Adora Jeová, Liurai rohan-laek
“Ba Liurai rohan-laek neʼe, . . . ba nia naran boot no glória tinan ba tinan nafatin.”—1 TIMOTEO 1:17.
1, 2. (a) Sé mak “Liurai rohan-laek”? Tansá mak ita bele hatete nuneʼe? (Haree dezeñu iha pájina neʼe.) (b) Tanbasá mak ita hakarak Jeová ukun ita?
LIURAI ida naran Sobhuza II ukun rai-Suazilándia ba tempu kleur toʼo besik tinan 61. Maski ita hanoin katak ninia ukun neʼe kleur tebes, maibé iha mós liurai ida seluk neʼebé ninia ukun hela ba tempu kleur liu fali ema nian. Bíblia bolu liurai ida-neʼe nuʼudar “Liurai rohan-laek”. (1 Timoteo 1:17) Liafuan iha salmu ida dehan: “Jeová mak Liurai ba tempu neʼebé la bele sura.”—Salmo (Mazmur) 10:16.
2 Maromak nia ukun la hanesan duni ho ema nian tanba Maromak nia ukun hela ba nafatin. Maibé buat neʼebé book ita atu hakbesik ba Jeová mak dalan neʼebé nia halaʼo ninia ukun. Liurai ida neʼebé ukun nasaun Israel ba tinan 40 liu fó hahiʼi ba Maromak Jeová, hodi hatete: “Jeová mak laran-sadiʼa no laran-luak, neineik atu hirus no hatudu laran-diʼak neʼebé nakonu ho domin. Jeová rasik mak halo metin ninia kadunan iha lalehan.” (Salmo [Mazmur] 103:8, 19) Jeová mak ita-nia Liurai, maibé laʼós neʼe deʼit, nia mós ita-nia Aman neʼebé domin-naʼin. Iha dalan saida deʼit mak Jeová nuʼudar ita-nia Aman? Husi tempu jardín Eden, oinsá mak Jeová hatudu katak nia ukun nuʼudar Liurai ba nafatin? Resposta ba pergunta sira-neʼe sei book ita atu hakbesik liután ba Jeová no adora nia ho ita-nia laran tomak.
LIURAI ROHAN-LAEK KRIA FAMÍLIA BOOT IDA
3. Jeová nia família primeiru mak sé? Jeová mós kria saida nuʼudar ninia “oan sira”?
3 Jeová haksolok tebes bainhira nia kria ninia Oan primeiru. Jeová la trata nia Oan hanesan atan neʼebé folin la iha. Maibé Jeová hadomi ninia Oan no hakarak atu haksolok hamutuk hodi kria anju sira rihun ba rihun neʼebé perfeitu. (Koloso 1:15-17) Tuir Bíblia, anju sira-neʼe serbí Jeová ho laran-haksolok nuʼudar “serbisu-naʼin sira neʼebé halo ninia hakarak”, no Jeová mós hafolin sira hodi bolu nuʼudar ninia “oan sira”. Sin, anju sira mós parte husi Jeová nia família.—Salmo (Mazmur) 103:20-22; Jó (Ayub) 38:7.
4. Oinsá mak ema mós sai parte husi Jeová nia família boot?
4 Depois Jeová kria lalehan no rai, nia mós aumenta ninia família. Oinsá? Ulukliu, Jeová prepara mundu neʼe nuʼudar hela-fatin neʼebé kapás, no depois nia kria mane primeiru, Adão, hodi tuir ninia ilas. (Gênesis [Kejadian] 1:26-28) Nuʼudar Kriadór, Jeová iha direitu atu hakarak Adão halo tuir Nia. No nuʼudar Aman, Jeová ho domin no laran-diʼak fó matadalan oioin ba Adão. Maibé ninia lei la hanetik Adão nia liberdade.—Lee Gênesis (Kejadian) 2:15-17. a
