1, 2. Ko e heigoa ka taute he Kautu he Atua, ti iloa fēfē e tautolu to hoko mai e Kautu ia?

 KE HE vahā tau tupu he tau 31 he mouga ne tata ke he taone i Kapanaumi, ne fakaako e Iesu Keriso e tau tutaki haana ke liogi: “Kia hoko mai hau a kautu.” (Mata. 6:10) He vahā nei kua tokologa ne fakauaua to hoko mai nakai e Kautu. Pete ia, kua mauokafua a tautolu to tali e Iehova e tau liogi ha tautolu ma e Kautu haana ke hoko mai.

² To fakaaoga e Iehova e Kautu ke fakalataha e magafaoa haana he lagi mo e lalolagi. Ko e finagalo ha Iehova to fakamooli ai. (Isaia 55:10, 11) Ko e tau mena tutupu ofoofogia he 100 tau kua mole ne fakamooli kua fitā a Iehova he Patuiki ti homo ue atu e tau mena hane taute e ia ma e tau miliona he haana tau fekafekau. (Saka. 14:9; Fakakite. 15:3) Pete ia, he eke a Iehova mo Patuiki kua kehe mai he hoko maiaga he Kautu he Atua ne fakaako e Iesu ki a tautolu ke liogi ki ai. Kehekehe fēfē e tau mena tutupu ua nei, ti lauia fēfē ai a tautolu?

3. (a) Magaaho fe ne fakauku a Iesu ko e Patuiki, mo e i fe? (e) To fakamooli fēfē e koe na kamata e pule ha Iesu he 1914? (Kikite matahui tala.)

³ Kavi ke he 20 e tau to hoko e 1900, ne kamata e tau fekafekau he Atua ke maama e perofetaaga ne tohi e Tanielu molea e 2,500 tau kua mole: “Ko e vaha he tau patuiki ia to fakatu ai he Atua he lagi e kautu nakai fakaoti tukulagi.” (Tani. 2:44) He molea 20 e tau,  ne fakamatala he tau Tagata Fakaako Tohi Tapu kua uho lahi e 1914. Tokologa e tagata he magahala ia ne lahi e amaamanakiaga ke he vahā anoiha. Taha e tagata tohia ne talahau: “Ko e lalolagi he 1914 ne puke he amaamanakiaga mo e maveheaga.” Pete ia, he matahiku he tau ia, ne kamata e Felakutaki I he Lalolagi ti fakamooli ai e perofetaaga he Tohi Tapu. Ko e kūkū he tau mena kai, tau mafuike, tau gagao, mo e falu perofetaaga he Tohi Tapu ne kua fakamooli, ne fakakite kua kamata e pule ha Iesu Keriso he lagi ko e Patuiki he Kautu he Atua he 1914. a Ha kua fakauku e Tama haana ko e Patuiki faka-Mesia, ne eke a Iehova mo Patuiki he puhala foou.

4. Ko e heigoa e mena fakamua ne taute e Iesu he mogo ne eke a ia mo Patuiki? Ko e heigoa ne matutaki a ia ke taute?

⁴ Ko e mena fakamua ne taute he Patuiki foou he Atua ko e tau ke totoko a Satani ko e matapatu fī he haana Matua. Ne tolo hifo e Iesu mo e haana tau agelu e Tiapolo mo e tau temoni oti haana mai he lagi. Tamai he mena nei e fiafia lahi ke he lagi ka e tamai e matematekelea ne nakaila pihia ia ke he lalolagi. (Totou Fakakiteaga 12:7-9, 12.) Mole ia, ne kamata e Patuiki ke hakahaka, fakaako, mo e fakatokatoka e tau fekafekau haana he lalolagi ke taute e finagalo he Atua. O mai la ke kitekite ke he puhala omaoma ha lautolu ke he takitakiaga ha Iesu kua fakatoka e fakafifitakiaga mitaki ma tautolu he vahā nei.

5. Ko e heigoa e fakameaaga ne tupu he vahāloto he 1914 mo e kamataaga he 1919?

⁵ He mole e fakameā e Iesu e lagi he tau fakaohoohoaga kelea ha Satani mo e tau temoni haana, ne tala age a Iehova ki a Iesu ke fakakia mo e hakahaka e tau fekafekau haana he lalolagi nei. Ne fakamaama he perofeta ko Malaki e mena nei ko e fakameaaga. (Mala. 3:1-3) Fakakite he fakamauaga tala ko e fakameaaga nei ne tupu he vahāloto he 1914 mo e kamataaga he 1919. b Ka manako a tautolu ke fai vala he magafaoa ha Iehova he lagi mo e lalolagi katoatoa, kua lata ia tautolu ke meā, po ke tapu. (1 Pete. 1:15, 16) Kua lata ia tautolu ke fakameā tumau e tapuakiaga ha tautolu mai he ilaila he lotu fakavai po ke tau politika.

