Krista Kum 100 Rorêlna—Engtin Nge A Nghawng Che?
‘Aw Chatuan Lal, Pathian Jehova, . . . i thiltihte chu a ropuiin a mak mang e.’—THUP. 15:3, NW.
1, 2. Pathian Ram chuan eng nge a rawn hlen chhuah ang a, engvângin nge Lalram a lo thleng dâwn tih kan rin tlat theih?
KAPERNAUM bula tlâng pakhatah, C.E. 31 nipui lai khân Isua Krista chuan a hnungzuitute chu: “I ram lo thleng rawh se,” tia ṭawngṭai tûrin a zirtîr a. (Mt. 6:10) Tûn laiah, mi tam takte chuan chu Ram chu a lo thlen an ring lêm lo. Mahse, keini chuan Pathian Ram lo thleng tûra tih tak zeta kan ṭawngṭaina chu chhân a ni ang tih kan ring tlat a ni.
2 Jehova chuan chu Lalram chu lei leh vân huap a chhûngkaw inpumkhattîr nân a hmang ang. Chu Pathian thiltum chu a lo thleng famkim ngei ang. (Is. 55:10, 11) A nihna takah chuan, kan hun lai hian Jehova chu Lal a ni dêr tawh! Kum 100 kal ta chhûnga thilthleng phûrawm tak takte’n chu chu a târ lang a. Pathian chuan a khua leh tui rinawm mi maktaduai têlte tân thil mak leh ropui tak tak a ti a ni. (Zak. 14:9; Thup. 15:3, NW) Mahse, Jehova Lal a lo nihna leh Isua’n dîl tûra min zirtîr Pathian Ram lo thleng tûr chu a inang lo. Chûng thilthlengte chu engtin nge a dang lam a, chûng chuan engtin nge min nghawng?
JEHOVA LAL SIAM CHUAN HMA A LA
3. (a) Engtik khân nge Isua chu Lal ṭhutthlênga a ṭhut a, khawiah nge? (b) Lalram chu kum 1914-ah din a ni tih engtin nge i finfiah ang? (Footnote en rawh.)
3 Kum zabi 19-na tâwp lamah, kum 2,500 kal taa Daniela chhinchhiah hrilh lâwkna: “Chûng lalte nîah chuan vân Pathianin ram a rawn din ang a, chu chu a chhe ngai tawh lo vang,” tih chu hriat thiam chhoh a lo ni ta a. (Dan. 2:44) Bible Zirlaite chuan kum 1914 chuan pawimawhna a nei dâwn tih kum sâwmbi têl chhûng an lo sawi chamchî tawh a. Chutih laia mi tam tak chuan beiseina sâng tak an nei a ni. Ziaktu pakhat phei chuan chutih lai dinhmun chu: “Kum 1914 khân khawvêl chu beiseina leh thil ṭha intiamnain a khat a ni,” tiin a ziak a. Mahse, chu mi kum, kum tâwp lama Khawvêl Indopui I-na a lo chhuah chuan Bible hrilh lâwkna chu a lo thleng famkim ta. A hnua lo thleng ṭâm te, lîrnghîng te, leh hrilêngte rualin Bible hrilh lâwkna dang thleng famkimte chuan kum 1914-ah Isua Krista chuan vâna Pathian Lalramah ro a rêl ṭan tih chiang takin a târ lang a ni. * A Fapa chu Messia Lal ṭhutthlênga ṭhuttîrin, Jehova chu kawng dangin Lal a lo ni ta!
4. Lal thar chuan eng thilte nge a tih nghâl a, a dawtah tute nge a ngaihsak?
4 Pathian ṭhuttîr Lal thar thiltih hmasak ber chu a Pa Hmêlma lian ber, Setana do a ni a. Isua leh a vântirhkohte chuan Diabola leh a ramhuaite chu vân aṭangin an paih thla a. Chu chuan vânah lâwmna nasa tak a thlentîr a; mahse, leiah erawh chuan tûn hma zawng aia nasain chhiatna a thleng a ni. (Thu Puan 12:7-9, 12 chhiar rawh.) A dawtah, Lal chuan lei lama a khua leh tuite chu Pathian duhzâwng ti tûra siam ṭhat nân, zirtîr nân, leh rêlbâwl nân a rawn ngaihsak a ni. Lalram rorêlnain chûng thil pathum a tihte ṭha taka an chhân lêt dân chuan kan tâna entawn tûr ṭha a siam dân i lo ngaihtuah ang u.