5. Maromak halo saida hodi halo mundu neʼe nakonu ho ema?
5 La hanesan ho liurai barak neʼebé sala-naʼin, Jeová haree ninia atan sira nuʼudar ninia família rasik. Nia mós fó knaar oioin ba sira hodi tau fiar ba sira. Porezemplu, Jeová haruka Adão atu halo serbisu boot neʼebé lori haksolok ba nia, neʼe mak atu hanaran animál sira. (Gênesis [Kejadian] 1:26; 2:19, 20) Maromak mós la kria kedas ema rihun ba rihun hodi halo nakonu mundu neʼe, maibé nia kria feto ida, Eva, atu sai Adão nia feen. (Gênesis [Kejadian] 2:21, 22) Hodi halo nuneʼe, Jeová fó oportunidade ba sira atu hakonu mundu ho sira rasik nia oan, no haluan jardín furak neʼe toʼo mundu tomak sai paraízu. Sira bele adora Jeová ba nafatin hamutuk ho anju sira nuʼudar família ida deʼit. Sin, Aman Jeová hatudu domin boot ba Adão ho Eva hodi fó esperansa kapás ba sira!
OAN SIRA LA SIMU MAROMAK NIA UKUN
6. (a) Oinsá mak Maromak nia família komesa kontra hasoru nia? (b) Oinsá mak ita bele hatene katak Jeová la lakon ninia kbiit atu ukun ninia kriatura sira?
6 Buat neʼebé triste mak Adão ho Eva la simu Jeová nuʼudar sira-nia Ukun-Naʼin. Duké halo tuir Jeová, sira halo tuir Satanás, anju ida neʼebé kontra hasoru Maromak. (Gênesis [Kejadian] 3:1-6) Ida-neʼe lori susar, terus, no mate ba sira-nia an no mós ba sira-nia oan hotu. (Gênesis [Kejadian] 3:16-19; Roma 5:12) Triste tebes katak iha mundu neʼe, la iha ema ida neʼebé rona ba Maromak Jeová. Maibé ida-neʼe katak Jeová lakon ona kbiit atu ukun ninia kriatura sira ka lae? Lae duni! Jeová uza ninia kbiit hodi duni sai Adão ho Eva husi jardín Eden no tau anju kerubín atu hein jardín hodi sira la bele tama fali. (Gênesis [Kejadian] 3:23, 24) No iha tempu hanesan, Jeová mós hatudu ninia domin ba ema. Nia promete katak nia sei iha anju no ema sira neʼebé halo tuir nia, no katak Adão nia bei-oan ida mak sei halakon Satanás no buat aat hotu neʼebé mosu tanba Adão nia sala.—Lee Gênesis (Kejadian) 3:15. b
7, 8. (a) Iha Noé nia tempu, mundu sai aat toʼo iha neʼebé? (b) Jeová halo saida deʼit atu halakon buat aat husi mundu no atu proteje ema?
7 Durante tinan atus ba atus depois Adão halo tiha sala, ema balu hanesan Abel no Enoc hili atu laran-metin ba Jeová. Maibé ema barak la simu Jeová nuʼudar sira-nia Aman no Liurai. Tan neʼe, iha Noé nia tempu, mundu neʼe sai “nakonu ona ho violénsia”. (Gênesis [Kejadian] 6:11) Ida-neʼe katak Jeová la tau matan ona ba mundu ka lae? Bíblia hatete saida?
8 Bíblia hatete katak Jeová fó matadalan ba Noé oinsá atu halo ró boot hodi salva ninia an no família. Jeová mós hatudu domin ba ema hodi fó knaar ba Noé atu sai “justisa nia manu-ain”. (2 Pedro 2:5) Noé hatete ba povu atu arrepende an no fó avizu kona-ba rai-nabeen, maibé sira la rona. Ba tinan barak Noé ho nia família moris iha mundu neʼebé nakonu ho violénsia no hahalok aat oioin. Maibé Jeová nuʼudar Aman neʼebé hadomi ninia oan, nia proteje no fó salvasaun ba sira naʼin-ualu neʼe. No ikusmai, kuandu Jeová halo rai nabeen, nia halakon ema no anju aat sira husi mundu hodi hatudu ninia kbiit nuʼudar ukun-naʼin.—Gênesis (Kejadian) 7:17-24.
