata ia henda, Jihova ua lange ni ku besoala o dinake dia athu enhó exile jifiiele. Mu ku bheka o Dilúvio ku mundu uoso, Jihova ua londekesa kuila ua kexile ni kutena kua ku buika o athu ni ji-anju ja mu bhukumukine. Mu kidi, Jihova ua kexile hanji mu tumina.—Dim. 7:17-24.

9. Ujitu uahi ua bhana Jihova ku athu mu ixi, kioso kia bhitile o Dilúvio?

⁹ Kioso kia tundu Noué ni muiji uê mu álaka, anga a diota ixi ia zelele ni nuha dizumba diambote, ene a sakidile kiavulu Jihova mukonda dia ku a langa. Mu kithangana kieniókio, Noué ua bhangele kalatódio, iu ua bhanene sata kua Jihova. Nzambi ua besoala Noué ni muiji uê, iu ua bhanene o kitendelesu kiki: “Divualienu mu sokoloke, mu izalese o ngongo.” (Dim. 8:20–9:1) Mu veji íii, o athu mu ixi a tambuile dingi o ujitu ua kubheza kumoxi, ni ku izalesa o ixi.

10. (a) Kioso kia bhitile o Dilúvio kuebhi ni kiebhi o athu a mateka ku bhukumukina Jihova? (b) Ihi ia bhangele Jihova phala o vondadi iê ku i kumbidila?

¹⁰ O Dilúvio ki di katula o kituxi ku athu, Satanaji ni ji-anju ja iibha akexile hanji mu funhisa o athu ku bhanga o ima ia iibha. Mu ku bhita kithangana, o athu a mateka dingi ku bhukumukina o ungana ua henda ua Jihova. Mu kifika, o mulaula ua Noué Nimilodi, ua ditunu o ungana ua Jihova. Nimilodi a mu tange kuila, ‘dinhanga dia ngenga bhu pholo ia Jihova.’ Muéne ua tungu jimbanza jonene, kala Babele, iu ua di bhange sobha, ‘mu ixi ia Xinale.’ (Dim. 10:8-12) Ihi ia tokalele ku bhanga o Sobha ia kalelaku ku sobha íii ia bhukumukine, phala ku fidisa ku zanga o kikanenu kia Nzambi kia ‘ku izalesa o ixi?’ Nzambi ua bhidika o mazui ma athu mu ngongo, phala ku bhangesa kuila o akaiedi a Nimilodi, ka di tendela n’a di muange “mu jixi joso kulu dia mundu.” Ene ambata o ubhezelu uâ ua makutu, ni ukexilu uâ ua ku tumina mu ididi muendele.—Dim. 11:1-9.

11. Kiebhi kia londekesa Jihova o ufiiele kua kamba diê Mbalahamu?

¹¹ Sumbala athu avulu akexile mu bheza o jinzambi ja makutu kioso kia bhitile o Dilúvio, kua kexile ué athu avulu exile ji fiiele a kolokotele mu kubheza Jihova. Muthu umoxi uexile Mbalahamu, ua kexile mu mbanza iambote ia Uli, a mu tumine kuia mu tunga mu jibalaka mu mivu iavulu. (Dim. 11:31; Jihe. 11:8, 9) Mu kithangana kia kexile mu nhunga Mbalahamu, kua kexile ji sobha mu jixi. Saí jisobha, a tungile mu jimbanza a ji kondoloka ni ilumbu. Maji Jihova ua lange Mbalahamu ni muiji ué. Kia lungu ni ukexilu ua Jihova ku langa, o mukua jisalamu uambe: ‘Nzambi  kehela diiala ku a bhanga phulu; ua bazela o jisobha mukonda diâ-ene.’ (Jisá. 105:13, 14) Mukonda Jihova fiiele ku makamba mê, muéne ua kanena Mbalahamu: “Jisobha hinu ja kà tunda momu’é.”—Dim. 17:6; Tiia. 2:23.

12. Kiebhi Jihova kia londekesa o kutena kuê mu Ijitu, ni kiebhi kiki kia kuatekesa o mundu uê?

¹² Nzambi ua tona dingi o kikanenu kiê kua mon’a Mbalahamu Izake, ni mulaulé Jakobo, kuila ueji ku a besoala, ni kuila ku muiji uâ kueji tunda o jisobha. (Dim. 26:3-5; 35:11) Maji ande dia ku kala jisobha, o muiji ua Jakobo ua kexile hanji ku ubhika mu ixi ia Ijitu. O kuila kiki kilombolola kuma Jihova keji kumbidila o kikanenu kia bhangele, mba ka kexile dingi mu tumina o ixi? Kana! Mu kithangana kia tokala, Jihova ua londekesa o kutena kuê kua Falaó, o sobha ia bhukumukine. O abhika akua Izalaiele a dielele kua Jihova, ua a bhuluile bhu kaxi ka Kalunga ka Kusuka. Kiki kilondekesa kuila Jihova uexile hanji o Sobha ia Ngongo Ioso. Kála o Tata ia henda u langa o tuana tuê, muéne ni kutena kuê, ua bhange ioso phala ku langa o mundu uê.—Tanga Makatukilu 14:13, 14.

13, 14. (a) Ihi imbi akua Izalaiele, ia lungu ni utuminu ua Jihova? (b) Kikanenu kiahi kia bhangele Nzambi kua Davidi kia lungu ni unguvulu?