MESSIA LAL CHUAN A KHUA LEH TUI RINAWMTE A SIAM ṬHA
5. Kum 1914 aṭanga 1919 tîr lamah khân eng tihthianghlimna nge thleng?
5 Lal tharin vâna Setana leh a ramhuaite thununna ṭha lo a thenfai hnuah, Jehova chuan leia a hnungzuite thlarau lam dinhmun enfiah tûr leh siam ṭha tûrin Isua chu a tîr a. Zâwlnei Malakia chuan chu chu thlarau lama tihthianghlimna angin a târ lang a ni. (Mal. 3:1-3) Thilthleng chanchin chuan chu chu kum 1914 aṭanga 1919 tîr lama thleng a ni tih a târ lang. * Lei leh vân huap Jehova chhûngkaw zînga mi ni tûr chuan kan thianghlim tûr a ni a. (1 Pet. 1:15, 16) Sakhaw dik lo emaw, he khawvêl politics emawin min tihbawlhhlawhna rêng rêng lakah kan inthiar fihlîm tûr a ni.
6. Engtin nge thlarau lam chaw pêk a nih a, engvângin nge chu chu a pawimawh?
6 Tichuan, Isua chuan “bawi rinawm, fing tak” ruat tûrin a lal thuneihna chu hmang a. Chu bâwih chuan Isua enkawlna hnuaia berâm ‘pâwl khata’ awm zawng zawngte hnênah thlarau lam chaw ṭha tak chu a pe ziah dâwn a ni. (Mt. 24:45-47; Joh. 10:16) Kum 1919 aṭang tawh khân, hriak thih unau tlêm tê chuan a “chhûngte” châwm tûra mawhphurhna rit tak chu rinawm takin an thawk zawm zêl a ni. Chûng mite kal tlanga thlarau lam chaw hnianghnâr taka pêkte chuan kan rinna a ṭhan theih nân min ṭanpui a. Thlarau lam, nungchang lam, rilru lam, leh taksa lama thianghlim kan tum tlatna pawh a tinghet sauh a ni. He thlarau lam chaw hian tûn laia leia hnathawh pawimawh bera theih tâwp chhuaha tel tûrin min zirtîr a, min buatsaih bawk a ni. Chûng thlarau lama châwmnate chu a ṭangkai thei ang berin i hmang em?
LALBER CHUAN A KHUA LEH TUITE CHU KHAWVEL PUMA THU HRIL TURIN A ZIRTIR
7. Isua leia a awm lai khân eng hna pawimawh tak nge bul a lo ṭan a, chu chu eng thlenga thawh zawm tûr nge ni?
7 Isua’n leia a rawngbâwlna a ṭan lai khân: “Khaw dangahte pawh Pathian ram chanchin ṭha ka hril tûr a ni, chu mi avâng chuan tirh ka ni si a,” tiin a sawi chhuak a. (Lk. 4:43) Kum thum leh a chanve chu he hna hi a nunah a dah pawimawh ber a ni. A zirtîrte hnênah: “In kalin, ‘Van ram chu a lo hnai ta,’ tiin hril zêl ang che u,” tiin a hrilh a ni. (Mt. 10:7) A thawh leh hnuah, Isua chuan a hnungzuitute’n he thuchah hi “kâwlkil thleng pawhin” an theh darh ang tih a sawi lâwk a. (Tirh. 1:8) Kan hun thlengin he hna pawimawh takah hian a tel zêl dâwn tih an hnênah a tiam bawk a ni.—Mt. 28:19, 20.
