1, 2. a) ¿Imashinata Jehová Diosca paipa Reinohuan paipa munaita pactachinga? b) ¿Imamandata Diospa Reino shamunataca tucui shunguhuan crina capanchi?

JESUSCA huata 31tami Capernaum llacta lado urcupi carca. Chaipimi paipa catijcunataca “Canba Reino ucha chayamuchun” nishpa Taita Diostaca mañanguichi nirca (Mat. 6:​10, NM). Cunan punllacunapi gentecunaca Taita Diospa Reino shamunataca na crinllu. Shinapash Jesusta catijcunaca Diospa Reino shamunataca tucui shunguhuanmi crinchi.

² Jehová Diosca jahua cielopi angelcunapash, cai Alpapi gentecunapash shujlla shina tandanajushpa sirvichunmi munan. Paipa Reinohuanmi chai munaitaca pactachinga (Is. 55:​10, 11). Yalishca 100 huatacunapi ima pasashcata ricushpami cunan tiempocunapipash Jehová Dios Rey tucushcataca ali yachanchi. Jehová Diosca jatun, juyailla cosascunata rurashpami paipa ali sirvijcunataca ayudajun (Zac. 14:9; Apoc. 15:3). Jehová Diosca ñami Rey tucushca nishpapash Diospa Reino ucha chayamuchun nishca shimicunaca nara pactarishcachu. ¿Imamandata shina ninchi? Diospa Reinoca ¿imashinata ñucanchitaca ayudanga?

3. a) Jesusca ¿ima hora, maimandata Rey cuenda mandai callarirca? b)  Huata 1914pi Jesús mandai callarishcataca ¿imashinata ricuchinguiman? (Notata ricupangui.)

³ Huata 1900cuna ña callarinallapimi Jehová Diosca Daniel  2:44​pi cai shimicunata aliguta intindichi callarirca: ‘Chai jatun mandajcuna mandajui punllacunapimi, jahua pachapi causajuj Taita Diosca, ima horapash na tucuchi tucuna mandana llactata churanga’ nishpa. Chaimandami Bibliamanda Yachajujcunaca ashtaca huatacunata villachirca, 1914 huatapica ashtaca ashtaca cosascunami pasanga nishpa. Shinapash chai tiempopi gentecunaca shamuj punllacunapica alimi causashun ninajurcami. Shuj escritorca nircami: “Huata 1914pi gentecunaca tucuicunami tranquilo, ali causanajurca” nishpa. Shinapash chai huatapillatami Primera Guerra Mundial tiai callarirca. Bibliapa profeciacunapi nishca shinaca, terremotocuna, millai ungüicuna, ninan yarjaicunami tiarca. Chai jatun llaquicunami Diospa Reino jahua cielopi mandai callarishcata ricuchirca. * Jesusta Rey cachun churashpami Jehová Diosca Rey tucushcata ricuchirca.

4. a) Jesusca ¿imatata Rey tucushcandi rurarca? b) Chai jipaca ¿imatata rurarca?

⁴ Rey tucushcandimi Jesusca paipa ali angelcunandi tandanajushpa Diablotapash paipa nali angelcunatapash jahua cielomanda llujchishpa cai Alpaman shitamurca. Chaimandami jahua cielopi angelcunaca ninanda cushijurca. Shinapash cai Alpapica ima horapash na tiashca llaquicunami tiai callarirca (Apocalipsis 12:​7-9, 12, liingui). Chai jipaca cai Alpapi paipa catijcuna Diospa munaita rurachunmi paicunataca limpiarca, yachachachirca, organizarcapash. Shinaca Rey Jesusta cazushpa imashina ñucanchiman shuj ali ejemplota saquishcata ricupashun.

5. Huata 1914manda 1919 huata callaricamanga ¿imatata Jesusca ricuna carca?

⁵ Jesusca nali yuyaicunahuan pandachij Diablotapash demoniocunatapashmi jahua cielomanda llujchishpa cacharca. Chai jipaca cai Alpapi Diosta sirvijcuna aliguta sirvijta ricuchunmi Jehová Diosca Jesusman mingarca. Profeta Malaquías nishca shinaca, Diosta sirvijcuna limpio sirvinajujtami Jesusca ricuna carca (Mal. 3:​1-3). Jesusca huata 1914manda huata 1919 callaricamanmi ricujurca limpio sirvinajujta. * Jehovapa angelcunahuan shujlla shina tandanajushpa sirvingapaca panda religiongunapipash, politicacunapipash na chapurishpami limpio cana canchi (1 Ped. 1:​15, 16).

