1, 2. Nyen la Royaume ti Nzapa ayeke sara ande nyen? Ngbanga ti nyen e yeke na confiance so Royaume ti Nzapa ayeke ga ande?

NA NGU 31, na ndo ti hoto so ayeke nduru na Capernaüm, Jésus Christ atene na adisciple ti lo, lo tene ala sambela ala tene: “Zia royaume ti mo aga.” (Mat. 6:10). Laso, azo mingi ayeke na kite na ndo ti gango ti Royaume ti Nzapa. Me, e yeke na confiance so Jéhovah ayeke kiri ande tënë na asambela ti e so e tene na lo na bê ti e kue ndali ti gango ti Royaume ti lo.

² Na lege ti Royaume ti Jéhovah, lo yeke bungbi ande oko asewa ti lo so ayeke na yayu nga na ndo ti sese. Jéhovah ayeke sara ande ye so lo leke na bê ti lo ti sara (És. 55:10, 11). Apendere ye so asi na yâ ti ngu 100 so ahon, a fa so Jéhovah aga Gbia awe nga so lo ngbâ ti sara aye so ayeke nzoni mingi teti awakua ti lo kutu na kutu (Zach. 14:9; Apoc. 15:3). Me, gango Gbia ti Jéhovah ayeke nde na gango ti Royaume ti Nzapa so Jésus afa na e ti sambela ndali ni. Na lege wa aye so ayeke nde nde? Aye so asara nyen na ndo ti e?

3. (a) Lawa la a zia Jésus Gbia ti Royaume? Na ndo wa? (b) Tongana nyen la mo lingbi ti fa so Royaume ti Nzapa ato nda ti komande na ngu 1914? (Bâ kete tënë na gbe ni.)

³ Na ngu 20 tongaso kozoni na ngu 1900, awakua ti Jéhovah  aga ti mä yâ ti prophétie so Daniel asû asara ngu 2500 awe. Prophétie ni atene: “Na lâ ti agbia so, fade Nzapa ti yayu ayä royaume so afuti lâ oko pëpe.” (Dan. 2:44). Teti angu mingi aWamandango Bible afa so akpengba ye ayeke si na ngu 1914. Azo mingi na ngoi ni so ayeke lani na beku. Tongana ti so mbeni zo ti sungo mbeti atene: “Na ngu 1914 dunia asi singo na atënë ti beku nga na azendo.” Me na yâ ti ngu ni so, Kozo Bira so Amû Sese Kue ato nda ni, na prophétie ti Bible aga tâ tënë. Akota nzara, asese so ayengi, asioni kobela nga na ambeni prophétie ti Bible so aga lani tâ tënë afa so Jésus ato nda ti komande na yayu tongana Gbia ti Royaume ti Nzapa na ngu 1914. * So Jéhovah azia Molenge ti lo tongana Gbia so lo soro lo, a yeke mbeni fini lege so Jéhovah akomande na ni tongana Gbia la.

4. Kozo ye so fini Gbia so Nzapa asoro lo asara lani ayeke nyen? Nyen la lo sara na pekoni?

⁴ Kozo ye so fini Gbia so Nzapa asoro lo asara lani ayeke so lo tiri bira na Satan, kota wato ti Babâ ti lo. Jésus na a-ange ti lo atomba Zabolo na asioni yingo ti lo na yayu. Ye so asara si ngia ayeke na yayu mingi me asara si pasi akiri ahon ndo ni mingi na ndo ti sese. (Diko Apocalypse 12:7-9, 12.) Na pekoni, Gbia ni azi asioni ye na tere ti azo ti lo na sese, lo fa ye na ala nga lo leke ala ti sara ye so bê ti Nzapa aye. Zia e bâ tongana nyen la sarango ye ti ala alingbi na fango lege ti Jésus ayeke mbeni nzoni tapande teti e laso.

