1, 2. Yini uMbuso waNkulunkulu lotayifeza, futsi kungani singaciniseka kutsi uMbuso waNkulunkulu utawufika?

ENTSABENI leseceleni kwaseKhaphanawume entfwasahlobo yanga-31 C.E., Jesu Khristu wafundzisa balandzeli bakhe kutsi bathantaze batsi: “UMbuso wakho awute.” (Mat. 6:10) Bantfu labanyenti lamuhla bayangabata kutsi loMbuso uyawuke ufike. Nome kunjalo, siyaciniseka kutsi imithantazo yetfu lecotfo yekucela uMbuso waNkulunkulu kutsi ute itawuphendvulwa.

² Jehova utawusebentisa uMbuso kute ahlanganise umndeni wakhe losezulwini kanye nalosemhlabeni. Lenjongo yaNkulunkulu itawugcwaliseka. (Isa. 55:10, 11) Ecinisweni Jehova sewuvele uyiNkhosi esikhatsini setfu. Tintfo letijabulisako letenteke kuleminyaka lelikhulu leyengcile tibufakazi baloku. Nkulunkulu wenta imisebenti lemikhulu futsi lemangalisako ngenca yetigidzi tetikhonti takhe letetsembekile. (Zak. 14:9; Semb. 15:3) Nome kunjalo, kuba kwaJehova yiNkhosi akufani nekuta kweMbuso waNkulunkulu lowo Jesu lasifundzisa kutsi siwuthantazele. Letintfo letenteka tehluke njani futsi tisitsintsa njani tsine?

3. (a) Wabekwa nini Jesu kutsi abe yiNkhosi, futsi ubusa kuphi? (b) Ungakufakazela njani kutsi uMbuso wasungulwa nga-1914? (Fundza umbhalo longentasi.)

³ Eminyakeni lengu-20 ngaphambi kwekufika kwa-1900, tinceku  taNkulunkulu tacala kusicondza siphrofetho lesabhalwa nguDanyela eminyakeni lengetulu kwa-2 500 leyengcile, lesitsi: “Ngesikhatsi salawo makhosi, Nkulunkulu welizulu uyawumisa umbuso longasoze wabhujiswa lutfo.” (Dan. 2:44) Bafundzi BeliBhayibheli kwaphela emashumi eminyaka batsi umnyaka wanga-1914 utawuba ngulobaluleke kakhulu. Bantfu labanyenti ngalesosikhatsi bebanelitsemba laloko. Lomunye umbhali wadzimate watsi: “Nga-1914 bantfu emhlabeni wonkhe bebanelitsemba.” Nome kunjalo, kucala kweMphi Yelive Yekucala ngasekupheleni kwalowo mnyaka, kwagcwalisa siphrofetho seliBhayibheli. Kwalandzela indlala, kutamatama kwemhlaba kanye netifo letingumshaya bhuce kwaphindze kwagcwaliseka letinye tiphrofetho teliBhayibheli lebetifakazela kutsi Jesu Khristu ucale kuba yiNkhosi yeMbuso waNkulunkulu ezulwini nga-1914. * Ngekubeka iNdvodzana yakhe kutsi ibe yiNkhosi lenguMesiya, asingabati kutsi Jehova waba yiNkhosi ngalenye indlela.

4. Ngusiphi sinyatselo lesatsatfwa yiNkhosi ngekushesha, futsi yase inaka bobani?

⁴ Kwekucala lebekutawentiwa yiNkhosi lebeyisandza kubekwa, kulwa nesitsa lesikhulu saBabe wayo lesinguSathane. Jesu kanye netingelosi takhe bacosha Develi nemadimoni akhe ezulwini. Loku kwaletsa injabulo lenkhulu ezulwini kodvwa emhlabeni kwaba nemonakalo lobewungakaze ube khona. (Fundza Sembulo 12:7-9, 12.) Ngemuva kwaloko, leNkhosi yase inaka tikhonti tayo emhlabeni, yatihlunga, yatifundzisa yaphindze yatihlela kute tente intsandvo yaNkulunkulu. Asesicoce ngekutsi kukwemukela kwato loku lokutsatfu lokwentiwe kubusa kweMbuso kusibekela njani sibonelo lesihle lamuhla.