6. a) ¿Pita ñucanchimanga micunaguta caranshna aliguta yachachijun? b) ¿Imamandata chai yachachishcacunataca aliguta aprovechana capanchi?

⁶ Jesusca mandangapaj autoridadta chasquishpami paiman mingashca sirvijcunaman micunaguta caranshna yachachichun ‘aliguta cazushpa, aliguta yarishpa sirvij’ esclavota churarca (Mat. 24:​45-47; Juan 10:16). ‘Aliguta cazushpa, aliguta sirvij’ esclavoca 1919 huatamandami “sirvijcuna” nishcacunamanga micunaguta caranshna yachachijushca. Esclavopa yachachishcacunami ñucanchi feta shinlliyachishca. Shinallata esclavopa yachachishcacunami Diosta aliguta adorachun, shuj jarihuan o shuj huarmihuan ama japirichun, limpio cosascunapi pensachun, limpio causachun ayudajushca. Ashtahuangarin, esclavopa yachachishcacunami gentecunaman uchashpa aliguta villachichun ayudashca. Shinaca ¿esclavopa yachachishcacunataca aligutachu aprovechanajupanchi?

7. a) Jesús cai Alpapi cashpaca ¿imatata rurai callarirca? b) ¿Ima horacamanda chai ruraitaca rurashpa catina carca?

⁷ Villachi callarishpaca Jesusca nircami: ‘Taita Dios mandajujmanda ali villaitaca villanapachami  cani. Villachunmi ñucataca cachamuhuarca” nishpa (Luc. 4:43). Jesusca quimsa huata chaupitami villachishpa purirca. Paipaca villachinami ashtahuan importante carca. Chaimandami paipa catijcunataca mandarca, Diospa Reinoca ñami chayamushca nishpa villanguichi nishpa (Mat. 10:7). Huañushcacunamanda causarishca jipaca Jesusca nircami, ñucata catijcunaca ‘cai pacha tucuri manñacamanmi ñucamanda villagringa’ nishpa (Hech. 1:8). Villachina cajpimi Jesusca ñucami cai pacha tucuri punllacaman tucui punllacuna cangunahuan casha nirca (Mat. 28:​19, 20).

8. Muyundi Alpapi villachichunga ¿imashinata Jesusca paipa catijcunataca animarca?

⁸ Huata 1919pica ‘ali villaicunata’ villachinamandaca mushuj cambiocunami tiarca. Shinallata ‘ali villaicunaca’ ashtahuanmi mirarca (Mat. 24:14). Jesusca ñami Rey carca. Cai Alpapi Diosta sirvijcunatapash limpio sirvinajujta ricushpami shuj uchila grupopi tandachirca. Paicunapash Jesuspa mandashcata cazushpami, Jesusca ñami jahua cielopi mandajun nishpa muyundi Alpapi cushijushpa villachinajurca (Hech. 10:42). Septiembre de 1922pica Cedar Point (Ohio, Estados Unidos) llactapimi asamblea internacional tiarca. Chaimanga casi 20 mil gentecunami rirca. Huauqui Rutherfordca “El Reino” nishca discursopica nircami: “¡Ricuichi Reyca ñami mandajun! Cangunami paimanda villajcuna canguichi. Shinaca, Reinomanda, Reymandapash villaichi, villaichi, villaichi” nishpa. Shina nijpica asambleaman rishcacunaca ninandami cushijurca. 2.000 yali huauquipanicunami “Día de Servicio” nishcaman llujshishpa 72 mil metro caruta rishpa villachirca. Shuj huauquica nircami: “Villachi nishpa discursota cujpi tucuicuna ninanda cushijushcataca nunca na cungashachu” nishpa. Ashtacacunapachami chai punllataca ninanda yarirca.

9, 10. a) Diospa Reinomanda aliguta villachichunga ¿ima escuelacunata tiashca? b) ¿Imashinata chai escuelacunaca quiquinda ayudashca?