![[Tabela iha pájina 10]](https://assetsnffrgf-a.akamaihd.net/assets/m/2014043/TTP/wpub/2014043_TTP_cnt_2_xs.jpg)
Jeová sempre hatudu katak nia mak Ukun-Naʼin ba ninia kriatura hotu (Haree parágrafu 6, 8, 10, 12, 17)
JEOVÁ NIA UKUN DEPOIS RAI-NABEEN
9. Depois Rai-Nabeen, Jeová fó oportunidade saida ba ema?
9 Ita bele fiar katak kuandu Noé ho ninia família sai husi ró boot no sira-nia ain sama rai, sira sente agradese tebes ba Jeová tanba nia tau matan didiʼak ba sira. Tan neʼe, Noé halo kedas altár no hasaʼe sakrifísiu hodi adora Jeová. Maromak fó bensaun ba Noé nia família no haruka sira atu ‘halo oan barak hodi halo nakonu mundu’. (Gênesis [Kejadian] 8:20–9:1) Dala ida tan, ema iha oportunidade atu sai família ida deʼit neʼebé adora Jeová no halo nakonu mundu tomak.
10. (a) Depois Rai-Nabeen, iha neʼebé no oinsá mak ema komesa kontra hasoru Jeová? (b) Hodi kumpre ninia hakarak, Jeová halo saida?
10 Maski nuneʼe, ema nafatin sala-naʼin. Satanás ho anju aat sira mós nafatin book ema. Lakleur, ema komesa atu la simu Jeová nia ukun. Sira ida mak Noé nia bei-oan nia oan, naran Nimrod. Bíblia bolu nia nuʼudar “kasadór ho forsa boot neʼebé kontra hasoru Jeová”. Nimrod harii sidade boot sira hanesan sidade Babel no halo ninia an nuʼudar liurai “iha rai Sinear”. (Gênesis [Kejadian] 10:8-12) Sin, nia koko hanetik Jeová nia hakarak atu halo mundu sai nakonu ho ema. Entaun, Jeová halo saida? Nia halo ema atu koʼalia língua oioin hodi namkari ba mundu tomak. Ikusmai, fatin hotu neʼebé sira bá, sira lori sira-nia relijiaun falsu no sira-nia toman hodi ukun malu.—Gênesis (Kejadian) 11:1-9.
11. Oinsá mak Jeová hatudu laran-metin ba ninia belun Abraão?
11 Depois Rai-Nabeen, maski ema barak adora maromak falsu sira, maibé ema balu laran-metin atu adora Jeová. Sira ida mak Abraão. Maski uluk moris diʼak iha sidade Ur, maibé nia halo tuir Jeová hodi husik sidade neʼe no moris nuʼudar ema laʼo-rai durante tinan ba tinan. (Gênesis [Kejadian] 11:31; Ebreu 11:8, 9) Durante tempu neʼe, Abraão la tau fiar ba protesaun husi ema ka sidade boot ho moru aas, maibé nia tau fiar ba Jeová. No nia ho ninia família hetan duni protesaun husi Jeová. Livru salmu ida hatete: “[Maromak] la husik ema ida atu lohi sira, maibé tanba sira, mak nia fó kastigu ba liurai sira.” (Salmo [Mazmur] 105:13, 14) Tanba Jeová mak Maromak neʼebé laran-metin ba ninia belun, nia promete ba Abraão hodi dehan: “Liurai sira sei mai husi ó.”—Gênesis (Kejadian) 17:6; Tiago 2:23.