8. Engtin nge Lalber chuan a lei lam khua leh tuite chu thil ti tûra a chawh phûr?
8 Kum 1919 khân “Ram chanchin ṭha” chuan awmzia a nei lehzual a. (Mt. 24:14) Lalber chuan vânah ro a rêl a, lei lam khua leh tui tihthianghlim tlêm tête chu a la khâwm a ni. Isua kaihhruaina pêk phûrawm tak: Lei chung zawng zawngah Pathian din Lalram chanchin ṭha hrilh rawh!, tih chu phûr takin an chhâng lêt a ni. (Tirh. 10:42) Entîr nân, kum 1922 September khân Cedar Point, Ohio, U.S.A.-a international inkhâwmpuiah Lalram thlâwptu mi 20,000 dâwn lai chu an kal khâwm a. Unau Rutherford-a’n “Lalram” tih thupui hmanga thu a sawi a, “Ngai rawh u, Lalin ro a rêl e! Nangni hi a chanchin pungtu tûrte in ni. Chuvângin, Lal leh a lalram chanchin chu puang rawh u, puang rawh u, puang rawh u,” tih a sawi chhuah laia an phûr dân tûr chu han mitthla teh. Palai sâng hnihte chuan inkhâwmpuina hmun aṭanga mêl 45 (km 72) hlaa awm inte thlenga tlawhin, abîk taka “Rawngbâwlna Nî” hmangin an chhâng lêt a ni. Thil ti tûra chawh phûra awm palai pakhat chuan: “Lalram puang chhuak tûra sâwmna leh mipuite phûrna kha ka theihnghilh ngai dâwn lo!” tiin a sawi chhuak a. Chutianga theihnghilh thei lo tûr chu amah chauh a ni lo.
9, 10. (a) Lalram thuchhuahtute zirtîr nân eng ruahmannate nge siam a nih? (b) He zirtîrna hi a mi mal takin engtin nge i hlâwkpui?
9 Kum 1922-ah chuan Lalram thuchhuahtu mi 17,000 aia tamte chuan khawvêla ram 58-ah thu an hril a. Mahse, zirtîrna an mamawh a ni. Kum zabi khatnaah khân, Lala Ruat Isua chuan a zirtîrte hnênah an thu hrilh tûr, an hrilhna hmun tûr, leh an hrilh dân tûr chungchângah kaihhruaina chiang tak a pe a. (Mt. 10:5-7; Lk. 9:1-6; 10:1-11) Tûn laiah pawh chu tih dân chu zuiin, Isua chuan Lalram thu hrilhnaa tel zawng zawngte hnênah kaihhruaina leh thiam taka hril thei tûra an mamawh hmanruate a pe a ni. (2 Tim. 3:17) Kristian kohhran hmangin, Isua chuan a khua leh tuite chu rawngbâwlna atân a zirtîr a. A zirtîr dân kawng khat chu khawvêl puma Thuhretute kohhran 1,11,000 aia tama neih Theocratic Rawngbâwlna School hmangin a ni. Chu zirtîrna chu hmang ṭangkaiin, thu hriltu mi maktaduai sarih aia tamte chu “mi zawng zawng” duh tûr zâwnga thu hrilh tûr leh zirtîr tûrin thuam an ni tawh a ni.—1 Korinth 9:20-23 chhiar rawh.
10 Theocratic Rawngbâwlna School bâkah, kohhrana upate, pioneer-te, nupui nei lo unaupate, Kristian nupate, Branch Committee member-te leh an nupuite, bial kantute leh an nupuite, leh missionary-te zirtîr tûrin Bible school dang pawh din a ni. * Kristian Nupate Tâna Bible School class pakhata zirlaite chuan an lâwmna chu heti hian an sawi chhuak a ni: “A bîka zirtîrna kan dawnte chuan Jehova kan hmangaihna a tizualin, mi dangte ṭanpui tûrin min thuam ṭha lehzual a ni,” tiin.