6. Foaki fēfē e tau mena kai fakaagaaga, ti ko e aoga lahi he ha e tau mena kai nei?

⁶ Ti fakaaoga e Iesu e pule haana ko e Patuiki ke kotofa e “fekafekau fakamoli mo e loto matala.” To foaki tumau he fekafekau nei e tau mena kai fakaagaaga mitaki ki a lautolu oti kua haia he “taha ai e fuifui mamoe” i lalo he levekiaga ha Iesu. (Mata. 24:45-47; Ioane 10:16) Tali mai he 1919, ko e matakau tote he tau matakainaga fakauku ne taute fakamooli e matagahua aoga he fagai e “tau fekafekau.” Ko e fekafekau fakamoli mo e loto matala ne foaki ki a tautolu e loga he tau mena kai fakaagaaga ke maeke e tua ha tautolu ke tupu. Kua taute foki a tautolu ke eketaha fakalahi ke tumau ha tautolu a tapuakiaga, tau gahua, mo e ha tautolu a tau manamanatuaga, ti pihia mo e tau tino ha tautolu ke meā he fakatatau ke he tau tutūaga he Atua. Ko e tau mena kai fakaagaaga nei foki kua fakaako mo e tauteute a tautolu ke gahua malolō he kotofaaga aoga lahi ke he lalolagi, ko e gahua fakamatala. Fakalataha tumau nakai a koe ke he tau mena kai fakaagaaga nei?

7. Ko e heigoa e gahua aoga ne kamata e Iesu he nofo a ia ke he lalolagi, mo e to matutaki ke hoko a fe?

⁷ He kamata e fekafekauaga ha Iesu ke he lalolagi, ne pehē a ia: “Ko e mena lata ke  fakamatala e au e vagahau mitaki he kautu he Atua ke he falu a māga foki; ha ko e mena ia ne fakafano mai ai au.” (Luka 4:43) He tolu mo e hafa e tau, ko e fekafekauaga nei ko e gahua aoga lahi he moui ha Iesu. Ne fakaako e ia e tau tutaki haana: “Ka e o a a mutolu mo e fakamatala atu, kia pehe atu, Kua tata mai tuai e kautu he lagi.” (Mata. 10:7) He mole e liu tu mai ha Iesu, ne talahau tuai e ia to folafola atu he tau tutaki haana e fekau nei “ke hoko ni ke he fakaotiaga he lalolagi.” (Gahua 1:8) Ne mavehe e ia ki a lautolu to lalago e ia e gahua aoga nei ato hoko ke he moumouaga he fakatokaaga nei.​—Mata. 28:19, 20.

8. Fakalagalaga fēfē he Patuiki e tau tutaki haana he lalolagi ke fakamatala?

⁸ He 1919, ko e “tala mitaki nai he kautu” kua putoia e kakano foou. (Mata. 24:14) Kua pule e Patuiki he lagi, ti kua fakapotopoto e ia e matakau tote he tau tutaki meā he lalolagi. Ne omaoma e matakau makai nei ke he poakiaga mahino ha Iesu ke fakamatala ke he lalolagi oti e tala mitaki kua pule e Kautu he Atua he lagi! (Gahua 10:42) Ma e fakatai, ia Sepetema 1922, tata ke he 20,000 he tau tagata lalago he Kautu ne haia he fonoaga he lalolagi katoa i Cedar Point, Ohio i U.S.A. Manamanatu la ke he fiafia ne ha ha ia lautolu he taute he Matakainaga ko Rutherford e lauga “Ko e Kautu” ti fakailoa: “Kitiala, kua pule e Patuiki! Ko mutolu haana tau hukui kua kitia. Ko e mena ia kia fakapuloa, fakapuloa, fakapuloa, e Patuiki mo e haana kautu.” He aho hake, ua e afe ia lautolu ne o atu ke he gahua he fonua, ti fai ne fenoga mamao atu ke 72 e kilomita mai he mena ne fono ai ke fakamatala. Taha e matakainaga taane ne pehē: “Nakai nimo e au e ole nei ke fakailoa e Kautu mo e fakamakutu he toloaga ne fakalataha ai!” Tokologa foki ne manamanatu pihia.

9, 10. (a) Ko e heigoa e tau aoga ne fakamahani a tautolu ma e fekafekauaga? (e) Kua aoga fakatagata fēfē a koe mai he fakamahaniaga nei?

