1, 2. a) Kaba lanüga Larúeihan Bungiu? b) Ka uagu chouru wabalin liábinba lan Arúeihani ligía?

 LIGIBUAGU aban wübü yarafa lun Kafarünaumu (Capernaum), arufudahati Hesusu houn lani disipulugu lun hamuriahan lidan furíei: “Ñǘbuinla barúeihan” (Mat. 6:10). Uguñe weyu, machourun hamuti saragu gürigia liábinba lan Arúeihani le. Ánheinti wagía, chouru wamuti lounabúba lan furíei le.

² Layusurubei Heowá Larúeihan lun lóundaraguniña sun lufamilian lidan aban, dandu gürigia ubouagu kei sífirigu sielu. Lisuuni Bungiu le lagunfuliruba lau ichouruni (Isa. 55:10, 11). Le linarün katei, Urúeihali Heowá lidan wadaani! Sun sügǘ le susereelibei lidan san irumu le sügühalibei arufuda lumuti ítara liña lan. Ladügüña Heowá katei wéinamuti luagu hafulesein saragu míñunu lubúeingu ha úaraguatiña (Sak. 14:9; Aruf. 15:3). Gama lumoun, mama ligiaméme Urúeihali lan Heowá lumoun Larúeihan Bungiu le uágubei layanuha Hesusu. Ka idan amu lan bián katei le luáriuagua, ani ka wagaradanboun lidan?

3. a) Ídabuga lagumesera Hesusu agumadiha keisi Urúei ani halía? b) Ida luba hafuranguagüdüni luagu gumese lan Arúeihani sielu lidan irumu 1914? (Ariha huméi abürüdǘni.)

³ Lumoun lagumuha sígulu disinéfu aba lagumeserun profesía le meha libihibei Danieli bián-milu-seingü-san irumu lubaragiñe afuranguda: “Lídanme lidaani harúeihan urúeigu ha, ladügüba Bungiu le siélubei aban arúeihani le siñabei lagünrinchaguni ni lagumadiruni  ni aban néchani” (Dan. 2:44). Sügütiña meha Aturiahatiña Bíbülia saragu irumu arufudaha luagu ábanbei lan irumu súdiniti irumu 1914. Gürigia ha meha lídanbaña dan ligía buin haña lau emenigini. Ariñagati meha aban abürühati: “Buin liña meha ubóu le lánina irumu 1914 lau emenigini”. Gama lumoun, lidanméme irumu ligía, aba laduurun Furumiñeti Wuribu Wéiriti. Aba lagunfulirun profesía burí le tídanbei Bíbülia! Aba liábingua ilamaü, hárabaganali luma sun luwuyeri igei, sun katei ligía arufuda lumuti gumese lan Hesukrístu arúeiha sielu lidan irumu 1914 keisi Urúei lidan Larúeihan Bungiu. * Lau ladügüni Liráü Urúeime, aba Urúei lan Heowá lidan amu igaburi.

4. a) Ka furumiñeti katei ladügübei Hesusu lárigiñe lañuurun lun larúeihan? b) Ka un letenira Urúei lárigiñe?

⁴ Furumiñeti katei le ladügübei iseri Urúei ligía, lageindagun kóntüra Satanási, lágani Bungiu le méinitimabei. Bugá lumuti Hesusu hama lani ánheligu Satanási siélugiñe hau sun lumafianu. Adügati katei le lun ñein lan ugundani sielu, anhein ubouagu aba lagumeserun lénrengunga le marihínwañahagili (aliiha huméi Arufudúni 12:7-9, 12). Lárigiñe, aba letenirun Urúei houn lubúeingu ubouagu. Ka un? Lun larumadahaniña, larufudahan houn luma lun laranseruniña lun hagunfuliruni lugundan Bungiu. Ariha waméi ida liña lan leseriwidun haganbadi lun Urúei lidan ǘrüwa katei le hénpulume woun uguñe weyu.