12. Oinsá mak Jeová hatudu ninia kbiit nuʼudar ukun-naʼin ba liurai Egiptu? Oinsá mak ida-neʼe kona Jeová nia povu?
12 Maromak promete ba Abraão nia oan Isaac no bei-oan Jacob katak nia sei haraik bensaun ba sira no sira-nia bei-oan mak sei sai liurai. (Gênesis [Kejadian] 26:3-5; 35:11) Maski nuneʼe, duké sai liurai, Jacob nia bei-oan sira sai atan iha rai-Egiptu. Ida-neʼe katak Jeová la kumpre ninia promete no lakon ona ninia kbiit nuʼudar ukun-naʼin boot ka lae? Lae! Tuir ninia tempu, Maromak Jeová hatudu ninia forsa no kbiit ba liurai Egiptu neʼebé ulun-toos. Ema Israel tau fiar ba Jeová, no nia salva sira iha dalan neʼebé furak tebes hodi lori sira hakur Tasi Mean. Klaru katak Jeová nafatin ukun lalehan no rai hotu, no nuʼudar Aman neʼebé hadomi nia oan, nia uza nia kbiit boot atu proteje povu Israel.—Lee Êxodo (Keluaran) 14:13, 14. c
JEOVÁ SAI EMA ISRAEL NIA LIURAI
13, 14. (a) Ema Israel sira hatete saida iha sira-nia knananuk kona-ba Jeová nia ukun? (b) Maromak promete saida ba David?
13 Bainhira Jeová halo milagre hodi salva ema Israel husi ema Egiptu, sira kanta knananuk atu hahiʼi Jeová. Knananuk neʼe hakerek iha Êxodo (Keluaran) kapítulu 15. Iha versíkulu 18 hatete: “Jeová sei ukun nuʼudar liurai ba nafatin no ba nafatin.” Loos duni, Jeová sai Liurai ba nasaun foun neʼe. (Deuteronômio [Ulangan] 33:5) Maibé ikusmai, ema Israel sente katak Jeová, neʼebé ema nia matan la haree, ninia ukun la toʼo. Liutiha tinan 400 depois sira sai husi rai-Egiptu, sira husu Maromak atu foti ema ida nuʼudar liurai, hanesan ho nasaun sira seluk neʼebé adora maromak falsu. (1 Samuel 8:5) Maski nune’e, iha liurai David nia tempu, Jeová hatudu sai ho klaru katak Nia mak nafatin sira-nia Liurai.
14 David lori arka aliansa nian ba Jerusalém. Iha tempu haksolok neʼe, ema levita sira kanta knananuk atu hahiʼi Jeová. Knananuk neʼe inklui liafuan furak neʼebé hakerek iha 1 Crônicas (Tawarikh) 16:31, hodi dehan: “Fó sai iha nasaun sira-nia leet bá: ‘Jeová mak sai ona Liurai!’” Karik ita hanoin: ‘Jeová mak Liurai husi ulukliu kedas! Entaun, oinsá mak nia bele sai Liurai iha tempu neʼebá?’ Tuir loloos, Jeová sai Liurai kuandu nia hatudu sai ninia kbiit nuʼudar Ukun-Naʼin ka kuandu nia foti ema ruma atu reprezenta nia. Antes David mate, Jeová promete ba nia katak ninia ukun sei hela ba nafatin, hodi dehan: “Haʼu sei foti ó-nia bei-oan depois ó, ó-nia oan rasik, no haʼu sei hametin ninia ukun.” (2 Samuel 7:12, 13) Promesa neʼe sai loos liutiha tinan 1.000, bainhira David nia “bei-oan” ida mosu. Entaun, sé mak ema neʼe? Bainhira loos mak nia sai Liurai?
JEOVÁ FOTI LIURAI FOUN IDA
15, 16. Horibainhira mak Jesus hetan knaar atu sai Liurai ba aban-bainrua? Durante iha rai, saida deʼit mak nia halo atu prepara ba ninia Ukun?
15 Iha tinan 29, João Baptista komesa haklaken katak “reinu lalehan nian besik daudaun ona”. (Mateus 3:2) Kuandu Jesus hetan batizmu husi João, Jeová fó espíritu santu ba Jesus nuʼudar Mesias no fó knaar ba nia atu sai Liurai ba Maromak nia Ukun iha aban-bainrua. Nuʼudar Aman, Jeová hatudu domin ba Jesus hodi dehan: “Ida-neʼe mak haʼu-nia Oan doben, neʼebé fó ksolok mai haʼu.”—Mateus 3:17.
