1, 2. 1) Jméni xi sʼin je Chjotaxále Niná. 2) Ánni nga ʼyasíñá nga ñaki kjoaʼaí Chjotaxá jebi.

KʼIANGA nó 31 nga cha̱nndoá, kʼianga tjíokao Jesús je chjotale ya jngo nindo xi tíjna ya chrian Capernaum tsakakóyale jokuitso nga kʼoetsʼoa, kitsole: “Katjinroa kjoatéxomali”, xi tsonile, je Chjotaxále Niná (Mat. 6:10). Nichxin xi tiyoaa ndʼaibi, nʼio nkjín chjota xi tsín makjainle tsa kjoaʼaí Chjotaxá jebi. Tonga ñá, ʼyañá nga kuitjoson jmeni xi tso kjoabʼetsʼoa jebi.

² Je Jeobá kui Chjotaxá jebi sichjén nga tojngo sʼin je choʼndale, je xi tjío ngʼajmi kao xi tjío Sonʼnde. Ñaki kuitjosonní jmeni xi tjínndajinle (Is. 55:10, 11). Je Jeobá, kʼoati tíbakó nga Rey sʼin tíjna nichxin xi tiyoaa ndʼaibi. Kʼoa jmeni xi kjima tje̱n nó 1914 kui bakóná nga je xi Rey sʼin tíjna. Je Niná nʼio tse xá tíbakó xi kao choʼndale xi miyón mani (Zac. 14:9; Rev. 15:3, TNM). Je Chjotaxále Niná xi kinchja̱ni Jesús kʼoa nga Rey sʼin tíjna je Jeobá alikui mangóson. Ánni nga tsín mangósonsíni, kʼoa jósʼin bʼakaotʼaná ñá.

3. 1) Kʼiáni kʼoa jñáni tsakʼétsʼiakao Jesús kʼianga Rey koan. 2) Jósʼin koakoyai nga nó 1914 tsakʼétsʼiakao je Jesucristo nga tsakatéxoma. (Chótsenlai je nota.)

³ Kʼianga jetífikjetʼa siglo XIX kʼiaa kisʼejnatsen josʼin tsoyanile je én xi jekjoan jao jmi basen nó tjínle nga kiski je profeta Daniel, xi tso: “Kʼianga tjíosa chjotaxá xokjoan je Niná  xi tíjna ngʼajmi jngo chjotaxá koasennda xi nikʼiajin tjóxin” (Dan. 2:44). Je Chjota xi kotʼaya Biblia nkjín nó nga kʼoakitso nga tjín xi koa̱n nga nó 1914. Je chjota xi kʼia tsakatio nga kui nó jebi kui xi ndatjín tjíokoyale. Jngo chjota xi xo̱n kji, i kitso: “Je chjota xi tjío nga nó 1914 tse kjoachoya kisʼele kʼoa kiskoyale nga kuitjoson jmeni xi tjíokoyale”. Tonga nga kui nó jebi, kʼiaa kisʼejna je Kjoajchántse xi títjon. Jmeni xi tongini kitso je Biblia kʼiaa kitjoson. Kisʼe kjinrá, cháonnʼio kao chʼintoán. Jebi kui tsakakó kʼianga nó 1914 tsakʼétsʼiakao nga tsakatéxoma Jesucristo ya ngʼajmi kʼianga Rey koan. * Kʼianga Rey kisikao Jeobá je ʼNdíle, kʼoasʼin titsakakóngáni nga je Jeobá xi Rey sʼin tíjna.

4. 1) Jméni xi títjon kisʼin Jesús nga je Rey kinikao. 2) Jméni xi kisʼin Rey jebi nga jekoanni.

⁴ Je xi títjon kisʼin Jesús nga je Rey kinikao kuinga kiskan kao je Na̱i, je xi kontra tíjnale Niná. Je Jesús kao ánkjele kʼoasʼin tsakʼaonjenngi i̱ Sonʼnde je Na̱i kao ánkje tsʼenle. Nʼio tse kjoatsjoa kisʼe ya ngʼajmi, tonga i̱ Sonʼnde kʼiaa kitsʼiani nga nʼio tse kjoa kisʼe (tʼexkiai Apocalipsis 12:7-9, 12). Xijekoan, je Rey Jesucristo kʼiaa kisitsje chjotale, tsakakóyale kʼoa kisikatíonda nga kui kʼoasʼin josʼin nga mele je Niná. Kataʼyala je choa̱ xi kisikʼéjnaná je chjotale Jesús nga kisitjoson nga jan koya jebi.