5. Ka arumadahani adügǘbei labadinagua irumu 1914 darí lagumeseha 1919?

⁵ Lárigiñebei larumadahani Urúei sielu lárigiñe lagadeiruni Mafia hama lumafianu, aba lariñagun Heowá lun lun letenirun houn lánigu ha ubouagubaña luma lun larumadahaniña. Ariñagati meha profeta Malakíasi ítara liña lan wadagimanu ligía kei aban arumadahani lúmagiñeti Bungiu (Mal. 3:1-3). Chóurugüda lumuti sun le ásügürübei luagu susere lan le labadinagua irumu 1914 darí lagumeseha irumu 1919. * Lun hadan wamá lufamilian Heowá, mosu haruma wamá (1 Fe. 1:15, 16). Mosu wakipuragun woungua díseñu luéi sun arufudahani le lídanbei relihión mama inarüniti luma luéi polítika le lídanbei ubóu le.

6. a) Ida liña weresibiruni ariñahani tídangiñeti Bíbülia? b) Ka uagu súdini lubéi ariñahani ligía woun?

⁶ Yusu lumuti meha Hesusu lubafu kei Urúei lun líridun aban “musu úaraguati ani gunfuranda ligía”. Ligía meha musu le lunbei líchugun ariñahani lúmagiñeti Bungiu houn sun lílana “aban fárüga” le lábugiñebei laríaahan Hesusu (Mat. 24:45-47; Huan 10:16). Lúmagiñebei irumu 1919, anihein aban liraüraü sétanu hani íbirigu anuadirúaaña ha agunfulirubaña lau úaraguni lau hani buligasion, híchuguni ariñahani súdiniti houn lumutuniña Bungiu. Saragu ariñahani lúmagiñeti Bungiu le wibihibei lúmagiñe musu úaraguati héregüda lumuti wafiñen ani adügati lúntima desidírü wamá wakipuragun woungua harumañu dandu lidan weseriwidun, lidan wagaburi, lidan wasaminan luma sun wágubu. Aranse lumutiwa giñe lun wetenirun lun wadagimanu súdiniti le adügǘbei lidan sun Ubóu: apurichihani. Sagá wamuti san sun buiti le wayaraati lídangiñe ariñahani lúmagiñeti Bungiu ligía?

7. a) Ka wadagimanu súdiniti lagumeserubei Hesusu dan le ya lubéi ubouagu? b) Ídaba lagumucha ladügǘn wadagimanu le?

⁷ Dan le meha lagumeserunbalin Hesusu lani ministeriu ubouagu, ariñagati: “Gasu giñe níchuguni uganu le luáguti larúeihan Bungiu houn lílana líbiri fulasu, ladüga lun lira nounahóua” (Luk. 4:43). Luagu ǘrüwa irumu dimí, apurichihani wadagimanu súdinitimabei lun Hesusu. Ani ruti gumadi houn lani disipulugu  lun hadügüni ligiaméme: “Heiba, apurichiheina luagu yarafaali lan larúeihan Bungiu” (Mat. 10:7). Lárigiñebei láguyugun, aba lariñagun Hesusu hanügübei lan lani disipulugu uganu ligía chülǘ lumoun “lidise-agei fulasu ubouagu” (Adü. 1:8). Ani füramaseti houn lasigiruba lan ídeha lidan wadagimanu súdiniti le darí lumoun lagumuchagüle ubóu le (Mat. 28:19, 20).