5. Ngukuphi kuhlanta lokwenteka emkhatsini wa-1914 nasekucaleni kwa-1919?

⁵ Ngemuva kwekutsi leNkhosi lebekiwe isuse umtselela lomubi waSathane nemadimoni akhe ezulwini, Jehova wacondzisa Jesu kutsi ayewuhlola aphindze ahlunge balandzeli bakhe emhlabeni. Umphrofethi Malakhi uchaza loku ngekutsi kuhlanta kwaNkulunkulu. (Mal. 3:1-3) Umlandvo uveta kutsi loko kwenteka emkhatsini wa-1914 nasekucaleni kwa-1919. * Kute sibe ngemalunga emndeni waJehova wendzawo yonkhe, kufanele sihlobe nobe sibe ngcwele. (1 Phet. 1:15, 16) Kufanele singangcoliswa yinkholo yemanga nobe yipolitiki yalapha emhlabeni.

6. Sikutfola njani kudla lokuvela kuNkulunkulu, futsi kungani kubalulekile?

⁶ Ngemuva kwaloko, Jesu wasebentisa ligunya lakhe lekubusa kute abeke ‘sisebenti lesetsembekile nalesihlakaniphile.’ Lesisebenti besitawuniketa bonkhe labakha ‘umhlambi munye’ waJesu kudla lokunemsoco lokuvela kuNkulunkulu. (Mat. 24:45-47; Joh. 10:16) Kusukela nga-1919, licembu lelincane lebazalwane labagcotjiwe belisolo liwenta ngekwetsembeka umsebenti lomkhulu wekondla ‘letinye tisebenti.’ Lokudla lokunyenti lesikutfola ngalabazalwane kuyasisita kutsi sikhule ekukholweni. Kucinisa kutimisela kwetfu kuhlala sihlantekile emoyeni, ngekutiphatsa, engcondvweni kanye nasemtimbeni. Lokudla lokuvela kuNkulunkulu kuphindze kusifundzise futsi kusisite kutsi siwente ngaso sonkhe sikhatsi umsebenti lobaluleke kakhulu lowentiwa emhlabeni lamuhla. Ukudla njalo yini lokudla?

7. Ngumuphi umsebenti lobalulekile Jesu lawucalisa ngalesikhatsi alamhlabeni, futsi bewutawuchubeka kudzimate kube ngunini?

⁷ Ngalesikhatsi Jesu acala umsebenti wekushumayela emhlabeni, watsi: “Nakulamanye emadolobha kufanele ngitishumayele letindzaba letimnandzi teMbuso waNkulunkulu, ngobe nguloko lengatfunyelwa kona.” (Luk. 4:43) Jesu wenta lomsebenti waba yintfo lebalulekile ekuphileni kwakhe, iminyaka  lemitsatfu nehhafu. Wayala bafundzi bakhe, watsi: “Njengobe nihamba, niboshumayela nitsi: ‘UMbuso welizulu sewusondzele.’” (Mat. 10:7) Ngemuva kwekuvuswa kwakhe ekufeni, Jesu wabiketela kutsi balandzeli bakhe bebatawusakata lomlayeto “nakuto tonkhe tincenye temhlaba.” (Imis. 1:8) Wabetsembisa kutsi abetawubasekela kulomsebenti lobalulekile kute kube sesikhatsini setfu.—Mat. 28:19, 20.