⁹ He 1922, ne molea e 17,000 e tagata fakailoa ne fakamatala ke he 58 e motu he lalolagi katoa. Pete ia, ne lata a lautolu ke fakamahani. He senetenari fakamua, ko e Patuiki ne fifili ne tala age e tau fakatonuaga mahino ke he tau tutaki haana hagaao ke he matakupu, matakavi, mo e puhala ke fakamatala. (Mata. 10:5-7; Luka 9:1-6; 10:1-11) He puhala pihia he vahā nei, ne mailoga mooli e Iesu ko e tau tagata oti ne fakamatala kua moua e tau fakatonuaga mo e tau puhala kua lata ke eke mo tau faiaoga mitaki. (2 Timo. 3:17) Kua fakaaoga e Iesu e fakapotopotoaga Kerisiano ke fakamahani e tau tutaki haana ma e fekafekauaga. Taha puhala ne fakamahani e ia a lautolu he fakaaoga e Aoga Fekafekau Fakateokarasi ne molea e 111,000 he tau fakapotopotoaga he lalolagi katoa. Kua fakaako he aoga nei molea e fitu e miliona tagata fakailoa ke maama e puhala ke fakamatala mo e fakaako ke maeke ke lagomatai e “tau tagata oti.”​—Totou 1 Korinito 9:20-23.

 ¹⁰ Ha ha i ai foki falu he tau aoga Tohi Tapu ke fakamahani e tau motua he fakapotopotoaga, tau paionia, tau matakainaga taane nonofo takitokotaha, tau hoa Kerisiano, tau tagata he La Komiti mo e ha lautolu a tau hoana, tau leveki faifano mo e ha lautolu a tau hoana, mo e tau misionare. c Ko e tau tagata fakaako he taha vahega he Aoga Tohi Tapu ma e Tau Hoa Kerisiano ne talahau loto fakaaue: “Ko e fakamahaniaga pauaki ne moua e maua ne fakahokulo e fakaalofa ha maua ki a Iehova ti kua tauteute fakamitaki aki a maua ke lagomatai e falu.”

11. Maeke fēfē ma e tau tutaki ha Iesu ke matutaki ke fakamatala pete ne tau totokoaga ha Satani?

¹¹ Ko e fī ko Satani ne kitia e tau laliaga loga lahi nei ke fakamatala mo e fakaako e tala mitaki. Manako a ia ke taofi e gahua fakamatala mo e to fakaaoga ha puhala kua maeke ia ia ke totoko e fekau he Kautu mo lautolu kua fakamatala ai. Ka e to nakai kautū e tau totokoaga ha Satani. Kua tuku e Iehova e Tama haana ke “mua ke he tau iki lalahi oti kana, mo e tau pule, mo e tau toa, mo e tau iki.” (Efeso 1:20-22) Ha ko e Patuiki, ne fakaaoga e Iesu e pule haana ke puipui mo e takitaki e tau tutaki haana ke mailoga kua taute e finagalo he Matua haana. d Kua matutaki e tala mitaki ke fakamatala, ti totou miliona e tau tagata mahani fakamooli kua fakaako ke tapuaki ki a Iehova. Ko e lilifu mooli ma tautolu ke fakalataha ke he gahua homo ue atu nei!

12. Tali mai he 1914, kua fakatokatoka fakamitaki fēfē e tau fekafekau he Atua?

¹² Tali mai he kamata a Iesu ke pule he 1914, ne hakahaka e ia e puhala kua fakatokatoka e tau fekafekau he Atua ke taute e finagalo he Matua haana. (Totou Isaia 60:17.) He 1919, ko e takitaki fekafekau ne kotofa ke he tau fakapotopotoaga takitaha ke takitaki e gahua fakamatala. He 1927, ko e tau fakapotopotoaga ne kamata ke fakamatala tumau he tau Aho Tapu. He 1931, ne kamata e tau fekafekau ha Iehova ke fakaaoga e higoa Tau Fakamoli a Iehova, ne fakalagalaga a lautolu ke lahi atu foki e gahua he Kautu. (Isaia 43:10-12) Kamata he 1938, ko lautolu ne takitaki e fakapotopotoaga ne nakai liu fifili he vili. Ka kua kotofa a lautolu. He 1972, ko e matagahua he leveki e fakapotopotoaga ne tuku age ke he matakau he tau motua ka e nakai ke he taha ni e matakainaga taane. Ko lautolu oti ne lata ke eke mo tau motua mo e tau fekafekau lagomatai ne fakamalolō ke makai ke lagomatai ke leveki e fakapotopotoaga. (1 Pete. 5:2) He 1976, ne fakatokatoka e Kau Fakatufono ke he ono e  komiti ke leveki e gahua he Kautu he lalolagi katoa. Tali mai he mogoia, ne matutaki a Iesu ke fakatokatoka e tau tutaki haana ke holo ki mua ke taute e tau mena he puhala he Atua.