¹³ Kioso kia zubha ku a bhulula mu Ijitu, o akua Izalaiele embi muimbu ua ku ximana Jihova. O muimbu iú, tu u sanga mu divulu dia Makatukilu kibatulu 15. O velusu 18 iambe: “Jihova ua hingila-ku; o ungana ué u nangenena.” Sé phata Jihova uexile Sobha ia kifuxi kioso kia Izalaiele. (Mate. 33:5) Maji o athu ka mesenene kuila Jihova, o muthu ka tena ku mu mona, u kala Sobha iâ. Mu ku bhita 400 ja mivu, kioso kia tundu mu Ijitu, ene a bhingi kua Nzambi phala ku a bhana sobha, kála kia kexile o ifuxi ki i kexile ku mu bheza. (1 Sam. 8:5) Né muene kiki, Jihova uexile hanji o Sobha, kiki tu ki mona mu utuminu ua Davidi, uexile o sobha ia kaiiadi ia Izalaiele.

¹⁴ Davidi ua bhekele o álaka ia kikutu mu Jeluzaleme. Mu kithangana kieniókio kia ku sanguluka, o Jilevita embi muimbu ua ku ximana, mua tumbula o izuelu i tu sanga mu divulu dia 1 Malunda 16:31: ‘A kizuele muene mu axaxi ka muiji kuila:  “Nzambi muene utumina.’” Nange muthu u di ebhuidisa, ‘Se Jihova muene o Sobha ia kalelaku, kiebhi kia tena ku kala Sobha mu kithangana kieniókio?’ Jihova u kala Sobha kioso, mu kutena kuê, u sola sobha phala ku tumina. Kima kiambote ku tendela kiebhi Jihova kia kala Sobha. Ande dia Davidi kufuá, Jihova ua mu kanene kuila o utuminu uê ueji nangenena: “Nga kà zangeleka o mbutu ié i ku bhingana ku dima, i tunda mu divumu dié muene, o utuminu uê ngi u kuatesa, u kola kiambote.” (2 Sam. 7:12, 13) O kikanenu kiki, kia di kumbidila kioso “o mbutu,” mba mon’a a Davidi, kia moneka mu ku bhita 1.000 a mivu ndenge. Nanhi uexile o mon’a iú, ni thembu kuxi kia kituka Sobha?

15, 16. Thembu kuxi kia undu Jezú phala ku kala Sobha, ni ihi ia bhange Jezú ia lungu ni utuminu uê?

¹⁵ Ku muvu ua 29 K.K., Nzuá dia Batizu ua mateka ku boka kuma, o “utuminu ua diulu ua [zukamene].” (Mat. 3:2) Kioso Jezú kia mu batizala kua Nzuá, Jihova ua undu Jezú kala Mexiia, ueji kala Sobha ia Utuminu ua Nzambi. Jihova ua londekesa o henda ia tata kua Jezú, mu izuelu íii: “Muenhú Mon’ami a kazola, ua ngi uabhela kiambote.”​—Mat. 3:17.

¹⁶ Mu ukunji uê Jezú ua ximana Tat’ê. (Nzuá 17:4) Muéne ua bhange kiki mu ku boka o Utuminu ua Nzambi. (Luka 4:43) Muéne ua longo ué o akaiedi’ê ku samba phala o Utuminu iú uíze. (Mat. 6:10) Mukonda muéne uexile o Sobha, Jezú ua zuela ku jinguma jê: “O Utuminu ua Nzambi uala moxi dienu.” (Luka 17:21) Mu ku bhita kithangana mu usuku ande dia kufuá, Jezú ua bhangele ‘kikutu ni maxibulu mê, phala ene ku kala jisobha.’ Muéne ua bhana ku akaiedi’ê exile jifiiele, o kidielelu kia ku tumina né ku Utuminu ua Nzambi ku diulu.—Tanga Luka 22:28-30.

17. Kiebhi kia mateka Jezú ku tumina ku hama ia dianga, maji ihi ia tokalele ku kingila?

¹⁷ Thembu kuxi Jezú ieji mateka o ku tumina ku Utuminu ua Nzambi? Muéne ka mateka kioso kia mu undu. Mu kizuua kia mukuá mu ngoloxi, Jezú a mu jibha, o akaiedi’ê a lenge. (Nzuá 16:32) Mu kiki, kala m’ukulu, Jihova uene mu tumina hanji. Mu kizuua kia katatu muéne ua fukununa Mon’ê, mu kizuua kia Pendekoxi kia 33 K.K., Jezú ua mateka ku tumina mu kilunga kia Jikidistá kia jiphange jê a a undu. (Kol. 1:13) Maji né kiki, Jezú ua tokalele hanji ku kingila phala ku tumina o ixi ioso kala o mbutu ia kanene Nzambi. Jihova uambela kua Mon’ê: “Xikama ku mbandu iami ia madilu, katé ki ngi ku bhanga o jinguma ji kala kibaka kié kia kutula inama.”—Jisá. 110:1.

18, 19. Ihi ia tu suínisa ku bhanga, ni ihi i tua-nda di longa mu milongi ia-nda kaiela?

¹⁸ Ku mazunda ni mazunda a mivu, o ungana ua Jihova a u bhukumukina ku diulu ni mu ixi. Maji Jihova muéne hanji o Sobha. Mukonda Tata ia henda, muéne ua lange o jiselevende exile jifiiele, kála Noué, Mbalahamu, ni Davidi. O kuila kiki ki tu bhangesa ku belesela o Sobha ietu ni ku mu zukama?

¹⁹ Maji nange tu dibhuidisa: Kiebhi Jihova kia kala Sobha mu izuua ietu? Kiebhi ki tu tena kulondekesa kuila tua mu belesela o Utuminu ua Jihova, ni kiebhi ki tu tena ku kala tu an’a a iuka ku muiji uê mu ngongo? Ihi ilombolola kioso ki tu bhinga phala o Utuminu ua Nzambi uíze? O ibhuidisu íii a-nda ku i tambuijila mu milongi ia-nda kaiela.