8. Ida liña meha línchahaniña Urúei lubúeingu ubouagu lun hapurichihan?

⁸ Lúmounbei irumu 1919, sánsihali meha katei lidan luáguti “uganu buiti le luáguti larúeihan Bungiu” (Mat. 24:14). Gumeseeli meha Urúei agumadiha sielu ani ubouagu óundaraguali meha aban liraüraü sétanu hau lubúeingu ha harumagüda laaña. Sétanu le gaganbaditi meha lun lugumadin lau ubebeni: aba meha hapurichihan lidan sun Ubóu luagu Larúeihan Bungiu le gumeseelibei sielu (Adü. 10:42). Kei hénpulu, chülütiña yarafa houn wein-milu gürigia lidoun aban adamurini le meha adügǘbei Cedar Point (Ohio, Meriga) lidan nefu-hati irumu 1922. Samina wamá luagun ugundani le hasandirubei dan le lariñagun íbiri Rutherford lidan aban yanu le gíribei “Larúeihan Bungiu”: “Ariha humá, lagumadihaña Urúei! Huguya lunbei hasubudiragüdüni. Ligíati, awisaha, awisaha, awisaha humá luagu Urúei luma luagu larúeihan!”. Ida liña hóunabun gürigia? Bián-milu hádangiñe gürigia ha ñéinbaña furitiña apurichiha lidan aban weyu espechaliti lánina apurichihani —le gíribei “Luéyuri Eseriwiduni”— lidan weyu ligía aweiyasuhatiña kéiburi 72 kilometuru (45 maili) apurichiha houn gürigia. Ariñagati aban íbiri: “Maweiyasunbadina abulieidei agunbirahóuni le wibihibei lun wayanuhan luagu Larúeihan Bungiu luma ubebeni le harufudubei sun lílana adamurini!”. Ani ligiaméme hasandirubei saragu hádangiñe gürigia ha ñéinbaña.

9, 10. a) Ka burí aransehani adügǘbei lun haranserun ha apurichihabalin Larúeihan Bungiu buidu? b) Ida liña líderagunün arufudahani tídangiñeti Bíbülia le?

⁹ Lidan irumu 1922 añaheinhaña meha hóugiñe disedü-milu apurichihatiña luagu Larúeihan Bungiu lidan 58 ageiraü. Gama lumoun, mégeitiña meha lanwoun subudi. Lidan furumiñeti sígulu, ruti Urúei le lunbei liabin adundehani furanguti houn lani disipulugu luagu kaba lan hariñaga, halíaba lan hapurichiha luma ida luba lan hadügüni (Mat. 10:5-7; Luk. 9:1-6; 10:1-11). Kei larufuduni adundehani le, uguñe weyu téniti Hesusu lun sun lan ha apurichihabaña uguñe weyu lun hibihini adundehani luma sun katei le hemegeirubei lun hadügüni wadagimanu le buidu (2 Tim. 3:17). Yusu lumuti damuriguaü kristiánu lun laranseruniña lubá ministeriu. Lun ladügüni, yusu lumutu Leskuela Kristiánu lánina Apurichihani, to ahuuduboun lun lóugiñe san-unsu-milu damuriguaü le lídanbei sun ubóu. Seremei leskuela to, aransehaña hóugiñe sedü-míñunu íbirigu lun hapurichihan luma lun harufudahan houn sun “hawuyeri gürigia” (aliiha huméi 1 Korintuna 9:20-23).

¹⁰ Anuheinharu giñe leskuela burí kristiánu lúntima haranserun wéiyaaña lidan afiñeni, prekursorugu, íbirigu ha mamarieidungiña,  leskuela houn maríeitiña, houn íbirigu ha arihibaña tau sukursali tuma hani weiriou, houn óunigirutiña sirkuitu tuma hani weiriou, luma houn misioneru. * Ariñagatiña íbirigu ha ñǘdünbaña tidan aban tídangiñe Leskuela Kristiánu houn Maríeitiña: “Sun aransehani espechaliti le wibihibei adügaali lúntima línsiñedun Heowá woun ani íderagua láadiwa lun buídutima lan wíderaguniña gürigia”.