8. Yini iNkhosi leyayenta kute tikhonti tayo tasemhlabeni tishumayele?

⁸ Cishe nga-1919, lacala kuphakama lizinga lekushunyayelwa ‘kwetindzaba letimnandzi teMbuso.’ (Mat. 24:14) INkhosi beyibusa ezulwini, futsi yahlanganisa licembu lelincane letikhonti letihlantiwe emhlabeni. Ngekutimisela tenta loko Jesu latsi tibokwenta: Kushumayela emhlabeni wonkhe tindzaba letimnandzi teMbuso waNkulunkulu losunguliwe. (Imis. 10:42) Sibonelo saloko kutsi kwaba khona bamemeteli beMbuso lebebacishe babe ngu-20 000 emhlanganweni wetive eCedar Point, Ohio, eMelika, nga-September 1922. Asewuyibone ngeliso lengcondvo injabulo lebeyikhona lapho ngalesikhatsi uMzalwane Rutherford etfula inkhulumo lebeyinesihloko lesitsi “UMbuso,” ngemdlandla watsi: “Lamuhla ngilo lilanga, iNkhosi iyabusa! Nine nititfunywa tayo. Ngako-ke memetelani, memetelani, memetelani, iNkhosi nembuso wayo.” Bantfu labatinkhulungwane letimbili balalela ngekutsi babe khona ‘ngeLilanga Lensimi’ baya emitini, bahamba emamayela langu-45 (lokungemakhilomitha langu-72) kusuka endzaweni yemhlangano. Lomunye lowahlanganyela ekushumayeleni ngalelolanga watsi: “Angisoze ngisikhohlwe leso simemo sekumemetela uMbuso kanye nenshisekelo yabo bonkhe lebebakhona.” Nalabanye labanyenti bativa njengaye.

9, 10. (a) Ngumaphi emalungiselelo lentiwe kute kuceceshwe bamemeteli beMbuso? (b) Kukuzuzise njani wena lokuceceshwa?

⁹ Cishe nga-1922 bamemeteli beMbuso labangetulu kwa-17 000 bashumayela ngekutimisela emaveni langu-58 emhlabeni wonkhe. Nome kunjalo, bebadzinga kuceceshwa. Ngelikhulu lekucala lemnyaka iNkhosi Leyakhetfwa yaniketa bafundzi bayo ticondziso leticacile mayelana nekutsi kufanele bashumayele batsini, kuphi futsi kanjani. (Mat. 10:5-7; Luk. 9:1-6; 10:1-11) Alandzela leyo ndlela lamuhla, Jesu uyaciniseka kutsi bonkhe labenta umsebenti wekushumayela ngeMbuso batfola ticondziso kanye nemathuluzi labawadzingako kute bashumayele ngemphumelelo. (2 Thim. 3:17) Jesu ucecesha tikhonti takhe kutsi tishumayele asebentisa libandla lebuKhristu. Sikolwa Semsebenti WemaKhristu lesichutjwa emabandleni langetulu kwa-111 000 emhlabeni wonkhe, singulenye indlela laticecesha ngayo letikhonti. Ngekusebentisa ticondziso labatitfola kuso, bashumayeli labangetulu kwetigidzi letisikhombisa bakulungele kushumayela nekufundzisa ngendlela lekhangako “kubantfu bato tonkhe tinhlobo.”—Fundza 1 Khorinte 9:20-23.

¹⁰ Ngetulu kweSikolwa Semsebenti WemaKhristu, kusungulwe letinye tikolwa teliBhayibheli  kute kuceceshwe labadzala belibandla, emahlahlandlela, bazalwane labangakashadi, emaKhristu lashadene, emalunga eKomidi Yeligatja nebafati bawo, babonisi labajikeletako nebafati babo kanye netitfunywa telivangeli. * Labanye labaya eSikolweni Lesisekelwe EBhayibhelini SemaKhristu Lashadene bakhombisa kujabula kwabo ngalesikolwa batsi: “Lokuceceshwa lokukhetsekile lesikutfolile kujulise lutsandvo lwetfu ngaJehova futsi kusisite kakhulu kute sisite labanye.”