13. Kua lauia fēfē a koe he mena ne taute he Patuiki faka-Mesia he pule haana?

¹³ Manamanatu ke he lahi he mena ne taute he Patuiki faka-Mesia he 100 tau fakamua he pule haana. Ne fakameā e ia e matakau he tau tagata ke hukui a Iehova. Kua takitaki e ia e fakamatala he tala mitaki ke he 239 e motu ti fakaako e tau miliona ke tapuaki ki a Iehova. Kua fakalataha e ia e tau tutaki fakamooli ne fitu e miliona hane makai ke foaki e lautolu a lautolu ke taute e finagalo he haana a Matua. (Sala. 110:3) Ne fakaaoga e Iehova e Kautu faka-Mesia ke taute e tau mena ofoofogia mooli. Ka e mua atu e tau mena tutupu fiafia ka hohoko anoiha!

14. (a) Ko e heigoa ha tautolu kua ole ke taute he Atua ka liogi a tautolu: “Kia hoko mai hau a kautu”? (e) Ko e heigoa e lauga he tau ha tautolu ma e 2014, ti ko e ha kua latatonu ai?

¹⁴ Pete he fakafoufou e Iehova haana Tama ko Iesu Keriso ko e Patuiki faka-Mesia he 1914, nakai ko e tali katoa anei ke he ha tautolu a liogi “kia hoko mai hau a kautu.” (Mata. 6:10) Ne talahau tuai he Tohi Tapu ko Iesu to ‘pule ki mua ha lautolu’ kua fai fī ki a ia. (Sala. 110:2) Ko e tau fakatufono he tagata i lalo he pule ha Satani kua totoko agaia ke he Kautu. Ka liogi a tautolu ma e Kautu he Atua ke hoko mai, kua ole a tautolu ke he Atua ke utakehe he Patuiki faka-Mesia mo e falu he tau patuiki 144,000 he lagi e pule he tagata mo lautolu he lalolagi kua totoko e Kautu. Ka hoko e mena nei, to fakamooli e perofetaaga ia Tanielu 2:44. Talahau i ai ko e Kautu he Atua “to tuki malipilipi mo e fakaotioti e tau kautu oti ia.” To moumou e tau fakatufono ne eke mo tau fī he Kautu. (Fakakite. 6:1, 2; 13:1-18; 19:11-21) Ha ko e mena to tupu mafiti e mena nei, kua latatonu ai ha tautolu a lauga he tau ma e 2014 ko e Mataio 6:10: “Kia hoko mai hau a kautu.” Kua 100 tau mogonei tali mai he kamata a Iesu ke pule he lagi!

15, 16. (a) Ko e heigoa e tau mena tutupu fiafia ka hohoko he taha e afe tau he pule he Keriso? (e) Ko e heigoa e mena fakahiku ka taute e Iesu ko e Patuiki faka-Mesia? Ko e heigoa e kakano he mena ia ma e finagalo ha Iehova?

¹⁵ He mole e moumou e Iesu e tau fī he Atua, to tolo hifo e ia a Satani mo e tau temoni haana ke he pahua ke taha e afe tau. (Fakakite. 20:1-3) He nakai fai fakaohoohoaga kelea pihia, to holo mafiti e Kautu ke lagomatai e tau tagata ke aoga mai he poa lukutoto ha Iesu, mo e to utakehe katoatoa e tau lauiaaga he agahala ha Atamu. To fakaliu tutū mai he Patuiki e tau miliona tagata mo e to fakatokatoka e fakaholoaga he fakaakoaga he lalolagi katoa ke fakaako a lautolu hagaao ki a Iehova. (Fakakite. 20:12, 13) To eke e lalolagi katoa mo parataiso tuga ne kaina ko Etena, mo e to mitaki katoatoa e tau tagata mahani fakamooli.

¹⁶ He mole e taha e afe tau he pule he Keriso, ko e finagalo ha Iehova ma e lalolagi to fakamooli ai. To liu a Iesu ke liuaki age e Kautu ke he haana Matua. (Totou 1 Korinito 15:24-28.) To nakai lata a tautolu ke liu fai tagata ke tū atu ki a Iehova ma tautolu. Ko e tau tama taane oti he Atua he lagi mo e haana tau fanau he lalolagi to fakalataha mo e ha lautolu a Matua he lagi ko e vala he haana magafaoa he lagi mo e lalolagi katoatoa.

17. Ko e heigoa haau kua eketaha ke taute ma e Kautu?

¹⁷ Ko e tau mena tutupu fiafia he 100 tau nei he pule he Kautu ne fakakite ki a tautolu kua pule a Iehova mo e ko e finagalo haana ma e lalolagi to fakamooli. Kia matutaki a tautolu ke fekafekau fakamooli ki a ia mo e fakailoa e Patuiki mo e haana Kautu. Kua mauokafua a tautolu to tali mafiti e Iehova e liogi ha tautolu: “Kia hoko mai hau a kautu”!