11. Ka uagu gayara lubéi hararamun apurichihatiña luáguti Larúeihan Bungiu lun lagayuahan Satanási?

¹¹ Ariha lumuti Satanási sun áfaaguni le wadügübei lun wapurichihani luma lun warufudahani uganu lánina Larúeihan Bungiu. Ligía láfaagunbei lun lararamuni wadagimanu le lau layusuruni sun luwuyeri óuchawaguni. Gama lumoun, meseriwinti lun saragu. Ru laali Heowá Liráü “lóugiñe sun gumadi, ubafu, erei luma arúeihani” (Efe. 1:20-22). Yusu lumuti Hesusu lubafu kei urúei lun lóunigiruniña ani adundehalaña lani disipulugu. Ítara liña lachoururuni lagunfulirun lugundan Lúguchi. * Aniheingua uganu buiti apurichihóua, ani añahán saragu míñunu gürigia haruma tanigi afurendeira luagu Heowá. Ma lubuidun chansi wawadigimaridun lidan lisudinin wadagimanu le!

12. Írida humá fiú lídangiñe asansiruni le adügǘbei tidan lóundarun Heowá lúmagiñebei lagumeserun Kristu arúeiha.

¹² Lúmagiñebei lagumeserun Larúeihan Bungiu agumadiha lidan irumu 1914, aranseheina liñalin Urúei ligaburi hóundaragun lubúeingu Bungiu lun hadügüni lugundan (aliiha huméi Isaíasi 60:17). Lidan irumu 1919, iridúati aban íbiri lun lalidihani apurichihani lidan kada damuriguaü. Fiú irumu lárigiñe, lidan irumu 1927, aba lagumeserun aransehani lun ñein lan apurichihani muna tuagun muna sagü dimaasu. Ani ma funa lanarime ugundani le hasandirubei íbirigu dan le heresibirunbalin iri tídangiñeti Bíbülia gefentiña luagu Heowá lidan irumu 1931! (Isa. 43:10-12.) Lidan irumu 1938, aba mámaali lan lau abuduhani hanuadirúa íbirigu ha anügübalin ubaraü lidan damuriguaü. Lúmagiñe dan ligía, mosu meha hagunfulirun lau le tariñagunbei Bíbülia lun gayara lan hiridún. Lidan irumu 1972, aba lerederun lounigirún damuriguaü háhaburugu sun wéiyaaña lidan afiñeni ha lídanbaña damuriguaü lubaragiñe lerederun lúhaburugu ábanrügü hádangiñe. Sun ha agunfulirubaña lau le tariñagunbei Bíbülia lun heseriwidun kei wéiyaaña lidan afiñeni o kei ídehatiña lidan damuriguaü amisurahóuatiña lun hídehan lidan hounigirún “lirahüñü Bungiu” (1 Fe. 5:2). Lidan irumu 1976, aba lóundaragun Sétanu le arihibei lau hawadigimari gefentiña luagu Heowá lidan sun ubóu lidan sisi sétanu lun hetenirun lun wadagimanu lánina Larúeihan  Bungiu lidan sun ubóu. Kei warihini, aransereina liñaliña Urúei le líridubei Heowá lubúeingu según ladundehan Bungiu.

13. Ka buiti ibiha humaalibei lídangiñe sun katei le ladügübei Larúeihan Bungiu lidan furumiñeti san irumu lánina larúeihan?

¹³ Samina humá luagu sun le adüga láalibei Mesíasi le Urúei lidan furumiñeti san irumu lánina larúeihan. Arumadaha laaña saragu gürigia lun hanügüni liri Bungiu. Adundeha laali wadagimanu lánina lapurichihóun uganu buiti lidan 239 ageiraü ani íderaguali saragu míñunu gürigia asubudirei Heowá. Óudaraali hóugiñe sedü míñunu gürigia ha deregeguañabaña houngua lau sun hagundan lun hadügüni lugundan Lúguchi (Sal. 110:3). Ma wéinamuti ani buíduburiti katei le adüga láalibei Heowá lau Larúeihan Mesíasi? Ani gíbegili katei lunti warihini!

14. a) Ka wamuriahabei luma Bungiu dan le wafurieidun: “Ñǘbuinla barúeihan”? b) Ka san bérusubei lánina irumu 2014, ani ka uagu buidu lubéi?