16 Durante Jesus iha rai, nia nafatin fó glória ba ninia Aman. (Joao 17:4) Nia halo ida-neʼe hodi haklaken kona-ba Maromak nia Ukun. (Lucas 4:43) Nia mós hanorin ninia dixípulu sira atu halo orasaun hodi husu Ukun neʼe atu mai. (Mateus 6:10) Nuʼudar Liurai iha futuru, Jesus iha razaun diʼak atu hatete ba ema neʼebé kontra hasoru nia: “Maromak nia reinu iha ona imi leet.” (Lucas 17:21) Ikusmai, iha kalan antes Jesus mate, nia halo aliansa ho ninia apóstolu sira kona-ba ninia ukun. Aliansa neʼe dehan katak Jesus nia dixípulu balu sei sai liurai hamutuk ho nia iha Maromak nia Ukun.—Lee Lucas 22:28-30.
17. Iha dalan saida mak Jesus hahú ninia ukun iha tinan 33? Maibé nia presiza hein atu halo saida?
17 Bainhira mak Jesus sai Liurai ba Maromak nia Ukun? Nia la sai kedas Liurai tanba loron depois nia halo aliansa ho ninia dixípulu sira, ema oho Jesus no ninia dixípulu sira halai namkari. (Joao 16:32) Maibé iha tempu neʼe mós Jeová sei tau matan ba buat hotu. Liutiha loron tolu, nia halo ninia Oan moris hiʼas fali no iha loron Pentekostes 33, Jesus komesa ukun kongregasaun kristaun. (Koloso 1:13) Maibé, Jesus tenke hein ba tempu balu hodi bele simu kbiit atu ukun mundu tomak nuʼudar David nia bei-oan. Jeová hatete ba Oan: “Tuur iha haʼu-nia sorin kuana toʼo tempu neʼebé haʼu tau ó-nia inimigu sira iha ó-nia ain okos.”—Salmo (Mazmur) 110:1.
ADORA LIURAI ROHAN-LAEK BA NAFATIN
18, 19. Hodi hatene Aman neʼebé domin-naʼin, ida-neʼe book ita atu halo saida? Iha lisaun tuirmai, ita sei aprende kona-ba saida?
18 Ba tinan rihun ba rihun, anju no ema barak kontra hasoru Jeová nia ukun. Maibé Jeová nunka lakon ninia direitu no kbiit nuʼudar Ukun-Naʼin. Nuʼudar Aman neʼebé hadomi nia oan, nia proteje no tau matan ba ninia atan sira, hanesan Noé, Abraão, no David. Ida-neʼe book ita atu hakbesik liután no halo tuir ita-nia Liurai, loos ka lae?
19 Maibé karik ita hanoin: Oinsá mak Jeová sai Liurai iha ita-nia tempu? Oinsá mak ita bele sai Jeová nia atan no sai ida deʼit ho ninia família iha dalan neʼebé perfeitu? Kuandu ita halo orasaun hodi husu Maromak nia Ukun atu toʼo mai, ida-neʼe katak sá? Iha lisaun tuirmai, ita sei buka-hatene resposta ba pergunta hirak-neʼe.
a Gênesis 2:15-17: “15 No Maromak Jeová tau mane neʼe iha jardín Eden atu haburas no tau matan. 16 Maromak Jeová mós fó ukun-fuan ba mane neʼe hodi dehan: ‘Ai-fuan husi ai-hun hotu iha jardín neʼe ó bele han toʼo bosu. 17 Maibé kona-ba ai-fuan husi ai-hun koñesimentu nian kona-ba diʼak no aat, ó labele han, tanba iha loron neʼebé ó han ai-fuan neʼe, ó sei mate.’”
b Gênesis 3:15: “Haʼu sei halo ó odi feto neʼe, no ó-nia bei-oan no feto neʼe nia bei-oan sei odi malu. Nia sei harahun ó-nia ulun no ó sei hakanek ninia ain-tuban.”
c Êxodo 14:13, 14: “13 Moisés hatete ba povu: ‘Keta taʼuk. Hamriik metin bá no haree salvasaun husi Jeová, neʼebé ohin nia sei lori ba imi. Tanba ema Egiptu neʼebé imi haree ohin, imi sei la haree fali, sin, nunka sei haree fali. 14 Jeová rasik mak sei luta ba imi, no imi sei nonook deʼit.’”