5. Kua ti zingo ye ti saleté wa Jésus asara ni lani na popo ti ngu 1914 ti si na tongo nda ti ngu 1919?

⁵ Na pekoni so Jésus azi asioni ye so Satan na asioni yingo ti lo asara na yayu, Jéhovah ahunda na Jésus ti ga ti bâ dutingo ti adisciple ti lo na sese na lege ti yingo na ti zi asioni ye na tere ti ala. Prophète Malachie atene so ayeke lungulango, wala zingo saleté na lege ti yingo (Mal. 3:1-3). Mbaï afa so Jésus asara lani ye so na popo ti ngu 1914 ti si na tongo nda ti ngu 1919. * Tongana e ye ti duti na yâ ti sewa ti Jéhovah so ayeke na yâ ti dunia, a lingbi e duti na sioni na tere ti e ape, wala e ga nzoni-kue (1 Pi. 1:15, 16). A lingbi e zia lâ oko ape si mbeni ye so alondo na abungbi ti vorongo nzapa ti wataka wala na azo ti poroso abuba yâ ti vorongo so e yeke voro na Nzapa.

6. Zo wa la ayeke mû kobe ti yingo na azo? Ngbanga ti nyen la kobe ti yingo so ayeke nzoni mingi?

⁶ Na pekoni Jésus asara kua na ngangu so a mû na lo ti duti Gbia, na lo soro mbeni “ngbâa be-ta-zo so ayeke sara ye na ndara”. Ngbâa so ayeke mû kobe ti yingo lakue na azo kue so abungbi si aga “kundu oko” so Jésus ayeke bâ lege ti ala (Mat. 24:45-47; Jean 10:16). Ngbene ye na ngu 1919, kete wungo ti aChrétien so a soro ala ti gue na yayu ayeke sara kota kua so a mû na ala ti mû kobe na “azo ti kua” na lege ni. Ngbâa be-ta-zo so ayeke sara ye na ndara ayeke mû gbâ ti kobe ti yingo na e tongaso si mabe ti e alingbi ti kpengba. A sara si e kiri e ye mingi ti ngbâ ti duti na sioni oko pëpe na lege ti yingo, na lege ti sarango ye ti e, na lege ti bibe ti e nga na lege ti mitele. Na ndo ni, kobe ti yingo so amû maboko na e ti bi tere ti e na yâ ti kota kua so a mû na e, kua ti fango tënë. Kobe ti yingo so aleke nga e ti sara kua so mingi. Mo yeke bâ nzoni na lege ti aye ti nzoni kue so aga na lege ti kobe ti yingo so?

7. Kota kua wa Jésus akomanse ti sara lani na ngoi so lo yeke na sese? Kua ni so ayeke ngbâ ti gue juska lawa?

⁷ Na ngoi so Jésus akomanse kua ti lo ti fango tënë na ndo ti sese, lo tene: “A lingbi mbi fa nga nzoni tënë ti royaume ti Nzapa  na ambeni gbata nde, ngbanga ti so a yeke ndali ni si a tokua mbi.” (Luc 4:43). Na yâ ti ngu ota na ndambo, Jésus abâ kua ti lo so na nene ni mingi ahon tanga ti aye kue na yâ ti fini ti lo. Lo tene na adisciple ti lo, lo tene: “Tongana ala yeke gue, ala fa tënë, ala tene: ‘Royaume ti yayu aga nduru awe.’” (Mat. 10:7). Na peko ti so Jésus azingo na kuâ, lo tene so adisciple ti lo ayeke fa ande tënë so “juska na ambage ti sese so ayeke tâ yongoro.” (Kus. 1:8). Lo tene na ala so lo yeke mû ande maboko na ala na yâ ti kota kua so juska na hunzingo ti aye ti ngoi so.—Mat. 28:19, 20.