11. Engtin nge Lalram thuchhuahtute chu dodâlna tâwk chunga an chhel theih?
11 Lalram thu hrilhna leh zirtîrnaa nasa taka thawhrimna chu hmêlma Setana’n a hmuh hmaih lo. Ani chuan Lalram thuchah beih nân leh a thuchah kengtute hna tihtâwp nân kawng langsâr takte bâkah, hriatthiam harsa takte pawh a hmang a ni. Mahse, hmêlma thawhrimnate chu a hlawhtling lo. Jehova chuan a Fapa chu ‘lalna te, thuneihna te, thiltihtheihna te, rorêlna zawng zawngte chung daihah’ a ṭhuttîr tawh si a. (Eph. 1:19-22) Lalber a nih angin Isua chuan a Pa duhzâwng tih a nih ngeina tûra a zirtîrte vênhim leh kaihhruai nân a thu neihna chu a hmang a ni. * Chanchin ṭha chu hrilh a ni a, mi rilru ṭha pu maktaduai têlte chu Jehova kawngte zirtîr an ni bawk. He hna ropui taka tel ve theihna hi kan tân chanvo ropui a va ni êm!
LAL CHUAN A KHUA LEH TUITE CHU HNA ROPUI TAK ATAN A RELBAWL
12. Lalram din a nih aṭanga inawpna pâwl inrêlbâwl dân siam ṭhatna ṭhenkhat sawi rawh.
12 Kum 1914-a Lalram din a nih aṭang khân, Lalber chuan a Pa duhzâwng ti tûra Pathian chhiahhlawhte inrêlbâwl dân chu a siam ṭha a. (Isaia 60:17 chhiar rawh.) Kum 1919-ah chuan thu hrilhna enkawl tûrin kohhran tinah rawngbâwlna kaihruaitu (service director) chu ruat a ni. Kum 1927-ah Chawlhni apianga in tin kalna chu ruahman a ni a. Kum 1931-a Bible-a chuang Jehova Thuhretute tih hming an han put chuan, Lalram thlâwptute chu nasa lehzuala thawk tûra chêttîrin an awm a ni. (Is. 43:10-12) Kum 1938 khân kohhrana mawhphurhna neite chu kohhran mite thlan tlin ni tawh lovin, Pathian kaihhruaina anga ruat an lo ni ṭan a. Kum 1972-ah kohhran pakhatah enkawltu pakhat chauh ni tawh lovin, upahote chu ruat an ni. Unaupa puitling zawng zawngte chu ‘an zînga Pathian pâwlho enkawl’ thei tûra hmasâwn tûrin fuih an ni. (1 Pet. 5:2) Kum 1976-ah Governing Body chu khawvêl puma Lalram rawngbâwlna enkawl tûra committee paruka ṭhen a ni a. Inâwm takin, Jehova Lal ruat chuan Lalram khua leh tuite chu theocratic, a nih loh leh Pathian rorêl dân kawngin a rêlbâwl chho ta zêl a ni.
13. Lalramin kum 100 ro a rêl chhûnga a thil hlen chhuahte chuan engtin nge a nghawng che?
13 Kum 100 ro a rêl chhûnga Messia Lalin thil a hlen chhuahte chu han ngaihtuah teh! Jehova hming atân mite chu a thianfai a. Ram 239-a Ram chanchin ṭha hrilna kaihruaiin, mi maktaduai têlte chu Jehova kawng a zirtîr a ni. A khua leh tui rinawm mi mataduai sarih aia tamte chu a inpumkhattîr a, anni chu a Pa duhzâwng ti tûrin inhuam takin an inpe ṭheuh a ni. (Sâm 110:3) Messia Lalram hmanga Jehova hnathawhte chu a ropuiin, a mak hle a. Chûng aia thil phûrawm zâwkte chu kan hmaah hian a lo la thleng dâwn!
NAKINA MESSIA LALRAM MALSAWMNATE
14. (a) “I Ram lo thleng rawh se,” tia kan ṭawngṭai hian Pathian hnênah eng ti tûrin nge kan dîl? (b) Kum 2014 atâna kan kum châng chu eng nge ni a, engvângin nge chu chu a inhmeh?