5. ʼYáni xi koantsje kʼianga nó 1914 saʼnda nga tífitsʼia nó 1919.

⁵ Kʼianga jetsakʼaonjenngi Jesús i̱ Sonʼnde je Na̱i kao ánkje tsʼenle, je Jeobá kʼoakitsole nga katasítsje josʼin tjío je chjotale. Je profeta Malaquías tongini kʼoakitso josʼin koa̱ntsje chjota jebi (Mal. 3:1-3). Kʼoa kʼiaa koantsje fitsʼiakjoanni nó 1914 saʼnda nga tífitsʼia nó 1919. * Kʼiatsa mená nga tojngo jtín si̱xálee Jeobá kao je ánkjele xi tjío ya ngʼajmi tjínnele nga tsje koaan (1 Ped. 1:15, 16). Alikui koa̱n nga ya kuinójiaan yaoná jmeni xi sʼín je relijión ndiso kʼoa kao kjoa polítika xi tjín i̱ Sonʼnde.

6. 1) ʼYáni xi tsjoáná je kjoankjíntokonle Niná. 2) Ánni nga nʼio chjísínile xi kao ñá.

⁶ Kʼianga jetsakʼaile xá je Jesucristo kʼoati jngo “choʼnda xi nʼiotʼakon, xi nda be xá” tsakasénnda. Je choʼnda jebi jé tsjoále kjoankjíntokon xi tsʼe Niná je “xi tojngo” jtín mani, xi kjinentsja je Jesús (Mat. 24:45-47; Juan 10:16). Fitsʼiakjoanni nó 1919, ñaki nda tísítjoson je xále choʼnda xi nʼiotʼakon, xi nda be xá kʼianga tjíotsjoále kjoankjíntokonle Niná “xikʼa choʼndale” Jesús. Kʼianga kʼoasʼin tjíotsjoáná kjoankjíntokonle Niná je choʼnda jebi nʼio sítaja kjoamakjainná kʼoa ñaki kʼoabʼe tokoán nga tsje kuiyoaa ngixko̱n Niná, nga tsje koanngínkoaa yaoná, nga tsje kʼoé kjoafaʼaitsjenná kʼoa nga tsje sʼiaan. Kʼoati bakóyaná kʼoa síchjinená nga si̱tjosoán je xá xi kjima jngo tjíjtsa Sonʼnde kʼianga kʼoasʼin tíʼmiyason je énle Niná. A nichjénñá kjoankjíntokon jebi.

7. 1) Jmé xáni xi tsakʼétsʼiakao Jesús i̱ Sonʼnde. 2) Kʼiá saʼnda kjoetʼa xá jebi.

⁷ Kʼianga tsakʼétsʼiakao xále Jesús i̱ Sonʼnde nga tsakakóyason i kitso: “Kʼoati xi xinsa naxinandá machjén nga kuinchjaya je énnda xi tʼatsʼe kjoatéxomale Niná nga̱ kui xá jinroania” (Luc. 4:43). Jan nó basen nga ñaki tokui xá kisʼin nga kitsoyason. Kʼoa kʼoakitsole je chjotale nga kʼoati katasʼín, kitsole: “Kʼia nga timangíon, tinókjoayao, kʼuitixón: Je kjoatéxomale ngʼajmi jenroa machrian” (Mat. 10:7). Kʼoa kʼianga  jejaʼáyale, kʼoakitso nga kuitsoyason je chjotale “jña saʼnda nga fetʼa sonʼnde” (Hech. 1:8). Kʼoa kʼoakitsole nga jesoa tsjoánganʼiole xá jebi saʼnda nga kjoetʼa jmeni xi chon je sonʼnde (Mat. 28:19, 20).