8. Tongana nyen la Gbia ni apusu azo ti lo so ayeke na sese ti fa tënë?

⁸ Na ngu 1919, a kiri a fa ambeni ye na ndo ti “nzoni tënë ti royaume”. (Mat. 24:14). Gbia ni ayeke komande lani na yayu, nga na sese ge lo bungbi mbeni kete wungo ti azo ti lo so lo zi saleté na tere ti ala. Kete wungo ti azo so asara ye na bê ti ala kue alingbi na commandement ti Jésus ti fa na ndo ti sese kue nzoni tënë ti Royaume ti Nzapa so ayeke komande na yayu (Kus. 10:42). Na tapande, na septembre ngu 1922, awafango tënë nduru na 20000 ague lani na Assemblée internationale na Cedar Point, Ohio na Amerika. Tere ti ala anzere lani mingi na ngoi so Ita Rutherford amû mbeni diskur na anglais so mama tënë ni ayeke, “Royaume ti yayu aga nduru awe” na lo tene : ‘Ala bâ nzoni, Gbia ni akomande! Ala yeke awatokua ti lo. Tongaso ala fa, ala fa, ala fa tënë ti Gbia ni na Royaume ti lo.’ Na ndade ni, azo saki use na popo ti azo so aga na assemblée ni ague afa tënë, na ambeni asara même akilomètre 72 ti gue ti fa tënë. Mbeni ita-koli so aga na assemblée ni atene: “Mbi yeke girisa lâ oko ape wango so a mû na e ti fa tënë ti Royaume nga na fango tënë so gbâ ti aita afa.” Aita mingi ayeke lani na mara bango ndo ti lo so.

9, 10. (a) A-ekole wa la a zia na sese ti fa ye na awafango tënë ti Royaume? (b) A-ekole so amû maboko na mo tongana nyen?

⁹ Na ngu 1922, wungo ti awafango tënë ahon 17000 afa lani tënë na yâ ti akodoro 58 na yâ ti dunia. Me, ala yeke lani na bezoin ti tene afa ye na ala. Na ngoi ti akozo Chrétien, Gbia so a soro lo afa na adisciple ti lo polele tënë so alingbi ala fa, ndo so ala yeke fa tënë ni dä nga tongana nyen la ala yeke fa tënë ni (Mat. 10:5-7; Luc 9:1-6; 10:1-11). Legeoko nga laso, Jésus ayeke sara kue si a fa na awafango tënë kue ye so alingbi ala hinga nga a mû na ala ye kue so ala yeke na bezoin ni ti duti anzoni wafango ye (2 Tim. 3:17). Na lege ti congrégation ti aChrétien, Jésus ayeke fa na adisciple ti lo tongana nyen ti fa tënë. Lo yeke fa ye na ala na lege ti Ekole ti Kusala ti aChrétien na yâ ti acongrégation ahon 111000 na yâ ti dunia kue. Ekole so afa na awafango tënë ahon kutu mbasambala tongana nyen ti fa tënë nga ti fa ye na mbeni lege so ayeke mû maboko na “mara ti azo nde nde kue”.—Diko 1 aCorinthien 9:20-23.

 ¹⁰ Ambeni ekole ti mandango Bible ni ayeke nga dä so ayeke fa ye na a-ancien, na apionnier, aita-koli so ayeke akumbamba, aita-koli na awali ti ala, amembre ti Komité ti filiale na awali ti ala, asurveillant so ayeke gue na ando nde nde na awali ti ala nga na amissionnaire. * Mbeni ita so asara Ekole ti aita-koli na awali ti ala atene: “A fa na e nzoni kode ti fango ye na asara si e kiri e ye Jéhovah mingi na aleke e nzoni mingi ti mû maboko na azo.”