⁹ Huata 1922pica 17 mil yali huauquipanicunami 58 llactacunapi villachinajurca. Shinapash aliguta villachingapaca prepararinarami carca. Jesús cai Alpapi cashpaca imata villachinata, maipi villachinata, imashina villachinatami paipa catijcunamanga yachachirca (Mat. 10:​5-7; Luc. 9:​1-6; 10:​1-11). Jesusca cunan punllacunapipash paipa catijcuna aliguta villachichunmi yachachijun, shinallata imahuan villachinatapashmi cujun (2 Tim. 3:17). Jesusca Bibliamanda Yachachingapaj Escuelahuanmi muyundi Alpapica 111 mil yali congregaciongunapi yachachijushca. Chai Escuela ayudajpimi 7 millón yali publicadorcunaca ‘tucui gentecunaman’ villachinajun, yachachinajun (1 Corintios 9:​20-23, liingui).

¹⁰ Ashtahuangarin, ancianocunata, precursorcunata, soltero huauquicunata, cazarashca huauquipanicunata, misionerocunata ayudangapaca tauca escuelacunami tiashca. Shinallata,  Comité de Sucursalpi ñaupajman pushajcunata paicunapa huarmicunatapash, superintendentecunata paicunapa huarmicunatapash ayudangapami escuelacuna tian. * Cazado Huauquipanicunapa Escuelaman rishca cusahuarmicunaca agradicishpami nirca: “Chaipi aligutapacha yachachijpimi Jehovata ashtahuan juyashcanchi. Shuj gentecunamanbash aliguta yachachichunmi chai Escuelaca ayudarca” nishpa.

11. Diablo jarcangapaj munajpipash ¿imashinata Jesusta catijcunaca villachishpa catinajun?

¹¹ Diabloca Diospa Reinomanda villachishpa, yachachishpa catichunga na munanllu. Chaimandami paica imashinapash jarcangapaj munan. Jarcangapaj munashpapash paica na ushangachu. Jehová Diosca, Jesusmanmi ‘ushaita charijcunata, jatun mandajcunata, cati mandajcunatapash mandachun’ autoridadta cushca (Efes. 1:​20-22). Autoridadta charishcamandami Jesusca paipa catijcuna Jehová Diospa munaita pactachichun paicunataca cuidariajun, imata ruranatapash yachachijun. * Villachishpa catijpimi ali shunguta charij ashtaca millón gentecunaca Jehová Diosta rijsinajun. Gentecunata chashna ayudanaca shuj jatun bendicionmi can.

12. Huata 1914mandaca ¿imashinata Jesusca paipa catijcunataca organizamujushca?

¹² Jesusca 1914 huatamandami paipa ali catijcuna Jehovapa munaita rurachunga asha asha aliguta organizajushca (Isaías 60:​17, liingui). Chaimandami huata 1919pica cada congregacionbi villachinata aliguta organizachunga director de servicio huauquita churarca. Huata 1927pica domingocunata huasin huasin villachichunmi arreglocunata callarichirca. Shinallata, huata 1931pica testigo de Jehová shutitami Bibliamanda japirca. Chai shutitami japinchi nishpa villajpica ninandami huauquipanicunaca cushijushcanga (Is. 43:​10⁠-12). Cutin, huata 1938pica congregacionda ñaupajman pushaj huauquita agllangapaca ñana votacionda ruranllu carca. Chai huatamandami congregacionda ñaupajman pushachunga Bibliapi requisitocunata pactachijujta ricui callarirca. Huata 1972pica ñana shuj huauquillachu congregaciondaca cuidajurca. Congregacionda cuidachunga cuerpo de ancianos nishcatami churarca. Tucuilla ancianocunata, siervo ministerialcunatami ‘Taita Diospa tandanajushca llamagucunata michipaichi’ nishpa animarca (1 Ped. 5:2). Huata 1976pica muyundi Alpapi imashina villachinajujta ricungapami Cuerpo Gobernanteca 6 comitecunata churarca. Imashinami ricupanchi, Jehová churashca Rey Jesusca Jehová Diospa direccionda  catishpami paipa catijcunataca asha asha organizamujushca.

13. Callari 100 huatacunapi Jesuspa rurashcacunaca ¿imashinata ayudashca?

¹³ Imashinami ricupanchi Rey Jesusca ashtaca cosascunatami cai callari 100 huatacunapica rurajushca. Jesusca Taita Diospa shutita apachunmi huaquin gentecunataca agllarca. Shinallata, ashtaca ashtaca gentecuna Jehová Diosta rijsichunga 239 llactacunapi imashina villachinatami Jesusca ricuriajun. Ashtahuangarin, 7 millón yali gentecunatami Jehovata sirvichun tandachijushca. Paicunaca cushijushpami Jehovapa munaita ruranajun (Sal. 110:3). Jehová Diosca Jesusta Rey cachun churashpami jatun, juyailla cosascunata rurajushca. Shinapash ashtaca cosascunata rurangarami.