14 Kum 1914 khân Jehova chuan a Fapa, Isua Krista chu Messia Lal angin lallukhum khumtîr tawh mah se, chu chu “I Ram lo thleng rawh se,” tia kan ṭawngṭaina chhânna kim a la ni lo. (Mt. 6:10) Isua’n amah ‘dotute zîngah ro a rêl’ dâwn thu Bible-ah sawi lâwk a ni. (Sâm 110:2) Setana thu neihna hnuaia mihring sawrkârte chuan Lalram chu an la dodâl reng a. Pathian Ram lo thleng tûra kan dîl hian, Messia Lal leh a rorêlpui tûrte’n mihring rorêlnate titâwp a, lei lama Lalram dodâltute tiboral tûrin Pathian hnênah kan dîl tihna a ni. Chu thiltih chuan Daniela 2:44-a thu, Pathian Ramin “hêng ram zawng zawngte hi a tikeh sawmin a tiral zâwk ang,” tih chu a ti thleng famkim ang a. Chu chuan Lalram hmêlma sawrkâr zawng zawng chu a nuai bo vek ang. (Thup. 6:1, 2; 13:1-18; 19:11-21) Chu mi a lo thlen hun chu a hnai tawh hle. Vâna Pathian Ram din a nih chhampha vawi 100-na, kum 2014 kum châng atâna Matthaia 6:10 thu: “I Ram lo thleng rawh se,” tih hman a ni chu a va inhmeh tak êm!
Kum 2014 kum châng: “I Ram lo thleng rawh se.”—Matthaia 6:10
15, 16. (a) Kum Sâng Rorêl chhûngin eng thilthleng phûrawm tak takte nge thleng ang? (b) Messia Lal anga Isua thiltih tûr hnuhnûng ber chu eng nge ni a, chu chuan a thilsiam zawng zawng tâna Jehova thiltumah eng awmzia nge a neih ang?
15 Messia Lalin Pathian hmêlmate a nuai bo hnuah, Setana leh a ramhuaiho chu kum sâng khat atân leilâwtah a paih ang a. (Thup. 20:1-3) Chu thununna suaksual tel lovin, Lalram chuan Isua tlanna inthawina hmang tûr leh Adama sual nghawngte nuai bo tûrin hma a la ang. Lalber chuan chhiarsên loh thlâna awmte chu a kaitho vang a, an hnêna Jehova chanchin zirtîrna hun ropui tak a ruahman ang. (Thup. 20:12, 13) Leilung pumpui chu Eden huan ang chiahin paradis-ah a chang ang a. Mihring rinawm zawng zawng chu ṭhat famkimnaah hlân kai an ni ang.
16 Krista Kum Sâng Rorêlna tâwpah chuan Messia Lalram chuan a thiltum chu a hlen ang a. Tichuan, Isua’n Lalram chu a Pa hnênah a hlân ang. (1 Korinth 15:24-28 chhiar rawh.) Jehova leh a lei lam fate inkârah palai neih a ngai tawh lo vang. Lei leh vâna Pathian fate zawng zawng chu lei leh vân huap Pathian chhûngkua zînga mi niin, an Pa vâna mi nên an inpumkhat tawh ang.
17. Lalram nêna inkûngkaihin eng nge tih kan tum tlat?
17 Krista kum 100 rorêlna hun chhûnga thilthleng phûrawm tak takte chuan Jehova’n thil a thunun tlat tih leh lei atâna a thiltum chu hlen chhuah a ni ang tih min tiam a ni. A khua leh tui rinawm ni zêlin, Lal leh a Lalram chu i puang chhuak zêl ang u. “I Ram lo thleng rawh se,” tia tih tak zeta kan ṭawngṭaina chu Jehova’n a chhâng thuai dâwn tih ring tlat chungin, kan puang chhuak a ni. (w14-E 01/15)