11. Tongana nyen la adisciple ti Jésus awara lege ti ngbâ ti fa tënë atâa so Satan ayeke gi ti kanga lege na ala?

¹¹ Satan so ayeke wato ti Nzapa abâ angangu kue so a yeke sara ti fa tënë ti Royaume nga ti fa ye. Lo yeke gi na alege nde nde kue ti kanga lege na tënë ti Royaume nga na azo so ayeke fa tënë ni. Me aye kue so lo yeke sara ti kanga lege na ni ayeke tï na ngu. Jéhovah azia Molenge ti lo “na nduzu kâ na ndo ti ngorogbia kue, komandema kue, ngangu kue, na ndo ti ala kue so akomande”. (aÉph. 1:20-22). Teti so Jésus ayeke Gbia, lo yeke sara kua na ngangu so a mû na lo ti bata adisciple ti lo nga ti fa lege na ala ti tene ala sara ye so bê ti Babâ ti lo aye. * Ni la a ngbâ ti fa nzoni tënë nga a yeke fa na azo kutu na kutu so bê ti ala ayeke nzoni ti voro Jéhovah. A yeke biani mbeni kota pasa la e yeke na ni ti sara kota kusala so!

12. Ngbene ye na ngu 1914 ti ga na ni, a leke awakua ti Jéhovah nzoni tongana nyen?

¹² Ngbene ye na ngoi so Jésus akomanse ti komande na ngu 1914, lo leke awakua ti Nzapa ti sara ye so bê ti Babâ ti lo aye nzoni mingi ahon ti kozo. (Diko Ésaïe 60:17.) Na ngu 1919, a zia awayinda ti kusala na yâ ti acongrégation oko oko ti mû li ni na yâ ti kusala ti fango tënë. Na ngu 1927, a leke lani ti tene acongrégation afa tënë da na da na alango ti dimanche. Na ngu 1931, na ngoi so iri ti awafango tënë ti Royaume aga aTémoin ti Jéhovah apusu ala ti fa tënë mingi ahon ti kozo (És. 43:10-12). Na ngu 1938, a zia lege ti votengo azo so amû li ni na yâ ti congrégation na a yeke soro ala fadeso alingbi na ye so Bible ahunda. Na ngu 1972, a mû kua ti bango ndo na ndo ti congrégation na bungbi ti a-ancien me a mû kua ni gi na mbeni ita oko mbeni pëpe. A wa aita-koli kue so alingbi ti sara kua ti ancien wala ti wakua ti mungo maboko, ti gi ti sara kua ti ‘batango angasangbaga ti Nzapa’. (1 Pi. 5:2). Na ngu 1976, a kangbi yâ ti Bebungbi na akomite omene ti bâ ndo na ndo ti kusala ti fango tënë na yâ ti dunia kue. Ngbene ye na ngoi ni so ti ga na ni, Jésus angbâ ti leke adisciple  ti lo yeke na yeke ti sara ye tongana ti so Nzapa aye.

13. Aye so Gbia so Nzapa asoro lo asara na yâ ti ngu 100 so lo komande asara nyen na ndo ti mo?

¹³ Gbu li ti mo na ndo ti aye kue so Gbia so Nzapa asoro lo asara na yâ ti ngu 100 ti komandema ti lo. Lo zi aye ti sioni na tere ti azo so asara kua na iri ti Jéhovah. Lo fa lege na kua ti fango nzoni tënë ti Royaume so a yeke sara ni na yâ ti akodoro 239 nga lo fa na azo kutu mingi ti voro Jéhovah. Lo bungbi azo ahon kutu mbasambala na ala kue amû tere ti ala wani ti sara ye so bê ti Babâ ti lo aye (Ps. 110:3). Jéhovah ayeke sara kua na Gbia so lo soro lo ti sara apendere ye so adö bê ti zo. Me ambeni ye ni so ayeke pendere mingi ayeke si ande.

14. (a) Tongana e sambela e tene: “Zia royaume ti mo aga”, e yeke hunda na Nzapa ti sara nyen la? (b) Versê ti e ti ngu 2014 ayeke nyen? Ngbanga ti nyen versê so alingbi na ngoi ni?