11. Bamemeteli beMbuso bakhone njani kucinisela ngisho nobe baphikiswa?

¹¹ NaSathane uyawunaka lomsebenti lomkhulu wekushamayela kanye nekufundzisa ngeMbuso. Usebentisa kuhlasela lokubonakalako kanye nalokunganakeki kulomlayeto weMbuso nakulabo labawentako kute etame kumisa lomsebenti. Kodvwa imetamo yalesitsa ayikaphumeleli. Jehova ubeke iNdvodzana yakhe ‘ngetulu kwabo bonkhe bohulumende, emagunya, emandla, nebukhosi.’ (Ef. 1:20-22) Njengobe ayiNkhosi, Jesu usebentisa ligunya lakhe kute avikele futsi acondzise bafundzi bakhe kute aciniseke kutsi intsandvo yaBabe wakhe iyenteka. * Tindzaba letimnandzi tiyashunyayelwa futsi tigidzigidzi tebantfu labatsandzako tifundziswa tindlela taJehova. Kusibusiso lesikhulu kuba nesandla kulomsebenti lomkhulu kangaka.

12. Shano lokunye kuhlela lokwentiwe enhlanganweni kusukela kwasungulwa uMbuso.

¹² Kusukela kwasungulwa uMbuso nga-1914, iNkhosi beyisolo ihlunga indlela tinceku taNkulunkulu letihlelwe ngayo kute tente intsandvo yaBabe wayo. (Fundza Isaya 60:17.) Nga-1919 umcondzisi wemsebenti wabekwa ebandleni ngalinye kute ahole emsebentini wekushumayela. Kushumayela emtini ngemuti lobekwentiwa njalo ngeliSontfo, kwahlelwa nga-1927. Basekeli beMbuso bakhutsateka kutsi bente umsebenti lomkhulu nga-1931 ngalesikhatsi batfola ligama lelisekelwe emBhalweni lelitsi BoFakazi BaJehova. (Isa. 43:10-12) Nga-1938 kukhetsa emadvodza lanemtfwalo wekunakekela libandla ngentsandvo yelinyenti, kwatsatselwa sikhundla kutsi akhetfwe ngekucondziswa yimiBhalo. Nga-1972, kwengamela libandla kwaniketwa sigungu salabadzala esikhundleni sekutsi umzalwane munye alengamele. Onkhe emdvodza labekawufanele lomsebenti akhutsatwa kutsi atfutfuke kute ‘eluse umhlambi waNkulunkulu lawuphatsisiwe.’ (1 Phet. 5:2) Nga-1976, Sigungu Lesibusako sahlelwa saba ngemakomidi lasitfupha kute sicondzise umsebenti weMbuso emhlabeni wonkhe. INkhosi lebekwe nguJehova ichubeka nekuhlela  tikhonti tayo teMbuso ngendlela lefunwa nguNkulunkulu kube kufanele.

13. Loko lokufezwe kubusa kweMbuso kuleminyaka lelikhulu, kukutsintse njani kuphila kwakho?

¹³ Cabanga ngaloko iNkhosi lenguMesiya lekufezile kuleminyaka yekucala lelikhulu yekubusa kwayo. Ihlante bantfu ngenca yelibito laJehova. Icondzise umsebenti wekushumayela tindzaba letimnandzi teMbuso emaveni langu-239 yaphindze yafundzisa tigidzigidzi tebantfu mayelana netindlela taJehova. Ihlanganise tikhonti letetsembekile letingetulu kwetigidzi letisikhombisa, ngamunye kuto utinikela ngekutitsandzela kute ente intsandvo yaBabe wakhe. (Hla. 110:3) Liciniso likutsi imisebenti Jehova layenta ngeMbuso wakhe lobuswa nguMesiya, mikhulu futsi iyamangalisa. Kusetakwenteka tintfo letimangalisa kakhulu.

14. (a) Nasithantaza sitsi: “UMbuso wakho awute,” sisuke sicela Nkulunkulu kutsi enteni? (b) Sitsini sihloko semnyaka sanga-2014, futsi kungani sifanele?