8. Je Rey Jesucristo jósʼin kitsjoanganʼiole je choʼndale nga kuitsoyason.

⁸ Saʼnda tje̱n nó 1919 je “énnda xi tʼatsʼe je kjoatéxomale ngʼajmi” tsʼantjaiya choa (Mat. 24:14). Nga kui nichxin Rey jesʼin tíjna je Jesucristo kʼoa tsakatioxkó kʼa chjota i̱ Sonʼnde xi kʼoasʼin kisitsje. Chjota jebi kisitjoson jmeni xi kitso Jesucristo kʼianga kʼuínyason jngo tjíjtsa Sonʼnde nga jetíbatéxoma Rey jebi (Hech. 10:42). Kʼoa yaa ʼyañá nga̱ me kan jmi chjota kicho kʼianga jngo kjoajtíntse kisʼejna ya Cedar Point (Ohio, Estados Unidos) kʼianga sá septiembre nga nó 1922. Tosi̱kjaʼaitsjenla kʼianga títsjoá kjoanokjoayale je ndsʼee Rutherford xi “El Reino del cielo se ha acercado” ʼmi, kitso: “¡Koeni, je Rey jetíbatéxoma! Kʼoa jonño xi koanngínkaoson én. Kuinga, kʼoatixónsíño, kʼoatixón, kʼoatixón nga jetíbatéxoma je Rey”. Jókisʼin xi kinrʼoé én jebi. Kʼianga tojngo nichxin, jao jmi mani xi kitjotsoyason. Kisíxatʼa je chjota jngotjondaile jña kisʼejna kjoajtíntse, jankan kao te kilómetro kjin ki. Jngo ndsʼee xi i̱ kitso: “Nikʼiajinla cha̱jinna kʼianga kʼoatsakʼinnajin nga kuinókjoanijin xi tʼatsʼe Rey jebi kʼoa jokji tsjoa kisatiole ngatsʼi xi tjío ya kjoajtíntse”. Nʼio nkjín xi kʼoakisatio kon joni tsa ndsʼee jebi.

9, 10. 1) Jósʼin tínichjine xi jebakóyason je Énle Niná. 2) Jósʼin tíbasenkaoli ji je kjoachjine xi tsjoá naxinandále Niná.

⁹ Kʼianga nó 1922, jetsʼato xjaʼaonjao jmi mani xi jetsoyason Énle Niná kʼoa ñachan xjaʼaonjan naxinandáyʼai jetíʼmiyason. Tonga nga kʼia, chasale josʼin nga koa̱nle kuitsoyason. Kʼianga siglo I, je Jesús kʼoakitsole jméni xi kuitsoyason chjotale, jñáni nga kuitsoya kʼoa jósʼin kuitsoya (Mat. 10:5-7; Luc. 9:1-6; 10:1-11). Kʼoati tísʼín ndʼaibi je Jesús, jé tíbándiaale toʼyani xi mele nga kʼoasʼin xá jebi kʼoa títsjoále jmeni xi machjénle (2 Tim. 3:17). Yaa síchjine kʼianga sʼená je kjoajtín. Jngo koya xi síchjén kui je Skuela xi síchjine choʼndale Niná xi satío ya jtín xi tsʼato jngo siento kao tejngo jmi mani xi tjío jngo tjíjtsa Sonʼnde. Tsʼato ñato miyón mani, xi jetsoyason Énle Niná, xi kʼoasʼin tísíchjine Skuela jebi nga katatsoyason kʼoa nga katabakóyale ngatsʼi chjota (tʼexkiai 1 Corintios 9:20-23).

¹⁰ Xi ijngosani, tjío skuela jñani tínichjine xi chjotajchínga sʼin tjío, xi precursor tjíosíxá, ndsʼee xi sʼa tjío tojé, xi jechixan, ndsʼee xi ya tjíojin Comité xi tsʼe Sucursal kao yánchjínle, xi superintendente xi tsʼe distrito kao circuito tjíosíxá kao yánchjínle kʼoa kao xi misionero tjíosíxá. * Je ndsʼee xi jeki Skuela xi síchjine  xi jechixan i kitso: “Je kjoachjine xi tsakʼainajin kui tsakasenkaonajin nga ngisasa nʼio koantsjoachaijin je Jeobá kʼoa kʼoati kisichjinenajin josʼin nga ngisasa nda kuinyakoaijin xi kjaʼaí”.

11. Ánni nga tjíochókjoakaosínile xi jetsoyason je Énle Niná tojmeni xi tsoʼbasʼín je Na̱i.