¹⁴ Atâa so Jéhovah azia molenge ti lo Jésus Christ Gbia na ngu 1914, a yeke lani gi mbage ti kiringo tënë na sambela so e tene “zia royaume ti mo aga.” (Mat. 6:10). Bible afa kozo awe so Jésus ayeke “komande na popo ti awato ti [lo].” (Ps. 110:2). Komandema ti azo so ayeke na gbe ti ngangu ti Satan angbâ lakue ti kanga lege na Royaume ti Nzapa. Na ngoi so e sambela ti tene Royaume ti Nzapa aga, e yeke hunda na Nzapa ti tene Gbia so lo zia lo nga na azo 144000 so ayeke komande legeoko na lo afuti komandema ti azo nga na azo so akanga lege na Royaume ni. Ye so ayeke sara ande si prophétie so ayeke na Daniel 2:44 aga tâ tënë. Prophétie ni atene so Royaume ti Nzapa ayeke ‘fâ mbeni royaume so kue nduru nduru, na a sara si royaume nde nde so kue awe’. Royaume ni ayeke futi angorogbia so ayeke awato ti Royaume ti Nzapa (Apoc. 6:1, 2; 13:1-18; 19:11-21). Ye so aga nduru ti si awe. A yeke na lege ni so versê ti e ti ngu 2014 ayeke Matthieu 6:10 so atene: “Zia royaume ti mo aga.” A sara laso ngu 100 awe la Jésus ayeke komande na yayu.

15, 16. (a) Apendere ye wa ayeke si ande na ngoi ti Komandema ti Ngu Saki Oko ti Christ? (b) Tanga ti ye so Jésus ayeke sara ande tongana Gbia ti Royaume ayeke nyen? A bâ ye so Jéhovah aye ndali ti amolenge ti lo kue tongana nyen?

¹⁵ Tongana Gbia so Nzapa asoro lo afuti awato ti Nzapa awe, na pekoni lo yeke bi Satan na asioni yingo ti lo na yâ ti dû so alï mingi teti ngu saki oko (Apoc. 20:1-3). Teti so Satan ayeke sara ngangu na ndo ti azo mbeni pëpe, Royaume ti Nzapa ayeke sara ande ye hio ti mû maboko na azo ti bâ nzoni na lege ti ye so aga na peko ti ngere so Jésus afuta ti zi na azo. Nga Royaume ni ayeke zi ande azo biani biani na gbe ti aye so aga na peko ti siokpari ti Adam. Gbia ni ayeke zingo azo kutu mingi so akui nga lo yeke leke ti tene a fa tënë ti Jéhovah na ala na ndo ti sese kue (Apoc. 20:12, 13). Sese kue ayeke ga ande paradis tongana yaka ti Éden. Azo kue so ayeke be-ta-zo ayeke ga ande azo so alingbi kue.

¹⁶ Na peko ti Komandema ti Ngu Saki Oko ti Christ, a yeke hunzi ande ti sara ye so bê Jéhovah aye na sese. Na pekoni, Jésus ayeke kiri na Royaume ni na Babâ ti lo. (Diko 1 aCorinthien 15:24-28.) E yeke duti ande pëpe na bezoin ti tene mbeni zo asara songo na popo ti e na Jéhovah. Amolenge ti Nzapa kue so ayeke na yayu nga na sese ayeke duti ande beoko na Babâ ti ala tongana azo ti sewa ti lo so ayeke na yâ ti dunia.

17. Nyen la mo leke na bê ti mo ti ngbâ ti sara ndali ti Royaume?

¹⁷ Apendere ye so asi na yâ ti ngu 100 so Royaume ti Nzapa akomande afa na e so Jéhovah ayeke na ngangu na ndo ti dunia nga so ye so bê ti lo aye ndali ti sese ayeke ga ande tâ tënë. Zia e ngbâ lakue ti sara na lo be-ta-zo nga e ngbâ ti fa tënë ti Gbia ni na Royaume ti lo. E yeke na kite oko pëpe so na yâ ti kete ngoi Jéhovah ayeke kiri ande tënë na sambela ti e so e tene: “Zia royaume ti mo aga”!