¹⁴ Nanobe Jehova abeka iNdvodzana yakhe lenguJesu Khristu kutsi ibe yiNkhosi nga-1914, loko bekusengakabi yimphendvulo yemithantazo wetfu lotsi: “UMbuso wakho awute.” (Mat. 6:10) Kwabiketelwa eBhayibhelini kutsi Jesu ‘utawubusa emkhatsini wetitsa takhe.’ (Hla. 110:2) Bohulumende bebantfu labalawulwa nguSathane solo bamelene neMbuso. Nasithantazela uMbuso waNkulunkulu kutsi ute, sisuke sicela Nkulunkulu kutsi iNkhosi lenguMesiya kanye nalababusa nayo bete batewucedza kubusa kwebantfu baphindze basuse baphikisi beMbuso labasemhlabeni. Lesento sitawugcwalisa emavi lakuDanyela 2:44 latsi uMbuso waNkulunkulu “uyawupitjita yonkhe leminye imibuso uyicedze.” Uyawubhubhisa bohulumende labatitsa taloMbuso. (Semb. 6:1, 2; 13:1-18; 19:11-21) Sesisedvute kakhulu sikhatsi sekutsi loko kwenteke. Kuyafaneleka-ke kutsi sihloko semnyaka sanga-2014, lokungumnyaka welikhulu wasungulwa uMbuso waNkulunkulu ezulwini, kube nguMatewu 6:10 lotsi: “UMbuso wakho awute.”

15, 16. (a) Ngutiphi tintfo letijabulisako letitakwenteka eKubuseni Kweminyaka Leyinkhulungwane? (b) Yini Jesu latawugcina ngayo kuyenta njengobe ayiNkhosi yeMbuso waNkulunkulu, futsi loko kutawusho kutsini ngenjongo yaJehova ngendalo yakhe yonkhe?

¹⁵ Ngemuva kwekuba iNkhosi lenguMesiya seyibhubhise titsa taNkulunkulu, itawujikijela Sathane nemadimoni akhe emgodzini longenamkhawulo iminyaka leyinkhulungwane. (Semb. 20:1-3) Njengobe atawube angasekho Sathane nemadimoni akhe, loMbuso utawutsatsa sinyatselo kute usite bantfu kutsi bazuze enhlawulweni yaJesu yesihlengo, futsi utayicedza imiphumela yesono sa-Adamu. LeNkhosi itawuvusa tigidzigidzi tebantfu labasemathuneni iphindze ihlele umsebenti lomkhulu wekutsi bafundziswe ngaJehova. (Semb. 20:12, 13) Umhlaba wonkhe utawuba lipharadisi ufane nensimi yase-Edeni. Sono sitawucedvwa kubo bonkhe bantfu labetsembekile.

¹⁶ Nakuphela iMinyaka Leyinkhulungwane Yekubusa KwaKhristu, uMbuso waNkulunkulu utawube sewuyifezile injongo yawo. Ngemuva kwaloko, Jesu utawubuyisela loMbuso kuBabe wakhe. (Fundza 1 Khorinte 15:24-28.) Ngeke siphindze sidzinge lotsite kutsi asimelele kuJehova. Onkhe emadvodzana aNkulunkulu ezulwini kanye nebantfwana bakhe emhlabeni, batawuba munye naBabe wabo wasezulwini njengencenye yemndeni wakhe wendzawo yonkhe.

17. Yini lotimisele kuyenta ngenca yeMbuso?

¹⁷ Letintfo letijabulisako letentekile ekubuseni kweMbuso losekutsatse iminyaka lelikhulu, tisicinisekisa ngekutsi Jehova nguye lolawulako futsi injongo yakhe ngemhlaba itawugcwaliseka. Shengatsi singachubeka sitikhonti letetsembekile futsi simemetele iNkhosi neMbuso wayo. Loko sikwenta sinelitsemba lelikhulu lekutsi masinyane Jehova utawuphendvula umthantazo wetfu locotfo lotsi: “UMbuso wakho awute.”