¹¹ Je Na̱i tíbe jokji tibʼenelee yaoná nga tiʼmiyasoán kʼoa nga tibakoyalee je chjota xi tʼatsʼe Chjotaxále Niná. Kʼoa kuinga básjaisínile josʼin bʼetʼaná nga mele koatechjoa xá jebi. Tsakui nichxin ñaki kʼoetʼa kixiná kʼoa tsamaije̱ tjín xi sichjén. Tonga likui chókjoale. Je Jeobá “ngisa tongʼa kisikʼéjnale [je ʼNdíle] kaoni tsa xi xátítjon tjínle, kao ngatsʼi chjotaxá, kao ngatsʼi xi tjínle nganʼio” (Efes. 1:20-22). Je Jesús kʼoasʼin tísíchjén je xá xi yʼa nga tísíkuinda kʼoa nga tíbándiaale je chjotale. Kui kʼoatísʼínni nga katabitjoson josʼin nga mele je Nʼaile. * Tosi tonda tíʼmiyason je énnda chjotse, kʼoa miyón mani chjota xi tjíobe xi tʼatsʼe Jeobá. Nʼio tse kjoanda tje̱nkao nga kʼoati kui xá jebi tinʼia.

12. Saʼnda nga Rey sʼin tsakʼejna Jesús ya ngʼajmi, jméni xi tíbʼantjaiya josʼin kjimaxá i̱ jinnaxinandále Niná.

¹² Saʼnda nga tsakatéxoma je Jesús kʼianga nó 1914, sa tísíndaya sa tísíndayaa je chjotale josʼin tjíosíxá nga kʼoatjíosʼín josʼin nga mele je Nʼaile (tʼexkiai Isaías 60:17). * Kʼianga nó 1919, jngo xi director de servicio ʼmi kinikasénnda nga jngó jngó jtín kʼoa jé tsakʼéndajin josʼin nga kʼuínyason. Tonga xi jeki nó, kʼianga nó 1927 kʼiaa kisʼendajin nga koa̱n kʼuínyason nga xki̱ niʼya kʼianga taingo. Kʼoa nga nó 1931, nʼiojin tsjoa kisʼele je ndsʼee kʼianga kui jaʼaín tsakʼa xi faʼaitʼa ya Biblia: testigole Jeobá (Is. 43:10-12). Nga nó 1938, alikui tije jtín kiskoejinni je ndsʼee xi tsakinyatítjon ya jinjtín. Saʼnda nga kui nó jebi, ʼyani xi xá tjoéle ya jinjtín tjínnele nga jetísítjoson jmeni xi síjé ya Biblia. Nga nó 1972, kʼiaa kisʼendajin nga jngo jtín mani je xi chjotajchínga sʼin koatio xi sikuinda je jtín ʼndele nga tojngo koa̱nni xi sikuinda. ʼYani xi mele nga chjotajchínga sʼin kʼoéjna kʼoa tsa siervo ministerial koa̱n kʼoatsakʼinle nga katasíkuinda je “chjotale Niná xi tjíojin[le]” (1 Ped. 5:2). Nga nó 1976, je Cuerpo Gobernante jaon comité koan nga kʼoasʼin sikuinda je xále Niná xi kjima jngo tjíjtsa Sonʼnde. Tojosʼin tiʼyaa, je Rey xi kiskoejin Jeobá ñaki nda tíbʼéndajin josʼin tjíosíxá  je choʼndale, nga kʼoatjíosʼín josʼin tíbándiaale Niná.

13. Jósʼin tíbasenkaoli ji jmeni xi tísʼín je Rey xi kiskoejin Jeobá xi jejngo siento nó tjínle nga tíbatéxoma.

¹³ Tikjaʼaitsjenlai jmeni xi jetísʼín je Rey xi kiskoejin Jeobá xi jejngo siento nó tjínle nga tíbatéxoma. Jngo jtín mani je chjota xi kʼoasʼin jekisitsje nga jaʼaínle Niná katabʼa. Tíbándiaa nga tíʼmiyason xi jao siento kao kanxjaʼaonño naxinandáyʼai, kʼoa miyón mani chjota xi tíbinyakao nga katabe je Jeobá. Kʼoa jetsʼato ñato miyón mani je choʼndale xi kʼoasʼin tjíoxkóle. Choʼnda jebi ñaki ni̱ma̱le tjíonroajinni nga kʼoatjíosʼín josʼin nga mele je Niná (Sal. 110:3). Ñaki tomaxkónná je xá xi tísʼín je Jeobá nga tísíchjén je Rey jebi. Kʼoa tsesa xi sʼa sʼin.

14. 1) Jméni xi tinijélee je Niná kʼianga i̱ ʼmilee: “Katjinroa kjoatéxomali”. 2) Jñánile je testo xi tsʼe nó 2014, kʼoa ánni nga nʼio nda bakinsínile testo jebi.