¹⁴ Íbini adüga lani Heowá Liráü Mesíasime le Urúei lidan irumu 1914, mama ñein lagumucha óunabagülei lun le hamuriahabei gürigia dan le hafurieidun “Ñǘbuinla barúeihan” (Mat. 6:10). Ariñawagúaali meha tidan Bíbülia ‘lagumadirubaña lan Hesusu láganiñu’ (Sal. 110:2). Uguñe weyu añahagua urúeigu ubouaguna ha lábugiñebaña lubafu Satanási ebedaagua lun Larúeihan Bungiu. Dan le wamuriahan lun liabin Larúeihan Bungiu, wamuriahaña luma Bungiu lun liabin Mesíasi le Urúei hama 144,000 ha lúnbaña harúeihan luma lun hagumuchun hau urúeigu ubouaguna luma hau láganiñu Larúeihan Bungiu ha yáabaña ubouagu. Ábameti lagunfulirun dimurei le lídanbei Danieli 2:44, le ñein lubéi lariñaga ‘lagünrinchagubei lan arúeihani ligía sun líbiri arúeihani sunsuinagubei’. Ítara liña, lagumuchuba lau sun arúeihani le kóntürabei luagu (Aruf. 6:1, 2; 13:1-18; 19:11-21). Murusunrügaali dan lun lasuseredun katei le. Lidan irumu 2014 lagunfulirun furumiñeti san irumu lúmagiñe lagumeserun Larúeihan Bungiu agumadiha sielu. Ligía buidu lubéi lídangiñe lan Matéu 6:10 lasagarúa bérusu lánina irumu: “Ñǘbuinla barúeihan”!

15, 16. a) Ka katei buíduburiti lunbei lasuseredun lábugiñe larúeihan Mesíasi le lánina Milu Irumu? b) Ka lagumuhóun katei lunbei ladügüni Hesusu keisi Mesíasi le Urúei? c) Ida luba lagunfulirun lisuuni Heowá lun sun le ladügübei?

¹⁵ Danme le gumuhali Mesíasi le Urúei hau sun láganiñu Bungiu ha yáabaña ubouagu, ábame láguruni Satanási hama lumafianu lidoun fusu mébehati luagu milu irumu (Aruf. 20:1-3). Lárigiñeme lagidaruni Hesusu Satanási hau sun lumafianu, ábame lanügüni Larúeihan Bungiu sun buiti le lanügübei lani Hesusu sákürifisiu ani ábame lagumuchun lau sun lani lifigoun Adán efekütu. Láguyuguagüdübaña Urúei saragu míñunu gürigia ha hilaguaañabaña ani ábame ladügün aban óunwenbu aransehani lun larufudahóun houn gürigia hagía luagu Heowá (Aruf. 20:12, 13). Paraísuhalime sun Ubóu, kei meha fuluri-agei Edén. Ani sun gürigia ha gaganbadibaña mafigounhañame.

¹⁶ Lídanme lagumuchun Larúeihan Kristu le lánina Milu Irumu, gúnfuli láalime Larúeihan Mesíasi lisuuni. Ábame lederegeruni Hesusu Arúeihani lun Lúguchi (aliiha huméi 1 Korintuna 15:24-28). Memegeirun hamaalime gürigia Hesusu lun hayarafadun lun Heowá. Sun lisaanigu Bungiu, dandu ha ubouagubaña kei ha siélubaña, yarafabaña lun Háguchi le siélubei keisi lílana lufamilian.

17. Ka desidírü wabéi wadügün luagu Larúeihan Bungiu?

¹⁷ Sun katei buiti le asuseredubei lidan furumiñeti san irumu lánina larúeihan Heowá chóurugüda lumuti woun lúmañein lan Heowá ubafu ani lagunfuliruba lan lisuuni lun Ubóu lau ichouruni. Ligíati, sigí wamá eseriwida lun lau úaraguni ani ayanuha wagíame luagu Urúei luma luagu Larúeihan. Chouru wamuti luagu málühali lan óunaba lan Heowá afurieiduni le wadügübei tídangiñe sun wanigi: “Ñǘbuinla barúeihan”!