14. a) “Canba Reino ucha chayamuchun” nishpaca ¿imatata mañanajunchi? b) Huata 2014paca ¿maijan textota canga? c) ¿Imamandata chai textota agllanaca ali cashca?

¹⁴ Huata 1914pi Rey cangapaj autoridadta Jesús chasquishpapash “Canba Reino ucha chayamuchun” nishca shimicunaca nara tucuipi pactarishcachu (Mat. 6:​10, NM). Bibliapica ninmi Jesusca paita ‘fiñajcunapa chaupipimi mandajunga’ nishpa (Sal. 110:2). Cunan punllacunapi gobiernocunaca Diablopa munaita catishpami Diospa Reinota jarcangapaj munan. Shinaca Diospa Reino ucha chayamuchun nishpa mañanajushpaca, Rey Jesús 144.000 ungidocunandi mandashpa cai Alpapi gobiernocunatapash, Diospa Reinopa tucuilla contracunatapash tucuchichunmi mañanajunchi. Diospa Reinopa tucuilla contracunata tucuchijpimi, Daniel 2:44​pi “cai tucuilla mandana llactacunatami ñutushpa tucuchinga” nishca shimicunaca pactaringa (Apoc. 6:​1, 2; 13:​1-18; 19:​11-21). Ñallami Daniel 2:44​pi shimicunaca pactaringa. Huata 2014tami, jahua pachapi Diospa Reino mandai callarishcamandaca 100 huatacuna tucunga. Chaimandami cai huata 2014pa textoca Mateo 6:10manda japishca canga. Chaipica ninmi: “Canba Reino ucha chayamuchun” nishpa (Mateo 6:​10, NM).

15, 16. a) Huaranga huatacunata Jesús mandajujpica ¿imata pasanga? b) Huaranga huatacunata mandajushca jipaca ¿imatata Rey Jesusca ruranga? c) ¿Imashinata jahua cielopipash cai Alpapipash Taita Diospa munai pactaringa?

¹⁵ Rey Jesusca cai Alpamanda tucuilla contracunata tucuchishca jipami, Diablotapash demoniocunatapash shuj yana yana utujuman shitashpa cuenda huaranga huatacunacaman tucuilla poderta quichunga (Apoc. 20:​1-3). Chai punllacunapica ñana pitapash Diabloca pandachingachu. Shinallata, Jesús paipa causaita cushcamandaca tucuilla juchacunami chingaringa. Ashtahuangarin ashtaca millón huañushca gentecunata causachishpami Jesusca tucuicuna Jehovata rijsichun yachachi callaringa (Apoc. 20:​12, 13). Tucuilla Alpapashmi jardín de Edén cuenda shuj juyailla Paraíso tucunga. Shinami Jehovata cazujcunaca jucha illaj canga.

¹⁶ Rey Jesús huaranga huatacunata mandashpa Jehovapa tucuilla munaita pactachishca jipami mandana autoridadta o Reinotaca paipa Taitaman tigrachinga (1 Corintios 15:​24⁠-28, liingui). Chai punllacunapica ñana Jesuspa shutipi mañashunllu. Ñucanchillatami Jehová Diostaca directo mañashun. Shinami Taita Diospa huahuacunaca jahua cielopipash cai Alpapipash tucuilla shujlla cuenda Jehová Diostaca sirvishun.

17. ¿Imatata rurangapaj munapanchi?

¹⁷ Ña 100 huatacunata Jesús mandashpa ashtaca cosascunata rurajujta ricushpami Jehová Dios mandajushcataca ali yachanchi. Shinallata Diospa tucuilla munai pactarinatapash alimi yachanchi. Shinaca Rey Jesustapash paipa Reinotapash tucui shunguhuan cazushpa catipashunchi. Shinallata Rey Jesusmanda paipa Reinomandapash villachishpa catipashunchi. “Canba Reino ucha chayamuchun” nishca shimicunaca ñallami tucuilla pactaringa.