¹⁴ Ningalani Rey kisikao Jeobá je ʼNdíle kʼianga nó 1914, ali tsa kʼiajin kitjoson je én xi “Katjinroa kjoatéxomali” tso ya Biblia (Mat. 6:10). Ya Biblia tongini kʼoakitso nga je Jesús koatexomajinle je kontrale (Sal. 110:2). Kʼianga kʼoasʼin je Na̱i kjinentsja chjotaxá sonʼnde tojo kʼoasʼin tjíobatiochjoale je Chjotaxále Niná. Kʼianga tinijé nga katafaʼai je Chjotaxále Niná kui xi tinijélee Niná nga je Rey xi kiskoejin kʼoa kao xi jngo siento kao ñachan ño jmi mani xi ya koatexomakao katafaʼaisíkje je chjotaxá sonʼnde kʼoa kao xi kontra tjíobatiole Chjotaxále Niná. Kʼoa kʼiaa kuitjoson jmeni xi tso ya Daniel 2:44, je Chjotaxále Niná “ñaki sichaoní kʼoa kjoaʼaxinní ngatsʼi chjotaxá xokjoan”. Sikjeson ngatsʼi je chjotaxá nga̱ kontra tjíobatiole (Apoc. 6:1, 2; 13:1-18; 19:11-21). Jetochoasa chale nga kʼoakoa̱n. Nó 2014 jngo siento nó bichó nga jetíbatéxoma ya ngʼajmi je Rey xi kiskoejin Niná. Kʼoa nʼio bakinle je testo xi tsʼe nó jebi, Mateo 6:10 nga tso: “Katjinroa kjoatéxomali”.

15, 16. 1) Jméni xi koa̱n kʼianga jetíbatéxoma xi jngo jmi nó je Jesús. 2) Jméni xi sʼin je Jesús kʼianga jekjoetʼale je xále xi jngo jmi nó. 3) Jósʼin kuitjoson jmeni xi tjínndajinle je Jeobá.

¹⁵ Kʼianga jesikjeson je xi kontra tjíobatíole je Niná je Rey jebi, jngo jmi nó nga jngo ndi̱tja̱n sikatíoʼyanʼio je Na̱i kao ánkje tsʼenle (Apoc. 20:1-3). Kʼoa nga jekjoaʼaxin, kʼiaa sichjén je kjoanda xi tje̱nkao je kjoabʼechjíntjai xi kitsjoa kʼoa kjoaʼaxin je kjoa xi tje̱nkao je jée xi tsakajngi Adán. Kʼoa je Rey jebi, miyón chjota xi jekʼien sikjaʼáyale kʼoa jé kʼoendajin josʼin kʼuínyale chjota xi kjoaʼáyale nga katabe je Jeobá (Apoc. 20:12, 13). Jngo tjíjtsa Sonʼnde ʼndenaxó koa̱n tojo koanchon ya ʼndenaxóle Edén. Kʼoa ngatsʼi je chjota xi sitjoson ñaki tsje koa̱n.

¹⁶ Kʼianga jekjoetʼa je xi jngo jmi nó koatexoma Cristo, kʼiaa koa̱njngole jmeni xi tsakʼéndajin je Niná. Kʼoa je Jesús kʼiaa tsjoánile je Nʼaile je kjoatéxoma xi kitsjoale (tʼexkiai 1 Corintios 15:24-28). Nga kʼia, alikui tikoa̱nchjénniná nga kjaʼaí xi kuinchja̱ngajaoná ngixko̱n Jeobá. Ngatsʼi je xtile Niná, xi tjío ngʼajmi kao xi koatio i̱ Sonʼnde jtín sʼin koatio ngixko̱n Nʼaile xi tíjna ngʼajmi kʼoa tojngo familia koa̱n ngatsʼi.

17. Jméni je xi tosi tonda sʼiaan.

¹⁷ Jmeni xi kjima je xi jejngo siento nó jetíbatéxoma je Jesús, kui xi bakó nga tojé Jeobá xi Rey sʼin tíjna kʼoa nga ñaki kuitjoson jmeni xi tjínndajinle i̱ Sonʼnde. Kuinga machjénsíni nga tosi tonda kixi katamaa kʼoa kuinókjoañá xi tʼatsʼe Chjotaxále Niná. Kʼoa nijmejinla xi jao tjínná kʼianga jeme sitjoson je Jeobá jmeni xi tinijélee kʼianga tiʼmilee: “Katjinroa kjoatéxomali”.